Staats den Elbsegler hett Kuddel hüüt en Clownshoot op

 

 

Kuddel sien Bertha will...

Mindstlohn för Rentner

Kuddel

Se harrn sik de Daagsschau ankeken un Kuddel weer an't Zappen. Siet se dat Abonnement för dat Daagblatt künnigt harrn un blot de Apothekenrundschau lesen, weer dat siene leefst Opgaav. Enerworrns mutt dat doch 'ne Sennen geven, de beid intressert!

"Kuddel, worüm hett de Bundsraat nu eerst den Mindstlohn vun Euro 8,50 beslaten?", fraagt Bertha unverwohrens.

"De hebben doch nu eerst de Mehrheit kregen dörch de wunnen Wahl in Neddersassen."

"Ach ja! Nix för ungoot! Du weets ja, ik verstah nich so veel vun Politik!"

"Jo, mien Bertha. Dat muttst du nich ümmer wedderholen! Dat weet intwüschen jedereen!"

Bertha weer nich mucksch un fraag foorts: "Gellt dat denn ok för Rentners?"

"Kloor, ok Rentners hebbt kapeert, dat du keen Politkenner büst! Renters sünd doch nich dösig!"

"Kuddel, du tühnst", sä Bertha duursam. "Du weetst nau, wat ik menen do. Dat gifft doch Renten ünner't Existenz-Minimum. De möten doch nu anpasst warrn!"

"Wo stellst du di dat vör?"


Is de Clown villicht "de Joker"?

Ehr Bertha anter, befehl se: "Hör op to zappen! Laat den Jauch an! Wenn wi al nich to Geld kaamt, will ik tominnst kieken, woans annere an de Moneten kamen! — Un nu will ik di mal en Vergliek maken: Ik arbeid runne tweehunnert Stünnen per Maand in'n Huusholt. Tweehunnert mal achtföfftig sünd eendusendsövenhunnert Euro. Ik krieg aver blot dat Halve!"

Kuddel weer enen Ogenblick baff. Denn lach he luuthals. "Dat muttst du Steinbrück vörslaan! Denn harr he endlich en Wahlkampthema un al twintig Millioon Rentnerstimmen seker!"

"Ach Steinbrück! De hett doch al allens verspeelt! Na Italien dörv he nich mehr rin. Dor warrt se em bi'n Krips kriegen! De Klone!"

"Clowns!"

"Nee, klaun schallt se em nich glieks. Dat weer ja Kidnapping!"

"Dat mach ja sien, man Klonen vun Minschen is in Düütschland verbaden!"

"Ach wat? Wokeen maakt denn solk malle Gesetten? Sachs Hartz veer, wat? Dorüm kaamt ok de Zirkusse nich mehr op'n grönen Telg! Ahn Klone geiht doch nüms hen! Man in Italien dröfft se dat noch, ja?"

Kuddel süüfz. "Op jeden Fall hett Steinbrück doch recht hatt mit siene Insaag gegen Grillo un Berlusconi! Blot as Kanzler-Kandidat dörv he dat nich seggen!"

Bertha maakt 'ne minnachtig Handgebeer. "De will doch gar nich mehr antreden! He weet doch, dat he gegen Angela kene Chance hett! Dorüm pedd he vun een Fettpott in'n neegsten! He luurt op de rode Koort vun de egen Partei. Wenn beid Italieners dat nich schafft, in de Regeren to kamen, hett Steinbrück de neegst Mööglichkeit, jem den Raatslag to geven, sik bi Roncalli to bewarven. Klone warrt ümmer söcht!"



na baven