Wees fief Minuten still
2. Juni


Andacht vun Heinrich Giesen, in Platt bröcht vun Anke Nissen

Dorüm segg ik juuch dat rein herut: Nüms, de in Gott sienen Geist snacken deit, seggt: "Verflucht sall Jesus wesen!"
Un nüms kann seggen: "De Herr is Jesus!", wenn he dat nich in den Hillig Geist deit.

1. Korinther 12, 3, Platt na Johannes Jessen

Een kann veel över Jesus utseggen. He is en ganz Groten, he is en Lehrer, nüms kann sik mit em meten. Man vun sowat warrt in de Bibel nienich schreven. De Bibel seggt, dat he de Herr is. En Herr hett allens to seggen orrer gor nix. Wokeen Jesus as Herrn ansüht, hett sien Befehlsgewalt anerkannt un steiht in allens vull un ganz achter em. Man wi sünd ja Lüüd, de jümmers noch sülven Herren blieven wüllt, de Jesus sien Herrschaft blots to 'n Deel anerkennt. Wi kaamt jümmers geern to 't Ergeevnis, dat Christus överdrifft, dat he dit orrer dat doch nu würklich nich vun uns verlangen kann.

Ja, uns gesunnen Minschenverstand!

Graad dorüm stimmt de Text vun hüüt: Keeneen kann Jesum enen Herrn nömen, wenn he dat nich in den Hillig Geist deit. Also kann dat blots vun Gott sülven kamen. Dor mütt schon wat an uns passeern. Wi hebbt dat nich in uns Hannen, wenn 't sowiet kümmt, dat wi em unsen Herrn nöömt. Un dat warrt Tiet, dat dat passeert.

Wi mööt in faste Hannen.

O hillig Geist, o hillig Gott,
uns' Gloov doch jümmer wassen laat!
Dat wi an Christus gloven doot,
dat deit ja doch din Hülp, uns Gott.

Na Johannes Niedling


24.5.2009


na baven