WäschepuffWäschepuff

vun Anke Nissen


Mien Mudder harr enen "Wäschepuff", jüst so as miene Tanten un mien Oma. He stünn in de Schlaapstuuv. He höör — so dücht mi — in de dormalige Tiet to dat normale Utstatten vun en Schlaapkamer. He sehg meist recht hübsch ut, un wi Kinner kunnen uns goot in em verkrupen, tominst so lang, as wi noch lütt noog weern.Waschdag fröher

De "Wäschepuff" vun mien Mudder weer en rechteckig' Korf. Sien Deckel weer mit en Oort Kissen polstert, dor kunn een goot up sitten. Sien Upgaav weer, dat wi all tohoop uns' schietig Wäsch dor rin smeten. Weer de Puff vull, müß de Waschfru kamen — in uns Fall weer dat Fru Staak.

So woor fröher wuschen

Hüüt, in de Tiet vun de Waschmaschinen, kümmt dat ja gor nich dor up an, wo oft wi uns Büx wesseln doot, wo oft wi en frisch Hemd antreckt. Allens kümmt in de Waschmaschin, dorna in de Maschin to'n Drögen, un an'n annern Dag kann't al wedder antrocken warrn. — Man dormals weer een mit dat Antrecken vun frisch Tüüg nich so gau. Wi wesseln eerst denn, wenn allens richtig schietig weer.

Wäsche-Romantik in de "gode" ole TiedDat duur ja ok jümmers en bannig lang Tiet, bet allens wedder rein in'n Schapp leeg; Fru Staak keem blots alle veer Weken. Denn stünn se aver ok den helen Dag an de dreebeenig Waschbalje, duuk mit ehre barten Arms bet an'n Ellenbogen in hitt Sepenwater un schrubb up dat Rubbelbrett uns Büxen un Hemden rein. Later ok de Dischwäsch, de Lakens und Handdöker.

Fru Staak keem mi jümmers en beten vör as Fru Holle. För mi harr se en fründlich "Fru-Holle-Gesicht". Blots dat ehr Gesicht nich mit witte Snee-Feddern ümgeven weer, nee, dit Gesicht swömm in hitten, hellen Waterdamp.

Un wenn se avends trecht weer mit't Waschen, denn reep se: "Tschüß alltohoop! Un smiet nich to veel Tüüg in den Wäschepuff!"


30.3.2008


na baven