Maat Jan ut BremenMaat Jan simmeleert över:

AfD vör Gericht un Europa ut'e Sicht


Wat is bloß mit us Kanzlersche los? De is ja woll heel un deel in ehren föhlten Vörrohstand ankomen. Se stört sick an nix mehr. Dor schwänzt zigdusend Schölersche un Schölers (de Tied för't Gendern mutt schon ween!) Week för Week de School, üm to demonstreeren. Dat is praktisch en wilden Streik! Anarchie! Wat seggt de Kanzlersche? "Ick begröt dat." Hett se noch gor nich mitkregen, dat dat ehre egene Politik is, wo de Kinner gegen demonstreert?

Man wehe, wenn ehre Partei wat vun ehr will! Dit Johr gifft dat de Europawohl, dorto Wohlen in Bremen, Sachsen, Brandenborg un Thüringen. Allns Länder, wo de CDU un Merkel bannig Wind vun vörn verwachten köönt. Wat seggt de Kanzlersche? "Och nö. Wi laat dat."


Angeevlich is düt de Köök in't Slott vun Dornröschen,
avers wi weet dat beter: Dat is dat Bundskanzleramt
ünner dat Leit vun den Narkoosdokter...

De regeerende Bundskanzlerin höllt sick komplett ut'n Wohlkampf rut! Un bewiest blangenbi, dat ehr Europa ober mol sowat vun an'n Mors vörbi geiht. Good, Politik hett se egentlich jo noch nienich intresseert. Oder kriggt se dat ok al nich mehr mit? Ick har mi jo fors wunnert, dat utrekent en Narkoosdokter de neede Chef vun'n Bundskanzleramt worn is. So mutt dat ween: Helge Braun hett de Merkel sowat vun afschoten, dat an Wohlkampf öberhaupt nich to denken is.

Egentlich is dat en Inladung för de Opposition. Man de gröttste Oppositionspartei is de AfD, un de hett mit sick sülbst noch to doon. Toeerst wullen se ehre Ex-Chefin Frauke Petry verbeden, blau to ween. Also nich Petry sülbs, man ehre neede Partei "De Blauen". Man wo anners schall de sick nömen? "Petry-Jünger" gifft dat al, dat sünd de Keerls, de en Stück Fadem in't Woter hollt un dat "Sport" nömen doot. Man good, dat dat Gericht entschieden hett: De AfD is nich de Eenzige, de offiziell blau ween dröff. Weer jo nich uttodenken, wenn kieneen mehr blau ween draff: de Schlümpfe, Schalke 04, Margot Käßmann...

Frauke Petry hett noch en annern Prozess an'n Hals, vunwegen Meineid. Se schall ünner Eid över de Wahlkampf-Finanzen vun de AfD logen hebben. Se seggt, se harr sick bloß verbiestert. Dat kümmt jo egentlich op eens rut, much een menen. Eid is Eid. Anners kunnen Politiker jo allns Möögliche vertellen...! So Angela Merkel mit ehren beropen Satz, se wull Dütschland dienen. "Ick heff mi irrt. Wull ick doch nich." Wi schafft dat? "Dor heff ick mi irrt." Un eerst Christian Lindner: "Dat is beter, nich to regeeren as... och nee, is doch nich beter! Jamaika, wi kaamt!"

Dat Dollste an dissen Meineid, de nu doch kien ween schall, is, dat dat all 2015 west is. Also hett de Partei all vör veer Johr ehren eersten Spennenskandal hatt. Dor köönt wi mol sehn, wie gau de Kinner opwasst! Aus Spinnern werden Leute, as de Hoochdüütschen seggt. Wekeen op de Landsliste wull, hett de Partei en Darlehen geven müsst, wat he bloß trög kriggt, wenn he nich wählt worn is. Nor dem Motto: Versogen möt sick wedder lohnen.


Ümweltpolitik à la AfD: Ok de AfD hett nu ehrn Parteispendensumpf!
Aver wokeen schall düsse Krööt slucken?

Ünner Alice Weidel geiht dat fix wieder mit en needen Spennenskandal. De hett eerst Grotspennen kasseert un denn utposaunt, de AfD harr kiene Grotspender. Un dat nich in irgendeen Utschuss, nee, open in dat Internet.


"Wüllt Se uns nich bitte düt Geld spennen? Wi spendt Se dat tovör! Ja! Wenn Se seggt, Se weern uns Spenner, laat wi uns dat wat kosten! Na, wo weer't?"

Sietdat sünd all an't Rätseln, wekeen denn de Spenner ween kunn. De AfD harr jo en Liste mit Naams vörleggt, man denn keem rut, dat dat nich de wohren Spenner weern. Dat weern bloß Lüüd, de de AfD dorvör betahlt hett, dat se sick op de Liste sett. Also wenn du all Lüüd dorför betahlen muttst, dat se so doot, as wenn se di wat Goods doon wullen, denn muttst du wohrlich mol över dien Beleevtheit nodenken.

Man wekeen is nu de wohre Spender? Dat mutt en Düütschen ween, anners weer dat illegal. Man een, de in de Schwiez wohnt, bannig veel Geld hett un dösig noog is, de AfD en groten Bulten dorvun to schenken. Dor fallt mi eegentlich bloß een in: Boris Becker!

Dat weer nu wohrlich en Sensation. Hett Boris wat mit Alice Weidel an't Lopen? Anners steiht he doch nich op blond. Man dat Geld mutt weg, wat schall he moken? Anners kriggt dat de Lilly. Dor meent he op End woll, denn al lever de Alternativen finanzDienstleister!

Un so as Boris mit sien Geld ümgeiht, so mokt dat de SPD mit ehre Wählers. En poor Weken vör de Europawahl hett de Böverste Jungspund in de SPD, Kevin Kühnert, en por wunnerliche Saken utposaunt. So meent he, jedeen dröff hööchstens so veel Wohnruum besitten, as he ok bewohnt!

Dat klingt eerstmol richtig. Wo kaamt wi dor hen, wenn jedeen eenfach wohnt, wo he will?! Kontrolleeren kunn dat op't best de Stoot. Denn klingelt obends eenfach mol de Mann vun'n Wohnungsamt und kiekt nor, ob du ok wohrlich jedeen Ruum un jedeen Quadratmeter in diene Wohnung sülvst bewohnst.


"Ein Meter fünfzig im Quadrat, das ist bezaubernd und nett,
und wenn's hinten noch ein Gärtchen hat für Spinat und Kopfsalat,
dann ziehn wir nie wieder weg!
"

Dat fordern desülvigen Lüüd, de bi jedeen Afschiebung "Kien Minsch is illegal!" bölkt. Kien Minsch — uter dat he wat hett, wat sien Norbor nich hett! Denn jedeen schall bloß dat hebben, wat he bewohnt. As in de gode ole Tied. Du wars boorn, geihst to School, kriggst en Job un en Wohnung. Und de hest du denn. Wenneer een ümtreckt, denn bloß op'n Friedhof. Dat is dat 19ste Johrhunnert. De Tied vun Marx un Engels. Un in de Tied passt Kühnerts Ideen rin. Dor harrn se funktioneert. Un dat is jo nu nich Kevin sien Schuld, dat de Welt sick sietdat verännert hett.
Jusos in de SPD: noch kiene 30 un all so oolt. En Predigt vun'n Papst is dorgegen Science Fiction.


Na also, endlich weet ik, wat mi bi dat BMW-Logo jümmers fehlt hett! Nu süht dat endlich richtig ut!

Kühnert meen ok noch, em weer dat egol, ob BMW in Tokumst en Stootsünnernehmen oder en Genossenschap warrt. Oder ob "sick dat Kollektiv entscheiden dee, dat se BMW gor nich mehr bruken deen". Dat Kollektiv entscheidt sick bi us jo regelmäßig in Wahlen. De Parteien, de ut de Konzerne Staatsünnernehmen moken wüllt, loopt dor jümmers ünner "Sonstige". Frogt sick bloß, wenneer sick dat Kollektiv entscheiden deit, dat se de SPD gor nich mehr bruken doot. Man dat is Kevin Kühnert anschienend woll ok egol.

Prost Wohltied! röppt

Maat Jan



17.5.2019

 


na baven