1. Adventsönndag: "Dei Herr kummp"

Jesus treckt in Jerusalem in

As sei nu duune bi Jerusalem wörn, bi Betfage an den Ölgebarg, don schickde Jesus twei Jünger vörut un hei sä tau ehr: Gaoht in dat Dörp, dat vör jau ligg, un dor finnt ji forts eine anbunnen Äselstute mit ehr Faohlen, binnt dei los un bringt mi dei her! Un wenn jau ein'n anspräken dait, so sägget: Dei Herr bruuket dei. Un forts krieget ji dei mit. Dat passeierde aower, dormit erfüllt wörd, wat dei Prophet ankünnigt har, as dei sä (Sacharia 9,9): "Vertellt dei Dochter Zion: Süh, dien Käönig kummp sachte nao di her un ritt up einen Äsel un up ein Faohlen, ein junget Lastdeiert." Dei Jünger güngen los un dön dat, wat Jesus ehr ansäggt har, un sei kömen mit dei Äselstute un dat Faohlen trügge un läen ehr Tüg doräöwer un hei settde sich dor baoben up. Don lä orig väl Volk Tüg up den Weg. Dat Volk aower, dat vör üm hergüng un üm naoköm, röp: Hosianna för David sienen Säöhn! Lobet wäs, dei dor kummp in den Naomen van den Herrn! Hösianna in dei Höchte!"

(Matthäus 21,1-9)