Mediale Sabbelbüdels

vun Heinz Tiekötter


Vele Lüüd hebbt wol nich bit to'n Enn toheurt, as uns Bundskanzlersche an Ooltjohrsobend ehre Ansprook holl'n hett. Woto ok, wenn in de Norichten all den hele Dag öber alle Senders in vörrut vertellt ward, wat uns Angela obends in Ansluss vun de Norichten seggen ward?

Dat Kanzleramt gifft dat Manuskript 'n poor Doog vörher rut und denn ward Silvester vun morgens bit obends in de Norichten — sabbel, sabbel — alle halbe Stünn vun de Reed bericht, de an Obend öber den Äther utstrohlt ward. Un ümschalten or zappen nützt di gornix; de Rundfunkanstalten hebbt sik afstimmt. Dat is allerwegens dat sülbige Theoter. Du kannst jem nich entkomen. Eerst an Obend no Klock söben hollt se in'n Radio de Luft an.


Un wat hett se nu seggt? Bild: Screenshot ARD

Man nu freihst du di all wedder to freuh; wenn de Fernseher mit "Heute" orrer "Tagesschau" op Sennung sünd, geiht de Speelkrom wieder! Nu vertellt di de Schnackers op'n Bildschirm, wat tein Minuten loter Fru Merkel preestern ward.

Un wenn denn de Norichten toenn sünd un de Kanzlersche endlich süllmst vör dat Micro steiht un öber dat ole un dat nee Johr vertellt, denn hest du den Text lang utwennig lehrt un weetst all, wo öber se schnacken ward.

Is villicht ok ganz goot so. So fehlt di tomindst keen Infos, wenn du in düsse Tiet diene Gedränke ut'n Keller hoolst. Denn glieks kümmt jo dat interessantere Obendprogramm!


6.1.2019


na baven