Twee Opas — twee Welten

vun Meike Balzer-Fraun


Ik harr twee wunnerbore Opas.

Opa Heini is in Vegesack an de Werser opwussen. In en lütt Huus mit en Plumpsklo achtern in'n Grööntüüchgoorn. He kunn goot reken, dorüm gung he na sien Konfermatschoon in sien nie'n Antog mit Schlips un Kragen op't Kontor vun'n Bremer Vulkan. He harr op de Warft en Lehrstell as Koopmann.

In den Eersten Weltkrieg wöör Heini versehrt, un wiel de Warft ok kriegswichtig weer, kunn he bald wedder torüch in sien Kontor.
Na den Krieg free Heini sien Anna. Se weer Pättersche bi en vun de Direkters vun'n Vulkan. Opa köff Anna ehr Öllernhuus in Hammersbeck mit den bannig groden Goorn. Se harrn dree Kinner. Anna weer nu Huusfru un Goornersche un Opa leep wedder na Vegesack op't Kontor bi'n Vulkan. Oma ehr Süster Lilly bleev in't Huus.

Heini sien Jung un Bernhard sien öllste Dochter freen: se weren miene Öllern un wi wahnen in Opa Heini sien Huus. Dor harr Oma Anna dat seggen. Opa harr to Huus nix to doon un nich veel to vermellen. Bi Schietwedder leep he nich mehr. Denn keem en Fohrer vun'n Vulkan in en swattet Auto un haal em af.

Opa Heini weer en sünndaags Opa: vörmiddaags nehm he mi mit na'n Kroog to sien Fröhschoppen, namiddaags maken wi Utflöög mit sien VW Käfer. He harr woll en Föhrerschien, man mien Papa weer de Fohrer. Oma, Mama, Tante Lilly seten achtern, mien lütt Süster un ik ganz achtern in den Kofferruum. Meist güng dat mit de Fähr to en Sommergoorn oder Kroog güntsiet.

Eerst en beten lopen un denn Appelkoken mit Slackermaschü oder Fürst-Pückler-Ies, Swattbrot mit rökert Swiensmors, Smuttaal oder Buernfröhstück — jichtenswat snutenleckert geev dat jümmers.

Mit mien nie'n Pucky-Roller kunn ik Opa besöken.
Dat Kontor in't böverste Stockwark harr ja so gor nix vun'n Koopmannsladen. Allens düster blanket Holt, grode Schippsbiller, Opa sien smucke dree Damen achter ehr Schrievmaschienen un Opa achter sien massigen Schrievdisch mit dat swatte Telefon. Wat harr dat mit Koopmann, Schippbo un Arbeit to doon?

Opa Heini kenn ik blots in sien Antog, faken mit Mantel un Hoot oder in sien wittet langet Linnennachthemd.

He weer fründlich und spendabel, harr jümmers en poor Groschens in de Tasch.

To Huus seet he in'n Goorn oder in de Stuuv un smöök sien Zigarr.

 

 

 

 

15 km nördlich vun Vegesack is Opa Bernhard in Rönnebeck an de Werser opwussen. In en lütt Huus mit en Plumpsklo achtern in'n Grööntüüchgoorn. Na sien Konfermatschoon kreeg he en Seemannskist för sien Kledaasch un Warktüüch un en Hängematt. Sien Vadder nehm em mit up enen vun de olen Windjammers. He schall dor ok Schippstimmermann lehrn, wiel dat in sien Familje so Traditschoon weer. As de Eerste Weltkrieg anfung weer Opa Bernhard op sien Schipp jüst in Las Palmas un wöör dor interniert. Wieldat he so'n jungen Keerl weer, muss he de Kinner vun en rieke Familje oppassen. He överlegg eernsthaftig op dat Eiland to blieven, as de Krieg vörbi weer.

Man Bernhard keem trüch un free sien Henny. Se weer in Deensten op en groden Buernhoff. Se wahnten mit Anna ehr Mama in de ehr Huus in Farge mit den bannig groden Grööntüüchgoorn. Se harrn dree Kinner. Henny weer nu Huusfru un Goornersche, un Opa weer Schipper bi'n Norddeutschen Lloyd in Bremen in'n Haven. He sleep faken in sien Koje an Boord un weer nich veel to Huus. In den Tweten Weltkrieg wöör Opa sien Schipp versenkt, un he weer nu ahn Lohn.

Arbeit harr he aver massig in sien Swiegermudder ehr Huus un Goorn mit dat Swien, de Höhner un Göös. Se verköfften Eier un Grööntüüch, man dat Geld weer knapp, un Opa harr bi sien Swiegermudder nich veel to vermellen.

In Farge weer ik to un to geern to Besöök. Dat duerte nich lang, dor geev dat ok för Bernhard Arbeit op'n Vulkan. He fohr jümmers mit't Rad un sien Hund na'n Vulkan hen. Wenn he Nachtschicht harr muss ik liesen sien.

Opa Bernhard un Oma Henny weern alldaags Grootöllern. Opa harr sien ole Hängematt parat wenn ik keem, un mien Fohrrad weer blank un heel wenn ik na Huus muss. Oma kaak Suerkruut mit Ananas un ik kreeg Vanilljepudding mit de eersten Eerdberen, rode Grütt un veel vun Opa sien Zuckerbroot to'n Instippen in mien Muckefuck.

In Farge höör ik ok faken wat vun de Schipperspraak: Ran anne Back! Kloor Schipp maken. Rin inne Koje.

Ok Opa Bernhard kunn ik mit mienn Roller besöken.
Sien Arbeit op'n Vulkan verstunn ik opsteeds. He harr en lütt Stuuv op en lütten Toorn achter en hogen Tuun. Ünnen weer de Hunnenhütt. Sien komodige Stuuv harr Fenstern na alle Sieden un en Bolleraven to'n Kaffekoken un Middageten opwarmen, en Stohl un en Disch för den Kaffepot un de Piep. Opa muss oppassen, dat de Fohrrööd vun all de Vulkanesen nich toschannen kemen. So veel Fohrrööd harr ik noch nie nich sehn, so wiet kunn ik gor nich tellen. Wat'n Arbeit!

Opa Bernhard droog sien Antog bi Ooroma ehr Gräffnis un mien Konfermatschoon. Sünst blots Arbeitstüüch un Schippermütz. He weer fründlich un fix un harr jümmers dat richtige Warktüüch in sien groden Schuppen, wenn jichtenswat twei weer. Männigmal sett he in'n Goorn oder in de Köök un smöök sien Piep, man meist harr he wat to doon.

Ik harr twee wunnerbore Opas.

Wat dat woll mal swore Fragen twüschen de Familjen vun den "kaufmännischen Prokuristen" un den "Wachmann" geev?
Miene Kinnerwelt weer in't Loot.

Fragen kann ik nu nüms mehr, ik bün de Öllste vun de beiden Familjen.


24.4.2022

 


na baven