Op ole Weeg un Brüchen:
Över düsse Brüchen müss du gahn — wenn du na Löhrsdörp wullt

vun Antje Heßler


Se köönt de Fotos per Klick vergröttern.
Trüch kaamt Se denn mit den Zurück-Knoop op de Browser-Symboolliest.

As wi de ole Feldsteenbrüch vun Sütel vör twee Johr'n funnen un ankeken harrn, müssen wi an dat Goot Löhrsdörp vörbi. To'n Ankieken vun dat Goot langte uns Tiet nich mehr. Dat wöör nu nahaalt! Dat Goot Löhrsdörp mit de Steenbrüchen wull ik partu bekieken. Dor leep doch de Goddersdörper Au vörbi, un över de Au güng ok de ole Feldsteenbrüch in Sütel.

De Gootshoff leeg up en Insel, weer mit enen Watergraven ümgeven. De Goddersdörper Au lever dat Water för den Watergraven üm den Hoff. Man müss ümmer över so ene Steenbrüch, üm up de Hoffinsel to kamen.

De weern anners buut as de olen Feldsteenbrüchen. Weern en godes Bispeel för Steenbrüchen in dat 18. un 19. Johrhunnert. De Granitsteen weern beter bearbeit. De Brüchen weern breder. Dor kunnen twee Peerwagen aneenanner vörbikamen.


De Brüch na't Gootshuus, baven: vun de Siet, hier: mit Schott


Staustoop

De eerst Brüch güng över de Goddersdörper Au. Sehg meist ut, as wenn se de up dat Fundament vun en öllere Brüch buut harrn. Weer ok en Brüch ut Feldsteen. De Steen weern aver bearbeit un harrn en glatte Böversiet. Man kunn sehn, dat se nich so oold weern.

Wieldat de Brüch över de Goddersdörper Au leep, harrn se ünner de Brüch en Wehr buut. Dat weer wichtig, wenn de Au mal Hochwater föhr.


In dat Brüchenrickels ...


...is de Johrstall 1949 mit dat Monogramm vun den dormaligen Gootsbesitter inlaten


De twete Brüch is ja noch schöner!


De twete Brüch vun de anner Siet

Glieks dorachter keem de tweete Brüch na den Gootshoff. Dat weer en smucke Tweebagenbrüch ut Feldsteen. Vun dor kunnen wi dat Gootshuus un welk vun de annern Gootshüser sehn. Besünners upfallen dä de veerkantige Peerstall mit de Klock.


De Klock up den Peerstall


De Gootshoff up de lütte Insel ...


...dor lett sik dat utholln!


Weg över den Hoff mit Peerstall

Wat hebbt wi up uns eerst Fohrt de tweete Brüch söcht! Wi kunnen se ganz eenfach nich finnen un sünd nu noch en tweetes Mal na Löhrsdörp föhrt. Dorbi harrn wi al meern up de Brüch stahn! Vör luder Buschwark un Gelänner harrn wi de Brüch nich wohrnahmen. Wi hebbt luthals över uns lacht. Nu kregen wi eerst mit, wat dat för en smucke Brüch weer. Links vun de Brüch leeg en wunnerboren Park. De weer dormals vun den Goornarchitekten Harry Maasz ut Lübeck anleggt woorn. In dat Wader vun den Watergraven, de to en Diek breder maakt weer, spegel sik dat Herrenhuus.


De Gootshoff...


...vun de Noordensiet: noch en Brüch


Dörfloot vun de drütte Brüch


Kohstall un Futtersilo

Up de Nordsiet vun den Gootshof geev dat noch en wat öllere Brüch. Dat weer ok en Steenbrüch mit enen Bagen un mit en Gelänner ut Iesenstangen. Dor kunn man goot dörchkieken. De hebbt wi glieks funnen. Vun dor kunn man den Kohstall un dat Futtersilo sehn.

Ok harr man enen herrlichen Utblick över de Feller un in de Natuur. Dat Ackerland vun Löhrsdörp liggt dicht üm den Gootshoff. Land un Water speelt en wunnerschöön Speel tosamen, un de Insel-Gootshoff Löhrsdörp liggt as en Juwel merrn dor binnen.


Weg rut na't Ackerland



na baven