De Lücht vun Tramünn
De Nachtwächter vertellt

vun Burkhard Wunder


Oftins warrt noch hüdigendaags de Fischer meern in de Nacht an't Brodtener Över en Lücht wies. De Lücht danzt up un daal un is meist so groot as en Schoosterkugel. Ümmer wedder springt de Lücht so wat bi'n halven Meter över de Eer up un daal un hin un her un kümmt so langsam na Tramünn.

Up de Strandpromenaad vör dat Casino blifft de Lücht verwunnert stahn. Springt denn mang de Fontainen vun den Springborn, lacht un hüppt hin un her. Vergnöögt danzt se wieder na de Noordermool un besöcht dor den lütten Lüchttorm an de Spitz vun de Mool.

Eenige Male ümkreist se em, springt ok mal vun Steen to Steen un övert Water. Dat seht aver de Lotsen nich geern. De Lücht bringt de hele Schippfohrt dörcheenanner. Se hebbt de Lücht vun dor na den olen Lüchttorm verjaagd. Dor danzt se denn wedder vergnöögt up un daal.

De Minschen, de dat wies warrt, blievt stahn un wunnerwarkt, wi de Lücht kort dorna an den Lüchttorm hochkladdert. Vergnöögt hüppt se över dat Gelänner un hoppst rundüm. Vun överall harr se dor baven en wunnerbor Utsicht up Tramünn.

Dorna kladder se gau wedder hindaal un danzt wieder de Vörreeg lang bit na de ole Vogtei. Böög denn na rechts un stünn kort dorna vör de St. Lorenzkark. Dörch en lütt Lock in de Preesterpurt witsch se in de Kark un lüch dor noch bit meern in de Nacht.


De ole Vogtei


De Preesterpurt

Alle Lüüd, de bit hüüt de Lücht achterna güngen, vertellen, dat se mit de Höölp vun de "Lücht vun Tramünn" dat wedder funnen harrn, wat för se al weg weer. Vele güng up den Weg achter de Lücht en Licht up!

Dat gifft aver ok Lüüd, de meent, dat de Tramünner Fischer af un an up de Hermannshöhe to lang un to deep in't Glas keken hebbt. De Fruuns kemen denn mit de Lücht un lüchen de Mannslüüd na Huus. Up dat wull goot güng?

Seker is up alle Fäll, dat man de Tramünner Lücht ok hüüt noch sehn kann. So as de "Lücht vun Tramünn" de Scheep den rechten Weg wiest, so kaamt all up den rechten Weg wedder na Huus.

En Wunsch för dat neegst Johr:
Mit Höölp vun de Lücht köönt de Tramünner un ok anner Lüüd in dat Johr 2012 den rechten Weg finnen!


In't Plattdüütsche överdragen vun Antje Heßler
Fotos: A. Heßler
31.12.2011


na baven