Nu kümmt de schöne Maientiet

vun Walter Meß


Wat is de Monat Mai blots schöön,
de örste Raps is al an blöhn,
en güllen Kleed kriggt uns lütt Land
hier baben an de Waterkant!

De Menschen seht so fründle ut,
treck gor nich mehr en kruse Schnuut,
den Winter hebbt wi nu vergeten,
de warme Luft wüllt wi geneten!

De Vageln singt, de Luft is lau,
de Himmel farvt sik nu so blau,
un schallst mal sehn, ob Fru, ob Mann,
nu kümmt de witte Maibüx an.

Mit'n Fohrrad geiht dat mit Juchei,
in de Natur in Monat Mai,
Vadder, Mudder un de Göörn,
dat maakt ehr Spaß, dat Fohrradföhrn.

So schulln wi dankbor nu uk sien
un freit uns över'n Sünnenschien,
de Herrgott meent dat mit uns goot,
so maakt de Mai uns frischen Moot!


6.5.2012


na baven