Dat Virus is nich döfft

vun Marlou Lessing

Nu fangt de "twete Well" vun't Coronavirus an to lopen, un wi warrt en sunden Minschenverstand bruken, ehr aftowehren. Leider mutt ik hören, sehn un lesen, dat düsse sunde Verstand ünner Christenlüüd nich jümmers so präsent is, as dat to wünschen weer.

Stückerwat vun de Corona-"Hotspots" vun de eerste Well sünd ja Karkengemeenen west. Dutzen Lü, ja deelwies Hunnerte Lü hebbt dor tosamen ahn Maske Gottsdeenst fiert, ahn Maske sungen un ok dat Avendmahl fiert. "Woans", fragen welk vun düsse Gemeenen, "woans kann dat falsch ween, Gott mit Singen to laven? Un woans kann en Christenminsch vun't Avendmahl jichenswat Leges verwachten? Orr jichenswat anners as bloots Segen?! Dat is doch en Gottslästern, to denken, dat Avendmahl kunn en Christen krank maken!"

Denkt de Lü, dat Corona-Virus weer christlich? Döfft un kunfermeert villicht? Orr harr doch en besünnern Respekt vör de Kark? Un wat för'n Verachten vun anner Religioonen stekt dor binn! De allerdings sülven dat Lieke för sik annehmen doot...

In wat för en Welt leevt solk Lü? Wo de Gloov liefhaftig Bargen versetten schall — ja, mutt, denn ehrder sünd se nich tofreden? Nee, de physischen Bargen mutt de Gloov nich versetten. Anners weer ok keen Barg mehr an sien Platz.

En kloke Minsch hett mol seggt: Gott hett sik nich bloots eenmaal betüügt. De Religioonen hett he ehr hillige Böker geven, in de he sien Botten för de Minschen betüügt hett; all Minschen avers hett he dat anner Book vun sien Hand geven: de Natuur. De Schöppen sülvst. Un ehr Gesetten.

Dor stekt veel Wohrheit binnen. Un mi dücht, wenn dat op ankümmt, dat een vun de hilligen Böker in'n Weddersprook to de Natuur kümmt, denn is dat teemlich kloor, wokeen Recht behöllt. De Religioonen wüllt dat bloots mit Wedderwilln wohrhebben. Man jedeen Saak regeert ehr Rebett: De hilligen Böker regeert de Harten vun Minschen, de Natuurgesetten de Natuur. Un dat Virus is en Stück Natuur. Keen Straaf vun Gott. Allens, wat physisch passeert, is Natuur, ok wenn dat in uns Gemööt en religiöös Bedüden hett. En Avendmahlskelch is nix as Natuur — för so'n Virus. Dat he för uns noch wat anners is, scheert dat Virus nich. De religiöse Bedüden hebbt de Saken bloots in uns Hart un Gemööt. Bloots dor. Un ok dat bloots bi de Minschen, de dat so seht. Wokeen nich religiöös denkt, för den is dat allens profan. Un en Virus denkt nich religiös. Dat denkt gor nich. Dat hett bloots poor rudimentäre Arvinformaschoonen mit en beten Lipide butenrüm. Dormit kannst nich denken. Ok högere Deerten, de immens komplexer opbuut sünd un en echten Bregen hebbt, denkt nich religiöös. Tominnst ünnerstellt wi ehr dat nich. Wenn en Karkenmuus direkt vör'n Altar köttelt, is dat för uns ja ok keen "Gottslästern", oder?

Mit de Beteken "Gottslästern" schulln wi sowiso mal gaaaanz trüchhöllern ween.

De ganzen Versöök vun de Religioonen, in dat Rebett vun de Natuur rintoregeern, weern historisch sehn en Keed vun Pleiten un Verlusten — anfungen vun de Schöppen in söss Daag vör 6000 Johr (welk glöövt dat avers jümmer noch) över dat kopernikanische Weltbild un Galilei usw. usw. — överall behöll de Natuur Recht, nich de Religionen mit ehr hillige Böker. De Versöök, bloots mit en hillig Book gegen universelle Fakten antogahn, is nix anners as wat Donald Trump anduernd deit (bi Trump bloots ahn hillig Book). Gegen de Fakten hest keen Schangs. Meddewiel hebbt se't insehn un opgeven (Trump steiht düsse Schritt noch bevör).

Un, veel wichtiger: Woneem de Religioon ehr Rechtfardigen un Begrünnen ut de Natuur trocken hett, hett se ok verlaren. De Natuurwetenschap övernimmt dat Verklaarn vun de Welt vun'n Uurknall bet na'n Regenbagen un all ehr Phänomene. Religioonen, de ehr Götter nix anners to beden harrn as en "Verklaarn" vun Natuurphänomene — etwa dat Thor sien Hammer smitt, wenn't dunnert —, sünd verswunnen. De Religioonen kaamt ut minschlich Hart un Seel, för't minschlich Hart un Seel sünd se dor, bloots de schallt se helpen, un se wirkt bloots dor. In't Riek vun de physische Welt regeert dat anner Book vun Gotts Hand: de Natuur. Un ehr Gesetten. Dat is liekso schöön as de Psalter orr jichenseen hillige Text. Ja, ok en Virus is schöön op sien egen Wies!

Un wenn nu wirklich welk denkt, de Gloov kann in de dingliche Welt rinregeern, un wenn se överall Viren riskeert orr vun mi ut ehrn Avendmahlswien mit Gift versett un op bestaht, dat ehr dat nich schaden kann, wieldat dat ja dat Avendmahl is: dat is keen Frömmigkeit. Dat heet Gott op de Proov stelln. "Wundersüchtiges Volk!" nöömt Nathan de Wiese solk Lüüd. Gott schall sien Book vun de Natuur willkürlich towedderhanneln, bloots wieldat wi uns dickdoon un as wat Besünners föhlen wüllt. Wat för en Anmaten! Nee, dat is nich fraam. Sien egen Verstand to bruken is veel ehrder fraam. De Verstand is, blangenbi, ok en Gaav vun Gott. To'n Bruken, nich to'n Wegsmieten.