En Angeliter vertellt:
Wat'n Vergnögen

Vun Helmut Marxen

Wintertiet is de Tiet för grote Feste un Fiern. Överall hangen Plakaaten mit Anseggen för Füerwehrball, Schützenfest, Vereens- un Dörpsvergnögen. Kannst binah nich allns beschickt kriegen, wenn du hier un dor mitmaken müchst. Jüst hett de Büx vun dien beste Kledaasch noch'n Strich mit dat Plättiesen kregen, na dat du vun de letzte Ball in Schietwedder an de Kaat keemst, dor mutt denn ok al to dat nächste Fest rüstet warrn.

För uns Mannslüüd geiht dat jo noch: Schlips un Kraag wesseln, frische Snuuvdook insteken un fardig. Aver de Frunslüüd! Dit Kleed weer'n se al öfters mit ut, dat annere harrn se al annerjohrs in opfulln, wiel dat doch ut de Mood weer. De beste Rock hett nich mehr de rechte Längde. Dat heet, de Längde hett sik jo nix an ännert, woso ok, aver de Mood. För'n annere Rock is keen passende Bluus in't Schapp. De dor wull angahn kunn, de is al öfters to Kaffeeklatsch utföhrt wurrn. Akraat de Frunslüüd vun de Kaffeerunn weern wiss ok bi de nächste Ball dorbi. Wat'n Mallöör!

Danzen — so orrer so

Denn mutt jo ok eerst noch de Prüük opmöbelt warrn. So'n Barbeertermin duurt mitünner länger as dat ganze Fest, för dat de Mars nödig is. De junge Welt is sodennig hüüt jo wat anners instellt, dat gellt ok bi de Kledaasch. Wokeen "in" is, de geiht opleevst in däägliche Klamotten to Fete. Wenn't angahn kann, warrn sogor ut Protest kaputte Jack un Büx gegen unse heele Welt insett. Na denn…

Af un an mutt man bi so'n Ball mitmischen, ok wenn dat anseggte Vergnögen bi de Enn allns annere as en Vergnögen warrn schull. Jungedi, wat hett sik dat allns ännert. In junge Johrn kunnst de Tiet nich aftöven, wenn so'n Schwoof anseggt weer. To Foot un op Rad weern wi sünnavends ünnerwegs, wenn dat to so'n Ringelpiez gung. Keen lütte Dörpskroog in Umkreis vun veer, fief Kilometer wurr utlaten, överall weer unse Anloopstell för'n fixe Danz op de Dääl.

En deegte Blasmusik. Bild: Wikimedia Commons

Flotte Musik geev dat dor ok. Nix vun Superdisko, dat de Wänne wackeln un du nich verstahn kannst, wat dien Naver di in't Ohr bölken deit. Wi harrn handmakte Musik mit Vigelien un Klaveer, Treckfiedel un Trumpeet — dat recke. Dorto en Bruuswater för achtig Penn, denn harrn wi för de dore Avend utsorgt. Bi Wind un Wedder gung dat denn achteran nachts torüch an'e Kaat. Aver ok dorbi weer noch Tiet un Luun för un bringen so'n lütte smucke Deern an de Huusdöör, ok wenn ehr Tohuus mitünner wat wiet ut de Kehr weer.

Bild: Cuchullain/Wikimedia Commons

Denn eerst de grote Bälle bi uns in't Dörp mit Turnerball un Maskeraad oder dat Kappenfest vun de Humor-Vereen. Överall wurr düchtig scherbelt, bi jede Fest weer de Saal knüppeldick vull. Wat hem sik de Lüüd afmarst mit dat Verkleeden to so'n Prämien-Maskeraad. Poor Weken vörher weer ut oole Plünnen, ut Mudders kaputte Dischdeck un ut ramponeerte Slupen dat beste Maskenballverkleden togang kaam.

Hett sik wohrhaftig veel ännert. Aver wenn ik de Radaumusik, bi de hüüt keen Minsch noch poor Wöör snacken kann, mit domalige Tiet vergliek, denn weer mi so'n lütte Danzkapell mit Musik in Handarbeit mitünner doch wat lever. Villicht weer'n de Fieravend-Muskanten nich half so düchtig as mi dat hüüt vörkümmt. Nich half so luut weern se ganz bestimmt, dor verlaat di to.