Logo "Wunnerwarken in Mäkelborg"Wunnerwarken in Mäkelborg, Deel 38:

Beseuk an Havel und Elde

vun Hans Jürgen Grebin


Wi niegierigen Rentners wiern mit unsen Reiseklub "55Plus" schon an männich Quellen von dei europäisch' Flüss. Natürlich anne Elw, in dat tschechische Riesengebirge, anne Warnow, bi dat mäkelbörgsche Grebbin, inn Mai 2014, anne Havelquell bi Ankershagen un taun Enn ook an denn Näbenfluss vonne Elw, an dei mäkelbörgsche Elde, bi Darze.


Wi niegierige Senioren bi dei Eldequell'

An dei Havelquell'

Wer in dissen Öller kann woll von sick segg' n: Ick hew all vääle Quellen besöcht, un dat nich bloots in Düütschland, nee, ook in't Uutland? — Nu fählen uns bloots noch dei Quellen von dei Elde, dei Peene, dei Recknitz, dei Stepenitz un noch poor annere in uns Murrerland MV. Wi hebb'n je noch poor Johr Tied, dat tau erläwen!


Al up dei Koort süht ein dei wunnerschöne Seenkeed.
In dei Natuur süht dei noch väl schöner ut!


Dei Verfater an den Havel-Denkstein

Üm tau dei Quell von dei Havel tau gelangen, führten wi na Ankershagen. Ein Dörp, dat dörch den Entdecker von Troja weltbekannt worrn is, dörch Heinrich Schliemann. Eigentlich harr vör Johrhunderten dei Havel kein Quell, sünders wüür dörch einen See spiest, den Bornsee, bi den Uurt Bornhof, nich wiet von Ankershagen wech. Noch inn 13. un 14. Johrhunnert kaem dat Waarer von hier dörch anner Dieks in den Mühlensee.


Ja, wi harrn Spaaß!

Hier wüür ein Damm anlecht, üm ein Waarermoehl bedrieben tau koenen. Dörch ein Ruhr is intwüschen ein Verbinnung mit den Mühlensee herstellt worrn un so koenen wi hüdigen Daachs ein schöne infaate Havelquell erläben. Oewer dissen Damm twüschen Mühlensee un dat Feuchtgebiet Dickenbruch, up'n Wech von Ankershagen na Ulrichshof, verlöppt dei Waarerscheid twüschen Nord- un Ostsee.


Up Platt gäw dat dit Schild noch nich

Dat Quellwaarer von dei Havel flött denn dörch wiedere Quellseen in dei Elw, tauletzt dörch einen Kanal twüschen Havelberg un Gnevsdorf/Abbendorf.


För den Havel-Radwech mutt'n noch wat fitter sien as wi. Wi nähmen den Bus!

Dortwüschen sünd in dei letzten Johrteihnte Sparrwarks buut worrn, üm den Ünnerscheid in dei Hööchde von 2 Meter twüschen Elw un Havel uuttauglieken, dei bi Hochwaarer ümmer tau Oewerschwemmungen in dat Havelgebiet führt harrn.


All dei Jahresringler geven dei Havel dei Iehr

För uns Johresringler hett dei Beseuk an dei Havelquell einen lustigen Awschluss, wenn dorbi ook einer bäten natt worden is. Dei sei hierher alle herbröcht hett, wüür oewermäudich un will up dei anner Sied von dei Quell' tau sien Fru roewer. Üm Tied tau spooren, güng hei mit einen groten Schritt oewer denn Rand von dei Quellinfatung, dorbi dacht hei nich an dei greunen Algen und "Plautz!" rutscht hei siedwärts rin in dei Quell. "Wer den Schaden hett, bruukt för den Spott nich tau sorgen!", so heit ein oll ' Rimel. So gescheiht dat ook, all "freuden" sick oewer dat Missgeschick, sünd over nahstens doch all besorcht üm ehren Vörsitter un wüllen em helpen.

Dei Eldequell' bi Darze

As bi dei Havel is dei Quelluurt nich ümmer licht tau finnen. So ook bi dei Elde. Na niehsten Ünnerseuken sall dei Eldequell' bi Darze in dei Gemeinde Altenhof, söss km südöstlich von'n Plauer See liggen. Dei iersten 600 m ünner ein Feld sünd verruhrt. An dat Dageslicht kümmt dei Elde denn rund 400 m westlich von Darze in ein Geländehööch von 90 m ü. NHN.


Hier kümmt dei Elde ut den Hügel...


... un flütt rut in dei Welt


Dei fründliche, hülpsrieke Armin Reimer

Uns Bus höllt gegen Klock Nägen in Darze. Näben uns kümmt ein Auto tau stahn un dei Fohrer nümmt uns ganz fründlich tau Kenntnis, up uns Fragen parat. Ass ick em na dei Elde-Quell' fraach, kümmt "as uut dei Pistol schaten" von em dei Antwuurd: "Dei Elde-Quell ' iss up mien Koppel, ick bün dei Schäper un warr Sei dorhen führn. Kamen S' man mit den Bus hinnerher, ick führ vörwech!"

Poor hunnert Meter hinnern Uurt höllt hei an un maakt uns sien Koppelduur apen, giwwt noch schnell eine Antwuurd up ein von mien Fraach, lacht un verschwindt. Ick harr em secht, hei mücht doch dei Quell an disse Stell för dei Beseukers sichtbor maaken.

Dei Elde is mit 208 km dei längste Fluss in M-V, licht in'n Süden un Südwesten von uns Bundsland un verbindt dat Gebiet üm dei Müritz mit dei Elw. Dei gröttst Deil (183,8 km) is schiffbor un warrd as Müritz-Elde-Waarerstraat beteikend. Ümmer wenn wi oewer dei Autobahn uns Bundsland in Richt Berlin verlaten, queren wi dei Elw as letzt Waarerstraat; doch hier is sei noch nich schippbor.


Tschüß, seggen dei Senioren



25.1.2022


na baven