Romulus as Grünner von Rom harr tau Ihren von den Haudengott (Herdengott) Faunus dei dies februatus, dat Luperkalienfest, up den 15. Februar fastlecht. Tau disse Tiet wier dat all 'n Stunn' länger hell as tau dei Wintersünnenwenn' in'n Julmånd, dat Vörjohr wier in Sicht — un so süllen dei Minschen un dat, wat sei ümgifft, dörch Opper von Dierten wedder reigen un fruchtbor sien. Disse heidnisch Bruk, den Minschen dörch Opper von sien Schullen wedder frie tau måken, wür vonne Christenheit upgräpen un 40 Dåch nå Wihnachten, un twors ümmer an'n 2. Hornung (Februar), as Mariä Lichtmess af't 5. Johrhunnert in Jerusalem un af't 7. Johrhunnert in Rom fieert.

Up dissen Dach föllt Jesus sien ierster Besäuk in'n Tempel von Jerusalem, un dei 40 Dåch sünd ok dei Tiet, dei ein Mudder (un ok Maria) nå dei Geburt intauhollen harr, üm wedder reigen tau warden un fruchtbor tau sien. Blot Dierten würn nich mihr oppert, sonnern Lichten hillig språken. Dat wiern dei Karkenlichten för dat ganze Johr un Lichten vonne Lüüd, dei mit 'n hillig språken Licht inne Schrift läsen wullen. Un dat geef Festümtööch mit Lichten, üm dat Vörjohr un dormit dat niege Läben tau ihren. Mariä Lichtmess wier bet 1912 sogor 'n Fierdach in Bayern, un in männig kathool'sche Gägend bläben dei Krüff un dei Wihnachtsbom bet tau dissen Dach un nich blot bet Hogenniejohr an'n 6. Hartung (Januar) inne Kark ståhn, dat geef un gifft Lichtmessandachten un besonnere Kauken tau Lichtmess, un Lichtmess is hier un dor ok dei Beginn vonne Fastnacht.

Lichtmess harr oewer ok Bedündung as Losdach. För den Buern wier dei Winter vörbi, dat güng up Acker un Wischen. Un dat lech ok an'n Buern, ob dei Knechten un Mägden blieben künnen orrer güngen un dörch Handschlach för ein Johr bi 'n niege Herrschaft ünnerkeemen. Up jeden Fall geef dat an dissen Dach dat Deinstbauk mit 'n Indrach oewer't Benähmen up'n Hoff un buten bi dei Arbeit un den dortauhürigen Johreslohn.

So beseihn, güng't up 'n Buernhoff nich so sihr üm Hilligspräkung von Lichten as väl mihr üm Landwirtschaft. Tau Lichtmess kann nich blot dat Gesinnel wesseln, tau Lichtmess möt ok noch dei Hälft von't Fauder för dei Dierten dor sien, süss kåmen's nich œwer 'n Winter. Un as Wäderrägel güll: "Is't tau Lichtmess klor un hell, kümmt dat Vörjohr nich so schnell, wenn dat œwer störmt un schniet, is dat Vörjohr nicht mihr wiet." Na denn möten wi dissen Winter ja nich miehr lang täuwen! — Un dei plietsch Buer wüsst ok, dat nå Lichtmess Wruken äbenso as Dierns oewer 30 an Wiert nålåten!