Maat Jan ut BremenMaat Jan schrifft en Breef:

Leeve Sigmar!


Leeve Sigmar,

nu is dat so wiet. Dat ward nu Tied för dien persönlichet Kamming-aut, oder wo dat heet. Du hest di nu lang noog mit dien Geheemnis plagt. Dorbi weers du nich mol de Erste. Dat gifft en olen Film mit Peter Sellers, wo he en eenfachen Gärtner speelt, de Präsident warrt.


Kannst du düssen Breef överhaupt lesen, leeve Sigmar? Orr leest em di een vör?

As en Keerl em seggt, he schall sick dit un dat mol dörlesen, seggt he heel eenfach: "Ick kann nich lesen." Schaadt em dat wat? Nee, in Gegendeel, de Fernsehfritzen sünd begeistert vun so veel "Moot un Ehrlichkeet. So en Kerl brukt Amerika".

Süst du woll, dat is gar nich so swor. Ick weet, Ehrlichkeet is an sick nich so dien Fall. Ober glöv mi dat, af un to möögt de Lüüd dat gerne liern, wenn en Politiker ehrlich to jüm is. Möt jo nich to veel ween. Un nu, nordem du to dat Asylpaket twee tostimmt hest, ohn to weeten, wat dor genau in steiht, gifft dat sowieso keen Trüch mehr. Mook eenfach en Pressekonferenz, wo du kort un bündig verklorst: "Ick heff dat nich leest, wiel ick nich lesen kann. Ick heff dat eers markt, as mien Hofschranze (Generalsekretär heet dat, glöv ick, bi di) mi as jedeen Dag de Tiedung vörlesen hett." Wenn du di alleen nich truust, nimm eenfach een vun diene Frünnen in de SPD mit, to'n Bispeel....
Goot, vergeet dat fix wedder, Fründ in de SPD, dat is en Weddersprook in sick.


Kunn düt helpen?

Du büst doch ok gor nich alleen dormit. Kiek di bloß den Beckenbauer an, de ünnerschrifft ok allns, ohn dat to lesen. Un de hett dat dormit bit to'n Kaiser bröcht. Denn klappt dat bestimmt ok noch mol mit di un dien Kanzlerschap. Doch, ganz wiss. So klor, as Leverkusen düütsche Meester warrt.

Wekeen dat nich glöövt, de schall mol in en Computerspeel-Laden gohn. Ick segg bloß: "Warhammer! The age of Sigmar". Dat is de needste Renner bi de Fantasyspeele. En Fantasiewelt mit en "Gottkönig Sigmar", mit sine Sigmarritter (Sozis), Waldelfen (Grüne) un Chaoszwerge (Jusos). Un so süht dat dor ut (vun den Hersteller siene Website):
"Dat Tiedöller vun dat Chaos mokt dat Leven in de Rieke nor un nor to en Höll. Sigmar sett up Wiesheet un nich up Stärke, treggt sick trüch un fangt an, de gröttsten minschlichen Krieger to erschaffen. He dükert se in de Magie vun de Steern un flößt em afsolute Göttlichkeet in."

Klor, dat mookst du jo op jedeen SPD-Parteitag. Ober denn geiht dat wieder: "Sigmar sien Storm steiht kort dorvor, sienen Brass gegen de Strietkräfte vun dat Chaos to entfesseln."

Dunnerwedder, denn möt dat jo gewaltig losgohn mit de Sozis disse Dag. Bloß noch fix dat Alphabet lehrt, un los geiht de Storm! Eersmol veellicht in Rheinland-Palz, Baden-Württemberg un Sassen-Anhalt. Vandaag süht dat man mehr so ut, as wenn de Sozis in all dree Bundslänner de Storm in't Gesicht puust. Dorbi hebbt se doch so grote "Hoffnungsträger" an'n Start as de beropen Nils Schmid in BaWü un "Wo-heet-he-noch-mol" in Sassen-Anhalt. Dor kunn denn wohl ok en so groten Windbüdel as du nich mehr veel an ännern. Dor brukt dat en erfohrenen, bekannten un — wenn't denn geiht — ok beleevten Mann an de Spitze. Nee, deit mi leed, de Schmidt kümmt nich mehr trüch, glööv mi dat endlich!

Ober kiek di mol den Beckenbauer an. Dat is de ideale Politiker: Vun nix en Ahnung, ober jümmers vörn mit dorbi. Jümmers an't Snacken, ober seggt nix. Skandale un Fehltritte grient he eenfach weg. Un för de Politik is een nienich to oolt. Bi de Amis mookt ok jüst en Midd-Söbentiger Furore, de Bernie Sanders. - Nee, de is nix för jo, de is Sozialist. Bliff lever bi den Franz.

Dat empfehlt di

Maat Jan




14.2.2016


na baven