Maat Jan:

Ubs, al wedder!

"Ups, ick heb dat wedder dohn!" So hett en grode Hit vun Britney Spears heeten. Un Ubs — mit B — heet ok de gröttste schwiezer Bank — un ok de hett dat al wedder dohn!

Nich bloß, dat se tein Johr nor ehr Gründung 2008 vun Schwiezer Stoot rett't worn möt, wieldat se to veel Schrottpapeern ut amerikonsche Hypotheken utgeven har. Dorbi hett de UBS dree Mol mehr in ehr Bilanz stohn, as de heele Schwiez in't Johr verdeent. Nich mol een halv Johr loter möt de Bank sluukohrig togeven, dat se ehr Kunden holpen hett, Stürn to hinnertrecken. Mit 780 Million Dollar Nortohlung is de UBS noch billig wegkomen. Un nu, dissen September, hebbt se dat wedder dohn. En Investmentbanker mit den schönen schwiezer Naam Kweku Adoboli har up Kosten vun de Bank 1,7 Milliarden Euro verzockt, ehrdat sin Chefs dor öberhaupt achter komen sünd.

Een Schandol nor den annern. Gegen disse Schwiezer Bank sünd al de Griechen un Portugiesen un Italiener bloß langwielige Bookhollers. Un jüss disse Bank har sik Axel Weber för sin Comeback utsöcht. Weber, de bi de Bundsbank hinsmeten har, wieldat em de Griechen-Rettung dör de EZB nich "seriös" un "solide" noog west is. Nu kunn he lehren, wa "seriös" dat eersmol bi de Schwiezer Banken togeiht. Sin eenzigen Trost: Dat duurt villicht nich lang. Siet 2007 hebbt al fief Chefs vun Vörstand un Upsichtsrat bi de UBS upgeven.

So, un nu heff ick dal also ok wedder dohn. Lang noch bün ick up See west, man disse Dog, wo dat jümmers kolder wart, sitt ick ok lever bi en Grog in min gode Stuuv.

De CDU-Kompass. Weer en Kreiselkompass nich doch wat anners...?

Un welkeen is Schuld, dat dat jümmers kolder wart? Heel klor: De Regeerung! Merkel har jüs nochmol up ehrn Parteidag seggt: "Ik orienteer mi nor den Kompass vun de CDU." Un wo wiest en Kompassnadel hen? Nor Norden, dorhen, woneem dat kold is! Bruks di över "soziale Kälte" nich to wunnern. Bloß bi Merkel ehrn Kompassstimmt wohl wat nich. Seggt hett se dat nämlich in Leipzig, also in Oosten. Oder för ehr in Süden, se wohnt jo in Berlin. In'n Berliner Westen.

So, nu sünd Se jüss so god orienteert as use Regeerung. Man dat an ehrn Kompass wat nich stimmt, dat könnt wi al disse Dag beleven: Eerst schafft se de Wehrplicht af, denn de Atoomkraft, un nu wullt se op Mol en Minnstlohn. Dat heet, nich en Minnstlohn, sonnern veele ünnerscheedliche för jedeen Branche, jedeen Regioon, mach ween ok för jedeen Ünnernehmen, jedes Weer...Un se wullen dat ok nich sölbs fastleggen, dat kunnen de Tarifpartner don. Dat harn se ober tovör ok al kunnt. So geiht dat mit den CDU-Kompass: Eenmol inne Runde dreihn, denn wedder an Anfang stahn.

Dorbi brukt Merkel nödig en goden Kompass, an ehr orienteert sick disse Dog ja heel Europa, meent tominnst Volker Kauder. "Op eenmol snackt de Euro Dütsch", hett he seggt. Ik har op See wohl Mol de Wellen tohört, ober min Geld hett noch nienich mit mi schnackt. Ober bi Politiker is dat anners, Theo Waigel hett in de 90er ok al seggt "De Euro schnackt Dütsch." De Euro het also de heele Tied al Dütsch schnackt. Dorum hebt de Griechen em ok nich verstohn.

Da is he, de Ubs-Euro! Un he hett Düütsch snackt! Ik heff dat nau höört! Du ok? Wat hett he denn seggt???

Bloß us Kanzlersche, meent Kauder, de versteiht alns. Se is ok de eenzige in Europa west, de verstohn har, dat de Schuldenkrise dorvun kummt, dat to veel Schulden mokt worn sünd. Dor möt een jo ok eersmol op komen. De Euro-Gipfel möt denn so ähnlich aflopen ween as de Szene mit de Nudel bi Loriot. Eers wart Merkel vun Sarkozy, Berlusconi un al de annern ümjachtert un ümswarmt. Un op End seggt se bloß: "Se hebben dor Schulden in ehrn Etat." Un al sünd baff: Wohraftig, ik hebb jo Schulden! Wo komt de denn op Mol her? Ik hebb doch güstern noch alns dörfegt.

So wiet Volker Kauder. En Sinsheimer verklort de Welt. Woans een op sowat kummt, dat hett he us ok verroden: "Twee, dree Wetenbeer per Dag, de möt al ween." Wohrschienlich hett he Recht. Anners höllt een Dütschland in November nich ut.

De Dax stört af, de Euro mit, un överall hebt de Dütschen de Moorskoort. Bloß dat dat nich mehr Arschkarte heet, sonnern A-Rating. Denn gift dat noch dat AA-Rating, dat heet An'n Arsch. Un Länder as Dütschland mit eer AAA: Afsolut an'n Arsch.

Bloß een sweevt up rosarote Wulken: Oskar Lafontaine hett künnig maakt, dat he mit Sarah Wagenknecht "eng befründt" is. Mit sin Fro is he dorum nich mehr so eng befründt. Wenn he sin Sarah ok noch heirot, denn hett he mit Gerhard Schröder (de beeden wern jo ok Mol "eng befründt") tominnst noch een Sok gemeen: Beed hebbt denn veer Ehefruuns hart. Ick günn em dat un för sin Flitterweken brukt he nich Mol wiet to föhrn: He het jo al "Jamaika" tohuus in't Saarland.

Ehr

Maat Jan