Platt mookt stark

vun Heinz Tiekötter

Hunnert Perzent Schutz för Null Euro, hebbt se mi versproken. Dat is'n Johr her, dor find ik in't Internet 'n Antiviren-Programm för mien Computer. Dat sull nix kosten, dat weer för umsünst, wenn ik mi dat doollood. Dat hebbt se hooch un hillig versproken. Achterran sall ik keen Last mehr hebben mit Viren, Wörms un Spams. Spams, dat sünd Emails, wodörch dien Reekner mit Spijöök un Untüüg infiziert ward. Ik heff mi dorop inloten, un tein Minuten loter harr ik düssen perfekten Schutz op mienen Computer. Un alle poor Doog kreeg ik wedder Norichten mit de neeste Version vun düsse Antibiotika. Dat nöömt sik denn Update.

"Hmm, allns gratis, schall ik mi dat rünnerloden?"

Nu, een Johr loter, kreeg ik een Reeknung. Un se schrieft mi op Ingelsch, wo ik doch blots 'n beten Hooch un ganz veel Platt snacken kann. Ik röber no mienen Nober. He is 'n Mann mit Billung. He arbeit in'n Hoben un hett 'n Barg Lüüd ünner sik. He is Kroonfohrer. He hett öbersett, wat in de Reeknung stunn. De Virenjägers schrifft, dat se dottig Euro för de Verlängerung vun dat Programm hebben wüllt, un se harrn mien Konto all belastet un de dottig Euro introcken.

Nodem dat ik mien puterroten Kopp mit Atemtechnik..... — miene Fro seggt, ik heff mi nich in Griff. In mien Oller mutt een ruhiger ween — also miene natürliche Farv mit de Sommerbräune is wedder trüch, dor roop ik de Viren, ik meen, de mit dat Programm gegen Viren, de roop ik an. Dat weer en nette junge Fro op de annere Siet an Klöönkasten. De wull erstmol miene Kunnennummer weten. Ik weer noch netter as se. Ik bün ik jo en utslopen Norddüütschen. Mi schittst nich so licht an. Ik heff ehr eerstmol kloormookt, dat dat keen Kunnennummer gifft. Ik weer jo keen Kunnen, ik weer jo dat Opfer vun en kriminelle Handlung. Dor wull se nix vun weten, man nodem ik ehr mienen Beseuk ankünnigt heff, hett se mi denn doch versproken, dat se dat Geld trüchschicken ward. Un se ward mi dat ok stantepe mailen.

Tein Minuten loter harr ik dat Schrieben; wedder op Ingelsch. Dormit müss ik nu wedder to mienen Kroonfohrer. Du weest al, wegen siene Billung. Ik heff em froogt, wat he mi nochmol dat nee Schrieben verkloorn kunn. Du, hett he seggt, dat is ok ingelsch. So wiet weer ik all, dat harr ik sülmst rutfunnen. "Se schrieft di hier in, dat se di geern as Kunnen beholl'n wüllt. Mehr nich."

"Wat? Dottig Euro?!"

Ik wedder trüch no Huus. Jüst in düssen Ogenblick keem ut mienen Computer nochmol 'n Schrieben vun de Antibiotika-Firma. Op Ingelsch! Ik dat drütte Mol röber to mien Nober. De weern nu grood bien Eten un 'n beten genervt. He drück mi en Wöörbook mit Düütsch-Ingelsch in de Hann un säe, ik sall dat mol alleen mit dat Öbersetten verseuken. Dat euvt fix un so leern ik ok bald Ingelsch to snacken.

As ik so an Ingelsch euben weer, stell ik fast, dat dat gorkeen groten Ünnerscheed twüschen Platt un Ingelsch gifft. Un in dat nee Schrieben wull'n de Bazillen weten, wat ik vun jemmer Sörvis holl. Ik sull jem man benoten. Schoolnoten sünd jo internaschonool un dat ik kunn nu licht. Un in dat lütt Finster ganz ünnen, dor sull ik noch rinschrieben, wat ik vun jemmer Ünnernehmen holl. Dat heff ik denn ok mookt: obers op plattdüütsch. Ik heff nämlich ok Billung. Sietdem heff ik nix mehr vun de Virenjägers heurt.

Du, ik segg di, Plattdüütsch, dat is'n starke Sprook. Dormit kannst so'n Afzocker-Ünnernehmen direkt in de Knee twingen!