Hmm... Marketing orr Klimawannel?

Ik verstoh dat nich!

vun Heinz Tiekötter


Woso koomt wi mit den Schutz vun uns Ümwelt nich vöran? Froogst du de Parteien: de hollt dat Thema för afsünnerlich wichtig; seggt se tomindst. Se weet nu all, an welk Steed uns Welt in föftig or hunnert Johrn ünner Woter steiht. Se schnackt hüüt all vun de Dürre un dat Chaos, de op uns täuvt. Dat heet, een vun de Parteien hett mit düt Thema nix an Hoot. Dat lett jem koolt. Se rekent in Perioden vun dusend Johrn, ok wenn jemmer leste bloots twolf Johr anduert hett.


Seriöse Infos staats Reklaam?

Ik mutt jümmers doran dinken, wat Aldi, Lidl, C&A un all de velen annern Händlers för jemmer Prospekte utgeevt. Uns Regierung fehlt för sowat wull dat Geld. Warbung mookt se bloots, wenn Wohlen anstoht, un nich wenn dat dorüm geiht, de Minschen optorütteln. Orrer hest du all mol Opklärung in dien Breefkassen funnen öber Plastikmüll, öber Glyphosat un all den Schiet, de uns süük mookt?

Kunn jo ok sien, dat uns Regierung de Lüüd nich belehren will. Se gläuvt villicht, de Minschen kapiert dat doch nich. Ik dink jo ok meist, dat se nich veel vun uns Billung hollt. Anschienend hebbt se dormit Recht.


Stapelwies Reklaam in en Hamborger Mietshuus

Vele Minschen köfft sik 'n Illustrierte, denn se find de Sieden mit Sport un de Juxsieden interessant. Wenn de Norichten öber Katastrofen kümmt, kiekt se bloots de Biller an. Se weten ok nich, dat se mit elkeen Droppen Motoroil, den se still un heemlich in Wohld entsorgt, dree Milljoonen Droppen Woter schietig mookt, dat denn nich mehr drinkt warrn kunn. Un solang, as nüms jem kloormookt, dat se grod dorbi sünd, ehr Kinner un Enkelkinner een bitopulen, ballert se ehren Schiet in de Gegend. Dat Weten fehlt jem! Un dat Umweltsministerium un all de Behörden koomt nich an se ran. Se hebbt keen Ohnung vun Marketing un noch nix vun Breefkassen heurt. Se weet ok nix vun Anzeigenbilogen un vun Prospekten.

Tweemol in de Week sünd bi uns de Breefkassen vull vun de Prospekte vun Aldi, Edeka un Lidl un vun all de annern velen Händlers. Un de velen bunten Biller sünd wirksom. Dat markt een denn, wenn he bi jem vör de Kass in een lange Slang steiht. Mit bunte Biller kannst wat bewegen. Besinn di mol op de Akschoon "Rauchen gefährdet deine Gesundheit"! Wenn du freuher in'n Kroog rinkeemst, kunnst du wegen luder Qualm den Tresen nich erkennen. Hüüt stoht villicht twee Mann vör de Döör un nuckelt an jemmer Zigarett.

Woan liggt dat nu, dat de Politikers keen Strateschie find, de Natur intakt to hollen? Orrer hebbt dor allwedder welk vun de Lobbyisten ehre Hannen in Speel?


6.12.2018


na baven