Wees fief Minuten still
7. April


Andacht vun Heinrich Giesen, in Platt bröcht vun Marlou Lessing

Smeckt un warrt wies, wa fündlich de Herr is!

Psalm 34, 9

Gott hett mehr daan, as us en Wetenschap to överlaten un us gode Gedanken un Wiesheiten för't Leven un för de Ewigkeit mit op den Weg to geven. He hett us twoors sin Woort geven, un wi mööt nu tosehn, dat wi dat mit uns Bregen faat un mit kloren Vernimm begriepen doot, üm wat dat in sin Woort geiht. Avers Gotts Weg mit sin Woort na us geiht över sin lievhaftig Woort, över Jesus Christus sülven. "Smeckt un warrt wies" heet: So düütlich, so dicht is Gott in uns Welt kamen, dat wi em smecken un wieswarrn köönt. Dorüm gifft Gott sin Gemeen blangen de Predigt ok noch dat Sakrament, dat wi in de Teken, de Gott us in de Hand gifft, düüdlich seht un smeckt, wa good he dat mit us meent. Wenn wi meent, wi brukt dat Sakrament nich, denn fangt wi bilütten an, vun Gott as vun en Gottheit to snacken, to swarmen vun Erlösertum, man us nich sülven erlösen to laten; vun en groot Vadderhus to snacken, avers nich sülven dör de Döör to gahn.

Smeckt un warrt wies: Also nich en Mööglichkeit bloots in Gedankens, sünnern würklich vör oogen: Smeckt! Kiekt! So fründlich is Gott.

Mi armen Stackel hest du deckt den rieken Gnadendisch mit Broot, dat rein na Leven smeckt. Dat maakt mi heil un frisch.

Na Friedrich Spitta


6.4.2008


na baven