To Ewigkeitssünndag


 

Du lewe, lewe Fro!

Nie kann ick dat vergeten,
Nie let min Hart dat to,
War ick an die beseten,
An di, du lewe Fro!

Bi di als Husfro seten
Wi all an enen Disch,
Un du bröchst uns dat Eten
Dat schmeck' so schön, so frisch.

Möchst mi so gern beschenken
Un helpen mine Not,
Du könntst di 't alltied denken,
Wo fehlen dä dat Brot.

Du wollst et garnich hören,
Wenn man woll danken di:
"Lat mi man still gewehren,
Dat wör doch Pflicht von mi!"

Du wüsst' in swaren Bagen
Di redlich dörchtoflahn,
Du kennst keen bang' Verzagen,
Man blos: Mit Gott to gahn.

Dat kann ick nie vergeten,
Deckt ok de Eer di to,
Wat ick an die beseten,
Di lewe, lewe Fro!

Heinrich Eggersglüß

 

Schwieg still …

Schwieg still, mien Haart, schwieg still
mien Seel flücht över d' Woater licht
see weet nich wat see söken will
see käent nich Förm un nich Gesicht
see spöört dat mi wat fäälen deit
see sücht dat Lokk in mien Besinnen
in dat sükk aal mien Süchten dreit
so witt as unbeschrääven Linnen
see kummt eers trüch wenn see wat funnen
wat liek in mien Belääven passt
wiel see denn 'wiss dat ikk hevv wunnen
wiel verlüstich geit mien Olldachslast.

Ewald Eden

Hoffnung

Ein letzt drög Blatt an'n Rosentwieg,
Dei mäud an'n Tunpahl lähnt,
In Storm un Rägen sich up 't nieg
Nah warmen Sünn'schien sähnt.

Novembernäbel, natt un kolt,
Hett ganz ümsünst sich mäuht,
Denn an dit kahle Rosenholt
Ein letzt Ros' liekers bläuht.

Wat seggt uns disse Rosentwieg? —
Wenn 't schient: Alls is vörbi!
Bliwt doch in 'n Läben stets up 't Nieg
Ein Hoffnung noch in di,

Dei Kraft di giwt för bäd're Tiet,
Di nich verlaten ward,
Dei tau di höllt, di steiht tau Siet,
Denn sei wahnt in dien Hart!

Helmut Hillmann

 

Oprichten

Stiefbeent
steltzt de Brüch
dwars över de Elv,
wo ik ünnerweg
mit de Pandemie
in dat lecke Boot
sitten do.
Wi dümpelt dor
man eben so lang
ünner den Qualm
vun de Schippswarften
ünner den Larm
vun de Vörslaghamers.
Wat Steen un Stahl is
mutt Slag üm Slag
smiedig warrn.
Bit an' End
Talglichten dor sünd,
de uns lüchten doot,
dat wi uns oprichten köönt
ut Fallgruben un Graffsteden,
de uns de Tied un de Dood
Hand in Hand
schüffelt hebbt.
Un wenn ik mien Boot
jichenswann
un jichenswo
anlanden kann,
denn gah ik los
un stell Andrag
op een tweet
Leven.

Cord Denker


21.11.2019


na baven