Maat Jan ut BremenMaat Jan höört nix as:

Gedöns & Gesabbel


Nu geiht dat wedder los! Ick weet gor nich, wo ick dat nömen schall — "Gedöns" het Gerhard Schröder jümmers seggt to al de Themen, de em nich interesseert harrn: Froons to'n Bispeel — ick meen inne Politik, privat harrn de em woll interesseert...; ober ok Kinner, Familien, Soziales... oder leever "Gesabbel", as Helmut Schmidt to sin Tied jümmers seggt hett: "Hol mit dat Gesabbel up!" Hüüt is he al lang pensioneert, man mit sin Gesabbel kriggt he jümmers noch dicke Böker, Talkshows un sin Konto vull.

So oder so, een oles Gedöns un Gesabbel geiht nu wedder vun vorn los: Dat mit dat Atoom. Alltohop sünd se wedder an Gang mit dat Atoom. Un de meesten sünd bloß dorgegen. Dorbi weet ick gor nich worüm? Mi persönlich ton Bispeel hett noch nienich een Atom irgendwat daan. Nienich! Ober dat is ok wedder typisch: Dor is mol een, de is heel lütt un deit nüms wat toleed, glieks hackt se mit all Mann op em rum. Dorbi weet wi doch al, wat dorbi rutkummt, wenn een, as he lütt is, jümmers bloß op' Fell kriggt. Denn hest du up End en gespaltene Persönlichkeit. Denn steihs du dor! — un dor ok! Un jüs dat schall dat Atoom jo op keen Fall ween: gespalten.


Atomis in aartgerechte Haltung!

Dor kunnt sick doch mol de Friedensbewegten um kümmern. So veele gifft dorvun jo siet Joschkas Tied nich mehr, ober de poor Uprechten schalln ruhig mol wat doon gegen de Unnerdrückung vun dat Atoom. T-Shirts mit de Upschrift "Min Fründ is en Atoom" kunn ick mi dorto goot vörstellen.

Dat gröttste Gedöns wart disse Dag um en Sarrazzin mokt. Un dormit meen ick nich de muslimischen "Sarazinen", de in't fröhe Middelöller vun Karl den Groten massakreert worn sünd. Dat Dumme is man bloß, he har een överloten. Un den sien Norfahr het nu en Book schreben, wo sick al över opregt: "Düütschland schafft sick af". "Düütschland lacht sick schlapp" wär normolerwies de eenzig vernünftige Reaktion up so en Book. Man so eenfach is dat in Düütschland nich, dor wart ok dat gröttste Gesabbel dörkaut in al de Talkshows un Feuilletons, as wenn't jüs nix anners to beschnacken gev. "He hett in veele Saken Recht", heet dat denn överall, ok wenn kieneen seggen kunn, in welk. Dat een sien Eegenschopen vererben kunn un dat dat bloots dorüm överhaupt sowat as Tierzucht gifft — dormit harr he wiss Recht. Bloß har em wohl kieneen verklort, dat dat bi Mastswien un Zuchtbullen nich jüs um Intelligenz geiht.

Un dat de Juden en Intelligenz-Gen harn, wat se plietscher mokt as all anner Lüüd, dat hett he sogor in en Zeitung lest. Sarrazin kummt jo ut Berlin, un dor sitt jo ok en heel grode Zeitung mit heel grode Bokstoben, de, as wi al weet, nienich lücht. So en "Erkenntnis" passt jüs in dat Niveau vun de Zeitung.

De ehr böverste Boss sökt disse Dag per Anzeige en needen Assistent. Dat schall een ween, de "Övertügungen couragiert vertreten" kunn. De Neede schall Wirtschap studiert un Praxiserfahrungen in de Medien orr in en renommeerte Investmentbank mokt hebben, he schall sünnerlich veel Vermaak an politische Themen hebben un sick för Medien begeistern könen — un daför, woans een ehr nütt maken kann. — Dor weer uns Thilo doch jüs de rechte Mann!


Sarrazin in aartgerechte Haltung

Goot, de Bundsbank is nich direkt en Investmentbank, man dat Thilo en sünnerliche Begeisterung dorför hett, sin krude Ideen över politische Themen in all Medien to bringen, dat is wiss.

Ober denn schall de Neede ok noch "en journalistischen Achtergrund" un "Spoß an Verännern" hebben. Mach ween, dat Sarrazin disse Spoß, nordem he in sin Job rutflogen un in sin Partei kört dorvör is, so'n beeten vergahn is. "Spoß an Verännern" — wekeen fallt us dor wohl to in? Wekeen Journalist is dorför berühmt, dat he sick för sien Orbeit jümmers verännert? Dor gifft bloß een, heel klor: Günter Wallraff!

Wallraff as Assistent för den Boss vun Springer — mach dat goot gahn? Ick glöv bald nich. Wekeen Boss kunn sick schon doran gewöhnen, dat sin Assistent jeden Dag anners utsicht?

För de SPD is dat bloß wedder een Problem mehr, wo se al noog vun harrn. Man so'n lütt beten hebbt se ok sülbs Schuld: Wenn kieneen wat secht harr, weern wi doch nienich dorup komen, dat so een as Sarrazin in de SPD is.

Heel groot Gedöns gifft ok jümmers üm dissen Prozess gegen Jörg Kachelmann. Ok dor is desülbige Zeitung wedder jümmers dorbi. Dank disse fliedigen Journalisten weet wi nu veel Wichtigs: To'n Bispeel, wo veel Froons wannehr woneem wo foken mit den Kachelmann in de Puuch weern un wat se dor an leevsten daan hebbt. Un nebenbi erfahrt wi ok, woneem he geboren is: in Lörrach. Jüs dor also, wo nu en junge Fro Amok lopen is — vellicht ok ut Sehnsucht nor ehrn leevten Kachelmann?


Glückliches Poor?

Wat wi nich weet, is, wat de Deerns an so en zappeligen Wetterfrosch funnen hebbt. Villicht hebbt de al dat Märken vun "Frosch küssen, dormit he sick in en Prinz verwandelt" verkehrt verstohn. Deerns, lest de Geschichte normol richtig. Küssen helpt nix, een möt den Frosch anne Wand smieten, dormit he sick verwannelt! Dat is ober in Lörrach anschienend ok scheef gohn,

meent

Maat Jan



na baven