Seggt nee!

vun Marlou Lessing

Is Moderdag. Moderdag, 75 Johr na Kriegsenn. Den Moderdag, al 1914 in de USA erfunnen, hebbt de Nazis to en Uterus-Hoochleistungs-Dag maakt, Moders mit 8 un mehr Kinner kregen dat güllne Moderkrüüz (dat in'n Volksmund ok "Karnickelorden" heeß). Moder ween heeß nix anners as: gebären, gebären.

Dat Kriegsenn hett uns ok dorvun frie maakt.

Nich mal dat Gebären weer avers för de Nazis en Weert an sik. Nee, se bruken de jungen Minschen: de Deerns as niege Gebärmaschinen, de Jungs as Kanonenfoder. De Krieg weer lang plaant, de Welt schull erobert un vun "Herrenminschen" besiedelt warrn, dor kunnst orig vele vun bruken. Sex weer nich för Leevde dor, sünnern för Minschenprodukschoon. De Pille weer ünner de Nazis wisslich verbaden woorn.

Moders as Kriegswaff. De düütsche Uterus as Rüstungsfabrik. Wat för en Horror.

Un allens, dat de Moders ehr Kinner in'n Krieg toschann gahn sehn kunnen.

Dat Kriegsenn, dat eenzig mööglich weer as Nazi-Enn, hett uns dorvun befriet. Ja, ok hüüt noch geiht de Kraam verkehrt, wenn Fruuns nich to rechte Tied topackt. Moders draagt ok hüüt in de Coronatieden de Hööfdlast, Fruuns sünd jümmers noch Hoochleistungsgeschöpfe — avers mit all ehr Fähigkeiten, nich bloots den Uterus. Se dröfft wedder Minsch ween. Moders dröfft Minsch ween, un Minschen dröfft Moders ween.

Nu herrscht 75 Johr Freden in Zentraleuropa, den lütten, terstückelten Kontinent, för den fröher de Krieg de normale Levenstostand weer — jümmers harrn sik welk in de Kladden. Ja, ok in de 75 Johr "Fredenstied" geev dat Krieg in Ex-Jugoslawien un nu in de Ukraine. Wo lang noch is Freden bi uns?

Uns Probleme sünd nu global. Dat Coronavirus is en Lehrstück, dat Klima, de Weerschap, de Migraschoon, allens dat warrt sik noch entfolen. In de Kries is jedeen Staat wedder op sik sülvst trüchfulln, un na de Kries will de rieke Norden de ärmern Länner nich helpen, indem dat se ehr Bonität för billige gemeensame Kredite ("Coronabonds") henhollt. — Wo kaamt wi denn hen, wenn de Länner, de spoort hebbt, de Missweertschap vun anner Länner ünnerstütt? Opletzt sogor ehr Korrupschoon? Hier arbeit de Lü hart, in Italien gaht se veel fröher op Rente — schallt wi dat etwa mitfinanzeern? Nee! As de Italieners noch ole Römers weern, heeß dat bi se: "Fiat iustitia, pereat mundus" — Gerechtigkeit schall warrn, un wenn dorbi de Welt ünnergeiht! So!

Allens richtig. Un so terbrickt villicht de Gemeenschap. — Un later fraagt sik wedder en Generaschoon: Weern Coronabonds nich en billige Pries för Freden west?

As neegst warrt dat Frankriek slecht gahn. Bannig slecht. Wenn Frankriek nich hulpen warrt, köönt wi de EU begraven. Dat ik dat noch mal seggen mutt: Ünner Helmut Kohl weer dat nich passeert. Kannst gegen em seggen, wat du wullt, avers he wüss, dat Geld för Freden en good Geschäft weer.

Nich allens warrt sik so billig lösen laten — also mit Geld. De Krieg gegen de Schöppen, gegen de Natuur, warrt wirklich Oppers un Verzichten feddern. De Krieg gegen de Minschlichkeit, den Profitgier un Haifisch-Kapitalismus föhrt, mutt ophaaln, lever gistern as hüüt. "Seggt nee!", hett uns Wolfgang Borchert achterlaten.

Dat is an uns all richt.

Wi all schallt as Moders ween. Minschen dröfft Moders ween. Villicht is dat de moderne Moderdag: Minschen enerworrns in de Welt, weest as Moders to juun Welt! To enanner! Nich bloots an düssen Dag, sünnen all Daag. Sünst geiht de Kraam verkehrt op düsse Welt.