Is dat Freedens-Dividende?

vun Jens-Peter Bey


Schönen Schiet, wenn miteens wohr ward, wat veele Lüüd am leevsten wüllt: keeneen schall mehr Soldat speelen. In uns Dörp schüllt nu 2.000 Manns- und Fruunslüüd ut de Kasern' jagt warrn. Wat nu? Wat kümmt achteran?


Lerrig Industrierüüm. Foto ML

De Bäcker blifft op sien Rundstücken sitten, un de Klempner kriggt vun Staats wegen nix mehr to klütern. De Babutsch kleit sik vör Langewiel den Rüch mit Kamm un Böst. Uns Döner-Keerl kann sick mit'n scharp Mess blots noch in'n Finger snieden. De Tanksteed lockt ok mit Discount-Diesel keen Korporal mehr ran. Weltünnergang is anseggt: De Fritten freert in'n Drahtkorv fast, dat BiFi blifft bi'n Koopmann liggn un schalet Beer drüppelt in de Gaststuuv... Prost Mahltied, wenn so de Freedens-Dividende utsehn deit, denkt de Geschäftslüüd sik.

Börgermeister un Paster schüttköppt üm de Wett: Wat schall ut Kinnergoorn un School warrn? Allns veel to groot! Hebbt se de Stüergeller dörch'n Schosteen jagt? De Kassenbaas vun de Gemeen kümmt nich in'n Slaap. De Kläranlaag is veel to groot un to düer. Wohr di weg, wenn de Suldaten för de Schieteree keen' Penn mehr tobetahlen doot. De Reken för dat Afwater verduppelt sik.


Lerrig Industrierüüm. Foto ML

Is nu nix mehr mit Grooten Tappenstriek, Tschingbum, Schnätterätäng un blanke Oogen. Dat Klooksnacken mit de Böbelsten in Uniform is för Börgermeister, Gemeenvertreders un annere Dörpshonoratschoren ok vörbi. — Tweedusend Lüüd mütt nu enerwegens affblieben un niede Arbeit, niede Scholen, niede Navers, niede Frünn finnen. Dat is hüüttodaags nich so eenfach. Twintig grote Blocks, Warksteed un Halln tövt op Kooplüüd, Inschenöre un Ünnernehmers mit 'n plietschen Kopp. Un dor wo de Soldaten nu dörch Matsch un Modder krupen dot, künnt de Buern in tokamen Tiden Nawaro wassen laten. Nawaro seggt di nix? Dat sünd de nawassenden Rohstoffe. Gifft nich noog Mais rundrüm für de grooten grönen Energie-Moscheen.


Energiemoschee, äh: Biogasanlaag. Bild: Vortexrealm/Wikimedia Commons

Veele Lüüd weern füünsch as vör 53 Johrn de eersten Suldaten in dat Dörp keemen. Vun dat Scheeten un dat Soldatspeelen harr man na'n Krieg de Nees full. "De Hand schall affuulen, de wedder na de Flint griepen will", hett vörmals en seggt, de later as Bunnsminister för dat Trüchhauen tostännig weer. Dor is nix affuult.

In Sneekatastrophentieden un bi Flootwater weer Larm vun de Panzers un vun de Quirl-Fleegers Musik in uns Ohrn. Bi dat Frieschüffeln un Affdämmen hebbt de Soldaten wiest, wat se künnt, wenn Minschen in Not sünd. Kannst hüt noch den Hoot trecken!

Dag för Dag hebbt de Olivgrönen mehr as een halv Johrhunnert Deenst dahn — mit lange un mit kotte Hoor — un düchtig Freeden produzeert. So düchtig, dat Holsteener un Meckelnbörgers ünner een Dack krupen kunnen un sik nich länger in Bunnswehr un Vulksarmee in't Visier harrn. Is beter so.

Mulmig is mi tomood, wenn ik doran denken do, dat de Soldaten an'n Hindukusch Kopp un Iesenhoot hinholen mütt. Op de anner Siet vun de Eer ward uns Freeheit deffendiert. So vertellt dat truschullig klooke Politikers. Wüllt de uns vernarrn holn? Wi tövt op dat Kupong-Snieden för de schönste Freedens-Dividende, de dat gifft: Af na Huus un keen Drüppen Bloot mehr! Trüch ünnert Kasernendack! Un wenn dat nich mehr in uns Dörp is? Is liekers Freedens-Dividende.


13.5.2012


na baven