Över en "Öffentliche Inrichtung"

vun Günter Sohnemann

Mi is dat egol, ob du Platt snacken deist. Wenn du lesen kannst? Denn do dat. Mi is infulln, dat ick jo nich över uns komodigste Inrichtung von uns "Öffentlichte Inrichtung, de Toiletten" schreven har. Dat is jo bannig wichtig, dat en Minsch doröber mol schrieven doon mutt! Villicht gifft dat denn en poor Politickers mehr, denen dat Thema jo ock bannig wichtig wär.

Vörderst kann ick hüt nienich verstohn, dat se all de "Öffentlichen Toiletten" dicht mokt hefft. Denn scheten ward doch alle Doog! De eenfachen Lüüd op de Stroot doot dat. Nee, nich op de Stroot. Tohuus, dor hefft se en "Stillen Ort" — nu weetst Bescheed.

Ick gleuw, de Politikers un uns Bürgermeester scheet in ehr Büxen. Wat schall ick denn denken? Schiet to moken is er Pläsier. De mokt all Daag so veel Schiet, de markt dat gornich mehr.

Süht ut as Kachlen in't Klo, is aver de Wand vun de Elphi

Muttst bloots eenmool anne Elbfilomonie denken, wat se dor mit uns Zaster, uns Stüergroschen buut hefft an'ne Elv. Dorvun kunnst an'e Elv un anne Fleeten un an de scheune Alster mit ehr Kanälen un an'ne Bille för jeden Inwohner vun Hamburg en egen "Paddemang" buun. (Wat en "Paddemang" is, dat beschriev ick di in dissen Stremel.) Jo, un denn hest noch so veel Zaster över, dat se de Elbfilomonie ock noch buun köönt, wenn se mit uns Zaster beter oppassen döön.

Spoorn köönt se inne Elbfilomonie anne Klosetts. De Besökers vun de Elbfilomonie kriegt freen Togang to'n "Paddemang" an'ne Elv.

Ick kann di seker vertelln: Freuher geev dat mehr vun disse "Öffentlichen Toiletten"! Nu hefft se hüüt meist alle afschafft — oder privatisiert. Ick weet von veel Rentners, de nich mehr so "dicht" sünd as Junglüüd. De mucht gornich mehr geern inne Stadt föhrn to'n Inkeupen. Un wenn se dat mol waagt, un se kriegt denn mol so'n Grummeln in'n Buuk... ehr Ogen kaamt meist ut den Dööz! Passeert di dat, denn höp ick för di, dat achter di op de Rolltrepp in't Keuphus en groten Politiker steiht, nee, beter, de Bürgermeister steiht achter di, op de Rolltrepp. Dat drept denn nich bloots di alleen. Wat de Politiker di helpen de? Ick gleuw, de schitt sick sülven inne Büx. Ik segg, ik gleuw dat, weten kann ik dat nich.

Over frein dä mi dat doch. Weer doch good, wenn de Politikers feuhlt, wie bescheeten dat uns öllerhaftigen Bögers geiht. Un viellicht markt se ock: Dat gellt nich bloots bi't Schieten. Ick feul mi bannig bescheten vun uns Politikers ok op anner Rebetten. Un disse Lüüt mookt uns "Öffentliche Toiletten" dicht! Dor segg ik bloots: Buut Paddemangs för Hamborgs Bürger.