Ünner KT sien Dannenboom…

vun Jens-Peter Bey

Af un an mak ik mi Gedanken, woans dat to Wiehnachten bi de Von-un-To's vör sik geiht. Hebbt se ok en Omorika mit düchtig Lametta un elektrische Lichter, wieldat ehr Slott nich affbrennen schall? Sitt se dor an'n Wiehnachtsabend mit Kartüffelsalat, Bockwuss un scharpen Semp to Disch? Oder mütt se braadte Duven, Wachteln un Kapaun schnabuleern?

Du kennst KT nich? Seggt "Gutti" di wat? He un Stephanie sünd Von-un-To's un mi beid bannig an't Hatt wussen. KT is "Karl-Theodor" un de best Politikernees, de wi in Dütschland hebbt. He sitt sotoseggn op de Reservebank. Wenn uns Kanzlersche Wehdaag kriegen schull, brukt he blots "Ik bün all dor!" to ropen un warrt achteran Kanzler. Un denn liggt ganz Dütschland vör so'n fixen Dutt as KT op de Knee.

Gutti, neee! De Helm is verkehrt!!!

Wat dat mit sien Dannenboom to doon hett? Dor mutt ik 'n lütt beten uthalen. Pass mol op. Bi di liggt doch ok af un an wat Praktisches ünnern Wiehnachtsboom. Bi KT is dat jüst so. 8x4-Seep för 24-Stünnen-frisch hebbt de Guttenbargs nuch. Aber wat KT sien Wiehnachtsmann nie nich vergeeten deit, is 'n Putt mit Pomad', en Tuuv mit Brylcreem un blangbi dat Dree-Wetter-Taft. Kennst du doch: Dat Hoor sitt, wo immer du mit'n Fleeger büst. In Hamborg hült dien Hoor, ok bi Schietwetter, jüst so as bi den Stopp in München. De Sünn in Rom kann dat Hoor nix anhemm, wenn du dat düchti intaften deist. De Locken küselt. Keen scharpen Wind kann ehr wat anhemm. Un wenn du forts na Kabul wullt, all'ns keen Problem!

Du un ik hebbt nix in Kabul verlorn. Bi KT is dat anners. He is Bunnsminister för dat Trüchhauen, wenn uns een an de Wull will, so as düsse Talibans rund üm Kabul. Wenn de Dütschen in de Bargen an'n Hindukusch nich rümballern doot, is de Freeheit miteens ok op'n Bungsbarg un in Bayern, Barmbek un Bützow perdü.

O nee! Al wedder de verkehrte Helm!

Afghanistan is bannig wiet weg. Glövst nich, wi langwielig dat is, dor so alleen hintokutscheern. Nülichs grient Gutti sien Steffi an: "Kuffer packen, du kümmst mit 'na Kabul, all inclusive!" Jungedi, wat hett de Deern sik verfehrt. Se kreeg enen roden Kupp un sä, wat Fruunslüüd immer seggn dot: "Ik heff nix antotrecken, KT!"

De Reis is vörbi. Vunwegen nix antotrecken. De Deern hett doch nett un adrett utsehn un öberall en gode Figur affgeben. Dat weet nu alle Welt. Laberking-Kerner un all de tofällig mitbröchten Jubelfuzzis vun BunteBamSBild hebbt dat fein vermeldt. Op de erste Siet hett mien Billerblatt se ünnerbröcht, in een Stück un in Vulltüch vun de böbelste bit to de ünnere Kant: "Wir finden das Gutt". So groot sünd nich mal de Kanzlersche, Mudder Teresa un Tatjana Gsell rutkamen.

Gutti-Plakaat in Hamborg, knipst vun Katja Renfert

Wat en Fru an de Front to dregen hett, dor makt Steffi nüms wat vör. Den blauen Parka kannst nich mit 'n Burka verwesseln. De doden Katteekers an den Pelzkapuzenrand gaht noch as lütt' Kollateralmalör weg. Steffis Holtfällerhemd mit bunte Karos ritt allns rut un korrespondeert so'n lütt beten mit KT sien Schal. De Rolli dorünner in khacki un de Büx in sandfarv dögt wat för de Front, jüst so as de Isenhoot. Steffi hült em immer in de Hand. Kannst ehr dat verdenken? Een Kilo Isen op'n Kopp verschanduleert de schönste Front-Frisur. Op den Kattenstieg in Kabul un Masar-el-Scharif modelt uns Stephanie all de Heidis, Claudias un Naomis glatt an de Wand.

Steffi? Steffi, büst du dat? Nee — süht to patent ut...

Rundüm tofreeden weer se liekers nich. Ünner veer Oogen hett se ehren KT düchtig op'n Pott sett: "Mutt dat sien mit düsse gräsige Plattmaker-Splitterwest? Dor is ja nix mehr na vun mi, as Fruunsminsch meen ik!" KT kreeg rode Ohren, hett sik dat markt un glieks den Wiehnachtsmann Bescheed seggt.

Kittelschört un Blaumann liggn bi unsereen ünnern Dannenboom. Bi de Guttis is dat 'n lütt beten anners. Nich GucciGucci alleen, ok Steffis niede Splitterwest in 38/75-B stickt di in de Oogen. De is op Figur sniedert un mit de twee Buulen dat schönste Geschenk. So kümmt Steffi dat topass. Nu gifft dat nix mehr to quarken, vunwegen Unisex un Plattmaken. Dor hett se lang goot vun. Wenn dat in Afghanistan mal to Enn geiht, lött sik de West ok annerwegens bruken. So fix geiht dat nich mit den Weltfreeden, ok wenn in de Wiehnachtstied veel dorvun to hören is. — Ünnern Boom liggt ok noch dat lütte Schwatte. Is so'n Basic. Steffi kann dat för'n Klock-Fief-Tee bi de Naver-Baronessen bruken. Un wenn't ganz leeg kümmt, treckt se dat in de Kark an, wenn't för KT un för Dütschland wedder wat to truern gifft.

Och Steffi, neee! Al wedder de ganz verkehrte Optoog!

Ballerspeele liggn dor nich ünnern Boom rüm. Dat hört sik nich bi de Von-un-To's. Aber 'n lütt beten Elektronik mutt sien. De plietsche Klapprekner is för Stephanie. Se schall dormit Kinnerschänners för dat Bildungsprogramm RTL 2 jagen.

Un wat hebbt de beiden langbeenigen Poppen Barbie und Ken ünnern Dannenboom verlorn? Speelkram? Vunwegen. De sünd jüst so ut Ei pellt as Steffi un KT. "Sühst wohl, wi künnt uns sülm op de Schipp nehmen. Dat kümmt an bi de Lüüd!", künnt de beiden tofreeden seggn. Tofällig liggt dor ok noch'n lütt Book mit "Gedanken un Erinnerungen" rüm. Hett Stephanie as geborene Bismarcksche achtersinnig utsöcht. "Dat is vun den ersten dütschen Kanzler", will se bi't Utpacken seggn un em toplinkern: "Ach wie goot, dat keeneen weet, wie de nächste Kanzler heet!" Marks Müüs?