Bummel dör Bremen
Deel 3: Roland

vun Meike Balzer-Fraun

En Bremer Kinnerleed

Roland mit dat kruse Haar,
wat he kiekt so sunnerbor.
Roland mit den Wappenrock
steiht so stief as wie en Stock.
Roland mit de spitzen Knee,
segg mal, deit di dat nich weh?

De Roland steiht hier för de Freeheit vun Bremen.
Is he weg, is't dormit vörbi!

Also de Kneen sünd wohraftig spitz!

De Kneespitzen sünd nich dat Maat vun de Bremer Elle. De Kröpel dor ünnen is nich de arme Keerl, de dat Stück Land mit Möög ümkrabbelt hett, dat de Gräfin Emma de Börgerslüüd denn as Weid schunken hett. Ok worüm he so sunnerbor smustern deit, wat he nu fuchtig na'n Doom hen oder koopmansch na en Hannelsweg na Oosten, na Hamborch hen schuult, nix weet wi so nipp un nau! Seggt de ‚Wetenschop' nöömt Wikipedia.

Wiss is, dat de Roland in en Krieg doot bleev, en Held un Märtyrer, un dorför steiht de lütt Snall vun sien Gördel: En Engel mit Laute in en Krink vun Rosen.

Un seker is, wat sik schierweg in sien Rüch afspeel:
1938 weer de Roland sowat vun marood, dat he bald ümfallen kunn. Steenhauers hefft em utenanner nahmen, un de Nationalsozialisten harrn en willkamen Mööglichkeit, en Kassett mit Dokumenten inmuern to laten. En Loffleed op Hitler un sien Denkwies, en Text vun den Börgermeester un Blääd. Dat weer keen Geheemnis, man weer meist vergeten. De Lüüd harrn anner Sorgen.

Weer de staatsche Keerl weg west, weer't mit Bremens Frieheit wohraftig ut west!

1988 hefft se de Laag vun de Kassett mit en Metalldetekter funnen un in üm un bi dree Meter Hööchde dree Steen ut'n Rüch nahmen. De Kassett seet fast, man an de Paperen kemen se ran. Verblüffen — en Karstadt-Tüüt — seker nich ut de dörtiger Johren.
Wat weer passeert?

1984 kreeg de Roland en nie'en Kopp. (De ole is in't Focke-Museum.)
Een vun de olen Steenhauers kunn sik op de Kassettengeschicht besinnen un söch dat Dings.
De Handwarkers hefft opschreven, dat de so hooch löövt Diktater schuld weer an den Doot vun Millionen vun Minschen, un hefft dat Papeer in de Tüüt mit inmuert.

De Dokumenten sünd nu all in't Staatsarchiv.

Is dat villicht de Verkloren för Roland sien apartig Grienen?

Oder grient he, wieldat hei Spaaß hett?