Nu looppt se wedder

vun Silke Frakstein


Ik mag geern Lüüd bekieken. Ne, nich de an de Elv, de dor langstolzeert as de Hohn op'n Messhupen. Ik sett mi hier in Neendörp in dat Gehege. Fein kommodig in de Sünn.

Kiek, dor kümmt ok al de eerste. Jawoll, he löppt as'n Maschien. Rechts, links, rechts, links, jümmers liekut — "ut'n Weg, hier is mien Revier!"

Duert nich lang, denn trippelt de nächste üm de Eck. Ik glööv, de weer mol bi't Ballett. Huch, huch, huch un hoch den Foot. Ober em geiht dat goot dorbi, he lacht mi to.

Hacki de Specht seggt ok wat. Ober de beiden, de dor nu ankoomt, de heuert dat wiss nich. He vörn weg, natt von'n Kopp bit no de Büx. Un denn hett he woll'n Steen in'n Schoh, so'n Gesicht mookt he. Sien Fro as so'n lütte Muus op de Flucht achteran. Mit'n Pulsmesser an'n Arm un'n dösigen Blick. De schull sik man leber bi mi op de Bank setten.

Egentlich ward dat Tiet för... — jawoll dor kümmt se: Speedy Gonzales. De löppt jeden Dag. Egol, wo ik grood bün, Speedy kümmt üm de Eck. De is sowat von spiddelig, dor heuer ik dat Klappern von de Knoken al von wieden. Villicht schall se den lütten Dicken wat afgeven, de dor nu anjachelt kümmt. Mien Handy heff ik praat för den Dokter. Ober nee, noch höllt he sik op de Been un plumpst üm de Eck.

Eins zwei, eins zwei: "Habe ich dir schon von dem neuen Jogakurs erzählt?"
Twee "Fofftiger" in't niege Outfit. De seht un heuert nix.

Ach is dat scheun, so in de Sünn to sitten.

Schiet ok, nu ward dat luut, twölf Wuffis seggt sik "Goden Dag".

Ik segg Adschüs un goh nu Middageeten. Gänsekeule in Sauer mit Bratkartoffeln.
De Looperee weer bannig anstrengend!!


Na Silke Fraksteins Homepage


na baven