Oktober

vun Brigitte Fokuhl

Gold an de Bööm, Gold in dat Fatt,
dat gellt för den Oktober.
Probeer den Wien, dien Tung maak natt,
drääg Büxen in "Zinnober".

Dat is de Farv, de dit Johr tellt.
Drum fang an uttomisten,
süs bist du bi de Mood afmellt.
Smiet olles Tüüg in Kisten.

Un bring dat na dat "Rode Krüüz",
de köönt dien' Kraam goot bruken
un schückt dat hen na "Kükelüüz",
wo so veel Arme huken.

De Appeln sünd nu rood un blank,
Kantüffel warrt veel geven.
Drum fiiert wi ok "Erntedank"
un laavt uns' Gott in' n Häven.