Op ole Weeg un Brüchen:
Ole Tramünner Landstraat

vun Antje Heßler


Se köönt de Fotos per Klick vergröttern. Trüch kaamt Se denn mit den Zurück-Knoop op de Browser-Symboolliest.


So seht de Verkehrsadern vun fröher ut

Annerletzt sünd wi wedder mal dörch den Waldhusener Forst föhrt. Dat schöne Weder harr uns rutlockt. An de Krüüzung meern in Woold sind wi na Tiefensee un denn in Richt vun Tramünn föhrt. Dor leet uns en Peerschuppen anhollen. Smucke Peer keken över dat Gatter vun den Hoff un spitzen de Ohr'n. So'n Peer kenn ik vun mien Onkel, "Kaltblüter" nenn he düsse Oort.


De twee Bambusen links heet Max un Moritz

An den Peerschuppen weer en Schild mit de Johrstall 2007 anbröcht. Wi harrn den Schuppen vörher noch nich sehn. Weern wi so lang nich mehr över Tiefensee na Tramünn föhrt? Dormals hebbt wi na en Hünengraff, en Langbett, söcht. Hebbt dat ok funnen. Leider is dat intüünt un wi harrn över Stickeldraht un en Gatter klattern müss. So hebbt wi blots dat Schild sehn.

Meist gegenöver vun den Peerschuppen weer an den Stratenrand en oolt Stratenschild anbröcht: Alte Travemünder Landstraße. Dat is uns domaals ok al upfullen. Aver wi sünd de Saak nich wieder nahgahn. Nu wulln wi aver weten, wo de Straat anfangt un wo se ennen deit. Hüüt wer dat al to laat. Aver seker geev dat nochmaal so'n schönen Dag.


Dat Hünengraff: Langbetten ut de Steentied, 3700 v.Chr. — so oolt is de Straat noch nich

Nu weer dat sowiet. De Sünn prahl richtig. De Heven weer düsterblaag un ahn Wulken. Dat weer en Dag to'n fotografeern! Dütmal föhrn wi aver över Warnsdörp. Wi wullen kieken, up de Storch up sien Nest seet. De weer aver utflagen.


Klick up to'n Vergröttern!

Glieks na Krüüzkamp funnen wi den Wegwieser "Alte Travemünder Landstraße". Düt weer vör Tieden en Stück vun den Weg vun Lübeck na Tramünn west, as sik de "Straat", dormalen bloots en Sandweg, dör Woold un rore Dörpen slängelt harr. Meist vun Bad Schwartau an bit Tramünn kannst em up de Koort noch erkennen. Solk Straten füngen ehr Leven as Trampelpadden an, se woorn nich an'n Grönen Disch plaant as de Straten vun hüüt. Lübeck is över 1200 Johr oolt, Tramünn över 800, un so oolt mag ok düsse Straat sien.

Dat güng dull bargan an den Beutzer Woold vörbi. Denn keem wedder de smucke Peerstall. Dor hebbt wi nochmal anhollen. Över Tiefensee güng dat dütmaal aver wieder up de ole Tramünner Landstraat graadut in Richt vun Sereetz.

Dichtet Buschwark, lütte Watertümpel un grote ole Bööm sümen unsen Weg. De Februarsünn schien up enen Woold un farv de Bööm golden. Dat weer meist as in en Märken. Ganz langsam sind wi wieder föhrt. Un immer wedder hebbt wi Peer sehn.


Fodertied!


Stratenverhältnisse as in histoorsche Tieden

In Sielbeek heff ik uns Auto eerstmal an de Kant stellt. De Peer wöörn jüüst fodert. Gau bin ik utstegen. Mi steeg glieks de Ruuch vun Heu un Peer in de Nääs. De Peer dampen un leten sik dat goot smecken.En lütte Muusch keem vun de Wisch. Se schnurr un striek üm mine Been. Ik weer wi vertövert.

Ut den Stall kemen dree junge Deerns in Riederdress up mi to. "Wat is dat hier schöön!" Ik müss dat eenfach los warrn. Dor fraag mi de een: "Warrn Sie denn schon auf dem Hohenlied?" Ik schüttel mienen Kopp. Wi sull'n wi dorhin kamen. "Fahren Sie mit dem Auto die Straße in den Wald. Das ist nicht weit. Dann machen Sie schöne Bilder!", meen se un wies up mienen Fotoapparat.

Dat harrn wi aver lever blieven laten sullt. En lütt Stück sind wi föhrt. Aver denn weer de Weg so matschig. Ik heff uns Auto dreiht un bin lever wedder trüch föhrt. Dor bün ik eerst wies woorn, dat an den Ingang vun den Weg en Sparrschild stünn.

Dat weer allens nochmal goot gahn. Glücklich sünd wi wedder to Huus ankamen.


Tschüß!, seggt Max un Moritz



na baven