Silvesterböller

vun Günter Weber


Oever hunnert Millionen Euro gäwen wi alleen in Dütschland ut, damit dat düchtig an Silvester knallen deit. Kanns di dat vörstellen — hunnert Millionen?

Wat kanns dormit alles daun? Kanns nich optellen. Ik moet doch vör Silvester nochmol na denn Orthopäd. Mi daun doch ümmer de Knacken so Pien an de Stellen, wo sei bräken wiern. (Dat is de Erinnerung an dat Malheur bi de Suldoten van de DDR.) Dei Orthopäd deit sien best, doch bäter maken kann hei dat ok nich miehr.

Neven den Doktor ist so'n grooten Laden met "-land" an't Enn. Sühst, un in den grooten Laden güng ik rinn. Lotto hebb ik speelt. Tabletten gägen de Koppweihdach na Silvester hett mien betere Hälft mi opdragen. Kannst allens in das Huus köpen. Denn güng ik noch an dat Potträhm, wo allens liggt met MHD. Da is dat "Mindest-Haltbarkeits-Datum" aflopen. Blaut- un Leverwost vun Mecklenborg-Vörpommern is in dat Schapp. Dei is rökert un davon kennen sei hier an den Niederrhein nix. Ik bring meist drei, veer Stück mit, weil uns Jungs met Familie ok giern Meckelbörger Wust äten.


Rökert Leberwust

Ik kiek so hoch un denk bi mi: Wat stähn de Lüü doch da achtern?
Nieglich as ik bün: Kieken! — Du leeven Heiland! Junge Minschen, jo ok mit lütte Kinner bi sik, halen sik Raketen, Böller, den Inköpwagen bet boven vull. 162 Euro mutt dei een Fru an dei Kass betahlen. Met dei Kaart. Met dei drütte Kaart klappt dat ierst. Ik dink so, Gott nee, nix op dat Konto, äwer daför warrt Geld utgäwen. Doch dormit weer dat ja noch nich gaut.

Vör dei Kassen in den Laden is en grooten Deichbänniger (Bäcker). Een van de Kinner wull so'n Berliner hemm. Kost 90 Eurocent. Kreeg dat Kind nich, de Olschen meenten "wi hemm noch Stuten tohuus."

Silvester 0 Uhr güngen wi beid över dei Straat na unsern öllsten Soehn. En Glas Sekt op dat niege Johr drinken.
Unsen Naber hett Besäuk. Dor is wat inne Lucht flogen.

Niejahrsdag Morgen. Wi beid sind büschen lopen gahn. Unsern Naber fägte den Rest van dei Böller un Raketen weg.
Heff ik ehm frogt: "Na, is doch wohl noch wat Geld übrig geblieben von den gekürzten Fahrtkosten zur Arbeit?" Dorvun hett hei mi dei Daag vertellt un op den "Scheiß-Unternehmer" wettert.

Dei Vader vun den Naber hett mi hüt Nameddag vertellt, dat sei Böller för mehr as 200 Euro köfft hebben. Söben van dei Raketen sünd över't Huus bi mi in den Rasen steken bleeven. Op dat Feld van den Buern achtern mienen Goorn steken noch mindestens twientig Raketen dei Hultstäls inne Lucht.

Dei Stäls uut mienen Goorden bring ik morgen na ehm henn.


4.1.2015


na baven