To Richtfest

vun Sibilla Frerich


De Bulüüd:

Hier baven sweevt de bunte Kroon.
To'n Richtfest sünd wi laden.
Gotts Segen leeg op all uns Doon:
Dat Huus is good geraden.

Du, Buherr, weerst ok rein nich slecht,
du weetst ok, wat sik höört,
betahlst uns pünktlich un gerecht
un hest sünst nich veel stöört.

So wuss dat Buwark Steen üm Steen,
is allens schier un even. —
Dien Lüüd schallt alltied glücklich ween
un glücklich hier binn leven.

Prost!

De Buherr:

Ji Bulüüd weern patent un fix,
mit Hand un Harten düchtig.
Un an juun Wark — dor gifft dat nix —
sitt allens recht un richtig.

So dank ik för juun Segenssprook
un laav ju heel un deel!
Wat ji mi wünscht, dat wünsch ik ok,
un drink nu op juun Weel!

Prost!



na baven