Ik mutt mol ...

vun Silke Frakstein

... no Tante Meier, orrer op'n Pott.
Egol, wenn du nich to Huus büst, wat passeert denn?

Dat Problem is uroolt. Ok in uns so ach moderne Welt. Hett sik nix ännert. Bloots freuher hebbt sik de Lüüd dor nich so veel Gedanken mookt. De Mannslüüd harrn un hebbt dat jümmers licht mit "de Verrichtung".

An den französischen Hof to'n Bispill hebbt de Mannslüüd achtern Vorhang pinkelt un de Froonslüüd mit ehre lange Kleedoosch un den Reifrock dorünner, schwupp di wupp, — ok achtern Vorhang.

Ik heff en ole Unnerbüx, so an de 120 Johr olt. De is in de Mitt open un denn güng dat ünnerwegens, orrer bi de Feldarbeit, ok eenfach.

Ik bün en Fan vun histoorsche Romane so 12. bit 16. Johrhunnert. In enen groten Deel in düsse Romane warrt veel vun de "Hygiene" vertellt. Ober dat hangt mehrstendeels mit dat Wort "Gestank" tosomen. Ik denk dor an dat Book "Dat Parfüm".

Ober nu in dat 21. Johrhunnert is dat allens anners? To Huus villicht! In'n Schrebergoorn hebbt se dat Plumpsklo un in so'n Wohnmobil is dat de Chemie-Toilette. Un bi en "Event" de Toilettenwogen.
Doch so bilütten mook ik mi Gedanken.

Op'n Speelplatz, so an de 30 Kinner mit Anhang. Keen Toilettenwogen orrer Plumpsklo, keen Chemie-Toilette. Wat passeert dor???
Een Henwies: Die nächste Toilette befindet sich im Lokal… in 600 m.
Wenn dat Lütts's seggt: "Mama, ich muss mal", denn ober ok zack, zack un nich erst in 600 m! Oder: Osterfüer, Picknick in'n Sommer an'n Elvstrand. WC??? Reeperbohn Festival mit veel Beer un veele Toiletten. Ober de Mannslüüd hebbt ehren egen Kopp, seggt de Veranstalter.

Un nu, no Corona? De jungen Lüüd mööt ehren Frust etc. los warrn. Kann ik ok verstohn. Ober mutt man mit 4000 Lüüd in'n Stadtpark fiern un sien "Bedürfnis" bi de Anwohner in'n Goorn setten?

Wat würklich wichtig is un fehlt, an alle Ecken — dat sünd Öffentliche WCs. Un bi de Benutzung Rücksicht un Gedanken an den nächsten Benutzer.

In de Franzosentiet geev dat all "Tante Meier". Dat kümmt nämlich ut dat Franzöösche! Un twoors so:
Tente Amenager = Tente, dat Telt, mit de "Vörrichtung für de Verrichtung", also dat lütte Extra dorünner, den Emmer etc. — Mit Napoleon kemen even so'n paar nüttliche Saken. Un dat dat nich bi en "Tente", en Telt, bleven is, dat bleev denn bloots de Vernunft vun de Noorddüütschen överlaten.

Also, allens ganz eenfach!