Maat Jan ut BremenMaat Jan stöltert twüschen...

Bustellen


Düütschland, en Wintermärken? Vun wegen! Düütschland, ene Bustell! De eene dütsche Bukonzern wart jüs vun sponische Heuschrecken affröhstückt, de anner kriggt en needen Vörarbeiter: Roland Koch geiht as brutalstmögliche Bulööw to Bilfinger Berger. De Mann passt to den Konzern: beid sünd Experten in't Ünnergroben — Demokratie, Grundrechte, Stadtarchive, egal watt.


To'n Brüllen: Bu-Lööw Koch

Un wekeen hett dat wedder mol toeerst wüsst? De Bild! Dorbi hett Koch toeerst noch seggt, an de Bild-Meldung weer nix, ober ok gor nix Wohres an. Un nu is dat doch wohr. Kunn dat etwa heten, dat Koch logen harr? Och wat, Roland Koch un lögen, nienich! In Wohrheet harr he al jümmers nor Bilfinger Berger wullt, he harr bloß nich wüsst, dat he dat wull. Ober de Bild weet allns, kennt use geheemsten Wünsch un weet best, wat wi wüllt.

Dormit mokt ehr bloß noch RTL Konkurrenz, wo nu en Spiritistin Kontakt mit den doden Uwe Barschel opnohmen het. Dat Problem dorbi is dit Mol nich, ob Dode mit us schnacken köönt, sünnern ehrder, wekeen se noch wat glöven schall: "Bist du dat, Uwe?" "Dorup geev ick jo min Ehrenwoort!"

Un dat Koch as Ministerpräsident de neede Frankfurter Landebahn dörsett hett, de sin Konzern nur buut, dat kann in en "lupenreine Demokratie" ja al mol vörkomen.

De Kanzlerin har ok wat wullt, se wullt eegentlich den Bukonzern Hochtief retten. Wohrschienlich weer de Nom ehr sympathisch: Hoch un Tief togliek, bloß keen klore Richtung, dat passt to Merkel. Ober denn hett de Ackermann ehr kort op de Finger kloppt un meent: "Deern, mok keen Dummheiten un bloß keen needen Regeln för Firmenövernnohmen. Anners möt ick op End ok noch richtig Geld dorför betohlen. Dorbi is dat doch bloß logisch, dat wi de Postbank ut de Portokasse betohlt." Dat de Bund bi en Änderung ok mehr Geld för sine Postbank-Aktien kriegen kunn, dat speelt nor so en Machtwoort keen Rull mehr.


Mitarbeiterfreter Schäuble hett mal wedder en Beamten vertilgt. Rülps!

Wo mehr Geld is, dor sünd ok foorts Politiker, die dat för irgendwatt utgeven wullen. Un de maakt usen Finanzminister Schäuble mehr Pien as en open Stell an sin Allerwertesten. Schön, dat he as Baas tominnst af un to mol so richtig Spoß hebben kann: Bi en Pressekonferenz, wo he sin Mitarbeiter vör all Lüüd blootstellen un de Pressefritzen glieks mit afkanzeln kunn. Heißa, dat is des Ministers Lust. Schäuble geiht mit sine egen Lüüd üm as dormols Schröder nor de Wohl 2005 mit Merkel — blots dat Schröder dornor politisch erledigt weer, un Schäuble höllt dat nich mol för nödig, sick anständig to entschülligen.

Wokeen ünner so en Chef arbeit, de kunn ok glieks to RTL gohn. In de ehr Norichtenavdeelung (up RTLisch "newspool") meenen bloß 4%, se warrn gerecht betohlt. Dree vun veer Journalisten dor föhlt sick respektlos behannelt. Dorbi is dat so eenfach, vun RTL hofiert to warrn: Gummisteebel antrecken un mit een gecastete "Fründin" debil dör de Wischen stampfen, dat bringt Quote un dormit ok Respekt bi RTL. Schäuble dorgegen kunn in Umgang mit Presselüüd bloß noch vun de Russen lernen...

Wat dor mit unbequeme Journalisten mokt warrt, dat harn de Werber vun de Agentur Jung von Matt all seit ehre "Du büs Düütschland"-Kampagne verdeent, un nu noch mol so veel: Bi den rituellen, all Johr wedderkamen Castor-Protest loten se en poor betohlte "Anhänger" vun Sixt mit en Reklame-Transparent för ehren LKW-Verleih mitlopen. Desülbe Agentur arbeit (?) blangenbi ok för de AKW-Bedriever vun RWE. Wohrschienlich lot se bi'n neegsten Castor-Protest en poor "Anhänger" mit en Pro-Atom-Slogan mitlopen. Demonstreern, ohn to kasseern? En marketingtechnischen Super-Gau.

Bi'n Protest gegen Stuttgart21 sorgt al lang en Werbeagentur för de richtigen Klöören, Spröök un Aktionen. Dormit sünd de Grönen wohl endgültig "in de Midd vun de Gesellschop ankomen". As neegst warrt Bilfinger Berger denn anbeden, den Protest gegen Stuttgart21 to sponsern. Den needen Bahnhof buut se natürlich ok. Frogt sick bloß noch, wekeen de Proteste gegen den neegsten G20-Gipfel anföhren schall — Thomas Gottschalk oder Dieter Bohlen?

Dat is to'n Glück nich min Bustell, meent

Maat Jan



na baven