Wenn de Ierdbeerwörteln na boven wassen

vun Günter Weber

Wat de Mullworm allens an Erinnern utbuddelt... Bild Stefan Didam/Wikimedia Commons

Taugeven, wat figilensch leest sich dat. "Woerteln na boven". Aevers dat is so weest. Doch nu de Saak von Beginn an. Ik keem so an't Erinnern, as ik den Mullwörm in'e Irdbeern von mien Buursfruu seihn heff.

So Anfang vun de föftiger Johr weer dat. Mekelbörg-Vörpommern. Achter uns weer de Welt tau Enn. Wi Bengels weern bannig wussen, na den Orlog. Where is a future? — No future? Bi uns nie nich. Mit de alt Trampelschees güng dat in'e Nawerschaft. Kino, Danz in die olen Sääl. Vun Daberkow bit na Weltzin. Fast ümmer mit minnstens twee Mann up een Trampelschees.

De ABV (Abschnittsbevollmächtigter der Volkspolizei) harr uns ja ümmer up'n Kieker. Ok up den Danzböhn. Wi weern ja allemann noch nich 18 Johr. "Jugendliche unter 18 Jahre haben jetzt den Saal zu verlassen", sää denn de Kapellmeester. De Gendarm kennte uns. Weerst jüst so schöön mit de Deerns in'e Gäng kamen ,"wenn bei Capri die rote Sonne..." Ja, un nu na Huus! Richtig suur kemen wi in uns Kaff böör. Suur, nee wat? Den ollen Krempkow harr doch so tietig säute Ierdbeern.

Ierdbeeren, Bild Jens Jäpel/Wikimedia commons

So richtig schiere Büsch. Dat harrn wi längst an'n Dag utbaldovert. Nu is dat ja ni nich licht, inne Düsternis rode un gräune Ierdbeern tau plücken.
Wi keemen ja ok nich an't Plücken.

"Klack", güng dat. "Au... a!", reep de lang Wolfgang.

Mullwörm-Falle

Hei weer in so en Fall tappt. Denn Krempkow weer bekannt, dat hei mit jedereen Striederie harr. Hei weer so een ganzen Gräsigen. Leggt denn doch so'n Fall ut, as wenn hei een Voss tau faten kriegen wull.

Den langen Wolfgang weer aver nich veel passiert. Dat Been weer büschen lädiert. Hei kunn noch gaut lopen. De Fall hebbt wi doch so wat vun fuurts in'e Tollens schmeten. Täuf man, wi warrt di dat schon noch wiesen.

Een Nacht hebbt wi verstrieken laten. Denn aver. Heidewitzka.

Ierdbeeren ümgraven. Foto Alupus/wikimedia commons

So ungefähr seh Kremkow sien Ierdbeerfeld ut, as wi een Nacht uns afrackert harrn. Ganz ümschmeten, die Woertel na boven.

De ABV will dat mit de Ierdbeeren upklären. Bildquelle

Wat hett dat Dörp Klempenow lacht! Ja doch, den Gendarm keem ok un versööcht, de Öveldeder tau ermiddeln. Kein een harr wat seihn, keen ok nix hüürt.

Up dat Wedderseihn 2006 vun de ehemaligen Klempenower föfftig Johr later harrn wi noch een herrlichen Grund, üm noch maal hartlich tau lachen. För den ABV is dat ok erledigt. To de Akten packt, de ganze DDR.