Menen

 

Wat ik menen do

Notizen vun Dieter Guderian


Dieter Guderian is an'n 9.10.2009 doodbleven.


12.4.09 Leihrööd

Glück hatt! Düttmal will de Bundsregeern nich Milliarden, sünnern blots Millionen Euro in den Orkus smieten. Üm wat geiht dat? De Verkehrsminister will 10 Millionen Euro spendeeren för eenen Modellversöök "Innovative öffentliche Fahrradverleihsysteme". Toeerst dacht ik, dat wär noch en Aprilscherz. Wenn ik so wat lesen do, dennso fallt mi toeerst dat Woort "Populismus" in. De Lüüd schullen denken, "de Mann denkt doch an allens". In de Utschrieven von den Minister Wolfgang Tiefensee steiht:

Kein Stau, keine lästige Parkplatzsuche, weniger Lärm, weniger CO2 und mehr körperliche Fitness. Das sind die Vorteile für jeden, der auf kurzen Strecken das Auto stehen lässt und auf Fahrrad, Bus und Bahn umsteigt. Doch was, wenn man an der Haltestelle aussteigt und das Büro, der Sportplatz oder das Kino noch kilometerweit entfernt sind? Was, wenn Touristen kein eigenes Fahrrad zur Hand haben? Öffentliche Leihfahrräder sind hier die Lösung.

Nu köönt sik Städer mit mehr as 100.000 Inwahners bi eene Stee mellen, de he insett hett, de dat ganze Tüch erst eenmal sammelt un sik achteran klok moken deit, um rutofinnen, wohen se dat Geld geven schall.

Min Meenen is: de Minister spinnt. De Mann weet nich, vun wat he snacken deit. De Mann hett wohrschienlich siet Kinnertieden nich mehr op't Fohrrad seeten und weet nich, woans de Millionen Lüd, de en Fohrrad nütten doot, dormit to Kehr gahn doot. Dat gifft in alle düütschen Städer so veele Minschen, de vun sik ut mit'n Fohrrad ünnerwegens sünd. Wenn de Minister in Berlin mal in de S- oder U-Bahn instiegen wöör, dennso wüßt he, dat de Radfohrers ehre Drahtesels in de Bohnen mit sik föhrt, üm över gröttere Strecken weg to kamen. So is dat middewiel in de mehrsten groten Städer. Dor kann een sien Fohrrad ok in de Strotenbahn oder in'n Bus mitnehmen. Wenn ik as Tourist mal wohen fahren will, wo dat schön is, dennso kööp ik mi bi de Düütsche Bahn een Ticket för mi un een för dat Rad. Un wenn ik dor bün, denn swing ik mi op'n Saddel un mok mit eegene Kraft mine Tour.

Twee "Modelle" mit Leihräder ut miene Gegend kenn ik all. Dat eene is dat "Rode Fohrrad" in Bremen. Dat Theater Bremen hett vör eenige Tied opropen, dat de Lüüd ohle Fohrrööd, de se nich mehr hebben wulln, afgeven. Se hefft de veelen Räders repareert und allesamt rood anstreeken. Eene korte Tied hett man se noch in de Stadt to sehn kreegen. Dat duurt ober nich lang, dor kunn man frogen "wo lopen se denn?". Se wärn eenfach weg. Dat annere Modell heff ik in mine lütt Stadt Achim (30.000 Inwahners) beleevt. Dor hefft se de veelen Drahtesels bi'n Fundamt, de keeneen mehr hebben wull, wedder trecht mokt, alle witt anmoolt un ok as Leihrööd "öffentlich" henstellt. Dree Mal dröffst du nu raden, wo dat mit dat Modell leep. Ik segg blots, dat no korte Tied keeneen vun de Dinger mehr optofinnen wär.

Fazit: Man kann nu mal sehen, dat de Minister wohrhaftig keenen rechten Överblick hett. As dat mit de Düütsche Bahn so scheef lopen dä, dor hett he blots dicke Backen mokt un wüss nich, wat to maken wär. Will he nu erst eenmal wedder lütte Brötchen backen? Ik frog mi: För wat kriggt de Mann eegentlich betahlt?


7.4.09 Hülp vun'n Staat

De Düütsche Industrie- un Hannelskammerdag hett siet 26. März eenen niegen Präsidenten. Hans Heinrich Driftmann heet he. De Weser-Kurier hett em fraagt, wat he över de Krise in de Weertschop denken deit. He seggt, dat dor groote Ünnerscheed sünd. Bi de Metall- un Elektroindurstrie, vör allen bi de Bedrieven, de för de Automobilindustrie tolevern doot, süht dat nich good ut. Woneem för den Export schapen warrt, süht dat sünnerlich slecht ut. Bi'n Kosum löppt dat anners. He seggt, dat de Dütschen sik bi ehre Inkööp nich trüchhollen. För ehr Eeten, Drinken un för ehre Kleedasch loten se örntlich wat springen, mehr noch as all de Johren vörher.

Dennso fragen se Driftmann no sien Meenen över de Kreditweertschop. Dat kümmt nich inne Gäng, seggt he. De Banken hefft no den grooten Crash so veel Bever in de Büx, dat se de Kundschoop veel to lang töven laat. De Baasen vun de Banken wulln nu op Sekerheet buun un speelt alltohoop den Bürokratius. De Bedrieven stünnen an'n End mit leddige Hannen vör de Döörn. Woneem sünd de Problemen an'n gröttsten? He antert, dat is bi den Autoberiek an'n slimmsten. Bi de grötteren Bedrieven gifft de Banken to 20 Perzent keene Krediten mehr. Dat ähnliche is bi Transport, Schippfohrt un Metall. Driftmann meent, dat dorvun de Gefahr utgeiht, dat de Arbeiters no Huus schickt warrn mööt. De Banken schullen mehr mit Geföhl, avers ok mit mehr Kurasch hanneln.

Schall de Staat ok bi de "Realweertschop" de Bedrieven ünner de Arms griepen?, hefft de Schrieverslüüd Driftmann fragt. He anterte, dat de Politik bi de Banken wat doon mutt, wieldat de Banken de heele Weertschop in'n Gang holen. Wenn se eenen Ünnernehmer Hülp tokamen loten, dennso warrt annere eenen Nadeel hebben. Dat dröff de Staat nich. Wat is mit Opel? Dorto seggt Driftman: De Arbeiders bi Opel doot em leed, avers wi möten an den Schaden denken, de sowat no sik trecken deit. För den heelen Middelstand gifft de Staat ok keen Penn. De Staat hett keen Verantwoorden dorför, dat to veel produzeert warrt un dat de Managers Mist buut hefft.

In dat Magazin Focus is to lesen, dat GM siet veele Johren dick in de roden Tallen steken deiht un dat de amerikaansche Konzern nix as Schullen hett. Dat geiht so wiet, dat de Opel-Fabriken in Dütschland noch nich mal mehr GM tohören doot; de hebbt se as Pand an de Banken geven müsst. Opel hett nix mehr as siene Arbeiders. Nu frog sik eener, wat sik de Politik in Dütschland dorbi denkt, wenn se so doon deit, as wenn bi Opel noch wat to redden wär.


5.4.09 Nochmal wat över de Bank ahn Boden

Keen Aprilspaaß wär't, as de Hamborger Börgerschop an'n 1. April mit de Stimmen vun CDU, GAL un SPD besloten hett, de HSH Nordbank Hülp vun'n Staat to geven. En poor Daag later hett nu de sleswig-holsteensche Landdag datsülvige besloten. In Kiel hefft CDU un SPD ehren Segen geven, dat de Bank ene Sprütt vun 3 Milliarden Euro in de Kass kriegen deit un dorto ok noch ene Sekerheit över 10 Milliarden. As bekannt, sünd Hamborg un Sleswig-Holsteen tosomen Deelhebbers över 59,51%. De Sporkassen sünd mit 14,82% mit vun de Partie. Un denn is dor noch de amerikaansche Deelhebber J.C. Flowers mit 25,67%. Sporkassen un Flowers hollt sik bi dat Stütten op Distanz. För dat, hefft de Parlamentariers besloten, schallen se ok nich vun de Hülp profeteeren. Wat jümmers dat heeten schall.

As de Kieler Landdag över den dicken Brocken verhanneln dä, seet de Baas vun de HSH Bank, Dirk Jens Nonnenmacher, boben op den Platz för de Tokiekers un hürte andächtig to. Sowiet bekannt, hett düsse Mann jümmers bloots tohüürt un keenen eenzigen Vörslag mokt, op welk eene Aart un Wies siene Bank wedder ut den Schiet rut kamen kunn, hett nich ja un nich nee seggt. As överall bi de dütschen Banken, de sik dör ehren Unverstand in de Miesen bröcht hefft, sitt de feine Herr liekers noch op sienen hogen Stohl. He hett jo nix utfreten, blots tokeeken, as allns in'n Keller güng. Een ganz lütt beten wulln se em avers doch bi de Büx kriegen: De Lüüd in'n Vörstand vun de Bank schalln nich mehr as 500.000 Euro in't Johr verdeenen. Boni sünd so lang ganz un gaar streeken, as de Bank nich wedder ut den Schiet rut is. Wenn man bedenken deit, dat de Bundsfinanzminister so bi 150.000 Euro oder de Bremer Börgermeester so bi 130.000 Euro in't Jahr to vertehrn hett, dennso müßt Herr Nonnenmacher eegentlich mit dat Geld ganz good trecht kamen.

En Nospeel gifft dat op jeden Fall: SPD un Linke in Hamborg wulln, dat en Utschuss insett warrt, de ünnersöken schall, wat allens mit rechte Dingen togüngen wär. Wenn de Hamborgers ehren Andrag vörleggt hefft, will de Kieler Oppositschion mit FDP, Gröne un SSW notrecken. De Baas vun de SPD-Fraktschion in Kiel, Ralf Stegner, will dat "Verfahren konstruktiv begleiten". He seggt, hee deit nich glöven, dat de Ünnersöken wat bringen warrt. Dor kannst mal sehen, wat dat nu wedder för en Klookschieter is. He weet dat all nu. So sünd uns grote Politikers.


31.3.09 Swattmaleree

All de veelen Länner op den Globus sünd in de Knee gahn. De Finanzweertschop hett allens daan, üm so enen lütten Weltünnergang in Gang to setten. De Banken sünd vörut gahn. Se wulln sik dumm un dösig verdeenen. As man sehn kann, hefft se sik so bannig verrekent, dat se in't deepe Kellerlock to sitten kamen sünd. Se hefft uns wiest, dat se nich noog Künn hefft, üm dat Schipp op gode Fohrt to hollen.

Nu is gode Raad düüer. In'n Oogenblick kann keeneen seggen, wo dat tokünftig lopen kann. As wenn se sik verafreedt harrn, is nu aver en Wettstried in Swattmaleree in Gang kamen. Wokeen geiht vöran? De Banken! De een denkt sik ut, dat uns' Weertschop so bi dree Perzent inbreken warrt, de anner find't dat nich gruslig noog, he sett noch een Perzent boben op. Den Vagel hett utgerekent de Commerzbank afschoten. De kennt wi all, wieldat se düchtig in de Miesen kamen is un sik dorto noch an de Dresdner Bank gewaltig versluckt hett. De Commerzbank also meent, dat de Weertschop mit söben Perzent afsacken warrt. Keene Ahnung hefft düsse Wohrseggers, woso söben Perzent! Is dat nich een ganz un gor verdüvelte Art, Unroh to maken? Se schullen allesamt lever ehr Muul hollen. Dat se nich künnig noog sünd, in de Tokunft to kieken, hefft se uns wiest. Dorvun sitten wi doch in'ne Schiet.

Mi kümmt dat bald vör, as wenn wi afsapen sünd as de armen Lüüd in New Orleans in't Johr 2005, as dor de de Hurrikan Katrina käm un de Dämm breken. Dat is hüüt noch nich wedder op de Reeg.


31.3.09 Dat grote Zockerspeel

Dag för Dag kaamt wi ut dat Schüddkoppen nich mehr rut. Op de eene Siet warrt uns künnig, dat eenige Anstellte bi de Banken ehre Kundschop Poppieren verköfft hefft, vun de se sülven nich weeten, wat dorvun to hollen is. Se harrn dat giftige Tüüch an'n Mann oder de Froo bröcht, wieldat dor allerhand Rendite rutspringen schall. Nich so veel för de Kundschop, aver för de Banken. Nu, wo de Blaas platzt is, moken de lütten Bankers dicke Backen. Viellicht hefft se sik sülben de aasigen Poppieren köfft. Op jeden Fall weeten se nich, wat se ehre Kundschop antern schalln, wenn de ehr Geld trüch hebben wulln.

Dennso gifft dat noch de "groten" Baasen bi de Banken. För disse Lüüd süht de Welt ers eenmal nich so finster ut. Se harrn ja ehr' Verdrääg, in de steiht, dat jem Boni tostünnen. Uns Kanzlersche hett düsse Saak bi Anne Will op den rechten Punkt bröcht: Se dacht jümmers, dat eener Boni to kregen hett, wenn he Winn för de Bank moken deit. Nu mutt se sehn, dat disse Lüd ok Boni kasseeren doot, wo dat Geld vun de Banken fleuten gahn is. Nu denkt de Republik daröber no, worüm de Banksters nich "Mali" to betohlen hefft för dat, wo se ehre Bank to Malör komen laat. Geiht nich, seggt de Avkaten, dat is nich recht. Eenige ganz wenige vun de groten Bankers hefft dat aver liekers spitz kregen, dat de mehrsten Minschen bi uns dat nich in Ornen findt, wenn se sik de dicken Millionen insacken doot. Se wüllt de Boni nich nehmen, to'n Deel nich, seggen düsse Bankers.

Just hett de "Comdirekt", een Dochter vun de Commerzbank, frogen laten, wokeen de Banken noch truun deit. Man mutt sik nich wunnern, wat de Lüüd antert hefft. Blots negen Perzent doot ehren Banker vertruun, 71 Perzent hefft de Näs vull vun allns, wat mit Wertschop un Finanzen to doon hett. Wat seggt de Baas vun de Comdirektbank? He seggt: Dat is en gewaltigen Backs för de Banken, de Sporkassen un ehre Anstellten, de de Kundschop raatslaan schalln.

Nu sitten de veelen Banken total in'ne Schiet. Vun alleen kümmt se dor nich wedder rut. De veelen Milliarden, de se mit Afsicht in'ne Grütt smeten hefft, köhnt se nu nich wedder trüch halen. Dat is nu de Momang, wo de Staat allns an setten deit, üm de Banken wedder ut den Maad rut to halen. Mit veele Milliarden, versteiht sik, mit veele Milliarden, de de Staat gar nich to eegen hett. Wo her kümmt dat veele Geld? Dat kümmt vun uns lütte Lüüd. Vun de lütten Lüüd gifft dat an'n mehrsten. Wat wi hüüt nich betohlen doot, dat haalt de Staat sik later. Eersmal warrt en beten mehr Geld druckt. Kümmt denn de Inflatschion, sünd wi all wedder mit vun de Partie. Wenn't nich mehr langen deit, kann de Staat uns noch en beten mehr Stüüern opdeubeln.

Wat mi wunnern deit: Dat uns dat jümmers noch heel good geiht. Töv man af!


8.3.09 Milliarden för Gaza

De Ägypter Hosni Mubarak reep un de halve Welt reiste no Scharm al-Scheich. De Klingelbüdel mokte de Runn. Achteran harrn se so bi 4,5 Milliarden Dollar op'n Dutt. Saudi-Arabien leet sik nich lumpen un gäv eene Milliarde, de USA nich ganz so veel, aber immerhin 900 Millionen, de EU stüert 554 Millionen bi un ok Düütschland will 150 Millionen locker moken, seggt de Butenminister Steinmeier. Dat Geld schall nu den Gazastriep to goot kamen. Dormit schall opbuut warrn, wat toletzt tweischoten un kaputt bombt wär. Denkt man an dat veele Geld, dat se den Stüertahler ut de Tasch trecken doot, üm de gewaltige Finanzkrise to stüern, dennso is dat blots en lütt Druppen, "Peanuts" seggt de Banker dorto. Op de annere Siet is dat veel, wenn man doran denkt, wat allens dormit mokt warrn kann.

Wat de groten Baasen vun de veelen Staaten sik bi düsse Gaza-Kollekte dacht hefft, dat blifft jem ehr Geheemnis. Se weten, för wat dat bruukt warrn schall, aber se weten ja gar nich, wo se dat Geld loten schallt. Wenn Mahmoud Abbas vun de Autonomiebehörde dat in de Hann' kriegen deit, dennso kann he in'n Gazastriep nich helpen; dort laten se em gor nicht dör de Port. Wenn se dat Geld de Regeern in'n Gazastriep in'n Rachen smieten wüllt, dennso köönt se seker sien, dat de Hamas dat för Wapen utgeven wöör. In ehren Willn, to wiesen, dat se wat Godes doon wülln, hefft se anschienend vergeten, dat de Krieg twüschen Israel und de Hamas nich to Enn is. De Hamas will de Wapen nich swiegen loten un lett to, dat jümmers noch Raketen no Israel fleegen un Schaaden anrichten doot. De Israelis hefft jümmers seggt, dat se noch eenmal angriepen wüllt, wenn't nich anners güng. Dor fraagt de Welt sik, wat in düsse Situatschion mit de veer un eene half Milliarde Dollar denn passeeren schull. De Politikers köönt sik dat an't Enn licht moken: Dor is keen eenzige Chance, dat spendeerte Geld no Gaza to betahlen.

Wo lögenhaftig dat op de Konferenz in Scharm al-Scheich togüng, lett sik ok doran sehn, dat se glöven, se kunnen enen fienen Ünnerscheed moken twüschen de lütten Lüd un ehre Herrschop. Dat is aber nich so. Ene grote Mehrheet hett de Hamas op demokratische Art wählt un wünscht sik ok, dat Israel bald to Fall kümmt. Also, se wüllt gar keenen Freeden. Kiek ik no de annere Siet, no Israel, dennso lett sik sehn, dat se seggt, se wüllt Freden, seggt aber nau as de annere Siet, dat warrt wohl nich möglich sien. Wenn de niege Regeern eersmol dat Seggen hett, dennso köönt wi dormit reken, dat de nu gar nich mehr mit de Palästinenser snacken wüllt.

Grote Töön hefft se alltohop op de Konferenz speet. Se wulln, dat de ganze Welt ehr hören deit un weet, dat se Freeden wüllt, un dat se twee Staaten hebben wüllt, un dat so gau as dat geiht. Wat ik noch seggen wull, is, dat op de Konferenz vun de Israelis un vun de Palästinensers keeneen dorbi west is. De hefft se nich mit inlaadt. Dat is allens en Stück Weltgeschicht, de warrt uns keen' Oogenblick to Roh kamen loten.


5.3.09 Poolsche Polarisation

Politikers in Polen hefft sik fastbeten an ene Person, de dat nich verdeent hett. De Bundsdagsafordnete Erika Steinbach, Baas vun den dütschen Verdrevenen-Verband, is all siet vele Johren vun de nationalen Fundis in Polen to ene Hassfigur mokt warrn. Se hefft sik jümmer wedder niege slimme Saken utdacht, dormit de Froo keen Been op de Eer kriegen kann.

Fru Steinbach hett vör Johr un Dag tosomen mit annere Lüüd de "Bunds-Stiftung Flucht, Vertreibung, Versöhnung" op den Weg bröcht. Eener, de domols mit ehr tosomen güng, wär Peter Glotz, de al dot bleven is. Nu ist de Stiftung so wiet kamen, dat in't Düütschlandhus en Museum inricht't warrn schall. Dat Museum schall enen Biraat hebben. Dree Maten vun den Verdrevenen-Verband schullen to dissen Biraat höörn, ok Fru Steinbach.

Wat de poolschen Fundis sik nu allens utdacht hefft, üm de düütsche Bundsregeern dat Leven swoor to maken, dormit se nich tostimmt, dat Fru Steinbach in den Biraat kümmt, kann eegentlich gar nich wahr sien. Se hefft mit verdeelte Rulln Karrn vull Schiet op de dütsche Siet smeten. Se hefft ok dütlich to verstahn geven, dat dat mit de düütsch-poolsche Fründschaft sünst bald vörbi wär.

Wat mokt de bundsdüütsche Politik? Se kniept de Backen tosamen un mokt de Oogen dicht. Blots nix gegen de leven Polen doon! Se hefft lever dat Sülvstbestimmungsrecht vun den Verdrevenen-Verband mit Fööt pedd. Fru Steinbach un Fru Merkel hefft över de Saak ok noch mal snackt. Wat is dorbi rutkomen? De Verdrevenen-Verband mokt nu keenen Vörslag, dat Fru Steinbach in den Biraat kümmt. Nu stellt sik uns düütsche Politikers hen un sabbelt wat vun "honorig" und "respektabel". So wat vun scheel un lögenhaftig, wat wi in'n Oogenblick in't Kiekschapp un in de Bläder över disse Saak erfohrn, is lang nich mehr dor west. Ik frog mi, wat Fru Steinbachs eegene Partei, de CDU, sik eegentlich dorbi denken deit. De seggt blots, dat de SPD schuld is. De SPD hett ut den Mund vun Fru Gesine Schwan (dat is de, de staats Horst Köhler Bundspräsident warrn will) en Veto gegen Fru Steinbach ankünnigen loten. Wat de FDP in düsse Situatschion seggt hett, kann man getrost vergeten: Hü un Hott. De Grönen harrn al en Metz gegen Fru Steinbach in de Hand.

Vun all düsse ekelhaftigen Politikspelen is mi richtig övel worrn. Ik warr dat lang nich vergeten. De eenzige Troost is för mi, dat dor noch kloke Minschen sünd, de versöcht, de politsche Hysterie wedder op enen Bodden to bringen, de mit de Saak sülven to doon hett. Een darvun is Ralph Giordano. He gifft den goden Raat, sik eers mol de enkelten Fakten antokieken. Un nich toletzt gifft he uns Bundskanzlerin mit op ehren Weg, sik nich frömd bestimmen to laten, so as se dat bi Fru Steinbach daan hett.


26.2.09 Fatt ahn Boden? Bank ahn Boden!

De HSH Nordbank is een vun de Gröttsten in Düütschland. In't Johr 2003 is se tosomen smeten worrn ut de Landesbanken in Kiel un Hamborg. In dat Geschäft mit de groten Kunnen is se de Eerste op den Finanzmarkt. Ehr Rebeet sünd Shipping, Transport, Immobilien un niege Energien. In ehre Bilanz steiht wat vun 200 Milliarden Euro. De gröttsten Deelhebbers sünd Hamborg mit 30,41 %, Sleswig-Holsteen mit 29,10 % un de amerikansche Investmentkoppel J. Christopher Flowers mit 25,67 %.

Düsse Goliath vun Bank is ganz dull in de Miesen rinsackt. Mit ehr eegen Geld hett de Bank sik nich mehr ut den Modder rut kreegen. Nu hangt se heel un deel an de Lutschbuddel vun'n Staat. De Banken-Rettungs-Fond SoFFin hett de klamme Bank erst eenmol mit 30 Milliarden Euro Börgschop ünner de Arms grepen. Se hett klaar mokt, dat't mehr nich gifft. De Regeern vun Hamborg, Ole van Beust, un vun Slewig-Holstein, Peter Harry Carstensen, hefft sik nu hensett un sik frogt, wat se mit de HSH-Liek moken schulln. Starven loten wulln se de Bank nich. Darüm hefft se erst noch eenmol 3 Milliarden "Eigenkapital" an de Bank geven. Dorto hefft sik de beiden Bundslänner noch eene Börgschop vun 10 Milliarden opsackt.

To'n Glück gifft dat bi uns noch un noch "Sachverständige", to'n Bispill den Baas vun dat Hamburgische Weltwirtschafts-Institut, Straubhaar. De meent, dat allns wedder beter warrt, wenn de Konjunktur in de Mitt vun düsse Johr wedder antrecken deiht. Dennso wär dat möglich, nächst Johr wedder ene "anständige" Dividende op de 3 Milliarden Eegenkapital uttoschütten. Stören deiht Straubhaar de private Investor Flowers. Den worr he an'n leevsten leddig gohn. Wat Straubhaar seggt hett, is in miene Ohren Sabbelkram. He snackt jümmers vun "wenn". Un dorbi weet he ok nich mehr as anner Lüd. Mit siene Wenns hett he sik en groot Muuslock frie hollen, dormit he gau utneihn kann, wenn — ja wenn de Katt em freeten will.

Een anner Wetenschoper (vun de Universität Bremen), Perfesser Rudolf Hickel, seggt: De HSH wär in siene Oogen de erste Bank, de he oplösen wörr. De Bank harr so veel Schietpapeern in ehre Bökers, dat de ganze Hülp achtern un vörn nich noog wär. He seggt ok, dat de SoFFin wohl wußt hett, worüm se de halfdode Bank nich mehr toseggen wull. De Baas vun düsse Institutschion, Hannes Rehm, wär bit letzt Johr de Baas vun de Nord/LB. Seker wüßt he genau, worüm dat reinweg güng. Hickel seggt, dat wenn man de goden Delen vun de HSH mit sekere Banken tosamen bringt, dat keen Malör gifft. De Sporkassen in Sleswig-Holsteen, de mit enen Andeel vun 14,82 % dorbi sünd, warrn dat nich anners sehn.

Un de Moral vun de Geschicht: Mit uns lütte Lüd köönt de Groten allens moken, wat se wüllt. De Hauptsook blifft jümmers noch de Profit. Wokeen sik dat anners denkt, hett möglicherwies nich utslopen.


24.2.09 Herr Schröder

Wi harrn in Düütschland mal enen Kanzler, de heet Gerhard Schröder. Den hett de Bundsdag an'n 27. Oktober 1998 to'n Bundskanzler vun uns Republik mookt. Mit sien nieget Kabinett hett he sik gliek an de Arbeit makt. Lütt beten hett't noch duert, bit 2003, dor hett de Bundsregeern ehre "Agenda 2010" in de Welt sett. Se wulln darmit dat düütsche Sozialsystem un den Arbeitsmarkt beter moken. To de Tied harrn de Bund un de Bundslänner groote Lökers in ehren Hushold. Mit de Politik vun Herrn Schröder wärn denn ok nich so veele Börgers tofreden. As 2003 in Nordrhein-Westfalen un in Hessen Wahl för de Landdagen wärn, güng dat för Herrn Schröders SPD deep in'n Keller. (Naja, ut dormalige Sicht wär dat deep — vun hüüt wüllt wi ja nich snacken ) Ene politsche Krise wär dor. Herr Schröder wull ober to de Tied noch nich trüch pedden.

As se sik nu wedder 'n beten berappelt harrn, segg Herr Schröder, dat de Grundlaag för siene Politik nich mehr dor wär. He wull noch mal wählen loten. An'n 1. Juli 2005 froog he den Düütschen Bundsdag, wat se em noch vertruen dään. Ne, se vertruten em nich mehr. De SPD mußt ehre Koalition mit de Grönen an'n Nagel hangen. Dat wär de Oogenblick, as dat mit de grote Koalition losgüng. Herr Schröder wär nich mehr mit vun de Partie. Noch in't sülbige Johr gäv he sien Bundsdags-Mandat wedder trüch. Nu sett he sik in Berlin dal as Avkaat. Dat hett em wohl nich recht wat inbröcht. Dor güng he as Beraader för enen Verlag op de Reis. Aver denn käm dat noch veel netter för Herrn Schröder. Mit sienen leeven Fründ Putin hett he 2006 affmakt, dat he de Vörsitter vun den Opsichtsraad vun de Pipeline-Sellschop warrt, de das Gas ünner de Oostsee no Dütschland bringen will.

Nu is Herr Schröder anschienend wedder in de hoge Politik trüch. De Bläder schrievt, dat he privat reisen deit. Dat süht aber gor nich darno ut. He is nu op Besöök in'n Iran west. Worüm? Dat kümmt wohl darvun, dat he sik vun eenige düütsche Firmen vöran schuven loten lett, de geern mal wedder wat in Persien verköpen wulln. So schön, so goot. Nu hett Herr Schröder sik dat aber nich nehmen loten, Herrn Ahmadinedschad "ganz privat" mit eenen Hofknix siene Opwartung in't Präsidentenbüro to moken. Dorto segg ik ganz dütlich: Herr Schröder speelt sik op. He deit, as wenn he liek as Basen vun annere Staaten un Regeern för siene Nafolger de Dören open moken kunn. För so wat bruukt eener nu mal enen Opdrag ("Mandat" seggt se in de hoge Politik). Herr Schröder hett keenen Opdrag kreegen. De Regeern in Berlin warrt sik bestimmt för so wat bedanken. Op Herrn Schröder hefft se wiss nich tövt. Wat seggt eegentlich Herrn Schröders SPD darto? Oder hefft se em all rutsmeten un ik bün dat nich gewahr worrn?


29.1.09 De Düütsche Bahn

An un för sik is dat nich mine Art, över verleden Soken to snacken, üm to seggen, dat fröher allens beter wär. Twee Bispilln will ik ober doch mal anföhrn. In ole Papiern, de bi't Ahnenforschen op mi komen sünd, dor wär ok eene lütt Postkoort ut dat Johr 1913. Dor schrifft min Moder an ehre Cousine, dat se ehr "hüt Nomeddag" besöken kümmt. Wat de ole Post in Hamborg dunnemals op de Reeg kriegen kunn, hett mi bannig wunnert. Hüttodogs löppt dat ja nu anners. Un denn is dor en Snack, de mi noch in de Ohren klingen deit. De heet "Pünktlich as de Bahn". Dat heff ik sülben noch belevt, dat de Bahn to de Tied in't Lopen käm, as dat in'n Fohrplan stünn. Ok dat löppt hüttodags nich mehr so, un de Lüd frogt sik, worüm dat wohl sien mutt.

Dormit bin ik nu bi de Düütsche Bahn un kumm wedder ganz trüch in uns' Alldag. Veele vun de Töög, de vun de Düütsche Bahn insett warrt, kaamt partout nich to de Tied ut'n oder an'n Bahnhoff, as dat in'n Fohrplan steiht. Eene Utnohm findt sik vun Tied to Tied, wenn een to'n Bispill mit ICE no Süden fohrn un in Hannover ümstiegen mutt, dennso kann he seker sien, dat de Toog, den he hebben mutt, pünktlich affohrn is. Sien Toog vun Hamburg no Hannover hett sik bi de Affohrt un ünnerwegens eenfach 'n beten ophollen. Wenn ik mit den "Metronom" vun Bremen no Hamborg fohr, den geiht dat "pünktlich as bi de Bahn", un so geiht dat ok bi de "Nordwestbahn".

Ok de Service stimmt bi de Düütsche Bahn nich överall. Ut de Bläder wär to lesen, dat welk vun de besonners fründlichen Kondukteure en Moder, de ehr Ticket in den Automaten op'n Bahnstieg noch gau afstempeln wull, nich mehr in'n Toog instiegen leten, wieldat de ja pünktlich affohrn mutt. Ehre Kinners sitten nu alleen dar binnen un wussen sik nicht recht to helpen. Frömde Lüüd hefft sik denn üm de Kinners sorgt. En anner Mal hett de Schaffner en lütt Deern vör de Dör sett, wieldat se keen Ticket harr, ober nich an "ehren" Bohnhoff, sündern op de Streck, wo se gar nix to bestellen harr. De Vörstand vun de Düütsche Bahn lett weten, dat dat blots Utrutscher wärn. Schall nich wedder vörkamen.

Wat bi de Düütsche Bahn allns vörkamen kann, belevt wi nu. Dor hefft se vör 'n poor Johrn wegen Korruption (!) 173.000 (!!!) vun ehre Mitarbeiders bespitzeln loten. Dor sünd ok Lokföhrer un Schaffner dobi west. Bi de högeren Anstellten hefft se ok nich vergeten, de ehre Fruuns mit ünner Verdacht to stellen. De grote Aktschion hett so bi 100 Tipps bröcht. Bescheed geven hett de Düütsche Bahn keeneen vun disse dusende Mitarbeiders. As düsse Geschicht ut de Bläders künnig woor, hett de Vörstand vun de Düütsche Bahn keen eenzig Mal to een vun ehre Lüd seggt, dat jem dat leed deit.

Middewiel hett de Düütsche Bahn in ehr Ansehn all so veel verspeelt, dat wi uns över disse scheele Geschicht noch opregen köönt, avers nich mehr wunnern.

Is dat nu de Mehdorn-Kultur bi de Bahn? Blots slechte Bispilln. As wenn se allns doran setten doot, ehre Kunn' to vergrelln un ehr slecht Image total twei to slaan. Dat best Stück ut'n Dullhuus kümmt ober noch: As de letzt Tarifkonflikt mit "Transnet" un de Gewerkschop vun de Lokomotivföhrers to Enn wär, dor hett sik de Baas vun de Düütsche Bahn, Hartmut Mehdorn, den Baas vun "Transnet", Norbert Hansen, in't Huus haalt un em to'n Personalvörstand mokt. Wat een' tollen Toog in't böse Speel! Nu kann de siene "Kollegen" nau seggen, wo't längsgeiht mit de ehre Fordern för mehr Lohn in de Tasch. Dat is eene wohre Geschicht vun den Buck, den se to'n Gaardner mokt hefft. Oder wüllt se nu den Düvel mit Beelzebub utdrieven?

Ik much geern mal weten, wo lang de Opsichtsrat vun de Düütsche Bahn sik all dat noch ankieken will, ohn dat se den Herrn Mehdorn dorhen schicken doot, wo he keen Schoden mehr anrichten kann: in de wiede Welt.

De ganze Murks hett bloots een Godes: An de Börs kriegt se düssen Saftladen so nich mehr. De velen Pleiten, Pech un Pannen hefft holpen, de gröttste Katastrophe, de Privatiseern, aftowennen. Vun noch mehr Murks vunwegen Gewinnmaximierung blievt wi also verschoont. Eerstmal!


27.1.09 "Seid verschlungen, Milliarden!"

Ik weet gor nich, worüm wi in'n Oogenblick in ene Flaute sitten doot, wenn sik dat üm de "Finanzkrise" dreihen deit. Hefft se all blots op den Momang luert, wenn Barack Obama eers as Präsident in't Amt trocken wär? Dat alleen kann't wiss nich sien. Ehrer hett dat wohl dormit to doon, dat de Banken sik eenfach sülben nich mehr helpen köönt, üm ut den Schiet wedder rut to komen, den se ganz alleen anricht't hefft. Wenn man sik de Weertschopssiet in de Bläder ankieken deit, so warrt alle Dog niege grote Löckers mellt. Mit'nmol mutt de Staat an de Füersprütt, üm to retten, wat noch to retten is. De Staat mutt nu veele Milliarden op sien Kapp nehmen, de he gor nich hett. He pumpt sik dat, wat he nich hett, vun uns Uurenkelkinners. De mööt denn sehn, wo se dormit trech kamen doot.

De Commerzbank, de sik de Dresdner Bank ünner den Nagel rieten wull, sitt nu gewaltig in de Kniep. De Staat hett mit 18 Milliarden Euro holpen, dat se tosomen kümmt. Nu hört den Staat to een Veertel de tweetgröttste Bank in Düütschland. Is uns, de wi de Stüern betohlt, dormit holpen? De Düütsche Bank, vun de ehr Vörsitter Ackermann vor korte Tied noch seggt hett, se wulln sik schamen, wenn se vun'n Staat Geld annehmen dään, hett all en Lock vun 4,8 Milliarden Euro. De stoppt de Bank op de Art un Wies, dat se de Düütsche Post in dat grote Ünnernehmen instiegen lett, dormit se de Postbank insacken kann, de allerdings ok en beten swack op de Bost is und all mit den Sonderfonds verhanneln deiht. Mit de Düütsche Post hett Ackermann sik nu tominnst indirekt den Staat in't Hus halt. Bi "Hypo Real Estate" sünd all 92 Milliarden Euro as Kredit un Börgschaften toseggt. Dat is en Fatt ohn Bodden, denn dat schient, as wenn dat mit de 92 Milliarden noch nich to Enn is. Düsse Bank kann möglicherwies nich mehr op eegen Been stohn.

Wat eegentlich kann de Staat denn nu beter moken as de Banken? In de Weertschop wiest se nich to Unrecht op hen, dat de Landsbanken de mehrsten Defizite infohrt hefft. De privaten Banken mööt sik mit ehre Kritik an de Bundslänner ober teemlich trüchholln. Ehre Opsicht hett achtern un vörn ehre Schülligkeit nich doon. Se hefft de lögenhaftige Zockeree toloten un tokeken, wat de Banken nu dicke Renditen infohrt.

Kann de Staat denn nu eegentlich vun de veelen Milliarden wat wedder sehn, de he in de groten Löckers rinsmieten deit? Dor is een ut de Wetenschop, Ulrich Blum, de Baas vun dat "Institut für Wirtschaftsforschung" in Halle, de seggt, dat de velen Kosten de Bankensektor drägen mutt, wieldat de Banken de Uursaak vun de ganze Kalamität sünd. Un de snackt noch nich mol doröber, wat se dor anricht't hefft un vun wat dat allens kümmt! De Ulrich Blum frogt, wat de Bankers denn nu nich wüllt oder wat se nich den nödigen Grips hefft, wedder ut de Grütt rut to kamen. Genau dat frog ik mi ok. Un wenn se den Grips partu nich hefft — woneem kriegt wi op'n Stutz niege, plietschere Bankers her?!


16.1.09 Steinmeiers Reis in't Morgenland

JerusalemWenn eener eene Reis moken deit, denn kann he wat vertellen, seggt man. Mehrstens stimmt dat wohl ok. Nu frog ik mi ober, wat uns Außenminister Steinmeier vertellen kann, wo he in düsse Dog all twee Mol in Israel west is. He hett en beten small talk mit Israels Präsident Simon Peres un mit de vun de Regeern in Israel mokt, achteran wär he op'n Tass Koffie bi den Palästinenserpräsident Mahmoud Abbas, de nix to seggen hett. Ok mit den ägyptschen Präsidenten Muhammad Husni Mubarak hett he eenige Wöör snackt un hett em sogor Hülp andeent, dormit de an siene Grenz no den Gazastriep beter klor kümmt.

Ik will nu mol nau frogen, worüm Steinmeier eegentlich disse Reis mokt hett. De eenzige Grund harr jo de sien kunnt, dat he wat för den Freeden in dat Rebeet doon wull. Dat wull he aber gor nich. Recht hett he. Dat is nich an em, nich an Düütschland, in den bösen Krieg to vermiddeln. He hett sülben seggt, dat he nich vermiddeln deit. Ut dissen Grund hett he sowiso blots mit Lüd vun de eene Siet snackt. Düütschland steiht an de Siet vun Israel. Steinmeier kann nich mit de Terroristen vun de Hamas verhanneln. Dormit wöör he de Autonomiebehörde in Ramallah to Fall bringen un Israel un Ägypten gewaltig vör den Kopp stötten. Wat de Staatengemeenschop dorvun Dat geiht bannig steil bargop...hollen deit, liggt op de Hand: nix. Mit annere Wöör: he hett keen Mandat.

Ohn Mandat hett he ne Reis mokt, de veel kosten deit. He flüggt jo nich alleen, dor sünd noch allerhand Diplomaten un ok noch massenhaft Journalisten bi em. Mit eene lange Autokolonne un Blaulicht loten se sik denn no all de hogen Lüd henfohren, mit de se snacken wulln. Achteran geiht't denn in noble Hotels. Un wokeen betohlt dat allens? All de Lüd, de de veelen Stüern betahlt, also wi.

Worüm mokt Steinmeier solk Reisen? Will he sik kunnig moken, üm to Huus beter Bescheed to weeten? Dat harr he ok eenfach hebben kunnen, wenn he so dann un wann vun to Huus bi de Partners anropen dä, de em allens verkloren köönt. Un denn is dor noch an to denken, dat he in all de Städer, de he besöcht hett, hoge Diplomaten sitten hett, de em vertellen köönt, wo't lang geiht.

Wull he mit eegen Oogen sehn, wo slimm dat de Lüüd geiht, de mitten in't Füer sitt? Ik glööv dat nich. He hett seggt, dat em de Krise in Gazastriep "nich koolt lett". Dorto segg ik blots: Denk mal!

Also worüm is he nu reist? En passliche Antwoort heff ik nich. Ober kann dat nich sien, dat Steinmeier, de jo nich blots uns Außenminister is, sündern ok de böberste SPD-Kandidat för de Bundsdagswahlen in'n September, sik de Wählers so'n lütt beeten vun gode Siet präsenteeren wull? Dor kann he mi nich mit meenen. Ik lot mi doch nich för dumm verköpen.


12.12.08 Sporsame Lüüd

De Welt stickt in de Krise un keeneen weet, wat noch allens op uns tokomen deit. De Klooksnackers, de bi uns as Experten in'ne Künn sünd, moolt de Tieden vun Dag to Dag swatter. Aver so ganz nau köönt se ok nich seggen, wo de Reis hen geiht.

Nu hefft sik de Europäers all wedder in de Wull kregen. Oder eegentlich de Briten un de Franzosen mit de Dütschen. Op den Gipfel vun de Europäische Union hefft sik de Präsidenten un all de Baasen vun de Regeern överslahn. Op en poor Milliarden mehr oder minner käm se dat nich an, üm gegen de Krise antostüern. Ok in Dütschland gifft dat noog Minschen, de uns Regeern darto bringen wüllt, noch mehr Milliarden ut'n Finster to smieten. Sogar de Minister Glos kann dat nich avtöven, dat noch so an de 25 Milliarden Euro in de Weertschop rinpumpt warrt. De Gewerkschaften wünscht sik, dat de Regeern sik vun de Rieken wat lehnen deit.

De Brite Gordon Brown un de Franzos Sarkozy künnt sik gor nich noog doon, üm dat veele Geld in'ne Konjunktur to steken. As uns Finanzminister Steinbrück sik över de Hektik bi de Briten un Franzosen utleet, dar hett he schön wat to hören kregen, dat em de Ohren so richtig susen dään. Richtig is, dat Dütschland in'n Vergliek to de Navers nich so veel Geld op'n Markt smieten deit. Brown und Sarkozy meent, de Dütschen sport to veel un exporteert, wat dat Tüch hollt. Se meent, de Dütschen konsumeert nich noog.

In disse Situatschion gifft dat noch veele Fragen, op de nüms en passliche Antwort weet. Kümmt de grote Crasch nich dorvun, dat de Lüüd in de USA un ok in Britannia jümmers op Pump leeft hefft? Worüm ropt de Banken, de in de Kniep steekt, keenen Penn von de Bundsregeern af? Wat hett dat för'n Grund, dat de Banken sik gegensiedig keen Geld utlehnen doot, so as dat vör den Crasch jümmers west is? Hefft se keen Vertruun to eenanner? Wat is dorvun to hollen, dat de Europäische Zentralbank in düsse Tied hoge Zinsen för dat Geld betohlt, dat de Kunnschop ehr anvertruun deiht? Kann dat sien, dat de Banken lever ehr Geld bi de Europäische Zentralbank "parken" doot, anstatt dat se dat de Firmen lehnt, de niege Investitschionen moken wüllt?

Wat mi gor nich wunnern deit, is, dat de Lüd bi uns mehrsdeels trotz allens för Wiehnachen inköpen doot, as se dat wennt sünd. De Dütschen sünd sporsame Lüd. Se hefft sik dorför wat op de hoge Kant leggt. Op de veelen Sporbökers vun de Dütschen liggt Billionen Euro. Dat Sporen hett dormit wat to doon, dat wi in Dütschland Insichten mit Währungsreform un Inflatschion hefft. Dat geiht Steinbrück un Merkel wiss nich anners. Se seggt, dat wi lever töven schulln, wohen de Weltwertschop in de nächste Tied geiht. Ik segg: Loot uns man de Backen tosomen kniepen un kieken, wo dat wieder geiht.


30.11.08 "Bankiers"

In Frankfort wär just de European Banking Congress. Dor seten all de groten Bankmanagers op'n Dutt. As se den Kongreß utmokt harrn, dor wär de Welt noch op Schick. So dachen sik dat de Böbersten. As de Kongreß nu anfüng, dor mokten se alle dicke Backen. De Crash wär dor. Man kann gor nich so veele Nullen achter de Tallen schrieven, as de Banken ründ üm de Eer mit eenen Knall utlöscht hefft. Nu wär klor, wat se all tohop för'n dicken Buck scheeten hefft un dat dat nienich wedder vörkomen dröff. De Utdruck, dat se "Fehler mokt" hefft, hett man hier dat erst Mol to hören kreegen. Eersmal güng de Kongreß ok ohn de smucke Ball in'ne Frankforter Ohle Oper to Enn. Jem wär noch to rechte Tied infullen, dat se keen Schampus op Staatsknete drinken schulln.

To ehr Unglück hefft se sik uns Bundspräsident ok noch inlodt. Vun höchste Steed dachten se dorför Loff to oornen, wat se allns so fein to'n Vordeel vun ehre Kundschop inricht' hefft. Aver Pustekuchen, in'ne Schiet hefft se't lopen loten. De Bundspräsident, nich fuul, hett de Banksters mol richtig de Leviten leest. He see, dat de "Bankiers", un he meent mit dit Woort, dat se wedder döögsam warrn schulln, sik sülben allerhand Fragen stellen mööten. Dat weern Fragen no de Verantwoorden vun de, welk ehre Kundschop de beste Raatslaan geven schulln, un ok vun de Baasen, de op ehre Lüd optopassen harrn, un ok vun de Böbersten, de nu wedder daröver to wachen hefft, dat de Baasen op den rechten Weg lopen dään. Un dennso wärn dat to allermehrst Fragen no de Renditengier, vun de se alltohoop so besopen wärn, dat se keen Oog mehr för de Risiken harrn, de se sik und ehre unkunnige Kundschop inbrockt hefft.

De Bundspräsident hett de "Bankiers" ok noch in ehr Stammbook schreven, dat se wedder Tro trüch winnen mööten. Vun de Tro hett to desülbige Tied ok de Präsident vun uns Bundsdag snackt, as he vun den Industrie-Club Bremen inlodt wöör. Dat wär to de Tied, as de soziale Marktweertschop Bortsdag harr un 60 Jahr old worr. Norbert Lammert vertellte de Industriebosse, dat blots noch en poor Börgers de Oorn vun uns Weertschop vertruun dään un dat dat Ansehn vun de Politikers hüttodags so minn is as noch nienich. Op de annere Siet wulln de mehrsten Börger aver, dat de Staat darför sorgen mutt, dat de Wertschop nich koppheister geiht.

Mi fallt op, dat dat in'n Oogenblick rund üm de Banken so still is. Dat veele Geld, dat de Bundsregeern locker mokt hett, üm de Banken ünner de Arms to griepen, wöllt se anschienend gor nich hebben. Se stellt sik darmit bannig an un hefft so'n lütt beten Angst, dat se denn an'n Pranger kümmt. Nu sitten se dat Malör wohl eersmal ut. Viellicht is jem ok klor, dat de nächste Crash sowieso komen deit. Uns leeve Frünn' in de USA hefft mit ehre veelen Kreditkarten so veele Schullen mokt, dat se de to'n grooten Deel gar nich mehr trüch betahlen köönt. Middewiel hefft sik de Amerikaners eene Billion Dollars opsackt. De Banken hefft ut düsse Schullen to'n Deel nu wedder "Wertpapiere" mokt, de in de Welt rümsusen. Dat is aver noch nich allens: To disse Kreditkartenschullen kümmt noch de Schullen hento, de se mit annere Kredite, to'n Bispill för Autokööp un för sünstwat, op ehre Schullern lodt hefft. Dat sünd noch eenmol 1,6 Billionen Dollar.

Dat Portjuchhee is lerrigDat sünd allens keene goden Utsichten för uns. Wi möten ja nich glöven, dat de groote Bülgenslag vun de annere Atlantiksiet utblieven deit un wi Schontied hefft. Avers wat schöllen wi lütten Lüd moken? Schölln wi nu sparsam sien un allens op de hooge Kant leggen, oder schalln wi lever allns, wat noch dor is, op'n Kopp haun? För mi is de Antwort eenfach: Ik heff so un so nix. Un de Politikers in Berlin weeten ok nich, wat se de Lüüd raden schulln, de noch wat inne Hand hefft. Doröver köönt se sik no Hartenslust strieden un all de sworen Probleme utsitten. Ik bün gespannt op de nächste Bundsdagswahl.


9.11.08 Hessen un keen Enn

Fru Ypsilanti hett de Näs noch nich vull. Bi de Hessenwahl hett ehre Partei mehr Stimmen kregen, as se dacht harrn. De Wählers harrn to de Tied nog vun den "brutalstmöglichen" Ministerpräsidenten. Nu is dat Pech för de Sozis, dat in dat Parlament nich blots de beiden groten Parteien introcken sünd. Op de linke Siet sitt nu ene niege Partei in'n Landtag. De hett de mehrsten Stimmen vun Wählers kregen, de in betere Tieden noch de Sozis wählt harrn. Nu wärn dat ja för de Sozis "Smuddelkinner", mit de man ünner gor keene Ümstänn gemeensame Sok moken kann. Hett Fru Ypsilanti seggt, as de Wahlen in Hessen vör de Dör stünnen.

Dat Problem is aver, dat Fru Ypsilanti mit alle Gewalt an de Spitz vun de Regeern wull. Dat güng aver nu wedder nich, wenn de Sozis mit de Swatten ene grote Koalitschion ingohn dähn. Denn de Swatten harrn noch en poor Stimmen mehr kreegen. De Wählers wulln de Swatten bekanntlich enen Denkzedel verpassen, wieldat se den Herrn Koch nich mehr so gern lieden kunnen. Wenn de Sozis mit de Swatten över eene gemeinsame Sok bi't Regeeren snackt harrn, dennso wär Herr Koch viellicht all lang vun't Fenster weg. Aver Fru Ypsilanti wull dissen Weg ganz un gor nich gahn. Üm an't Regeern to kamen, wärn ehr de Linken nu doch nich so unrecht. Nu ja, dat Manöver wär nu nich wegen de Linken, sünnern wegen veer Afordnete vun ehre eigene Partei in de Büx gahn. Wo se versöcht hefft, disse oprechten Minschen slecht to moken, un sik allerhand Schimpwöör för se utdacht hefft, dat is en Kapitel för sik. No mien Meenen sünd de Aforneten, de mit de Veer so gruslich umsprüngen sünd, gor keene echten Demokraten.

Nu hefft se mit allemann besloten, noch eenmol wählen to laten. Wat mokt Fru Ypsilanti? Se kandideert nich noch mal för dat hoge Amt. Dat kann ik verstohn. Se smitt lever eenen teemlich unbekannten Afordneten in't Füer. Ik denk mal, dat de mit Pauken un Trumpeten ünnergeiht. De leeve Fru Ypsilanti kann denn ja bit an't End vun ehre Dag Vörsittersche vun de SPD blieven und de niege Fraktschion seggen, wo dat lang geiht. In de lange Twischentied hett de "geschäftsführende Ministerpräsident" de Lüd wiest, dat se em doch ruhig wedder leev hebben köönt. De Hessen-CDU denkt sik dat seker ok, denn se stellt em noch eenmol as ehren Fürst op. He is för siene Partei wohrschienlich de Beste, den se op't Lager hefft.

Nu sünd achter düsse politschen Quengeleen eenige Stünnen in't Land trocken. Un dar mutt ik mi nu bannig över wunnern, wat de SPD-Aforneten un ok de Obermackers vun de Hessen-SPD sik allens vörschreven laten. Hefft de eegentlich keenen eegenen Willen? Woso mutt Fru Ypsilanti jümmers noch de SPD un de Frakschion vörsitten? Se seggen, op dat Programm kümmt dat an. De Wählers aver wählt doch keen Programm, sünnern de Lüüd. Dat sünd Lüüd, de nix anneres wüllt as an de Macht to kamen. Laat uns mol avtöven, wat am End in Hessen rutkomen deiht!


27.10.08 Dat hett keenen "Sinn"

Ok Professors künnt tehmlich bekloppte Dummbüdels sien. Dor hefft wi ton Bispill eenen Experten för de Weertschop, de to glieke Tied "Präsident des Ifo-Instituts" is, de mit de Münchner Uni tosomen geiht. He heet Hans-Werner Sinn. He is een vun de dütschen Wohrseggers, wenn dat üm de Frog geiht, wo de Weertschop in de nächste Tied hen lopen warrt. Wenn man genau oppassen deit, stimmt dat achteran sowiso nich.

Nu wull düsse Herr Sinn to'n Utdruck bringen, dat no sien Meenen de Managers gar nich so slimm sünd, as se in de Medien verdüvelt warrt. He hett nu een fö allemal eenen goden Indruck vun düsse Lüd. Över so wat mutt man sik nich opregen. Man kann ja dagegen seggen, dat een dat, wat de Banksters in de letzte Tied mit dat Geld vun annere Lüd opstellt hefft, eenfach för kriminell höllt, ok wenn för so en Hanneln keen Pattagraph in uns Strafgesettbook steiht.

Nu is he aber würklich een, de mit'n Klammerbüdel pudert wär. He hett hento sett, dat jümmers no Schüllige sökt warrt, wenn wat nich glatt lopen deit. In de grote Krise vun 1929 harrn se denn de Juden op'n Kieker un in'n Oogenblick de Managers. Ik kann dat eenfach nich foten. In de Tied no 1929 sünd de veelen Juden slagen, dot mokt un in'ne KZs sperrt worrn, wo se elennich verreckt sünd. Un de Banksters? De passeert gor nix. De köönt ehr Geld behollen, de puust de Regeern noch ene Prise Zucker in'n Mors. Un wi lütten Lüd möten ruhig tokieken. Wenn dat no mi güng, möten wi den groten Experten ümdöpen. Denn heet he nich mehr Sinn. Denn heet he eenfach Schwachsinn.


26.10.08 "Ganz dämlich bin ich auch nicht"

Dat hett Peter Sodann seggt, as se em frogen dähn, wat he sik dorbi denken deiht, sik as Kandidat för de Wahl ton Bundspräsidenten opstellen to loten. He hett ok noch seggt, dat sien Hart jümmers links slagen hett.

Un dor stünnen se denn so richtig nett bieenanner: Gregor Gysi, Oskar Lafontaine un Lothar Bisky, de Vörseggers vun de Partei de Linke. Un in'ne Mitt de Kandidat. Oskar Lafontaine meente, dat de Kandidat en wohrhaftige Bundpräsident för dat Volk wär. De Co-Vörsitter Gregor Gysi langte noch'n beten mehr hen: Peter Sodann wär jümmers en rebellischen Kirl west, un dat is he ok noch hüt. Wenn he Bundspräsident wär, kunn he sik för ene gerechte Vereenigung vun Ost- un Westdüütschland insetten. Wat schall man dorto seggen?

En beten afsünnerlich kümmt mi disse Kandidatentheater sowiso vör. Op de ene Siet mutt ik togeven, dat ik mi in'ne Glotze so dann un wann ganz gern welk vun siene 45 Tatortkrimis ansehen heff. Man kann sik an sien dösiges Gesicht ganz goot wennen. Vun Anfang an weet man jo ok, dat he de Mörders finnen warrt. Wat em ober nu drieven deiht, sik för dat höchste politsche Amt opstellen to loten, dat much ik geern weten. Wenn de Linke keenen echten Kandidaten opstellen kann, dann is dat de eene Sook. Wenn aver Peters Sodann meent, dat he de Richtge wär, dann mutt ik mi eenfach wunnern. Ehrlich seggt, föhl ik mi bi düsse politsche Komödie teemlich verhohnepipelt.

Ik will nu nich to veel spekulieren. Wenn de Linke aber nu enen eegenen Kandidaten opstellen deiht un de kriggt in de Bundversammeln ok de linken Stimmen, dennso fallt to glieke Tied Gesine Schwan, de Kandidaatsche vun de SPD, achtern rut. Mi mokt dat nix ut. Ik meen, wenn en Bundspräsident in'n Volk so veel Sympathie hett as Horst Köhler, denn künnt se em rohig noch för de tweete Amtstied wedder wählen.


24.10.08 Patientenverfögen

In Düütschland hett sik in de verleden 20 Johrn een' eegenen Bruuk mit de Patientenverfögen (Willensverfaat) instellt, de gor nich slecht is. In düsse Tied hett de Hospizbewegung mit ehre hunnerte vun Köppels de Patientenverfögen künnig mookt; dusende vun Minschen in Dütschland hefft ehren Text opsett', Gerichte hefft oordelt, wenn Twiefel wärn.

De Willensverfaat geiht dorvun ut, dat nüms een' Minschen vörschrieven kann, wat he moken schall un wat he to doon hett. Dat kümmt ut Artikel 1 vun uns Grundgesett. Den eegenen Willen kann een in gode Tieden opschreven. Denn weeten sien' Lüd und de Dokters, wat se to doon oder to loten hefft, wenn een nich mehr seggen kann, wat sien schall. Dat kann ja licht mal passeern, wenn een ganz dull elennig is. Gerichten in Dütschland hefft oordeelt, dat dat so to moken is, as dat opschreven steiht! Natürlich gifft dat ok mal Striet daröber, wat nu "richtig" is. Dormit möt wi trecht kamen.

In'n Bundstag hefft se mol wedder dat Thema "Patientenverfügung" lospedd. In't Fröhjohr 2007 hett de Bundsdagsafornete Joachim Stünker eenen Vörslag inbrocht. He wull mit sienen Vörslag fastmoken, wat sik in'ne Praxis all dörsett hett; he wull seker moken, dat dat ok denn no de Will vun en Minschen geiht, wenn he op siene letzte Tied kümmt. Wenn de Minsch fastleggt hett, wannehr keen medizinsche Therapie mehr sien schall, dennso hefft sik alle anneren un ok de Dokters doran to hollen. To Stünkers Vörslag hefft männich Institutschonen wat seggt. De mehrsten harrn Bang, dat de Minsch mit sien Sülvstbestimmungsrecht nich ümgahn kann. Ik meen, dat de Vörslag vun Stünker, den he to'n Gesett moken laten will, an de Sok vörbi geiht. Ok en Gesett kann nich klaar un dütlich moken, op welkeene Art un Wies mit den Willn vun een' starvenskranken Minschen ümtogohn is.

Nu miteens gifft dat noch eenen Vörslag. Den hett de Bundsdagsafordnete Bosbach mit'n poor politsche Frünn inbröcht. De wulln, eenfach utdrückt, dat nich de Minsch, de op'n Dood liggt, bestimmen deit, wat mit em to dohn is. Se wülln, dat toerst de Dokter dat Seggen behöllt un dat dorno de Will vun de Patient bi'n Notar fasttomoken is. Wat Bosbach un siene Frünn vörslagen, kann in'n Alldag bedüden, da de starvenskranke Minsch gar nix mehr to bestimmen hett. Slimmstenfalls kann't ok passeeren, dat de Minsch nich holpen warrt un nu en elennig Sükdoom op em luurt, wenn se em nich starven loten.

Man mutt weten, dat eener to glieke Tied mit 'n Willensverfaat ok noch 'n Sorgrechtvullmacht opsetten kann. Dorin kanns du een Minschen, de du vun Harten vertruen deist, de Vullmacht geven, an dien Stee to seggen, wo dat mit di gohn schall, wenn du dat sülben nich mehr kanns. De Vullmacht kann mit de Familje, de Frünn un de Dokters snacken un an'n Enn besluten, wo dat lopen schall. Gerichten hefft oordelt, dat jedeen sik dornach to richten hett, wat de Vullmacht an'n Enn seggt. So 'n Vullmacht is wichtig. In uns BGB steiht, dat de Richters keen "Betreuer" insetten mütt, wenn en Minsch eenen annern en Vullmacht geven hett.


17.10.08 "Belastungsmoratorium"

Wokeen is Michael Glos? Richtig, dat is de dütsche Minister för de Weertschop. He sitt in't Kabinett vun de groote Koalitschon. An un för sik hett bi uns in Dütschland in fröhere Tiden so en Minister mehrst wat mit de Weertschop to dohn, as all de Naam utdrücken deit. Eenen ganz grooten harr wi mal an'n Anfang vun uns Demokratie. Dat wär de unvergetene Ludwig Erhard. Achteran seten op dissen Stohl jümmers welk, de nich so veel op de Naht harrn as he. In'n Oogenblick sitt nu eener dor, de ut "Proporz" dor hensett wör. Vun Weertschop versteiht he anschienend nix. As de Finanzkatastroph op uns hendal käm, wär vun em keen Woort to hörn.

Nun is Michael Glos mitnmol opfullen, dat de düsteren Utsichten för de Weertschop, vun de de Kanzlerin un de Finanzminister snacken, stimmen doot. Vör Schreck hett he sik hensett un doröber nodacht, wat nu to doon is. Ja, wi mööten en "Moratorium" hebben. Ünner den Begriff is to verstohn, dat mit ene Regel stoppt warrt, wat allns besloten wär. He will en "Belastungsmoratorium". Alleen dit Woord schall enen gewaltigen Indruck moken.

Wenn du nun dacht hest, he meent dormit, dat de lütten Lüd wat vun ehre Belastung leddig warrn schölln, denn büst du op'n Holtweg. Ne, he meent de Weertschop. He wünscht sik een "generelles Belastungsmoratorium" för alle. He seggt, ok för de privaten Huusholden. Dat eenzige Bispill, wat he gifft, is aber, dat de Automobilindustrie nich darmit plackt warrn schull, sik wat uttodenken, op wat för ne Aart un Wies de CO2-Werte lütter mookt warrt. Endlich kann he sik mal frie för de Weertschop insetten. Is doch egaal, dat dat Kabinett sik eegentlich eenig is, dat de Industrie wat moken schall, üm betere Technik to erfinnen. All weten se, dat dat för uns Ümwelt gesünder wär un dat wi denn ok sogar noch mehr exporteeren köönt. Villicht weet Herr Glos dat nich. Warüm mööten wi solk Ministers hebben un betohln? Ik bün för en Rede- un Gehaltsmoratorium för Minister Glos.


11.10.08 Swatte Tieden

Wat in düsse Tieden üm uns herüm vörgeiht, hett noch keeneen belewt. Wi weeten middewiel, dat de swarte Freedag 1929 viellicht en Kinnerspeel gegen dat wär, as wat nu ründüm aflopen deiht. Keeneen weet, wo dat wieder geiht. De Aktien sünd in "freen Fall". De Banken hefft mit ehre gierige Finanzweertschop den ganzen Markt un dorbi sik sülben kaputt mokt. Se sünd mit ehre "Klokheit" total an'n Enn un weeten sik nich mehr to helpen. Rund üm den Globus sünd nu de Finanzminis-ters un de negenmolkloken Vörsitter vun de Nationalbanken op de Patten. Se wülln versöken, dat Füerrad to stoppen, dat den Berg hendol sust.

Wat is passeert? Mit Gier alleen is dat nich to verklorn. De meersten Minschen sind gierig. Dor kümmt noch wat hento: In de letzten Johrn vun dat verleden Johrhunnert hefft de hogen Politikers un Bänkers uns jümmer mehr wiesmokt, dat de niege Liberalismus dat Best för uns wär. Wi schulln de Finanzmärkte truun. De Staat schall siene Poten ut all dat rut hollen, den Staat dröff wi nich truun. Toerst sünd wi dormit nich slecht över de Runnen komen. Avers nu möten wi beleven, dat een poor grote Finanzhaie de Schruuv so wiet överdreiht hefft, dat op de ganze Welt nix mehr lopen deiht. Nu is mit'nmol de Staat wedder an de Reeg. De mutt helpen un will dat ok, wieldat nüms sünst dat kann. Vun wat aber will de Staat eegentlich dat Geld nehmen, üm Banken un Börsen ut de Schiet to trecken? Dat is doch nu wedder ganz eenfach. He treckt dat ut den staatlichen Huushold rut. Wenn de Staat aber nu nich noog in siene Kassen hett, wat denn? Dat is wedder ganz eenfach: Denn möten wi so veel mehr Stüern betahlen, bit dat wedder in de Reeg kümmt. Un denn gifft dat noch eene "stille Reserve". Dat sünd de Sparbökers von de Millionen lütte Börgers, de versöcht hefft, dat beten, wat se nich för ehr däglich Eeten un Drinken bruukt, an die Siet to leggen. Kiek, dor drifft sik dat doch ganz goot, dat de lütten Lüd sik ut den neemod-schen Anlageswindel ruthollen hefft.

In düsse Situatschion kanns warraftig nodenklich warrn. Toerst hefft de Minschen anfungen, de Natur un ehre Ümwelt kaputt to maken. För veele Soken is't all fief vör Twolf vörbie. Nu sünd welk dorbi, de soziale Ümwelt twei to moken. Een Enn vun de Geschicht is noch lang nich aftosehn. Wat köhnt wi moken? Wi köhnt as dat Karnickel op de Slang starrn. De Welt hett sik un warrt sik so verännern, dat wi wedder vun vörn anfangen mööten. Eers eenmol möten wi oppassen, dat nu nich de Demagogen de Bavenhand kriegen doot. Wieldat wi all nich mit Huut un Haar ünnergahn wüllt, mööten wi versöken, ut de Katastroph op en goode Art un Wies wedder ruttokamen. Eens is mi dorbi teemlich seker: Wenn wi dat eenmal achter uns hefft, dennso warrn wi mit'nmol de Welt nich mehr wedder kennen. Uns Denken un Hanneln warrt sik bannig verännern.


29.9.08 Arme Kinners

In de Bläder steiht alle Dag irgendwat doröber, dat de Öllern nich noog för ehre Kinners sorgen doht. Veele junge Öllern waßt de Kinnerkrom licht mol över den Kopp. Un wenn se denn noch mit Süchten op de scheeve Bahn komen sünd, dennso löppt männigmol gar nix mehr för ehre Lütten. Eene vun de slimmsten Geschichten wär de mit den lütten Kevin in Bremen.

Dat annere, wat jümmers wedder opfallt is, dat veele lütte Mäkens un Jungs to Hus gor keen Fröhstück kregen doht. De Öllern kennt dat gor nich mehr, sik mit'nanner an den Disch to setten. De Kinners mööten mit'n leddigen Magen no School. Wenn de Öllern dat hefft, denn gifft se ehren Junioren noch'n beten Geld mit op den Weg. Dor könnt se sik wat köpen, wat jem gefallen deit. Achteran wunnert wi uns, dat de Gören jümmers dicker warrt. Veel slimmer is dat aber för de Kinners, de to Huus keen Fröstück un ok nix mit in de School kriggt. Wenn dat middewiel nich barmhartige Helpers gäv, denn is nich avtosehn, wat ut de Armen warrn schall. De sünd eenfach as Arme op de Welt kamen. Süh man to!

Dat is ober noch nich allens. Düsse Dag wär in de Bläder to lesen, dat sik in Polen noch wat afspeelt, wat gor nich nich licht in den Kopp geiht. Ton Biespill: Op den Flughafen in Posen steiht en Jung vun 16 Johren. He kiekt no den Fleger, de in düssen Oogenblick in de Luft geiht. Alex winkt nich noch mal. Siene Öllern kunnen em sowieso nich mehr sehn. Se flüggt no Amsterdam trüch. Dor hefft se siet een Johr Arbeit. De Jung fohrt no Huus, mokt sik 'n Tee un denkt: twee Johr noch bit no'n Abitur. Alex alleen to Huus.

So as Alex geiht dat över 100.000 Kinner in Polen. Vadder oder Modder schapt irgendwo in't Utland. Männigmol sünd beide to glieke Tied weg. De Kinners möten denn sehn, wo se afblievt. Eenige köhnt bi de Verwandtschop ünnerkrupen, annere möten in't Heim. Meist begööschen de Öllern ehre Kinners dormit, dat se in korte Tied wedder trüch sünd. Doch dann kümmt de Winter und ok de nächste Sommer geiht vörbi. Un ok dat Telefon klingelt nich mehr. As in Polen de Videofilm "Eurowaisen" lööp, dor hefft sik Politikers, Lehrers un Weetenschoplers verjagt un hefft nokeken, wat dat mit de Sach op sik hett. Se hefft veel Leed to sehn kregen. Dor gifft dat keene Scholen un Kindergärten, wo nich eensame un traumatiseerte Kinner to finnen sünd. In Krakau hett sik de lütte Adam, 14 Johr old, ophangen. Sien Vadder wär all teihn Johr in London. Nu wull ok de Modder, mit'n niegen Partner, no London flegen. Eeene Stiftung hett sik de Sak annohmen. De Vörsitter seggt, he kann nich begriepen, dat sik de Politik in Polen nicht um de slimme Situatschion kümmern deit. De seggen bloots, "dat Problem gifft dat bi uns nich".


21.9.08 Milliarden inn'e Grütt

Dat is so tehmlich lang her, dor hett uns ole Bundskanzler Helmut Schmidt mal dat Wort "Raubtierkapitalismus" inföhrt. He wull dormit to'n Utdruck bringen, dat de Kapitalismus an un för sik nich slimm is, dat dor aber welk sünd, de mehr freten wülln, as se schieten köönt. Wo slimm dat kamen kann, köhnt wi hüttodags beleven. In Amerika geiht eene Bank no de anner koppheister. In de Kommentaren vun de groten Bläder seggt de Schrievers, de dormit kunnig sünd, wat dat mit dat gewaltige Bankenstarven op sik hett. Dat hett wat to doon mit de unbännige Gier vun de Banken, mit niege Finanzprodukte allns an sik to rieten. Se wärn am Enn aber nich klok genog, sülben to verstohn, wat se anröhrt hefft, un dat in'n Griff to kriegen. Dat kanns ok verglieken mit 'ne Hood Schaapen. Se steiht op een Plack. Mitnmol loppt een Schaap los un rennt un alle annern achteran.

is al weg!De Schaden, de Investmentbanker, Beteiligungsinvestoren und Hedge-Fonds anricht't hefft, beloppt sik op nich minner as 500 Milliarden Dollar. Dat is de Ünnerkant. Nu is de ganze schöne Marktwirtschaft ers eenmal vörbi. De Staat versöcht nu, to retten, wat noch to retten is. De Wall-Street warrt nu de Main-Street. De dat anricht't hefft, steiht dor nich mehr för in, de Schaden warrt sozialisiert. Dat heet, de lütte Mann mutt för dat instohn, wat de "Heuschrecken" utfreten hefft. Mi deit leed, dat dat keen Gesett gifft, düsse gräsigen Minschen bi de Büx to kriegen. För mi sünd dat Verbrekers, de achter Slott un Riegel hören.

No eenen Kommentar in de FAZ steiht dat, wat in'n Oogenblick to beleven is, in eene Reeg mit den "Börsenkrach" vun 1929, den "Schwarzen Montag" vun 1987, de "Asienkriese" vun 1997 und de "Technologieblase" an't Enn vun dat verleden Johrhunnert. Also, wat wi in'n Oogenblick beleven doot, is wahrhaftig teemlich dull.

So kann dat nich wieder gohn. De darför verantwortlich sünd, mööten "global" eenen Weg finnen, dat de lütte Mann op de Straat wedder vertruen kann. Angela Merkel hett jüst weeten loten, dat sik de Bundsregeern all vör dree Johren darför insett hett, dat för de "internationalen Finanzmärkte" Speelregeln sett't warrt. De Amerikaners un de Briten hefft dunnemals reineweg "nee" seggt. Nu hefft wi de Bescherung.


10.9.08 Wenn nix mehr geiht

En beten deit he mi leed. He is so en nett Kumpel un hett sik so dull afmaracht un hett versöcht, för Land un Lüd sien Best to gewen. Nu hett he den Kram hensmeten. He seggt, eenige ut de "tweete Reeg" hefft em op'n Steert peddt. An wokeen he dorbi denken deit, hett he nich seggt. Nu sitt he wedder dor, wo he mal anfungen is, in Mainz. Kurt Beck is teemlich gnadderich ut Berlin utneiht. Gnadderich is he ok all dat ganz letzt Johr west, mit siene Genossen, de meenten, dat de SPD mit em nich op'n goden Weg wär. Un ok mit de Schrievers vun de groten Bläder, de jümmers över dat Hü un Hott in de SPD schreeven un de meenten, dat Beck siene Partei nich de Richt wiesen kunn. Dat wär to veel för em, dat hett he nich mehr uthollen. Nu frog ik mi, worüm een, de so wiet boben ankomen is, dat Schafutern nich uthollen kann. Un wenn nich, worüm he denn nich all lang seggt hett, dat he dat nich packen kann. Ne, he harr all lang den Platz frie moken müßt. De verpatzte Kanzlerkandidatenkör wär villicht blots de letzte Druppen, de dat Fatt överlopen lett.

As de SPD mit allemann Gesine Schwan as den tokünftigen Bundspräsidenten opstellt hett, wär he mit vun de Partie. He wär för "links", wat jümmers dat bedüden deit. He leet siene Genossin Ypsilanti in Hessen moken, wat se will. De will nix anners as boben sitten. "Im Interesse" vun de Börgers, versteiht sik. In'n Bund käm een Tosomengahn mit de Linke ünner gor keenÜmstänn, nie un nich, in Froog, seggen se. Töv man af. Wi weet hüt noch nich, wat de Tied mal mit sik bringt. Nu hefft de Parteiböbersten den Kanzlerkandidot nöömt und sik ratzfatz för eenen niegen Vörsitter stark mokt. Wat schall nu wohl warrn? Lat uns avtöven, wat se wedder Richt in ehre Partei kriegen doot.

Mit twee Flünken büst noch lang nich in'n Himmel!

Wi wüllt nich so doon, as wenn dat in de anneren Parteien beter is. Kiek mal no Bayern. Dor rackert sik twee CSU-Politikers af un kriggt de Feut nich so ganz op de Eer. Mit den överdreihten Stoiber leep de Regeern wohl noch beter. Kiekt eener nau hen, so is dat mit de CDU ok nich so wiet her. Dor hefft se ok mehr as twe Flünken, de gor nich tosamen passen doot. Se hefft ober bannig veel Glück. Se bruken sik blots an dat to hollen, wat Angela Merkel seggt. De Linke hett vun Anfang an twee Flünken. Op ne wisse Aart geiht de Flünkenslag tosamen. Aver twee Gesichter hefft se vun Anfang an: Oost un West, jedereen annere verleden Tieden. De Grönen hefft ok minnstens twee Gesichter, de Fundis un de Realos. Un dat wesselt. Wenn se an de Macht wüllt, künnt se sik gewaltig anpassen. Över de FDP fallt mi nich veel in. Mi dücht, dat dor blots een eenzigen Minschen vun Tiet to Tied wat to'n Besten gifft, ik meen Guido Westerwelle. Mehr sünd dor wohl nich mehr. Över den Rest kann ik swiegen. Dormit is för mi nun ganz un gor nix mehr antofangen.


3.8.08 De Schrievreform hett Bortsdag!

Nu is't een Johr vörbie. An'n 1. August 2007 hefft uns Öberste de "Rechtschreibreform" in Gang sett. Is dat nun beter worrn? Nee, is dat nich! Is dat nun slechter as vördem? Dat frogt nu veele "Experten". Dorbi hefft se rutfunnen, dat de mehrsten Dütschen sik üm de "Reform" nich scheren doot. Se schrifft, as se dat mal lernt hefft, un kümmt mal recht, mal slecht dormit trecht.

Anners is dat mit de Schölers, seggt de "Forschungsgruppe Deutsche Sprache". An de Scholen hett de Reform de Schrieveree nich lichter, aber sworer mokt. Veertklässler to'n Bispill moken bi Opsätze 80% mehr Fehler as vördem. Slimmer A, B un C geiht noch graadnoch süht dat an de "Gymnasiale Oberstufe" ut. Dor moken se bi Diktaten worraftig 110% mehr Fehler, as se vörher mokt hefft. De Forschungsgruppe seggt, dat blots noch een poor Schölers weet, wannehr se en Duppel-S un wannehr se en Eszett schrieven mööt.

Wat ik meenen do, is, dat de ganze Reform so teemlich för de Katt wär. No den kompetenten Duden sünd in de Twüschentied noch annere Grammatikbökers rutkamen. De sünd to'n Deel ok all wedder old. Warüm? De Reform is noch eenmol reformiert worrn. An'n Enn wußt keener so recht Bescheed. Wenn ik mi so ümkieken do, fallt mi op, dat de mehrsten in miene Bekanntschop unseker worrn sünd. Un de nich alleen. Kiek mal in de Bläder. Dat "Greuel" nu "Gräuel" schreeven warrt, dat hefft nu mittlerwiel de mehrsten begrepen.

Wat mi, de sik alltieds üm dat rechte Düütsch und de beste Schrievwies bemöhen deit, richtig op den Keks geiht, dat sünd de Schrievers in uns Bläder, bi de ik mi frogen do, wat de för en Motiv harrn, utgerekent mit Schrieven ehr Geld to verdeenen. Ganz gliek, ob du nu no de ole oder de so nöömte niege Schrievwies schrieven deist, du findst alle Dog Öberschriften un Bidrääg, wo du di frogen muttst, an welkeene Schriefwies sik de Redakteur hollen deit. Ik will hier nich den "Oberlehrer" spelen un en lange List vun "linguistische Gräueltaten" opstellen. Ober eene Saak mutt ik eenfach mal los warrn: Wat eenige Blädermoker bit an dat End vun ehren Leven nicht begriepen doot, is, wannehr se een oder twee S schrieven mööt. Dat dat in de Hauptsook nu keen Eszett, sündern en Duppel-S geven deit, dat hefft se anschienend verstohn. Aber ob achter en Komma nu mit een oder mit twee S to schreven is, dat geiht veele Schrievers glatt ann Ors vörbi. So warrt ton Bispill schreven: "Ob die Leute wissen, das an dieser Stelle ...". Darför revancheert se sik bi'n Artikel vör en Wörd: "Zeugen haben gesehen, das dass Haus ...".

Dat deiht mi weh. Froh bün ik aber, dat unsre Dichters nich ok noch nadreeglich ver-stümmelt warrt.


2.8.08 Politik in't Sommerlock

De Müüs danzt!Wenn de Katt ut'n Hus is, danzt de Müs op'n Disch. So is dat wohl ok in de hoge Politik. Dor is to'n Bispill de SPD-Ortsvereen Bochum. De will, dat ehr Maat Wolfgang Clement ut de Partei rutsmeten warrt, wieldat he bi de Hessenwahl de Wählers seggt hett, dat se oppassen mööt wegen de Energiepolitik. Siene Genossen hefft dat so verstahn, dat he dormit seggen wull, se schalln nicht de böberste SPD-Kandidatin Ypsilanti wählen. Nebenbi seggt wör dat för alle klar, dat se blots tosomen mit de Linke in Hessen an't Ruder kunn. Denk mal an Fru Metzger, de dat partout nich wull. Dat wär all lang vör't Sommerlock. Nu hett ok de Landesschiedskommischon in NRW seggt, dat de Partei Clement rutsmieten mutt.

Mitnmal warrt de Parteiböbersten munter. Se harrn wohl nich dacht, dat de Genossen in NRW üp düsse Aart tolangen wüllt. De eenzig vun de Böbersten, de gau bi de Hand wär, dat wär Hubertus Heil, de Generalsekretär vun de SPD. He lett de Bläder weten, dat se in de SPD nu klok un nodenkern blieven mööt. Annerndags meldt sik ok de Vörsitter vun de SPD to Wort. Kurt Beck röp siene SPD op, "Besonnenheit und Verantwortung" an'n Dag to leggen. Un ok veele annere Stimmen ut düsse Partei seggen wat to de Geschicht. Mien Indruck is, dat de Vörstand vun de SPD slapen un de Genossen keen Richt wiest hett. In de "goden" olen Tiden harrn de Böbersten vun de Partei sik mit de "lütten" Genossen in'n Ortsvereen drapen, sik de ehr Klagen anhürt un se denn Bescheed seggt, wat se ok düsse Ansicht sünd. Nu möten se all mit'nanner töven, wat de grote Schiedskommission besluten warrt.

Lat uns nu ok mal de annere politsche Siet bekieken. Gesine Schwan, de vun de SPD as Kandidatin bi de Wahl to'n Bundspräsident opstellt is, wull sik bi de anneren Parteien vörstellen. De CDU un de FDP gäven ehr eenfach eenen Korf. Dor wär nix to bespreken, seggen se. Nu hett de Kandidotin Gregor Gysi dropen. De lett weten, dat Gespreek wär "rein privat". De Speegel hett ober rutkregen, dat de beiden sik erst mal vörweg daröber utspreken wulln, wo de Linke bi de Wahl Gesine Schwan ehre Stimmen geven köönt. Gysi hett dorbi weten loten, dat se darför sorgen mööt, dat SPD un Linke to eenanner findt. Lat uns mal aftöven, wat darbi rutkümmt.


13.7.08 So veel Geld!

In de veelen Bläder, de uns alle Dag dat Nieste verklart, schrifft se siet Weeken daröber, dat de Armen jümmers armer un de Rieken to glieke Tied rieker warrt. Un jedeen hett sine eegen Theorie, wo vun dat kamen deiht. Vun uns Regeern heff ik noch nie nich hört, wat se dorgegen moken wüllt. De Groten vun de Weertschop, de Industrie un de Banken lot sik öber dat Thema ok nich ut, so as wenn jem dat partout nix angeiht.

De eenzigen, de sik över Arm und Riek wat hören lett, dat sünd de kloken Denkers ut de Wetenschop. Wat unsereen vun de ehr Gebrabbel lernen kann is, dat se grad so veel weten as wi sülben. Wenn überhaupt! To'n Bispill: Alle Johr stellt sik de fief "Weisen" vör de Kameras un Mikrofone un vertellt uns, wat no ehren Meenen in de nächste Tied in de Weertschop vör sik gohn warrt. Dat kannst sowieso glieks afdreihn. Wokeen sik mal de Möh mokt hett, een beten later to kieken, wat de kloken Lüd richtig tippt hefft, de warrt wies, dat se blots Tüdelkram in de Luft pust hefft. Un all de Regeern in de verleden Tieden hefft jümmers wedder düsse Speel mitmokt, de CDU liek so as de SPD, un de Lütten ok. Dat is "Arbeitsbeschaffung" op eene hooge Etasch.

Nu heff ik in de Bläder lest, dat de jungen Lüd hüttodogs mehr Geld in ehre Hannen kregen as in verleden Tieden. Meinungsforschers ut München fragen bi 1500 Kinners vun söss Jahr an un junge Lüd bit 19 Johr, wat se in ehre Tasch hefft. Dorto telln se Taschengeld un dat Geld, wat se bi besünnere Gelegenheit tosteken kriggt. Ok Inkomen ut lütte Jobs tellt dorto. Bi de jungen Lüd, de all in Lohn un Brot stoht, fragen de Forschers no dat Nettogehalt.

Wat is dor bi rutkamen? Düsse jungen Minschen twüschen 6 un 19 Johr old geevt in een Johr 23,1 Milliarden Euro ut. De Forschers weeten ok, för wat dat mehrste Geld utgeven warrt. För Klamotten, niemodsche Saken un allerhand Biwark (Accessoires seggen de Forschers) wärn dat 4,4 Milliarden Euro. För den Besök vun Diskotheken un Kneipen wärn dat 2,7 Milliarden Euro. Doran kannst sehen, dat se nich blots vör ehr Kiekschapp sitten doot. För ehr Handys möten de Kinners un jungen Lüd so bi 2,2 Milliarden Euro opbringen. Twee Johr fröher sünd dat noch 2, 7 Milliarden Euro west. Dat is nun billiger. Wat seggt uns dat allens? Arm oder riek, an de Kinners warrt nich spaart.


4.7.08 Demokratie

De Friedrich-Ebert Stiftung hett sik dormit ut'nanner sett, dat jümmers weniger Lüd to'n Wählen gaht, wenn sik in'n Bund, in de Länder oder in de Kommunen de Parteien to Wahl stellt. Dar hefft se dat Forschungsinstitut "Polis/Sinus" ut München den Opdrag geven, de Lüd to fragen, woran dat liggen deit. De hebbt 2500 Börgers no ehren Meenen frogt. Mehr brukt de Forschers nich. Se weet, dat de poor Lüd den Rest representeeren doot.

Nu kümmt de grote Överraschung: Een Drüttel vun de Befrogten glövt nich doran, dat in de Demokratie all de sworen Probleme so behannelt warrt, as dat för uns Leven nödig wär. Ik sülben frog mi dor ganz unwillkürlich, in wat för een Verfaten dat denn wohl beter gohn schull. Ik mag gar nich an de Antworten denken, de männich Lüd geven doot, de mit uns Demokratie nich inverstahn sünd.Blievt de Wahl-Urnen lerrig?

Un denn kümmt de tweete Överraschung: Knapp de Hälft vun de Befrogten weet nich, wat se nächst Jahr bi de Bundstagwahl överhaupt to'n Wählen gohn wüllt!

Dat Drütt, wat se bi de Ümfrag rutkregen dähn, wär, dat so an de 57 % wüllt, dat mit de „Reformen“ eersmal Foftein mokt warrt. En poor wünscht sik sogar, dat all de Reformen wedder rückgängig mokt warrt.

Un denn noch wat: De Fragers hefft ok rutfunnen, dat nich blots de Lüd so denken doot, de nich veel in ehren Geldbütel hefft. Ne, ok de Minschen, de sik noch 'n beten wat köpen köönt, denkt nich anners. De Forschers hefft rutfunnen, dat de, de dat noch beter geiht, Angst hefft, no ünnen aftorutschen. An de 62 % vun de befragten Lüd meenten, dat se recht behannelt warrn. Dat annere Veerdel föhlt sik unrecht behannelt. Se hefft den Gloven an de Tokunft verloren.

Wat seggt de Baas vun de Befragers dorto? He seggt, dat de Volksparteien dat Vertruun leddig geiht bi een Drüttel vun des Wählers. De Politik, de in Berlin mokt warrt, geiht jem glatt an'n Oors vörbi. Wieldat de Tall vun de armen Minschen jümmers grötter warrt, stiggt ok de Gefohr för de Demokratie.

Ik meen, dat gifft keen Patentrezept, üm de Situatschion to verbetern. Wenn ik mi sülben frog, woans ik över all dat denken do, wat se de annern Lüd frogt hefft, so bün ik ers mal still un goh in mi. Achteran weet ik, dat ik daran glöven will, dat dat keen beter Verfaten gifft as de Demokratie. Kann ik ok nix ännern, so bliev ik doch Optimist un goh wählen, wenn dat wedder so wiet is. Viellicht kaamt för all de Minschen, de nu nich tofreden
sünd, ok wedder betere Tieden. Ik höp dat.


27.6.08 Soldaten

Rund üm uns un wohen du kieken kannst, findst du eenzig un alleen Staaten, mit de wi op een ganz un gar fründlichen Foot stohn doot. För wat bruken wi dor eegentlich eene Armee? Is good, wi bruken welk, de uns verteidigen köhnt, wenn uns eener angriepen will. Lot uns mal nich frogen, wokehn dat sien schall. Wohr is seker, dat dat männigmol Tieden gifft, wo bi Naturgewalten veel Hülp nödig is.

Viellicht wär dat ganz praktisch, wenn de befründeten Staaten in Europa ehre Ver-teidigung in een Pott smieten dähn. Geiht leider nich. Se sünd ja inne NATO und dor hört de Amerikaners mit dorto. Düsse Koalitschon stammt noch ut de verleden Tieden, as jedereen Angst vör den groten Angrieper ut den Osten harr. Meddewiel kann de uns aber nich mehr bang moken. In'n Osten hefft se mit sik sülben genog to doon. Eenmal hefft de Europäers dat ohn de Amis alleen mitnanner versöcht: op'n Balkan. Wär dat för de Lüd dor eegentlich een Hülp?

För mi is swohr to begriepen, worüm de Amerikaners un en poor annere sik rund üm den Globus so breet moken doot. Se seggt, dat se de Minschen de Frieheit un de Demokratie bringen wüllt. Hefft se dat in Vietnam henkregen? Geiht dat kloor in'n Irak? Erst recht frog ik mi, wat se denn eegentlich in Afghanistan verlorn hefft. Ik persönlich kann düsse "terroristischen" Taliban ok nich verknusen. Ik kann de Grundherrn in Afghanistan aver jüst so wenig af. Dat is ober no mien Meenen lang noch keen Grund, över düsse Lüd hertofalln. Dor hett mal een kloken Minschen seggt, dat en Volk sik siene Freeheit sülbst halen mutt. Dat lücht mi in.

Un nu kümmt de Deel, de uns Dütsche direkt wat angeiht. Uns grote Nato-Partner hett vör en poor Johren all seggt, dat he nich insüht, dat he all den Dreck alleen moken mutt. Wi sünd doch Verbündete. Dat wär domols dat erst Mol, dat se sik in Berlin in de Büxen scheten hefft. Se wärn nich in de Laag, nee to seggen. Opklärers schicken ja, ober nich scheten. In'n Oogenblick stoht wi vör den nächsten Schritt. Dor möten nu noch so an de dusend Soldaten mehr nach Afghanistan. Aver bloots üm ehre Kameraden, de all dor sünd, to schützen. Wenn nödig, dröfft se denn ok scheten. So will dat uns Verteidigungsminister Jung. He seggt aber glieks dorbi, dat he sik dat nich utfunnen hett. He will dat so dörsetten, as em dat de böberste Soldat in't Ohr swiestert hett, de Generalinspektör Schneiderhan.

Veele Ümfragen hefft an't Licht bröcht, dat de Mehrheit von uns Dütsche gegen den Insatz vun de Bundeswehr in Afghanistan is. Aber wat kümmert dat uns Böverste in Berlin! Se seggt, dat dor sowieso blots Soldaten henkümmt, de dat sülben wüllt. Ik frog mi ober: Bruken wi dorför ne egene Armee? De Lüd köönt doch ok as Söldners dorhen gahn, wo se för ehr Dodscheten veel Geld verdeent. Warüm uns Böverste dat allens moken doot, kann ik mi mit mienen unverstännigen Kopp nich erklärn. Viellicht wünscht sik de Generale mal so'n lütt beten Krieg. To Hus geiht dat ja nich. Un de Minister? Viellicht denkt he, wenn he abends inslopen will: Ik weet gor nich, wat de Lüd wüllt: Is doch eene prima Arbeitsbeschaffungsmaßnahme!


23.6.08 Flaggen

Nu sünd de Stroten wedder mol vull vun Dütschland-Flaggen. Ut veele Finster hangt de Farven swatt-rod-geel. Un denn noch de veelen Autos! Op beide Sieden hangt se ut de Finster. Ik heff mi all wunnert, as sik vör twee Johr dat Flaggenmeer as ne Floot utbreden dä, as de Football-Weltmeesterschop in Dütschland wär. Nu geiht dat blots üm de Europameesterschop, un de loppt nich mol hier bi uns to Huus. Ober de Flaggen möten wedder rutholt warrn.

Op de een Siet frei ik mi, dat so veele Lüd mitmoken doot. Se wüllt dormit wohl to'n Utdruck brigen, dat dat wat to fiern gifft un dat se sik bannig frein doot. Op de annere Siet denk ich doröber no, woher dat kümmt, dat de Lüd för den Football flaggen doot. Wenn to'n Bispill de Tag der deutschen Einheit is, heff ik blots över de amtlichen Hüüs de dütsche Flagg to sehn kregen. Aber dor holt se de Flaggen nicht för den Football ut ehre Kamern.

Ik harr ja nu dat "Glück", so af 1933 in't Leven to pedden. Ik will darmit seggen, dat ik in de verdammte Nazitied opwussen bün. In düsse Tied hefft se en gewaltigen Kult mit swatt-witt-rod un inne Mitt dat Hakenkrüz dreven. Dat güng so wiet, dat de Blockwart bi de Familien nofrogen dä, de ganz "vergeten" harrn, de Flagg ruttosetten. Un wenn se dat nich wulln, dennso kunnen se wat beleven. Wat meenst, wenn een siene Flagg an "Führers Geburtstag" nich wiest hett!

Ik verstoh dat, wenn de Lüd na de Nazitied un den slimmen Krieg nix mehr vun Fahnen un Flaggen weeten wulln. Un nu? Sünd wi mit'n Mal wedder Patrioten worrn? Op 'ne gewisse Art un Wies warrt dat wohl stimmen. In'n Football sünd wi bannig national. Kiek mal: As de Schiedsrichter den dütschen un den ööstreichschen Trainer bannt hett, dor güng Löw stracks op de Ehrentribün un geev Angela Merkel Poot un bleev in'ne Neeg sitten. Dat is eenfach national! Nu frog ik mi, wo dat Nationale bleeven wär, wenn wi nich den Football harrn.

So mutt dat utsehn! So mutt dat utsehn!
En vörbildlich dekoreertes nationales Auto, fotografeert
in Hamborg-Bramfeld an'n 7. Juni 2008 vun Marlou


31.5.08 "Schwant" uns wat?

De Fru mit dat Vagelnest: Gesine SchwanIn Berlin is mal wedder wat los. In de grote Koalitschon warrt all lang blots över dat palavert, wat eegentlich to doon un op de Reeg to bringen is. Richtig wat moken doot se alltohopen all lang nich mehr. Dar kümmt dat as bestellt, dat de SPD nu mit allemann eene eegene Kandidatin för das höchste Amt in unsern Staat opstellt: Gesine Schwan. Veer Johr trüch, as't all mal so wiet wär, hett de Fro binah so veel Stimmen kregen as Horst Köhler, de nu uns Bundspräsident is un dat ok blieven will, wenn in een Johr wedder eene Wahl ansteiht. Gesine Schwan will dat ober ok noch mal weten. Se seggt, dat se gor nich kandideeren worr, wenn se sik nich gode Utsichten utmalen dä.

Man nu geiht de politsche Larm ers richtig los. De CDU/CSU stellt sik hen un plarrt: Wa kann man blots! Wi hefft doch eenen Präsidenten, den dat ganze Volk leef hett. Se seggt, de SPD, de in de Wählergunst so bannig afsackt is, will nu ganz wiet nach links afdrieven, üm noch to retten, wat geiht. Se will sogar mit de koaleeren, de sik sülbens Linke nöömt. De CDU/CSU seggt, de SPD mokt de grote Koalitschon kaputt. Un wat schall denn woll warrn!

To desülbige Tied överleggen sik de Grönen und ok de Linken, wat se nich villicht ok eenen Kandidaten präsenteeren schulln. De FDP hett all Bescheed seggt, dat se för Köhler is. Wat man darut sehn kann, is, dat wi in eene Demokratie leven doot, in de dat ganz normal is, wenn unsereen sik för düt oder dat oder för de oder den utspreken kann.

Schaad is, dat wi lütten Lüd dor nich direkt mitspeelen köönt. De Bundspräsident kricht jo bekanntlich nich vun uns Wählers de nödigen Stimmen. Düsse swore Arbeid mookt de Politikers för uns. De Verfaten schrifft ja vör, dat de Bundsversammeln wählen mutt. Un wokeen is dat denn nu? Dat sünd de Aforneten vun uns Bundstag un eene lieke Tall Lüd, de vun de Länders köört warrt. Dat sünd denn alltohoop so an de 1200. En beten köönt wi aber doch mitmoken. Wi hefft ja "BILD". De seggt de Politikers jümmers Bescheed, mit wat dat Volk reken deit. De kiekt dat Volk op't Muul. Un denn gifft dat jümmers all de kloken Ümfraagen vun "Allensbach", "Emnid", "Forsa" un noch een poor annere. De find't rut, wat de lütte Mann oder Fro vun de Straat sik wünschen deit. An' Enn mokt de Bundsversammeln aber doch, wat se ehr egen politsche Klokheit vörgifft. Na ja, so is dat nu mal. Lot uns aftöven.


27.5.08 Wählen oder Quälen

Nu is dat amtlich. In Sleswig-Holsteen sünd veele Lüd letzten Sündag gor nich ers no de Wahl hengohn. Nich mal 50 Perzent hefft eenen Stimmzettel in de Urnen steken. Wenn man kieken deiht, wokeen de Rest ehre Stimm geven hett, denn is to sehn, dat de Lüd in Sleswig-Holsteen mit ehre grote Koalitschon ut CDU un SPD nich mehr tofreden sünd. Viellicht ok nich mit de in Berlin.

De beiden "groten" Parteien sünd deep in Keller sackt, de CDU hett blots noch 38,6 Perzent an Land trocken. Dat sünd 12,2 Perzent weniger as dat letzte Mal in't Johr 2003. De SPD is wohl bald eene vun de lütten Parteien. Se käm mit ganze 26,6 Perzent ut de Wahl rut. Den gröttsten Towachs hefft de Grönen mit 10,3 Perzent kregen, achteran de FDP mit 9,0 Perzent. Un nu kiek an: de Linke is vun 0,2 op 6,9 Perzent opstegen. De Wählergemeenschaften hefft tosomen ok noch 5,1 Perzent in ehre Schünen infohrt.

De Lüd sünd ja nich dumm. Se hefft längst spitz kregen, dat de beiden Sieden vun ehre Regeern sich partout nich lieden köönt un eegentlich nix vun de Stell bringen doot. Liekso as in Berlin. Se striedt sik lever öber de Frog, wokeen dat nächste (!) Johr Präsident von uns Republik warrn schall. Dor kannst lang över nodenken, wat Sleswig-Holsteen denn nu för eene politische Tokunft hett. Ne groote Koalitschon kann ik mi nu eegentlich nich mehr vörstellen. Aber se hefft nu ok noch annere Möglichkeiten, över de ik aber nich mehr spintisieren will. De Wählers hefft jo seggt, wohen de Fohrt nu gahn schull. 50 Perzent hefft seggt: Is mi schietegal. De annern wünscht sik nu viellicht ne lütte Koalitschon, in de de Politikers sik mit de würklich wichtigen Soken afgeven doot un sik Gedanken över all dat mokt, wat se in de letzten Johrn liggen laten hefft. Ik bün gespannt.


23.5.08 Diäten

Wenn eener Diät moken mutt, dann is he mehrsdeels krank oder to fett. Dat kennt wi all. Warüm aber dat Geld för de Afordente ok Diäten nennt warrt, dat blifft een' Frog, op de ik keen Antwort weet.

Nu is all wedder mal een Striet öber de Diäten inne Gang komen, wieldat de Oberen vun de CDU un de SPD för all de Afordente von uns Bundsdag noch'n beten toleggen wulln. De harrn aber ers vör söß Maanden mehr kregen. De Anföhrers vun de beiden gröttsten Fraktschionen harrn sik dat eenfach vörstellt. In'n Bundsdag hett de Regeern en Gesett inbröcht, mit dat se dat Inkomen för de Beamten een beten an dat anpassen wulln, wat de Tarif-Mitarbeider all kregen hefft. Un dor wulln de beiden Bosse dat Betohln för de Afordneten so ganz stieke mit rinschrieven.

De beiden Bosse Kauder un Struck sünd teemlich kloke Lüd. Se harrn sik wohl dacht, dat de een oder annere 'n beten mulsch op düsse Geschicht reagieren wörr. Se harrn aber nich darop keken, dat de Kandidoten för de nächste Wahl to'n Bundsdag nu all opstellt warrt. Dar sünd de ohlen "Platzhirsche" ganz gewaltig in'ne Kniep kamen. In ehre Wahlkreise hefft se teemlich wat op de Büx kregen. Un veele vun de Kandidoten hefft glieks bi ehre Oberen Bescheed seggt, dat se bi dat Gesett nich mitmoken wulln. So käm de ganze Geschicht to Fall. As Kauder un Struck de ganze Aktschion afblosen, loten se sik gar nich ers sehn. Se schreven för de Dagbläder blots en' lütten drögen Text. Eener aber harr sien' groten Dag: Guido Westerwelle, de FDP-Boß. He sä, an düsse Geschicht is dütlich wohrtonehmen, dat de Anföhrers vun de Koalitschion mit ehre Fööt nich mehr op'n Teppich stohn.

Wat wi all nu weet, is, dat de lütten Lüd vun de Basis wat ännern künnt, wenn se sik gemeensam darför stark moken doot. Sowat schall man nich so bald vergeten.


18.5.08 Unter den Brücken sollen sie schlafen

In de Politik geiht dat männichmal teemlich afsünnerlich to. To'n Bispill in Bremen. Dor harrn se an'n 10. April 2008 eene Haushaltsdebatte in de Bürgerschaft, un se strieden sik öber de Mieten. Un dor seggt eene Abgeordnete vun de SPD, dat de CDU-Opposition anschienend darför strieden deit, dat Dusende vun Minschen ut ehre Wohnungen un ehre vertruute Noberschaft rut möten. Dar geef dat eenen "Zwischenruf: Unter den Brücken sollen sie schlafen". Dormit harr de Twüschenroper erst mal wat anricht't. An'n 24. April 2008 schreev de Vörsitter vun de SPD-Bürgerschaftsfraktion eenen Breef an den Twüschenroper un to glieke Tied an den Präsidenten un de Vörsitter vun de annern Parteien in de Bürgerschaft. Un he schall sik entschulligen för dat, wat he seggt hett. Dar schreev de Twüschenroper, de CDU-Fraktionschef Thomas Röwekamp, eenen Breef an siene Parteifrünn. He beduurt düsse Sook un he hett sik achteran sülben doröber argert. An'n 17.5.2008 hett de CDU-Parteitag Thomas Röwekamp mit 83,5 Perzent to ehren Landesvörsitter wählt. Öber de dumme Sok hefft se gor nich mehr snackt. Wat ik noch seggen wull: Bi de letzte Bürgerschaftswahl hett de CDU utscheten un mußt' in de Opposition. Darvor geev dat in Bremen 'ne grote Koalition. In de wär Thomas Röwekamp Senator.


17.5.08 Veele Köche verdarvt den Brie...

...so seggt man. Een Koch alleen kann ok nich veel moken, wenn de Lüd nich wüllt. In Hessen hett Roland Koch nich noog Stimmen kregen, üm wedder to regeern. De annern künnt dat aber ok nich. In'n Ogenblick steiht de Partie op Patt. Nu is Roland Koch Ministerpräsident op Afroop. Dat heet, he mutt noch eene Tied uthollen, bit sik wat röhren deiht. Aber wat, dat weet to Tied keeneen. Rot-Grön wulln dat nich, wieldat se nich mit de knallroden Schmuddelkinner speelen wüllt. Jamaika is op de annere Siet ok nich so recht anseggt. Also lot uns man ruhig töwen. Wie hefft ja ers eenmal uns "Liebling Hessen".

Dat süht de CDU in Hessen nich anners. Op ehren Landesparteitag an'n 17. Mai 2008 hefft se ehren Liebling Koch mit 306 vun 321 Stimmen wedder in sien Amt as Landsvörsitter wählt. Dat sünd 95,3 Perzent. Vör twe Johr hett he noch 97,8 Perzent kregen. Dat he de letzte Landtagswahl för siene Partei in'n Sand sett hett, speelt dar wohl keene so grote Rull. Op den Parteitag hett he allens seggt, worüm dat wegen siene scheele Politik nich lopen dä. Anschienend genögt dat wohl de Damen un Herren Politiker, üm wedder got mit em to sien. Entweder se glövt an em oder se hefft keenen annern oder se mokt sik dar nich so veel ut.


16.5.08 De Cholera is op'n Weg...

De slimme Zyklon Nargis hett in Birma veel Unglück anricht't. De UN meent, dat darvon so an de 100.000 Minschen dod bleven sünd. Twe Millionen Minschen hefft nu keen Dach mehr öbern Kopp, nix to eeten un to drinken un weeten nich, wie dat wiedergahn schall. De Cholera is all op'n Weg. De Regeern mokt dat nix ut. Mit so bi 48 Millionen Birmesen kümmt dat op een poor mehr oder weniger nich an. De Regeern bruken för sik sülben ok keen Hülp von buten. Se sitt fein in't Dröge un hefft allns, wat se bruken. Dat eenzig, wat se to glieke Tied von de Minschen hebben wulln, is een Mandat to'n Regeern, darmit se ehre Macht fastkloppen köönt, de se vör lange Tied mit militärische Gewalt an sik reten hefft. As in't Johr 2004 de indsche Ozean all mal eene groote Flootwelle öber da Land schicken dä, dor wär dat för de armen Minschen nich ganz so katastrophal as nu. Aber Hülp gäv dat ok dunnemals nich. De Helpers von buten laten se damals vör de Döör stohn. Genau as hüt.



na baven