Öllere Daagbook-Notizen vun Marlou


30.12.17 ...Findigkeit gegen Gier

To dat utgahn Johr is dat ja an de Tied för Weltbetrachten un woans dat wiedergahn schall mit de Minschheit. Dat will ik hüüt denn ok mal doon. Also, de Tokumst! De Minschheit! 7,5 Milliarden Minschen, begrenzte Ressourcen, Klimawannel, dat is de Laag. Allns warrt knapper, de Konflikte üm de Ressourcen warrt scharper. Dat sünd wi all wies worrn — ok dör de Migration. Aafrika, dat sien Bewahnerschap in wenig Dekaden verduppelt, maakt mobil — ehr Arbeit un Rohstoffe na, de in Europa un China verswindt.

Man keen Bang. Eentlich bün ik en richtige Optimistin, wat uns Minschen angeiht. Dat gifft nämlich en mächtige Kraft, de allns in de richtige Richt bögen kann: de enorme minschliche Findigkeit. Uns Ümdrievigkeit un Forschersinn is unmeten un warrt nu eerst richtig rutfeddert. De Minschen, ok de afrikaanschen Minschen warrt Rezepte gegen Armoot un dormit gegen de Bevölkerungsexploschoon finnen; de Wetenschap warrt ehr Verspreken inlösen. Bi de Energie sünd wi al ganz neeg an de eleganten un nahaltigen Lösungen. Ok den Klimawannel warrt wi meistern. Dor bün ik ganz seker. Dat Leven op de Eer hett sik stedig verbetert un warrt sik wieder verbetern. Allns warrt good. — Dat heet nich, dat dat keen Oppers gifft; wohrschienlich mööt poor Millioonen Bangladeshis versupen, ahn dat sik wat deit; eerst wenn de Klimawannel t.B. Florida versenkt, denn warrt sik wat doon. Avers denn ganz fix. — Mehr köönt wi nich verlangen; wi sünd de Minschen, de wi sünd. Wi hier in Europa hebbt noch de besten Koorten, un för de armen Oppers in Bangladesh köönt wi denn ja spenden. So is dat; Illuschoonen nütt nix.

Man een Saak gifft dat, de mi Sorgen maakt un de dat Ganze noch to'n Kippen bringen kann, un dat is de minschliche Gier. In ehr Utmaat kann se dat locker mit de minschliche Findigkeit opnehmen: se is unmeten. Un woans se de positiven Lösungen torpediert, seht wi opstunns t.B. an de Afschaffen vun de Netzneutralität in de USA. Lütte Ünnernehmen un niege Ideen köönt sik nich mehr dörsetten, wieldat de Groten dat Nett besitt un en Hupen Geld dormit maakt, allens bit op ehr egen Angebott to ersticken. De Gier steiht gegen de Findigkeit gegenan! Dat is de hüüttodaags Kampf "King Kong gegen Godzilla", den wi nu beleevt — un de eminent wichtig is för uns Tokumst. Dat is al faken passeert — grote Firmen un Machthebbers hebbt niege Erkenntnisse un Erfindungen ünnerdrückt to ehrn Winst, avers to'n Schaden vun'e Welt. Ehr Middel, dat to doon, warrt jümmer grötter. Un dor mööt wi gegenan gahn. De Gier warrt wi nich afschafft kriegen, avers ehr Middel, sik dörtosetten, mööt wi heel knapp hollen. De wildwussen Kapitalismus kann so nich wiederwokern. Wi köönt ok nich veel Tied un Bregensmolt op düssen Kampf gegen de Gier verwennen; dat gifft wichtiger Problemen. De Findigkeit mutt sik frie bewegen könen; denn is de Minschheit en Siegermodell.


23.12.17 ...Wiehnachten mit Winnetou

Nu hebbt de Katalanen sik afspalt, heel gründlich, meist sogor vun sik sülven. De ganze Spalterie is ja teemlich unwiehnachtlich, avers ümdat en freedliche Lösung söcht warrt, much ik doch noch mal op dat verwiesen, wat ik al 2012 över Grekenland schreven heff. Dat weer doch nu de Schangs för de Katalanen! Ok Rajoy warrt se geern trecken laten, wenn se friewillig de Staatsschulden mitnehmt. Denn fix en lütte Pleite un Nieggrünnung. De Politik mutt endlich mehr vun'e Weerschap lehren!

De Idee mit dat "Bad Spain" weer ja nich vun mi; liekso is de neegste Idee nich vun mi. Ik heff överhaupt nich so veel Ideen, ik höör bloots good to. Leven Lüüd, wi maakt ja nienich Reklaam op Plattpartu, man hier kümmt en nich ganz eernst meente Raadslag vun uns leven Maat Jürgen Brake, den ik Se geern ok tostüern much:

Vüörwiehnachtstied

Laot us inne Biärge gaohn
und'n Böümken halen.
Wann dann nit däi Füörster küëmmt,
brûkt vi nicks betahlen.

Wann bi Ink kenn Böümken wässt,
niähm Di'n Bessmenstiël.
Wann De kenn Boum van maken kanns,
koup äin van Pläimobiël!


Foto Jürgen Brake

In dat Bild (Vergröttern dör Anklicken!) is dat Winnetou himself, de uns fröhliche Wiehnacht wünscht. Dat wüllt wi uns denn geern gefalln laten! Frohe Wiehnacht an all de roden un annersklöörigen Bröders, Süsters un ok an de, de dat niege "drütte Geslecht" tohöört un wo nümsnich weet, woans se ansnackt warrt! Frohes Fest!


17.12.17 ...Friebedrag: 100 €

De Parlamentariers, de hebbt ja meist all en Barg to verbergen: ehr Nevenverdeensten. Se scheffelt Geld säckewies as Opsichtsrääd, Afkaten un "Beraders". De gröttsten Dukatenritters wüllt natüürlich an'n minnsten togeven, wo veel dat is. Heldenhaftige lütte Organisationen so as Lobby Control wüllt dat opleevst ganz verbeden. Dat Apenleggen vun de Nevenjob-Inkünft is jümmers noch en Eierdanz. Un nu al wedder en Diätenerhöhn?! Utverschaamt!

Ik segg ja: Nevenjob? Keen Problem! — De Lösung geiht so: Nevenverdeensten warrt friegeven, se warrt avers natüürlich op de Diäten anrekent. Opstunns passeert dat ja nich. Dat heet, doch, avers bloots bi Hartz 4. Dor dröffst 100 € per Maand toverdenen; de Rest warrt vun Hartz 4 aftrocken. So wöör ik dat bi de Parlamentariers ok maken. För 100 € Opsichtsraad speeln, de Rest warrt vun de Diäten aftrocken. Dat spoort den Staat sooo en Barg Geld! Twee Drüttel vun't Parlament kriegt denn gor keen Geld mehr vun'n Staat! — Verdeent de Afordnete noch mehr as 100 €, dröff se/he bloots 20% dorvun beholln. As bi Hartz 4.

Ha, seggt Se, dat passeert doch nienich! — Stimmt, un dat is dat Problem. Dat schull nämlich sülvstverständlich ween, dat dat so maakt warrt. Wenn Nevenverdeensten överhaupt verlöövt sünd. Dat wi in en Sellschap leevt, 'neem ungliekes Recht as sülvstverständlich gellt, dat warrt wi noch eensdags düer betahlen. To 100%.


7.12.17 ...Nu is dat sowiet...

... nu mööt wi wat in't Drinkwater schüdden. Beruhigungsmiddel. Happy-Pillen. Fredens-Elixir. Anners geiht dat nich mehr. — To'n Verklaarn: Ik fohr Auto. Mehr bruukst nich seggen, nich? De Lü fohrt as besengt. As güng dat üm wat. As güng dat üm allens. De Aggreschoon, de Gewalt hett so tonahmen, dat kann sien Grund nich mehr in'n Verkehr hebben. Villicht in de Arbeitswelt... orr in de Welt an sik. Överall warrt de Druck ja grötter... All mööt op Entspannung ümschalt warrn, fix!, un wieldat dat keen Therapeuten schaffen köönt — her mit dat Tüüchs för dat Drinkwater!

Ik sülven warr denn foorts een vun de freedvullsten Minschen op de Welt ween. Ik bün sowiso nich so aggro — un ik drink so bi twee Liter Leitungswater per Dag. Villicht krigg ik denn den Fredensnobelpries. Endlich.


26.11.17 ...Farv bekennen

Nu kann de SPD ja, wenn se koaleern will, reinweg allens vun Merkel feddern. Endlich kann se mal so richtig tolangen un ehr ganzes Wahlprogramm ümsetten, Börgerversekern, Inwannernsgesett, Finanztransaktionsstüür, allens. Profil schärfen. Eenmalige Gelegenheit! Nu kann se wat bewiesen, man ran!

Nu kann de SPD....? Nee: Nu mutt de SPD. Un dor liggt de Hund begraven. Ik glööv, se will dat gor nich. Dat gifft gor nix to bewiesen. Düt Programm weer för den Wahlkamp dacht, nich för de Regeern. Dat ümtosetten hebbt se dat gor nich hild. — De SPD mutt nu Farv bekennen, nich to de Regeern orr Merkel orr den Staat, sünnern to ehr egen Programm. Kann dat so swaar ween? Will de SPD wirklich de HSV ünner de Partein warrn — jümmers vör de egen Verspreken trüchtucken? Wohrschuug: Dat mit de ewige Relegation kann ok mal scheepgahn!


20.11.17 ...Weg mit Schaden...

Hach ja, de FDP. Kole Fööt kregen, un weg. Bruukt wi tominnst dat Lindnergesicht nich mehr to sehn, de hoortransplanteerte Nixhaftigkeit. Man nu geiht't nich wieder. Wi bruukt en Regeern. — Bruukt wi? Woso eentlich? Dat gifft doch jümmer noch welk, de staht in Berlin redig un praat, ehr Arbeit to doon: de Dusende vun Lobbyisten, de sowiso al lang de Gesetten schrieven doot. Dat gifft 'n Karikatur, 'neem een Weerschapsbonze to'n annern seggt: "Dat beten Politik regelt wi doch ok noch blangenbi!" Stimmt. Also, geevt de Macht offitschell dorhen, 'neem se liggt, in de Hannen vun de Weerschapslobbies. De regelt den Kraam schon. Ganz in ehrn Sinn natüürlich. De Bundsdag brukt dat denn ok nich mal mehr aftonicken. — Hm, so regeert denn jichenswie doch wedder de FDP. Sogoor ganz alleen.


19.11.17 ...Soli afschaffen? Soli ümnöömen!

De FDP muult bi de Sondeernssnacks. As ehr grote politische Telen harrn se utgeven, den Soli aftoschaffen un mehr för de Bildung to doon. Dat schient je woll beid togliek nich mööglich to ween, sünnerlich vun de finanzielle Siet. (Dat de FDP dat liekers will, verwunnert nich: sünd ja allens BWL-Fuzzis, de köönt nich reken! ) Mien Vörslag: De Soli blifft, warrt avers anners nöömt. 'n anner Naam hett ja al mennigmaal de Gemöter beruhigt un Ööl in de Wogen gaten. (Sogor de Grönen köönt miteens de "Obergrenze" verknusen, wenn se "atmender Rahmen" heet!) Un dat de FDP ok glieks richtig wat vörwiesen kann, nöömt wi den Soli nu "Bildungstoslag" — nee, "Toslag" is nich good — "Bildungsbonus"!! Dat is't!

Op de Idee mit dat Ümnöömen harr Merkel avers eentlich ok sülven kamen kunnt. Dat is doch ganz ehr Stil: Nix ännert sik, un all sünd tofreden.


19.11.17 ...De Noord lehrt ok wat

Dat Ekligst an uns Kapitalismus is ja de Reklaam. Finnt Se nich ok? De Reklaam is as de Müll, den se anpriest: Düsse hektische, jachtige Spraak, de platte Verlogenheit vun ehr Verspreken, billige, kortlevige Sensaschonen, un dat Ganze in en penetrante Allgegenwart, dat di gor nich mehr slecht warrn kann, wieldat di sünst anduernd slecht weer. Dorwegen seh ik dat geern, wenn Reklaam wat sülvstironisch warrt un sik — naja, mehrst nich sik sülvst, avers doch: sik gegensiedig op't Koorn nimmt. So as hier. De ganze Bande weet ja doch, dat se nich för vull to nehmen sünd.

Nu is mi wedder sowat opfulln. Düt Plakat hier karikiert apensichtlich düsse un sach ok düsse Reklaam. De Noord hett also ok wat tolehrt! Recht so, leve Müritzers, hollt den Kopp hooch un weest stolt op juun Platt. Ji kunnen ruhig dörgahns Platt snacken, "zwischendurch" heet "twüschendör". Bloots Keesbroot eet ik nich so geern.


Klick op to'n Vergröttern!


5.11.17 ...Die Waffen nieder

Toeerst weern de USA de eenzige Staat mit Kernwapen — also unbesiegbor. Avers de "Atom-Spion" Klaus Fuchs hett in de 1940er Johr de geheimen Infos an de UdSSR geven, dat de ok en Bombe buun kunnen. Sietdat gifft dat dat verheerende Wettrüsten, in dat sik jümmer mehr Staaten inklinkt. — Klaus Fuchs woor avers as Verräter un Spion verurdeelt un verknackt.

Wi sünd in noch so'n anner Wettrüsten, liekso verheerend, un wedder gifft dat Hoochverräters, de uns letzte geheime Wapen an den Fiend verraadt. Dat sünd de Agrar-Industriellen, de uns letzte Reserve-Antibiotika skrupellos in de Deertenmast insett — bloots üm mehr Profit. De gefährlichen Keime kriegt so all de geheimen Infos un köönt Resistenz entwickeln. De normalen Antibiotika hebbt se uns op düsse Aart al nahmen, un dat hett al dusende Minschenleven kost. De roren Reserve-Mittel ok noch an den Fiend uttolevern is schändliche Verraat. Niege Antibiotika to entwickeln is enorm opwennig — de sünd nich för Profit, sünnern för Minschenleven! Wenn wi so wiedermaakt, köönt wi glieks de Wapen strecken. Denn sünd wi wedder in de Tied vör dat Penicillin, as een an lütte Alldagsverletzen starven kunn. Un en poor Lüüd sünd mal wedder riek woorn.

Ik much geern sehn, dat de, de dat verschüllt, liekso as Klaus Fuchs in't Gefängnis steken warrt. Bi jedeenen vun multiresistenten Erregern Infizeerten, den den Dokters nich mehr helpen köönt, kümmt een Straaf för fahrlässige Tötung dorto.


29.10.17 ...#MeToo

Sexuell Belästigen vun Fruuns warrt nu wedder breet diskereert ünner düssen Hashtag. Nich dat dat jemalen anners west weer, bloots fröher geev't keen Twitter. Ik meen ja, de Belästigen, de dösige Anmache, de Övergriffe sünd bloots de Halv vun dat Övel. Dat Leven vun en Fru kennt twee grote Kommandos: 1. Wees attraktiv! 2. Wees gefügig! — Deel 1 grippt faken liekso deep in uns Persöönlichkeit in as Deel 2. Bi Fruuns geiht dat nienich alleen üm de Saak, sünnern jümmers ok üm de Persoon. Kiekt sik in Medien un Apentlichkeit üm, op't Best in de Reklaam, un tuuscht Se de Geslechterrulln dor ut! Undenkbor? Ja; Mannslüüd dröfft Charaktere ween un ok öller. Fruunslüüd dröfft — attraktiv ween. Deko ween. Sünst nix.

Dat heet, de een Halv vun uns Tied slaat wi uns dormit rüm, de Schöönheitsnormen to gehorchen, un de anner Halv mööt wi denn de Dreckskeerls afwehren. Jungedi, dat is keen Wunner, dat Fruuns dat in'n Beroop faken to nix bringt! Se hebbt ja al noog to doon, op ehr Stöckelschoh nich ümtofalln, wieldess de Keerl in sien komodig Schohwark al över de neegste Problemlösen nadenkt... Jedeene vun uns hett al mal vun dröömt, de Geslechterrulln aftoschüddeln, eenfach unsichtbor to maken. Bloots homo sapiens to ween. Me too. Sik in en Diskuschoon mit Männer bloots op de Saak to konzentreern un nich blangenbi noch op "Wo seh ik ut? Sitt mien Hoor ok richtig?". Wo niedsch sünd wi all mennigmal op de Unbekümmertheit vun Mannslüüd! Me too. Man wi kaamt dor nienich ganz rut, wi sünd in de Wull farvt. Me too. Wi all weet nich, wo veel Perzent vun uns Potential vun düsse Endlos-Falle versluckt warrt, man ik bün vermoden, de Andeel is enorm. Dat wöör en Exploschoon vun Leistungen vun Fruuns geven, wenn se sik eenfach bloots as Minschen op de Saak konzentreern kunnen... Dat warrt hoge Tied, Fruuns, dat wi ut de Rull fallt! Laat sik weder in de Prinzesschen-Rull noch in de Opper-Rull fastnageln!

Ja, ik weet, uns Rullenklischees snöört ok de Persöönlichkeit vun Mannsminschen af. Maakt doch mol en Hashtag dorto, Jungs! Diskereert dat apen! — Och nee, geiht ja nich; Mannslüüd dröfft nienich klagen, nienich swack ween. Deit mi leed, dat Problem mööt ji för sik sülven lösen. You too.


11.10.17 ...You got Mail

Avaaz maakt en Mailkampagne för een vun ehr Mitmakers, de in de Türkei in Haft sitt. Ik heff jüst düt mailt:

Dear Minister Gül,

now this is downright awkward: Is Turkey afraid of every single peaceful human rights worker?! Do Turkish authorities feel terror when someone speaks of humanity? Or how is this "terrorism"? It means that you are terrorized, shaking in an agony of fear. It means that president Erdogan pees in his pants with terror when he sees a journalist or an activist. However, nobody else feels terrorized by them. Are all other countries so much braver than Turkey? Is not this like an elephant wincing before a mouse? Are not you all ashamed?!

To show the world that Turkey is not a pussy trembling at the slightest free-spoken idea, free Özlem Dalkiran, Mesale Tolu and all other activists arrested on made-up charges immediately!

Regards,

M.-L. Lessing
___

Note: M.-L. Lessing sent you this message as part of an Avaaz campaign to free human rights defender, and Avaaz friend and colleague Özlem Dalkiran: https://secure.avaaz.org/campaign/en/free_ozlem_sam_loc_/?reply. To respond, please e-mail reply+ozlem2017@Avaaz.org


3.10.17 ...Okay, FDP. Wies mi dat.

Nu hebbt wi ja dat "Nettwarkdörsettensgesett". Klingt, as wenn nu jedereen per Gesett endlich fixes Internet kriegen schall, is avers nich so. Nee, dat is dat "Facebook-Gesett", över dat ik hier al schimpt heff, as dat noch diskereert woor. Normaal richt ja de Justiz doröver, wat Recht un Unrecht is. Nu schallt dat ok Privaatünnernehmen. Heiko Maas hett de Rechtspreken privatiseert. De Justizminister sülven. Dat muttst di op de Tung tergahn laten. Nee, Heiko Maas is nich de Justizminister vun Erdogan! Denn wöörn wi uns hier ja ok över so'n Gesett opregen. He is de Justizminister vun Düütschland. 8 vun 10 Sachverstännige hebbt in'n Bundsdag seggt, dat Gesett weer verfatenswidrig. Scheert nüms.

Okay, FDP, ji Juristenpartei. Ji hebbt sik op de Fahnen schreven, dat Gesett to Fall to bringen. Jedeen Övel hett ja angeevlich ok sien gode Siet. Denn wiest mi de mal. Keen Jamaika-Koalitioonsverdrag, ahn dat düt Gesett streken warrt. Nix weniger will ik vun ju sehn. Denn hebbt ji wat Vernünftigs daan un dröfft na 4 Johrn in Ehren wedder antreden. Orr aftreden. Weer mi noch lever.


27.9.17 ...Werte as Waren

Wenn een, seggt wi mal, en Toaster verköpen will, denn warrt he orr se dorför sorgen, dat dat Ding jüst so utsüht un funscheneert, as de Kunnen dat hebben wüllt. De schallt dat ja köpen. Un wenn he na en Tied wieswarrt, dat de Lü gor keen Toasters mehr bruukt, denn warrt he fix ümsatteln — t.B. op Eierkokers orr Koffiemaschinen. Dat is ganz normaal. He (orr se) mutt dor ja vun leven.

Nich mehr ganz normaal is dat, wenn en Minsch versöcht, sik sülven so to verännern, dat he anner Minschen gefallt. Dat lett denn, as weer de Minsch sülven en Waar — de he ok sülven verköpen schall. Dorvun schull en Minsch nich leven möten! Avers in uns Sellschap is allens to en Waar woorn. Sogor de Religioonsgemeenschapen und Karken loopt de Minschen na, redig, ehr Bott an dat antopassen, wat de Lü verwacht. "Woans mööt wi ween, dat ji uns kööpt?"

Natüürlich doot dat nu na de Wahl ok de Partein. All vöran de CSU. Se will na rechts rucken, 'neem ehr Wählers afbleven sünd. "Wi hebbt verstahn." Wokeen so snackt, is per se nich mehr wählbor. He hett keen Standpunkt, un ok sien Programm is nix as wohlfeil. Lohnsnackers sünd dat, de dat, wat de Lü hören wüllt, as ehr Menen utgeevt un swöört, se meent dat eernst. Smerenkomödianten, de bloots op Amt un Macht ut sünd.

Leven Lesers, ik heff Se unbekannterwies hartens geern. Man ik warr Se nienich een Jota na't Muul snacken. Nich mal op Platt.


19.9.17 ...Schiet to'n Quadrat

Nu hett een Gericht al mal sien Menen künnig daan, de Mietpriesbrems weer nich verfatensmäßig. Wieldat dat bloots en lütt Berliner Landgericht is, ännert dat noch nix; man de FDP frohlockt al. Se wüllt den Mietmarkt ja frie wokern laten, denn "de Markt reguleert sik bekanntlich sülvst". Ok sünst versöcht sik de FDP as Spaßpartei. O Mann!!! Wosaken kümmt düsse unsäägliche Partei wedder in uns Parlamente?! Weern wi normale Minschen nich glücklicher ahn ehr? Nüms brukt de FDP!! Nich mal de, de von ehr profiteert, bruukt ehr, denn de sünd al riek noog; se wüllt bloots noch mehr. Un dat kriegt se ok — wenn de FDP wedder wat to seggen hett! — Un so en Partei, de bloots ganz poor Lü bedeent op Kosten vun den Rest, de warrt bi us opneegst sachs wedder vun 10% wählt. Dor giffst du op.

Och so, ja, "jedeen Volk hett de Regeern, de dat verdeent". Na wi sünd villicht en Volk!, dach ik de ganze Tied, bet mi so richtig kloor woor, dat de AfD ja in't neegste Parlament sitten un wisslich gewaltig luud ween warrt. Dor kunnst ja nu so richtig spien. Wi kennt de FDP un weet, mit wat för'n Schiet wi reken mööt, man de AfD is sachs Schiet in't Quadrat. Dat dat mööglich is, de FDP noch aftohangen! Wi sünd wirklich en Völkchen...


11.9.17 ...Öpps!

Öffentlich-private Partnerschapen, kort ÖPPs, warrt dat nöömt, wenn Staat un Privaatünnernehmen tosamen apentliche Opdrääg afwickelt. "Öpps!", dat klingt as'n Rülpser, orr as wenn een Melk verschüddt — un wat anners is dat ok nich. Dat woor erfunnen, wieldat de Staat ja bekanntlich en slechte Ünnernehmer is — BER un so. De Privaten sünd veel betere Ünnernehmers, t.B. VW, de johrenlang erfolgriek bedragen hebbt, orr ok "Toll Collect", de de wunnerbore LKW-Maut-Software entwickelt hebbt. Dor kasseert se nu veel mehr mit, as ehr tosteiht. Dat wöör de Staat nienich hinkriegen!

ÖPPs sünd nich eenfach Schiet. Se sünd för den Staat Schiet, avers för de privaten good. Dat beste Bispill is Alexander Dobrindt, de "Verkehrsminister" vun'e CSU. He is en ÖPP. He warrt vun'n Staat betahlt un vun Private. Vun mennig Private. Sülven en totale Null, föhrt he för Gehalt en apentlichen Opdrag ut — dat Ministeramt —, dorbi arbeidt he avers nich för den Staat un dat Gemeenwesen, sünnern för sien anner, private Opdraggevers; mit en fastwussen jungenhaften Grientje smitt he de Lobbys een apentlich Good na dat anner in'n Slund. Bald hett he den Staat den maximalen Schaden toföögt. (Dor sühst wedder, wat de Staat för'n slechte Ünnernehmer is — en Privaatünnernehmer harr so en perfiden Mitarbeiter längst rutsmeten!) Wenn sien Amt weg is, warrt em so veel Dören apenstahn...! Denn haalt he sik de Betahlen vun de Privaten in. Denn warrt VW dorför betahlen, dat he den Bedrugg deckt un de Sammelklagen verhinnert hett; Stratenbu, Provider un all Lobbys waart sik denn för sien Deensten erkenntlich wiesen. Dor kannst di to verlaten. Dat is uns Foorm vun Korrupschoon. Dobrindt weet dat. "Das ist Normalität", sä he hüüt to de jüngste Mautpanne (mit sien typischen Grientje). Wenn dat ganze Geld futsch is, seggt Dobrindt "Upps!". He meent avers "Öpps!"


30.8.17 ...Wi hebbt Wahlen. Avers keen Wahl. Orr?

Is echt wohr. In poor Weken sünd Bundsdagswahlen. Hett noch jichenseen dat Geföhl, dat sik dorbi wat entscheiden deit? Sünd wi etwa al as de Lü in de Törkei, Russland orr anner Länner, de ehr Wahlen ok nix entscheidt? Kiekt wi nich sünst op solk Länner dal as "undemokraatsch"? — Wi hebbt ja en gewisse Utwahl: vun Piraten bet Parasiten (also FDP). Avers welk vun de Parteien kann wat beschicken? (Leider sachs de Parasiten.) Un wat wüllt se överhaupt beschicken? Dat seggt uns nu wedder de Wahlomat, un den schulln Se sik op keen Fall entgahn laten. Bloots dormit Se weet, dat Se gegen ehr egen Interessen wählt, wenn Se wedder Ehr Krüüz dor maakt, 'neem Se dat jümmers maakt.

Man bloots, ok de Angaven in'n Wahlomat sünd opletzt bloots Wahlverspreken. Un de kann nüms inklagen. Schon Schiet.


13.8.17 ...De Todesspirale

De US-Nazis, de dor nu randaleert hebbt, erinnert de Se ok an de Taliban? Nich bloots vunwegen dat swatte Tüüchs. De ganze Aura, quasi ehr Utdünstungen, sünd liek. Wat dat nu Rassistenpöbel orr Trump orr dwanghaftig Religiöse sünd: Düsse Minschen hebbt Angst. Dat, wat överall "Hass" nöömt warrt un wogegen se nu sogor Gesetten maakt, dat Facebook dat löschen mutt — allns dat is Angst. Hass is Angst. Un wat förcht düsse Minschen? Nix Dramatischs. Lockerheit, Entspannung, Lachen. En Witz. De Freud. Taliban förcht ok Schöönheit un Musik. Dor stünn de Dood op. Se sülven köönt nich frie leven, se sünd so verkrampt, dat se sik an ehr snaaksche erfunnen Regeln fastklammern mööt. Un sik in de Illusioon bargen mööt, dat geev nix anners. Dorwegen schallt all annern Minschen liekso doon. Se köönt den Gedanken nich uthollen, dat jichenswoneem jichenseen Minsch glücklich is. Nich ut Böösaardigkeit, sünnern ut Erbärmlichkeit. Dorwegen hasst de Nazis liberale Minschen veel mehr as Taliban. Un annersrüm. De twee sünd Bröder in'n Geist.

Dorgegen hölpt meist nix, dücht mi. Wenn de Lüüd eerstmal opwussen sünd. En glückliche, entspannte Kindheit frie vun Gewalt, Ünnerdrücken un Sexualtabus — de hölpt. Avers leider sünd de Typen al groot. Un se maakt anner Lü den Globus to Höll, to de Höll in ehr Harten. Un dordör terstöört se Kindheiten — un dordör gifft dat jümmers mehr vun ehr. En Doodsspirale. Wi mööt wat doon. Ik wöör in düssen Fall vörslaan, en lichte entspannen Droge intosetten, dat düsse Lüüd sik mal vun ehr Dwangsvörstelln lösen köönt. Un denn müssen se eentlich alle in Therapie. Tja! De Therapeuten op düsse Eer hebbt de neegsten 100 Johr to doon, de Traumatiseerten to behanneln, de de Taliban & Co. trüchlaat...


9.8.17 ...O nee! Noch en Afwrackprämie!

De Autoindustrie versöcht ja nu, ut ehr egen Schietkraam mal wedder Guld to maken: mit Kampfrabatten op ole Diesel wüllt se de Bewiesmiddel för ehrn Bedrug verswinnen laten un dorbi noch Geld verdenen, indem dat se en nieges Auto losslaat. Natüürlich is dat richtig, dat de bedrogen Autoköpers en niegen Wagen mit korrekte Afgasreinigung kriegt; man se schulln nich noch wat bavenop betahlen möten! De Autokonzerne geevt bloots Rabatte. Toeerst hebbt se ja sogor versöcht, düsse Rabatte den Staat antohangen — also de Stüertahlers — as niege Afwrackprämie; dat hett nich klappt, ofschoonst sünst ja Frechheit siegt, un de Autoindustrie is dor verwöhnt. Naja, nu maakt se dat sülven.

Mennig Besitters vun ole Diesel hebbt resigneert un seggt sik, Schadenersatz orr Reparatur krigg ik ja doch nich, nehm ik even en niegen Wagen mit Rabatt. Ik kann de Lü verstahn. Man üm de Ümwelt geiht dat bi allens dat al lang nich mehr. För de warrt dat bloots slimm un slimmer. En nieges Auto, wenn dat fertig buut is un noch keen Kilometer fohrt is, hett al 70% vun sien ökoloogschen Schaden maakt. Niege Autos sünd keen Lösung. Repareern staats wegsmieten! — Ach wat, maakt warrt, wat Geld bringt. Ik resigneer ok.


30.7.17 ...Leevde geiht dör den Maag

Wokeen harr dat glöövt? Wat Trump un sien Horrorclownzirkus doot orr seggt, is de US-Börgers totaal egaal. Se hebbt villicht resigneert; villicht hebbt se ok insehn, dat ehr Ansprook an en Präsidenten — nämlich en Aart John-Wayne-Kastrat to ween, totaal bossig un maskulin un togliek brav asexuell — jichenswie vun güstern weer. Nu hebbt se Trump. De Mann, de Grenzmuern buun will, ritt all Anstandsgrenzen dal un peddt ehr twei. Dat warrt jümmer bizarrer, un dat prüde USAmerika leevt mit Zoten un Obszönitäten un schullertuckt bloots noch. Jedereen veracht dat, avers nüms hett mehr op acht. Dat is nich mehr wichtig, en Präsidenten to hebben, de dat Land anstännig vertreden orr föhren kann. Ok Korrupschoon un politisch Versagen kennt se nich orr scheert ehr nich. Ok an dat Chaos in't Witt Huus kehrt sik nüms mehr. Is Alldag. Ansehn un Werte sünd perdü, so what?

Dat eenzig, wat Trump to Fall bringen kann, is de Weerschap un dat weerschaplich Diegen vun de enkelten Wählers. Dor warrt se nich schullertucken, nienich. Man wenn Trump dor nich ganz op Grund löppt, kann he sik sachs allens verlöven.

Leevde geiht even dör den Maag. Un bi't Geld höört de Fründschap op. — Un doröver mööt wi noch froh ween.


27.7.17 ...De Opper

De Verteidigensministersche "verneigt sik" vör de twee Suldaten in den Helikopter, de "in'n Deenst vun uns Land" in Mali verschüttgahn sünd. Se is deep beweegt vun "dat Opper".

Över 6000 Minschen laat elkeen Johr ehr Leven in'n Deenst vun uns Autoindustrie — se starvt an Afgas. Un för de Autoindustrie ehr Profite to starven, is dat nich ok "in'n Deenst för uns Land"? Nix is düütscher as de Autoindustrie, oder?

Nee danke, op dat Verneigen köönt de Doden un de Nablevenen verzichten.


24.7.17 ...De Kartelloristen

Erdogan harr en List vun Ünnernehmen maakt, de "den Terror ünnerstütt". Dor stunn ok Daimler op. Süh! Dor kunn Erdo tofällig mal recht hebben — noch ehrder is de ganze Autoindustrie en terroristische Vereen! Sundheit un Leven vun vele Minschen sett se lichthannig för Profite op't Speel. Erdogan meent twoors ganz wat anners, avers dor hett dat blinde Hohn Erdo mal en Koorn funnen. — Aaaavers de düütsche Regeern weer foorts in Brass, aver sowat vun! Daimler un Terror! Utverschaamtheit! Un batz treckt ok Erdogan den Steert wedder in.

Wenn uns Regeern dat Autokartell ünnersöken müss, wöör ik swatt sehn. To'n Glück is bi uns de Justiz noch frie...


23.7.17 ...De Fehlermakers

Oh, oh, de düütsche Autoindustrie — orr beter: Automafia — is in'n Moors! Nu bringt ehr verbrekerisch Doon nich mehr bloots unschüllige Asthmatikers in de Städer üm (dat maakt ja nix), nee, nu föhlt se dat sülven — dat sleit op de Profite dör, dat deit ehr sülven weh. Aua! Also kümmt nu bald wedder de Tied vun de ""Insicht"" — un dormit vun mien Leevlings-Formuleern: "Wir haben einen Fehler gemacht." Orr, wenn dat ganz dicke kümmt: "Wir haben Fehler gemacht." In'n Plural. So as de Stasi na 1989, de harrn ja ok all bloots ut Versehn... Fehlermaken is ja so minschlich... un so weern se ja eentlich sülven de Oppers! Bi de Industrie is dat aver noch anners: Dor is düsse reumödig-wehleidige Satz jümmers de Optakt to en Griep na de Stüergeller. So warrt dat ok dütmaal ween. De Staat schall inspringen — finanzeern — utglieken — heilen...

Wehe!! To VW wöör ik seggen: Versöökt dat doch mal mit en Software-Update! Dormit kureert ji doch sünst allens.


18.7.17 ...Terror

Sünd de Mitarbeiters un Ehrenamtlichen vun amnesty international Terroristen? Erdogan meent, ja, un ut sien Sicht stimmt dat ok: "Terror" heet Angst, grote Angst, bannig grote Angst. Un Erdo föhlt Terror, wenn he düsse Lü süht. Horror. Panik. Vör nix hett Erdogan so'n Terror as vör Minschenrechtlers. Liekso as Jesus, Gandhi & Co. sünd Minschenrechtlers ut de Sicht vun gewisse Lüüd wirklich Terroristen. Monstren. Kann passeern, so'n Monster warrst al, wenn du bloots seggst: "Nu man sachten!" orr "Denk nochmal na!" Ok vör besunnen Lüüd hebbt se irren Bang.

Un dat seggt denn ja ok en Barg över düsse Lüüd.


9.7.17 ...Swatte Block na USA!

Hamborg hett ja nu wedder Roh. Un mutt orrig oprümen. Danke, Swatte Block, ji Aapen! Dank ok för de Verschärfung vun't Versammelsrecht, de nu wiss kamen warrt, un dat för de dummen Lüüd "Protest gegen G20" för jümmers juun Fratzen driggt! Ji hebbt good dat Geschäft vun de Gegensiet bedreven.

Wenn Trump dat överhaupt mitkregen hett, hett he sik wiss wunnert. In de USA gifft dat solk Phänomene ja noch nich. Dor weer dat avers besünners intressant. Stellt sik vör: So'n Mob as nu in Hamborg, man de ganze Bande hett Automatik-Gewehre! Un Munition ahn Enn! Steiht op de Huusdäcker un ballert! Ahn Dode geiht dat denn nich af. Un so'n Swatte Block kunn sik dor ja to jede Tied tosamenfinnen, nich? De Börgermeester vun New York, de in Hamborg to Besöök weer, hett sachs al dacht: Oha, op wat för'n Pulverfatt sitt wi... Trump denkt sachs nich so wied.

Ik much hiermit den Swatten Block nadrücklich inladen, sien neegsten Optridd in de USA to fiern. Wenn dat nämlich passeern wöör, geev dat ratzfatz in de USA totaal scharpe Waffengesetten. Un Trump wöör ehr afteken. Trump! — De Geschicht hett ja Sinn för Humor. Villicht passeert dat also. Wöör bloots nix nütten, de ganzen Scheetprügel dor kriggst nich so licht ut de Welt.

Noch schöner weer dat bloots, wenn de Swatten sik infalln laat, ehrn neegsten Optridd in China to maken. Denn sünd se fix verswunnen un duukt nich mehr op. Ik spend sogor wat för de Reisekosten.


7.7.17 ...Vörslag för en Terroranslag

In Hamborg röögt sik ja nix mehr — to Lann, to Water un in'e Luft. Momang — eens hebbt wi jümmers in de Luft: Wind. In de een orr anner Richt. Da kunnen wi doch, seggt wi mal, 500 bunte Luftballons köpen, opfülln mit so'n lütt beten Helium (nich to veel, se schallt nich to hooch stiegen) un an de Stripp so lütte Schachteln anbummeln mit gode Wünsch un lütte Geschenke (Gummibärchen! Blöömkens!) för de G20-Deelnehmers. Un denn överlaat wi ehr den Wind. Natüürlich stellt wi uns dorto an en Steed in Hamborg, 'neem de Wind so steiht, dat uns Gröten an de Veranstaltung ok ankaamt. Tralala!

Un denn kiekt wi de Polizei bi't Översnappen to. Helikopters stiegt op, man vull Bang — sünd in de Schachteln villicht Gift orr lütte Bomben mit Fernzünders? Warrt de Terroristen (also wi) de zünden, wenn en Helikopter to neeg kümmt? Wat schallt se doon? Meddewiel drievt de Ballons jümmer nehger na't Messegelänn. Wenn se de Ballons afscheet, fallt de "Bomben" ja dal — villicht op de Ünnerkünft vun een vun de Weltenherrschers? De Ballons verdeelt sik, sünd överall... Kameras ut alle Welt sünd op ehr richt, as bi 9/11. Terror! Terror! Terror! De Udels kriegt Nerventosamenbröök in't Dutz. Opletzt scheet de Privatbullen vun Trump op de Ballons — un kriegt Gummibärchen...

Sowat meen ik, wenn ik segg, wi schallt de Polizei mit ehr egen Hysterie to Fall bringen! Nich den swatten Block, de totalen Versagers! Fantasie!!! Vun düsse Aart kunn ik ju op'n Slag en halv Dutz Ideen levern! Maakt wat!

"Un bi mi peddt se achterna de Döör in", seggt mien Leevsten, "wieldat dat Marlichen över mien IP-Adress ehr Terrorbottschapen utsendt — ok noch verslötelt, op Platt!"


6.7.17 ...G 20

Dat langt. Nu al. Hamborg is dichtmaakt. Verkehrskollaps. Totaalöverwachen. Handys warrt afsichtlich stöört orr dwangswies vun de Polizei kuntrulleert; wat dorbi an Grundrechte vun ganz normale unschüllige Hamborgers övern Jordan geiht, is ja egaal, denn de Groooooten Twintig sünd ja dor! Hier warrst wies, wat för'n Weertünnerscheed twüschen Minschen maakt warrt. Ganz Hamborg is afsparrt, kümmst ok hüüt al nich an dien Arbeitsplatz; morgen eh nich. Mehr noch: Geschäfte in de Hoochsekerheitszonen kriegt vun de Udels Befehl, se mööt tomaken. Eenfach so. Is as in China: Rechtlosigkeit. Utnahmtostand. Kriegsrecht. Ok Dode warrt in Koop nahmen (orr wat schall dat anners heten, wenn de Handyempfang in de Binnenstadt stöört warrt? Lü köönt keen Nootroop mehr afsetten!). De Polizei schuult nich mehr de rechtschapen Börgers orr de apentliche Ordnung, bloots noch de Macht. Wenn Trumps orr Erdogans Gorillas dörknallt un üm sik ballert, wokeen warrt de düütsche Polizei denn schulen...? Wi, de Stüerbetahlers, sünd ehr Chefs! Ehr Arbeitgevers! De Souverän! Wi dröfft uns düt nich gefalln laten.

De Zivilisation is en dünne Firnis över dat Fuustrecht. In halv vun de G20-Länner is de Demokratie nich mehr as Droom orr Deko; un ganz licht kann dat ok bi uns so warrn. Dat deit nich good, mit solk Lü Ümgang to plegen. Dösige Idee, Fru Merkel.


1.7.17 ...Licht un Schadden

De Udels in Hamborg hebbt ja opstunns allens möögliche Wichtige to doon, avers nich, sik üm so'n popeligen Verkehrsunfall to kümmern. Bloots Blechschaden, avers de twee Fohrers — natüürlich junge Mannslüüd mit stylishe Klamotten un geelte Hoor — sünd ehr ramponeerte Hartens-Autos veel to wichtig, ehr vun de Krüüzung to fohrn, se tigert, Handy an't Ohr, vertwievelt blangen de Wracks op un dal, un de Verkehr staut sik, un dat duert un duert. Ja, ik fohr ok in Hamborg mal Auto. Un in den Stau kiek ik mi üm, seh de Reklaam an de Wänn, un dank den Stau heff ik Tied, en Foto to maken.


Klick op to'n Vergröttern!

Ja. Dor is nix wieder to to seggen. En anner Wirklichkeit brickt in. De Unfall mit de twee Idioten op de Krüüzung warrt Nevensaak. De Realitäten liegt as Schichten övernanner — de Doden ünner uns, wi hier un de G20-Gipfel vör uns, op den — wüllt wi dat nu orr nich — över Leven un Dood vun vele Minschen verhannelt warrt. Un dat vun Eitle, Korrupte, Verrückte, Verbrekers (de König vun Saudi-Arabien...!!) un en poor Nüchterne. Vun Minschen even — Minschen mit Macht, mit to veel Macht, villicht ganz ahn Macht, wat se avers noch nich weet. Minschen mit Verantwoorden. Ik seh de Krüüzen; wo mall köönt Minschen ween? Miteens denk ik, Demonstreern is nich noog, Demonstreern deit Noot, ja — man ik much ok beden.

Ach ja, hüüt warrt Helmut Kohl begraven. Eitle, Korrupte köönt ok düt un dat Gode beschicken. Licht un Schadden. Europa höört op de Lichtsiet. Jichenswie trööst mi de Gedank en beten. Schadden un Licht.


27.6.17 ...De schreckhafte Elefant

Hamborg steiht nu al meistto kopp. Riesige Lager warrt inricht, "Planten un Blomen" warrt afsperrt, de Hysterie stiggt an. Dat allens för twintig Politikerneesen, de so totaal unbeleevt sünd, dat se sik alltied förchten mööt, de avers partu merrn in en Grootstadt tohoopkamen wüllt. Verkehrte Welt. Trump warrt sogor sien egen Drohnen mitbringen — un he dröff de Dinger sogor flegen laten. Sünst dröff sik avers nich veel rögen. Sogor de allerlüttste Demo, poor Dutz Lüüd, warrt vun de Polizei fix verteihnfacht — nich ganz as fründliche Ünnerstütten. Wi sünd all potentielle Gefangene. Un as poor Lüüd en Auto mit grote Kisten binn parkt hebbt, weer de grote Hund los.

Dat lett as en totaal schreckhaftige Elefant, de vör en Grashüpper in de Hööcht jumpt un luut trompeten deit. Dat müss doch mööglich ween, dat de sik in ehr egen Hysterie verstrickt? Also wenn dat nich poor schnieke ironische Tricks gifft bi den Gipfel, de den ganzen Sekerheitsapparat för nix hittlopen laat...! De "swatte Block" kann tohuus blieven. Hier is Fantasie fraagt. De Ball liggt op'n Ölbenmeterpunkt, dor geiht wat!


25.6.17 ...Droompoor

Ik weet ja nich, mit den niegen franzööschen Präsidenten Macron geiht mi dat jüst as mit Angela Merkel: as Minsch schient he mi ganz sympathisch, man vunwegen sien Politik bün ik skeptisch. He is mi beten to aalglatt. Dat warrt sachs wedder de glieke neoliberale Schietkraam. Merkel lehrt ja ok eenfach nix to.

Man de Politik is ja nich allens. Merkel un Macron, Macron un Merkel — wat för'n Poor! Echte Droompoor kennst ja doran, dat se een Naam hebbt, ok wenn dat twee Lüüd sünd. Paradebispeel: Brangelina. (Naja, Paradebispeel — wenn ik ehrlich bün, dat eenzige Bispeel, dat mi infallt.) Siet den Gipfel in Brüssel hett dat niege Euro-Droompoor Merkel un Macron ok so en Naam: Mercron. Vörn Mer-kel, achtern Ma-cron. Natüürlich kriggt de Daam den Vörtridd. Nee, nich dat wedder Düütschland domineert — dat is bloots ritterlich, as de Franzosen sünd. Un wenn Macron toeerst harr nöömt warrn wullt, harr dat Droompoor ja "Mac-el" orr "Macr-el" heten. Un as en Makel orr — leger noch — en Makreel will so'n Droompoor ja wirklich nich heten! Ok nich, wenn se aalglatt sünd.


18.6.17 ...Kranz op't Graff

"Bi VW", sä mien Leevsten, "rüst se nu den ganzen Afgas-Schaden kostenlos na. Mit so'n Plastik-Seev. As wenn dat al jümmers de Lösung west weer! Un holl di fast: Op düt Plastikseev — de Gipfel vun Groottöögigkeit! — geevt se twee Johr Garantie!! Nu schallt de düütschen Autofohrers dankbor ween. In de USA mutt VW sünstwat betahlen un de Wagens trüchköpen, man de düütschen Autofohrers schallt dankbor ween för en Plastik-Seev mit twee Johr Garantie. Un keen Gericht in Düütschland warrt jemalen VW to mehr vergattern... Dat is so, as wöör en Möörder seggen: »Och, dat deit mi ja ok leed, un ik verplicht mi ok, en Kranz op't Graff to leggen un Blomen op't Graff to planten — twee Johr lang.« Un as wöör de Richter denn de Verwandten vun't Opper ankieken un seggen: »Na, is he nich eentlich en feinen Keerl? Nu köönt Se em doch nix mehr övelnehmen — weest Se dankbor!« So is dat in Düütschland, hier warrt de Industrie noch schuult! Man nich de Börgers."

Dat kümmt hüüt nich mehr faken vör, dat en Fru nich dat letzte Woort hett, man hier heff ik dat, wat mien Leevsten sä, nix mehr totofögen.

Ach ja: Helmut Kohl is ok doodbleven. Nu köönt se ja endlich en Fleegtüüchdräger na em nömen. (Dat heff ik 2003 schreven. Gruselig, wo aktuell dat hüüt wedder is mit dat Oprüsten, nich?) Ik wöör em ok geern en Kranz op't Graff leggen, man bün mi noch nich ganz kloor över de Opschrifft op de Sleep. Weet Se wat Passlichs?


8.6.17 ...De Wirklichkeit III

Dat gifft ja Saken, de wiest di op een Slag, wo mööd un möör du büst. So güng mi dat hüüt in Hamborg, as ik en Firmenfohrtüüch sehg mit de Opschrift "Erfolgreich feiern" un de tohöörn Webadress. "Erfolgreich feiern"! Mien Gott... steiht nu ok dat Fiern ünner Erfolgsdruck? Denn much ik lever gor nich mehr fiern. Erfolgreich arbeiten, erfolgreich lernen, sogor erfolgreich kommunizeern — dat hebbt wi allens akzepteert. De Leistungsdruck hett meist jeden Winkel vun uns Leven tofaat, sogor vun uns Privaatleven... Avers fiern deit een doch, wenn de Erfolg al dor is — wenn de Arbeit daan is — wenn de Druck vörbi is?! Nee, nu nich mehr. Ok de Fier is al wedder en niege Proov. Na den Erfolg is vör den Erfolg, so wöör Sepp Herberger dat sachs hüüt utdrücken. De Minsch dreiht en ewig Looprad, wi sünd nienich fertig, nienich good noog. Dat gifft keen Pausen mehr, keen Oasen, keen Fierdaag. Dat is hüüt de Wirklichkeit. Ik gah nu erfolgreich slapen, un eensdags erfolgreich starven. Tschüß.


7.6.17 ...De Wirklichkeit II

Is dat noch Wirklichkeit? Kann dat angahn? De junge NSA-Mitarbeitersche, de nu as Whistleblower verhaft worrn is, heet wohraftig (?) Reality Winner. Mal afsehn dorvun, wat sik Öllern denkt, de ehr Kind "Reality" ("Wirklichkeit") nöömt: "Wirklichkeit Sieger" heet de Fru, de publik maakt hett, dat Russland bi Trumps Wahl mitmischt hett. Dat weer schöön, wenn opletzt de Wirklichkeit as Sieger rutkamen wöör; man meddewiel süht dat so ut, as wenn de junge Fru de Verlerersche bi de ganze Saak weer. Un dormit ok de Apentlichkeit un de Demokratie. Dat is en Unding, woans Whistleblowers behannelt warrt. Ach ja, se harr dat Dokment nich rutgeven dröfft. Man nüms betwiefelt, dat dat echt is. Reality even.

Süht düüster ut för Reality, de de Wirklichkeit an't Licht bröch. Wohrschienlich süht Trump al vunwegen ehrn Naam root. Natüürlich winnt opletzt jümmers de Realität. Avers üm welken Pries...

P.S. Morgen bi de Wahlen in GB kümmt ja rut, wat de Pastorendochter May to de Pastorendochter Merkel in Tokumst noch seggen kann: "Unter uns Pastorentöchtern..." Wenn May de Wahl, de se sülven veel to fröh vun'n Tuun braken hett, versemmelt — denn kriggt se den Spottnaam Theresa "Schröder" May.


1.6.17 ...De Wirklichkeit

Komisch — Donald Trump is, so schient dat, "en Deel vun de dore Kraft, de bloots dat Böse will un bloots dat Gode schafft". Un dat mit Hoochtempo. He, de nix lever much as Fakten verwischen un de Realität utlöschen — he sorgt dorför, dat sik för den ganzen Rest vun'e Welt Richtig un Falsch klorer trennt as je. He, de den Klimawannel nich wohrhebben will, sorgt dorför, dat sik een Land na't anner klor to den Klimaschuul bekennt. He, de Europa minnacht un dat geern terslaan wöör, sorgt dorför, dat de Europäers nehger tosamenrückt — he stärkt Europa. He will "America great again" maken; real is he de Dodengräver vun USAmerikas Weltmachtansprook. Un he merkt dat nich! Trump is nich bloots en Karikatur, he is ok unfähig, in de Wirklichkeit antokamen.

Wi hebbt dat de ganze Tied nich glöövt. Angela Merkel ok nich. Na den EU-Besöök vun Trump hest ehr dat anmarkt. All Politikers hest ehr Fassungslosigkeit anmarkt. "He is wirklich so!" — Man wat Trump nich lehren kann, lehrt de Rest vun'e Welt in Hoochtempo; un dat is ja even nich slecht. Dat to sehn maakt Höpen. Bloots för den Juni in Hamborg is dat keen Godes Teken; de Klima-Utstieg maakt sachs dat Weder wärmer, nich avers Trumps Empfang op den G20-Gipfel... un in de Straten vun Hamborg.


23.5.17 ...Feigheit

Uns Wöör warrt ja jümmers mehr verdreiht un vun binnen uthöhlt. Dat behinnert dat klore Denken, denn to'n Denken brukt wi Begriffe; wenn de weg orr holl orr ahn Bedüden sünd, is de beste Bregen hülplos. Dat is sachs Afsicht. Wi schallt unklor denken. Demokratie is datsülvige as Kapitalismus, un wokeen gegen uns is, hett all slechte Egenschapen vun'e Welt. Ok Feigheit. So nu ok wedder bi den gresigen Anslag hüüt. Sülvstmoordanslääg sünd allens möögliche Slechte, avers de sik sülven in de Luft sprengt, sünd nich feig; un al gor nich dröfft dat Lü seggen, de in ehr sekere Wohnstuuv sitt un per Handy-App in anner Länner mit Drohnen Lü doodscheet. Dat heff ik allens al 2005 hier in düt Notizbook opschreven. Sülvstzitat mutt mal ween.


19.5.17 ...Inklusion

Se hebbt wiss mitkregen: Inklusion is dat grote Bildungsthema. De Sünnerscholen orr Förderscholen warrt mehr un mehr oplööst, de behinnerten Kinner schallt mit de "normalen" tosamen ünnerricht warrn. Dorbi mööt beid op'nanner togahn: De fixeren Kinner stekt en beten trüch, un de, de mehr so armsinns sünd, kriegt en extra Stütt, en Sünnerpädagogen orr so, an'e Siet. So kann't angahn, dat amenn wat tostann kümmt — naja, jichenswat jedenfalls.

En Bispill gefällig? Op den bevörstahn G7-Gipfel in Sizilien hebbt se de Redetied för all Referenten radikal kötter maakt, un ok bi'n Nato-Gipfel in Belgien dröfft de Redebidrääg bloots poor Minuten lang ween. Dat Inklusioonskind Donald ut de USA hett nämli nich so'n lange Konzentraschoon, he kann nich lang tohöörn. De annern nehmt Rüchsicht. So kann ok Donald halvwegs mitkamen un bastelt opletzt wat Schööns ut Buntpapeer to'n Dank.

He is ja as Inklusioonskind bloots to Gast. In de USA is nämli de ganze Regeern en Förderschool.

18.5.17 ...Is Quatsch

Merrnmang den Irrwitz vun de Weltgeschicht mutt ik doch ok noch mal op de Idiotien to snacken kamen, de uns in'n Alldag bemööt. To'n Bispill op de Reklaam.

Op düt Bild sühst, wo Reklaam Reklaam dör'n Kakao treckt. Un dat is verdeent, denn: De Reklaam vun düsse Online-Partnerbörs, 'neem sik all 11 Minuten en Single verleevt, de is so plump lagen, dat gifft't nich. Eerstmal: Keen Minsch verleevt sik in en Online-Profil. Tüünkraam. Tweetens: Wat een verleevt is, kannst gor nich meten. Is also lagen. Drüttens: Siet Johren maakt se Reklaam mit de 11 Minuten — wenn Reklaam wat nütten wöör, wenn se also jümmer mehr Kunnen harrn, denn müss de Tied ja woll meddewiel lütter woorn ween. All 6 Minuten orr all 4 Minuten müss sik nu en Single verleven. Man nee, 6 orr 4 sünd ja nich so sexy Tallen, de keddelt nich so as de 11! Kloor, dat nienich nüms wat all 11 Minuten deit. De Tall is utdacht. 11 is even en attraktive Tall, un Reklaam warkt ja nich över'n Verstand, sünnern över dat Unbewusste. — Dat de Likör-Reklaam nu apen över ehr Kollegen lacht, gefallt mi. Liekers fraag ik mi doch: Wat bringt de Parship-Reklaam-Makers dorto, de Minschen för so dösig to hollen?! — Un denn kiek ik mi in de grote Welt üm, un denn fraag ik mi dat nich mehr.


16.5.17 ...Is platt

Uns' Matin Katja Renfert hett mi op stött, dat nu ok de Staats- un Universitätsbibliothe Hamborg ("Stabi") plattdüütsch snackt: Hier is allens üm de Stabi op Platt verklaart, un twoors op heel godes Platt. As sik dat för en Universitätsbibliothek höört. Is to höpen, dat de plattdüütschen Böker ok orrig nafraagt warrt!


14.5.17 ...Is passeert

Nu is över en Virus en ganzen Koppel apentliche Inrichten lahmleggt worrn. Noch keen Atoomkraftwark — avers Sükenhüüs in England, en Fabrikationsstraat bi Renault in Frankriek un Iesenbahnen in Düütschland. Tja. Ik heff dat seggt. Eenfach nalesen. Ik segg dat nu nochmaal: Gaht offline. Fix.


9.5.17 ...Maiengegoogel

Hüüt wull ik mal wedder bi't Finanzamt anropen. Un en (Online-)Telefonbook bruukst ja vundag nich mehr — Google seggt di allens. Dat süht denn so ut:

Kiek eens ganz nerrn de Reeg: "Sind Sie der Inhaber dieses Unternehmens?" För en Minschen is de Fraag naiv, för en Computer — naja. Ik kunn ja nu avers mit teemlich veel Recht seggen: Jo!, denn uns Börgers un Stüerbetahlers höört ja de ganze staatliche Kraam eentlich to, nich? Ja: Ik bün de Besittersch vun't Finanzamt! Avers ok en lütt beten annersrüm. As in dat ole Leevsleed: "Ik bün dien, du büst mien"

Wenn ik dor nu avers op klicken do, schall ik mi glieks as Ünnernehmer inloggen, mit Passwoort. Dat heff ik nich. Ik fraag mi avers, wokeen den Togang hett. Schäuble...? Orr gellt ok hier, as dat in't Gedicht heet: "Verloren is dat Slüzzelin"?

Dat sünd so Maiengedanken.


5.5.17 ...Allens klaut!

Ik segg bloots: de Franzosen!! Nich bloots hebbt se uns schöne Holsteinflagg klaut un unsinnigerwies op de Kant stellt; nee, se hebbt uns ok uns Wahldag klaut — un meist dat ganze Opmarken vun de Welt dorto!! Hallo?! Hier warrt an'n Sünndag wählt, hier in Holstein! Un wi hebbt dat Monopol dorop, den gröttsten Schiet tosamentowählen, un bi uns is meist jedeen Politiker en halve Gauner! Hallo, Frankriek! Ji mööt uns nich allens namaken! Wählt mal bloots halv so veel Unsinn as wi! Geevt sik mal tofreden! Wi sünd de dörknallten Noordlichter, ji sünd en seriöse Kulturnation! Ischa nich uttoholln, is dat.

Na, tominnst een Idiotie warrt se uns nich namaken: De FDP kümmt bi ehr nich rin. So irre sünd nich mal de Franzosen.


20.4.17 ...Inakzeptabel!

"Inakzeptabel" is en schönes Woort, dat wi upstunns wedder enerwegens höörn köönt. Hoochsaison harr dat bi Erdogan sien Nazibeschimpfen vun anner Politikers. "Das ist völlig inakzeptabel!", hebbt Merkel & Co. töönt. Schall heten: Wi akzepteert dat nich, wi wüllt dat nich hebben, wi nehmt dat nich an! "Mi doch egaal", grien Erdogan, "maken köönt ji ja nix." So is dat ok: Se köönt nix maken. Un hier sühst ok glieks den Haken an de Saak: "Inakzeptabel" is en teemlich eensiedige Veranstalten. Un en ganz un gor passive. Dat heet bloots: Mi gefallt dat nich, avers ik kann nix maken. — Orr: Ik will nix maken. Denn ok Tostänn, Missstänn un Schandale warrt geern "inakzeptabel" nöömt. De Krim-Annexion funnen se "inakzeptabel", dat Syrien Gaskrieg föhrt, is "inakzeptabel", dat de Hülpsorganisaschoonen in'n Südsudan nich in de Flüchtlingslager laten warrt, is "inakzeptabel"... opneegst warrt Dusende Hungerdode in Aafrika "inakzeptabel" ween. Wi wüllt dat nich hebben. Wi sünd op de richtige Siet. Un dor blievt wi. Passiv.

Insofern is "inakzeptabel" as Woort doch nich so schöön, sünnern hööchstens ... akzeptabel.


14.4.17 ...Gesunde Hinrichten

Een Staat in de USA, so höört wi, will nu ganz fix en ganz Koppel Verurdeelte per Giftsprütt hinrichten. Passt in de Tied — is ja Karfriedag —, man dorwegen doot se dat nich. Nee, dat Gift löppt af. Hä?

Dorachter stekt, dat keen Pharmakonzern mehr Gift an de Kaschotten verköpen will — dat klingt ja nich good as Reklaam. Dat letzte Gift, wat se dor in't Kaschott hebbt, löppt nu af. Nee, nich dat dat dorna ungiftig warrt — tödlich noog is dat noch, man dat Datum is even üm, verstaht Se dat nich?! Is as bi'n Joghurt — de is noch en ganzen Monat lang good, avers wegsmieten muttst em liekers. Dat Datum is ja üm. Mutt doch allens sien Ordnung hebben! — Un överhaupt: Mit so'n gammlig aflopen Giftsprütt ümbröcht to warrn kannst doch keen vun de Delinquenten tomoden! Wi all weet ja, so aflopen Saken sünd gor nich gesund. Amenn starvt he gor nich richtig dorvun?! De Delinquent hett en Recht op frisches Gift — mit en gültig Datum! Mutt doch allens sien Ordnung hebben.

Ja, dat is wirklich USA, nich Düütschland. Kunn Düütschland ween, meent Se ok, nich? Man nee — wi Düütschen levert uns Wapen ja noch annerwegens hen, wenn de afloopt! Wi weet, de sünd noch tödlich noog. Weern wi as de USAmis, wöörn wi de brav dalleggen ("Die Waffen nieder", Se weet al) un seggen: "Dat döcht nix mehr, dat Datum is üm!"

Weer noch irrer, avers doch ganz schöön.


9.4.17 ...Wahlomat!

Leven Mit-Holsteeners und Mit-Holsteenersche, ik much nochmal ganz eernst op henwiesen, dat Se sik den Wahlomaten nich entgahn laat! Siet een Week is he endlich online. Em to bruken is heel nütt. Wi wählt sünst faken na Personen, na Gesichter un Sympathien, sogor wenn wi dat nich vermoden sünd. Bi'n Wahlomaten sühst keen Gesichter, föhlst di "blind", avers du warrst wies, dat de Wahl na Personen eentlich dat Blinde is. — Ik bün ja dorför, den ganzen Parteienklumpatsch dör en Afstimmen över Saakfragen to ersetten. Avers dat is en anner Thema!

Also, hen na den Wahlomaten! Kieken, wat Ehr Partei is! Wenn de AfD rutkümmt, an'n Wahldag tohuus blieven! Wenn en anner Partei rutkümmt, wählen gahn!


16.3.17 ...Rum-pel-stilz-chen!!!! Nu!!

Presskonferenz. Journalist: "Frau Merkel, was sagen Sie zu den neuen Vorwürfen von Präsident Erdogan?"
Merkel: "Ach, hat der wieder was gesagt? Keine Ahnung, damit befass ich mich, wenn ich nichts Wichtiges mehr zu tun habe."

Alternative: Journalist: "Frau Merkel, Präsident Erdogan nennt Europa faschistisch, was sagen Sie dazu?"
Merkel: "Gar nichts, auf Kindergartenniveau unterhalt ich mich nicht."

Alternative: Journalist: "Frau Merkel, Präsident Erdogan ..."
Merkel: (Lacht hemmungslos, wenn de Naam Erdogan fallt)

Al an'n 9.1.2015 un an'n 15.4.2016 heff ik de Saak mit dat Rumpelstilzchen verklaart. Wenn een en Choleriker eernsthaftig so wiet drieven will, dat he dat Rumpelstilzchen maakt, mutt een dat systematisch anfangen, un dat Timing is dorbi dull wichtig. Dat is as bi en Schaukel: Wenn de ganz hooch schall, muttst jümmers in'n richtigen Momang schubsen. Un "schubsen" heet hier nich, dat hööchste Politikers Erdogan wichtig nehmt, en eernst Gesicht maakt un vun "inakzeptabel" snackt! Dat will he ja, dat deit em good, da föhlt he sik buukpinselt. Nee, schubsen heet: lachen!! Em de kole Schuller wiesen! Em toben laten un dorbi vun't Weder snacken! Em Gift un Gall sprütten laten un dat ignoreern! Em wiesen, wo unwichtig he is! Em so vör sien Lü blootstelln!

Glöövt Se mi, ik kenn solk Charakteern. Ik weet, woans een de op 180 bringt. Wenn wi noch vör dat Referendum sehn wüllt, dat Erdo sien een Been packt un sik vör Woot merrn tweiritt as dat Rumpelstilzchen, denn mööt wi nu mit de Kooltsnutigkeit anfangen! Jede Momang is wichtig! Na dat Referendum is de Schangs vörbi. Un Erdo is so'n schönen Choleriker. Un he hett dat sooo verdeent!


14.3.17 ...En Zensur finnt nich statt

Justizminister Heiko Maas hett dat staatliche Gewaltmonopol satt. He will de Zensur "outsourcen" an Facebook. He will, dat in Tokumst Privaatünnernehmen över Wohrheit un Recht beslaat. Se dröfft dorför ok in grundleggen Frieheitsrechte ingriepen. Nee: Se mööt dat sogor. Sünst drauht ehr hatte Strafen. Un "Zensur" heet dat denn ok nich mehr — sünnern "Hass un Falschmellen löschen".

Wenn en Naricht in de sozialen Nettwarken "apensichtlich en Falschmellen" is, mutt dat Ünnernehmen dat löschen. Op Henwiesen vun de User. "Was ist Wahrheit?", fraagt Saladin den Nathan in't Drama, fraagt Pilatus den Jesus, un de Keerls hebbt recht: wat stimmt eentlich? Is de Klimawannel en Falschmellen? Orr is annersrüm sien Leugnen en Falschmellen? Kann ik noch dat Grundgesett ziteern? Dor steiht doch in Artikel 5 "En Zensur finnt nich statt". Is dat nich en Falschmellen? Un wat is mit de Reklaam? Dröff de Post noch de ganzen Werbemüll verdelen, wenn dor in steiht "Uns Produkte sünd de besten!" un "VW buut saubere Autos!" un so? Maakt sik de Post damit nich sülven straafbor? Mööt de Postbüdels nu nich elkeen Werbeprospekt dörkieken un de apensichtlichen Falschutsagen mit'n Edding swatt överpinseln?

Ok löscht warrn mutt, wat "apensichtlich straafbor" is, also Hetze, Beleidigen, Gewaltopropen. Dat is natüürlich en mächtige Entlasten för de Justiz. Wenn en Straafdaat "apensichtlich" is, dröff ok en Privaatfirma in de Grundrechten ingriepen — hier in de Redefrieheit. Bruukst keen richterliche Anordnen. Wenn sik dat bewährt, warrt dat op all Straafdaten utdehnt: Wenn dat "apensichtlich" is, dat ik een üm de Eck bröcht heff, kann mi ok en Privaatfirma inbuchten — ahn richterliches Urdeel. Weer ja apensichtlich, nich? Villicht köönt — nee: mööt! — dat bald ok Privaatlü doon, also enkelte Minschen ehr Mitbörgers?

Mal nadenken: Wenn jedereen sülvst entscheiden mutt, denn mutt ik dat ok. Dat Gesett, dat Maas vörsleit, is apensichtlich verfatenswidrig. Also dröff ik dat ok nich befolgen — un Maas mutt ik gefangennehmen. Nich?


8.3.17 ...Melania, gah!

Hüüt is Weltfruunsdag! Ut düssen Anlaat much ik mal en Fru Moot maken, de upstunns an en Knackpunkt vun ehr Schicksal steiht: Melania, verlaat em! Pack dien Kraam un gah!

Melania Trump weer achter't Geld her, avers se is keen totale Proletin. Wokeen ehr in de verleden Maanden in't Gesicht keken hett, de kunn sehn, wat se utsteiht. As se Trump nahmen hett, weer de bloots stinkriek. Pienlich weer he alltied, man dormalen weer he in sien egen Krinken, Halfwelt, Schickimicki, Glamour, dor pass dat un füll nich so op. Sietdat he avers anfungen hett mit Politik, süht nich bloots de hele Welt, wo pienlich he is — ok Melania warrt nu eerst wies, wat för'n Idiot he würklich is, un dat warrt ehr jümmer pienlicher! Dat Schickimicki-Girl Melania warrt in alle Apentlichkeit to en opwussen Fru, riep vun Lieden. Orr wokeen kann sik de Quaal vörstelln, an Trumps Siet to stahn, wenn de Dummtüüchs bölkt orr den Kotzbrocken rutkehrt — un för di sülven heet dat bloots: smile, smile, smile! Dat is Folter. Trump will ja sowiso de Folter wedder inföhrn — för Melania hett he dat al daan!

So steiht se an Trumps Siet, en verquäälte Statue vun Slaaveree vun't Geld un vun de Konventioon. Melania, versöök dat mal as Frieheitssstatue! Stah op un gah!


29.1.17 ...Verbaden?

Hach ja, de ganze Welt is nu de Donald-Trump-Show, un wi maakt ok noch mit!! Egaal, wat hett he denn nu wedder seggt? Över Folter hett he philosopheert. "Welk seggt, dat funscheneert nich", simmeleer he — natüürlich apentlich —, "man ik meen, dat funscheneert doch, un ik wöör glieks gröön Licht geven, man ik laat dat mien Ministers entscheiden." Hallo? Wat Folter nu funscheneert orr nich — Folter is verbaden! Sogor in USA. Verbaden — jüst düt Woort kennt uns Donald nich. Bi em is verlööft, wat geiht, un de Stärkste hett recht. De Realität sünner Maske.


25.1.17 ...Alternative Fakten

Also ik mutt seggen, Trump enttäuscht nich. Överhaupt nich! Dat he de Hannelsafkamen opkünnigt, hett sogor wat Godes. Bi allns, wat he deit, is aver doch de (bit nu) gröttste Errungenschap düt: de "alternativen Fakten". Eerstmal de Chuzpe vun sien Beratersche Conway, düssen Utdruck överhaupt to bruken!! Vun uns harr sik nüms sowat truut, nich? Dor sühst, in wat för Sphären de Trump-Trupp denken kann. Denn dat Entkernen vun uns Spraak! Wi lacht jümmers över "Entsorgungspark" un "Freisetzung von Arbeitskräften" staats "Mülldeponie" un "Rutsmieten" — man wat för'n Kinnerkraam is dat, meten an Conways revolutionären Spraakgebruuk! Un denn de Funkschoon vun so en Instrument!! Dat gifft nich mehr Richtig un Verkehrt, nich mehr Levig un Dood, nich mehr Swatt un Witt — dat sünd allens gliekberechtigte Fakten, de togliek todrepen doot. Conway maakt dormit de ganze Welt to Schrödingers Katt, un bloots Trumps Trupp dröff meten...

Togliek is dormit de Realität, ja de ganze Welt de Borrn wegtrocken. Wenn de Spraak nix mehr bedüüdt, wenn de Wöör togliek se sülvst un ehr Gegendeel heet, denn brukt wi eentlich överhaupt nich mehr snacken. Föhlt Se dat? Wi weet nix mehr un köönt nix mehr utdrücken. In uns Bregens warrt liekso en lerriges Chaos as in Trump sien. De Justiz kann nüms mehr verurdelen, de Wetenschap nix mehr meten... un Wahlen gellt nix mehr. Momang! Wahlen gellt nix mehr?! Denn is Trump ja gor keen Präsident! Dat is en alternative Fakt, de mi ganz sympathisch is.


22.1.17 ...Stolt un Inbilden

Europadrepen vun de Rechtspopulisten in Koblenz; Le Pen, Wilders, Petry, all sünd dor. Un de ganze Bande skandeert tohoop: "Merkel muss weg! Merkel muss weg!"

Gegen Merkel kannst veel seggen; avers dorop kann se stolt ween. Ik höp dull, dat düsse Minschen mi liekso in Grund un Boden verdammt. Weer mi en Ehr.

Vun de Stolten na de Inbildschen is en korte Weg: Leider keen Fake News weer de Inthroniseern (ja!) vun Donald Trump. Avers de Besökertallen, de weern en Fake! Veel höger weern se! Höger as jemalens bi en Amtsinföhren! So töönt Trump stantepe. Nich to glöven — kann he sik noch sülven höörn? Warrt he nich wies, wo lächerlich he is? Truut sik al nu nüms mehr, em dat to seggen?

Eendoon, Trump-Tallen sünd also jümmers de hööchsten, egaal wat dat de Besökertall is, dat Weerschapswassdom orr de Längde vun sien Schniedel. In Tokumst mööt wi bi all Trump-Tallen an den meten Weert en Null anhangen. Dat geiht licht: De Null is he sülven.


16.1.17 ...Wohrschuug, allens Fake News!

De Welt is opdeelt. Macht un Geld sünd in de richtigen Hänn un warrt dor jümmer mehr. Bloots de dösigen Wahlen stöört noch. Un dor muttst bloots för sorgen, dat de Lü nix anners to höörn kriegt, as wat de Mächtigen wüllt. Fröher geev dat dorför Zensurbehörden, vundaag kannst jedeen Privatfirma so as Facebook to solk hoheitliche Opgaven verdonnern. Bloots wat "wohr" is, also tamm, dröff schreven warrn. Nee, nich dat etwa een nu mit de ganze Wohrheit över Missstänn un Korrupschoon utpackt! Nee, nee, so is dat nich meent. Ji seht ja, woans dat de Whistleblowers geiht — Knast orr Exil. Nee, sowat, dat de Lü dull maakt, dat is denn ja al "Hass". De warrt ok löscht!

Facebook warrt as Inquisition ermächtigt un dröff faststelln, wat de Wohrheit is un wokeen linientru is. Wat ehr verdächtig schient, kümmt weg. Ahn Rekenschap. De Staat warrt nich füünsch, wenn se to veel löscht (wat sien Opgaav weer, he mutt de Frieheit vun'e Menen verdeffendeern), sünnern bloots, wenn se to wenig löscht. Opneegst warrt ok noch all Emails un WhatsApp-Botten scannt, un wat nich "wohr" is orr to "Hass" opstachelt, verswinnt. Tschüß, Märken, Parodie un Apriljux. Schrifft wedder op Papeer!

Nee, nich dat ik för Lögen un Pöbeleien bün. Man wokeen bestimmt, wat dat is? Wokeen dröff mi zenseern?! Wenn en Trump sien "Wohrheiten" fastsett, dröff em nüms mehr wedderspreken? Nee, de harr dat Zenseern gor nich nödig. De stellt sik as Opper dor, un de lütten Lü wählt em glatt gegen ehr Interessen. Dat kriegt uns Politikers denn doch noch nich hen. Dor öövt se noch...

Se öövt noch?! Dat striedt se af! Stimmt nich! Fake News! Löschen! — Ach wat. Ironie hett ja doch keen Sinn mehr. De Realität kickt ehr elkmaal vun achtern in de Knee un överhaalt ehr.


2.1.17 ...Gode Vörsätt

Moinmoin un frohes nieges Johr! Hebbt Se sik wat vörnahmen för 2017? Ik heff dor en Vörslag för de Ünnernehmen vun Enkelthandel un de Reklaamweerschap: Höört op mit dat hier!

So seht de Fensterbänk in en Hamborger Mietshus an de Fierdaag ut!! Armhoge Stapel mit Schiet-Reklaam! In dusende un dusende vun Hüüs! Mutt dat ween?! An de Fierdaag? Nüms will juun Papier-Spam!! Un allens fein in Plastik insweet't — dat een dat nich mal kumplett in de Ooltpapeer-Tunn smieten kann — tominnst nich ahn slecht Geweten! Gifft ok al en Petition dorgegen, avers dat versleit bi ju ja nix! Ik sett ju nu as Vörsatt för 2017: Sluss dormit! Neegst Johr will ik nix dorvun sehn! Den Weg na de Höll, so wiet he ok is, den kannst al tweemaal mit juun Schiet plastern — un dorför sünd gode Vörsätt ja dor!

Un de Plastikverpacken, de stekt juuch sünstwohen!!!


31.12.16 ...Postfaktizität II

Hach, dat gifft in't Internet "Fake News" — Norichten, de gor nich stimmt! Russische Hacker kunnen de Wählers "vun buten manipuleern"! Un neegst Johr is Wahl in Düütschland! Miteens seht wi en rores Schauspeel: wo fix de Politik aktiv warrn kann, wenn een in ehr Geheeg wildern geiht. Dat geiht üm ehr egen Existenz! Nu brennt de Büx. Dor mutt foorts wat passeern! Stantepe! Un wenn en staatliche Wohrheitsbehörde hermutt — klingt as vun Orwell utdacht, nich? —, eendoon, dat mit de falschen Fakten mutt ophöörn! Unsen Wahlkampf dröff nüms stören!

Wenn uns Politkaste seggt, nüms dröff de Wählers beeinflussen, meent se: nüms as wi. Nüms dröff de Lü manipuleern? Nüms as wi. All Norichten mööt stimmen — bit op uns Wahlkampfverspreken. Dat weer ja ganz wat Niegs, wenn de ok stimmen schulln! De weern al jümmers postfaktisch.

Nich missverstahn: Ik bün wiss nich för en Wahlkampf à la Trump. 80% Lögen is doch för düütsche Verhältnisse beten veel. Man de Hüchelee, de sik hier wedder wiest, hett doch eerst de Populisten so groot maakt. Wohr blifft: Dat Polit-Establishment hett versaagt. Wenn se liekso fix togang west weern, wenn dat de lütten Lü orr de Buurn orr de Lüttünnernehmers an de Existenz gahn weer, denn müssen se sik hüüt minner Sorgen maken. — Weer schöön, wenn so'n Wohrheitsbehörde de Wahlkampfparolen kasseern wöör — een na de anner...


7.12.16 ...Gipfelwahn

Worüm in Dreedüwelsnaam maakt se sowat as dat OSZE-Drepen in Hamborg? Un, veel slimmer noch, in'n Sommer den G20-Gipfel? Woso överhaupt in en Stadt? Ha: "Wegen de Weltapenheit vun Hamborg", seggt Steinmeier, de "Gastgever". Weltapenheit?! Hier is allens afsparrt!! Is dat villicht weltapen?

Ik segg Se, wat weltapen is: de Grote See. De wiede, blaage Oozeaan. Un ik segg Se ok, wat luxuriöös is: en Krüüzfohrtschipp. De Dinger hebbt Platz noog för Dusende Lüüd un Helikopterlandeplätz baven. So'n Dings warrt buten op de See schickt, de Politikers warrt mit Heevschruver inflagen, dor köönt se klönen, so lang se wüllt, un nix mutt afsparrt warrn un keen Polizei is nödig. Gifft ok keen Gegendemos!! Bloots handverlesen Presse! Un Komfort hooch dree. Dat is Vernunft — in en Tied, in de de Politik sik so veel Fienden op all Sieden maakt hett.


30.11.16 ...IoT-Idiotie

Jaja, dat IoT! Wat, Se weet nich, wat dat is? Utspraken warrt dat "Ei-o-Tie". Is avers keen Tee-Ei. Dat is dat "Internet of Things", op Hooch dat "Internet der Dinge" orr "Internet vun Gegenstänn". Klaar, dat en Kiekschapp vundaag online gahn mutt — dat mutt ja Filme ut't Internet wiesen! Un dat Köhlschapp mutt ok online ween, dat dat den Joghurt automaatsch nabestelln kann, wenn dat utgeiht. En intelligentes Köhlschapp kriggt dat mit! — Wat anners is dat mit de Heizung. Is dat wirklich nödig, dat ik de vun't Handy ut al inschalt, wenn ik noch in de S-Bahn sitt, dat dat ok komodig warm is, wenn ik ankaam? Langt doch, wenn ik inbööt, sodraad ik tohuus bün. — Un noch wat anners is dat mit dat Bögeliesen. Dat hett in't Internet nix to söken. Un de Backaven un Herd eerst recht nich!

Annerletzt weer ja de grote Attacke op de Telekom-Router. Nu maakt se sik alle Sorgen, dat dat IoT hackt warrn kunn. Natüürlich kann dat hackt warrn! Allns, wat online is, kann hackt warrn. — Huh! Hackers kunnen mien Heizung inböten, ahn dat ik vun weet! Hackers kunnen mien Herd anschalten! Un wat is denn mit de Stroom- un Waterwarken? De sünd doch hüüt ok all online. Köönt de ok all hackt warrn? Klaar. Avers wat söcht de online?!

Dat is doch de Fraag. Wenn dat so gefährlich is un wi vun Hackers erpresst warrn kunnen un sünstwat — woso sünd denn de Waterwarken online?? Un de Atoomkraftwarken? Kann mi dat villicht een verklaarn? Is ja nich so, dat dat fröher keen Waterwarken geven harr. Dat gode ole analoge Offline-Water hett mi ok jümmers good smeckt. Ik kann ja verstahn, dat dat hüüt allns digitaal stüürt warrt, mientwegen ok, dat se in't Intranet desülvigen Protokolln nütt as in't Internet — Computer bruukst natüürlich, ok Nettwarken! Avers mööt de an't Internet ween? Mööt de Stüercomputers alltohoop online gahn? Nee!! De Verantwoortlichen schallt gefälligst in't Waterwark sitten un dor ehrn Job doon. Een mutt nich partu dat Atoomkraftwark vun't Home-Office orr vun't Handy ut de S-Bahn stüern, üm den Pries, dat Hackers dat övernehmt!

De eenzige afsolute Schuul gegen Hacking is: offline gahn. Dat schulln de Waterwarken & Co. stantepe maken. — Wenn ik nich tohuus bün, treck ik mien Kiekschapp & Co. den Stecker. Un mien Joghurt kööp ik sülvst — nich dat Köhlschapp.


27.11.16 ...Postfaktizität

Nu will Trump nich mal mehr Hillary Clinton insparrn laten. Un den vun Minschen maakten Klimawannel höllt he miteens för mööglich. Trump brickt all sien Wahlverspreken, un dat schert keeneen vun sien Wählers. Ik heff mal annerletzt in en amerikaansches Bladd leest: De ganzen Mainstream-Medien hebbt Trump in'n Wahlkampf jümmers wöörtlich nahmen, avers nienich eernst. Muur na Mexiko! Muslime rutsmieten! Huh! Wat för'n Spinner! — Sien Fans un Wählers dorgegen hebbt Trump de ganze Tied nienich wöörtlich nahmen, avers jümmers eernst. Se weern gor nich verwachten, dat en Muur na Mexiko kümmt. Man dat he Präsident woor — dat ja. Se wulln bloots, dat een dat allens seggen un planen dröff — dat een in en erfundene Welt leven dröff. Se wulln, dat allens geiht. Se wulln bloots de Regeln afschaffen. Un de Herrschap vun de Tatsachen. Postfaktisch. "Post-truth" seggt de Lü op Ingelsch dorto — "nadem de Wohrheit afschafft is".

2017 warrt — vörutsichtlich — de AfD mit jüst solk Typen in'n Bundsdag intrecken. Denn hebbt wi de ok. Woans kannst dorgegen angahn? Ut den Ruum vun de Realität nehmt se nix an.

Postfaktizität is permanent high sünner Drogen. Dat schull liekso as Drogen behannelt warrn: Föhrerschien weg.


9.11.16 ...Pest

Tja, de USAmerikaners harrn de Wahl twüschen Pest un Cholera. Un se hebbt de Pest nahmen. Ik heff ehr noch överschätzt. Un de Cholera weer ja ok man Schiet. — Nu wüllt se dat unbedingt weten. Is to höpen, dat se dat nich ok würklich to weten kriegt. Is al komisch, wenn en Volk ut Verbittern över de Politikers, de anduernd ehr Verspreken brekt, een wählt, bi den en höpen mutt, dat he sien Verspreken nu wirklich brickt, nich?

"Postfaktisch" warrt düsse Welt ja nöömt, dat Tiedöller "na de Fakten", dat Tiedöller, 'neem Fakten nix mehr gellt, nich mehr wichtig sünd. Visionen un Geföhle hebbt ehr aflööst. En Welt op Droge. Permanent besapen. Naschonalismus is so en Droge. All de naschonalen Populisten, Trump as Paradebispill, pendelt twüschen Pubertät un eerste Trotzphase, un de Welt is ehr Sandkasten. Se buut nich mehr alltohoop en Sandborg, se sünd sik enig, dat jedereen in sien Eck buut, un se kloppt sik bloots noch üm den Sand un de Föörmchen. Solk Kloppereen harrn wi natüürlich al faken, vör 100 Johr un vör 80 Johr... Nee, Trump will ja nixnich mehr mit den Rest vun de Welt to doon hebben. He will de USA sogor ruttrecken ut de Nato. Avers natüürlich will he alle Föörmchen. Un ganz veel Sand. Wokeen, wenn nich he?!

Wo lang dat man good geiht.


21.10.16 ...Demokratie — so pienlich!

CETA mallöört nu an de Wallonie, de ünner Halv vun Belgien, Belgiens Armenhus. Jüst hebbt de Kanadiers de Verhanneln hensmeten: "Europa is opstunns nich kumpabel, en internaschonaal Afkamen to sluten!" Un all Europapolitikers hebbt rode Köpp vör Schaam: Europa is vertöörnt, Europa is verklaamt, Europa kann keen Kompromissen mehr: Europa pareert nich mehr! So schaneerlich! — Hä?! De Börgers vun Europa denkt ganz anners. Dat weer de naschonalen Politikers ehr Job west, uns CETA vun'n Hals to schaffen; se hebbt dat nich maakt, nu maakt dat even de lütten Regionen. Dat is leevte Demokratie, un dat de Wallonie sik wehren kann, dat en lütte europääsche Teilstaat nich machtlos is, wenn de Grootkoppschen ut Weerschap, Finanz un Politik ehr Supp kaken wüllt — dat warrt för Europa mehr wert ween as all de Gipfeldrepen, 'neem de Mächtigen Kaviar nascht un vörbildlich "Kompromissen sluut". In demokraatsche Entscheiden op regionale Ebene is de egen Stimm noch wat weert. Wenn de Lü dat föhlt, warrt se aktive Demokraten — un dat heet mehr as wählen gahn. Man welk in de Politik harrn villicht lever passives Stimmveeh.

Ik höp bloots, de Wallonen laat sik nich opletzt doch noch över'n Disch trecken, köpen, besteken orr sowat.


9.10.16 ...Dood dör de B-Note

Hach, de Kandidat hett unflätig över Sex snackt! Nu is dat ut mit em. — In welk Land sünd wi sachs, wenn sowat passeert? Richtig, USAmerika.

Fruunsfiendlich schall dat ween, wat he seggt hett. Ach, un an Fruunsfiendlichkeit stött sik miteens ok de Republikaners?! De nich bloots Afdrieven, sünnern ok Familienplanung un Krankenversekern afschaffen wulln? De Fruuns trüch in de Familienrull un Afhängigkeit drängen wüllt? Se un ehr evangelikale Christen, de en Sellschapsmodell vun vör 60 Johr anhangt? Verlagene Quatsch! An fruunsfiendliche Politik stöört se sik all nich. Dat kann noch veel dicker kamen. Wenn't man bloots nich ehr verhüüchelten Regeln vun Prüderie verletzt! Un dat hett Trump hier daan. Nich missverstahn: Trump is'n Kotzbrocken. Man de annern ok, de sik nu vun em afsett. Wat Trump in dat Schandaalvideo beschrifft, is sexuelle Nödigung un sachs justiziabel. Man se reegt sik ja nich dorwegen op. Sünnern wieldat he so unanstännige Wöör bruukt hett as f*****, T*****, na un so wieder. Un wieldat he verheiraadt weer, as he so snackt hett. As dään se dat nich alltohoop ok. — Snaaksch, dat utrekent de Kreationisten, de partu nich wohrhebben wüllt, dat wi Minschen en Apen-Aart sünd — dat jüst de notorisch den Apen dörschienen laat, 'neem dat jichens geiht.

Stilfragen also schallt Trump nu sien letzte Schangsen kosten. Exitus dör de B-Note. Ik kann mi nich helpen, nu kümmt — eentlich tabu — en Nazivergliek: Dat erinnert mi dull al welk öllere Verwandte, de jümmers sään: "Also der Hitler, in unserer Familie hat der nie was gegolten. So ungebildet, nur Malergeselle, und dann dieser Bart!" Tja, falsche Begründen, Lü. De Unpolitischen warrt amenn ok vun de Politik freten. "Trump? Also nein, der nicht. Diese Frisur!"

De ganzen Anbeders vun'n Starken Mann kriegt nu bloots, wat se verdeent. Mal ehrlich, eentlich harrn se sogor Trump verdeent. As Hööchststraaf. Bloots de Rest vun de Welt nich. Clinton warrt slimm noog ween.


19.9.16 ...De SPD siegt sik dood

Ha!, Sigmar Gabriel hett mal wedder en Sieg errungen — un in sien Partei CETA dörchdrückt. De sowat en Sieg nöömt, de nöömt ja ok dat en Sieg, wat de SPD in Berlin torechtmurkst hett. De SPD siegt sik so noch glatt to Dood.

Un Gabriel hett nu also mit CETA en niegen Sargnagel in de SPD haugt un sik dormit dat Recht sekert — so meent all Fachlüüd eenstimmig —, 2017 för de SPD as Kanzlerkandidat... to verleren. Natüürlich to verleren. Is dat nu so'n grote Saak, dat een dat allns dorför doon wöör? Nee. Wöför also deit Gabriel dat allns?

Wöör mi nich wunnernehmen, wenn na de verlaren Wahl vun 2017 jichenswoneem bi de Grootindustrie en gaaaaanz warmes Plätzchen op Sigmar Gabriel töövt. Dorför kannst dat allens doon.


18.9.16 ...Nazi will nich na Bautzen

Ik ünnerricht ja Migrantinnen un Migranten in beroopsbillen Kurse. Wi seggt Vörnaam plus "Se" op'nanner. Wieldat ik mi in den niegen Kurs noch nich so utkenn (so vele Naams...), bidd ik de Lü, ehr Naamsschiller vör sik op den Disch to stelln. Se doot dat, un de smucke junge Fru ut Persien liekut vör mi haalt en Schild rut, dor steiht groot "Nazi" op.
Ik, verbaast: "Wat schall dat? Sünd Se etwa en Nazi? Dat is nich Ehr Eernst!"
Se: "Doch, so heet ik!"
"Se köönt doch in Düütschland nich Nazi heten! Is dat en Afkörten? Heet Se villicht Nasrin orr so?"
Nu weent se meist. "Ik heet wirklich Nazi, dat is in Iran en richtigen Naam, un dat z warrt week spraken, sssss..." Un se summt as en Imm.
"As in Nasi Goreng?"
All lacht.
"Aver in Düütschland sünd Nazis gor nich good ansehn, faken finnt Se Spröök as "Nazis rut!". Dat sünd Se wiss al wiesworrn?"
Nazi nickköppt. "Man so heet ik doch. All mien Leven lang. Mien Öllern hebbt den Naam för mi utsöcht."
Denn mööt wi dor sachs mit leven.

In de Paus hett de Kurs bespraken, se wüllt sik elkeen en schönen Naam ut ehrn egen Kulturkring infalln laten, op Zedels schrieven, un Nazi dröff sik denn een utwählen, wo se in'n Kurs mit ropen warrn will. — Se blifft aver stuur. Se will lever Nazi heten.

Man na Bautzen trecken will se doch nich, ok wenn se so heet. Pech för Bautzen!


11.9.16 ...Ja, dat christliche Avendland ...

Soso, de CSU will also "Inwannerers bevörtoogt ut uns christlich-avendländschen Kulturkrink". Denn maakt wi dat so: Bayern kriggt de ganzen rumäänschen un bulgarischen Roma, christlich, bildungsunwillig un kinnerriek. Se sünd in undörsichtige Familienclans organiseert, leevt vun Soschiaalhülp un Kinnergeld un sünd de Schrecken för elk Wahnrebett. — De Rest vun Düütschland nimmt de ganzen kultiveerten, faken good utbillten Syrers un Irakers. (Dor sünd ok vele Christinnen un Christen ünner, avers wieldat de ja nich ut den "avendländschen Kulturkrink" stammt, kriggt Bayern ehr nich.)

Ik weet, so eenfach is dat nich. Dat geiht ok üm de velen jungen Mannslüüd ut Swattaafrika in de Boote ut Libyen; dat geiht üm de Männer ut den Maghreb, de verleden Silvester in Köln böös randaleert hebbt; üm Törken un Kurden, de ehr Konflikten mitbringt un hier Lawai maakt; dat geiht üm de velen Lü ut Afghanistan un sogor Pakistan, de faken nich so "kultiveert" un good utbillt sünd... Ik weet, dat is nich so eenfach. Wi brukt Inwannern — fraag de Weerschap, dat Handwark, den Middelstand... Un massenhaft Migranten sünd ünnerwegens un söökt en Tohuus. Wat denkt sik de CSU? Bloots Inwannerers ut dat christliche Avendland? Wüllt se de Weerschap vun Spanien un Italien wieder in de Knee dwingen, dat de ganzen jungen Lü vun dor hierher kaamt? Dat is demograafschen Vampirismus, nix anners.

Ik weet: So eenfach is dat nich. Ik weet dat. Weet dat de CSU ok?


4.9.16 ...Revoluschoon trüchwärts

Puh, dat hett ja jüst nochmal good gahn! De Wiehnachts-Snoopkraam is ankamen in de Supermärkte! Un ik harr al dacht, Wiehnachten schall düt Johr sachs utfalln, as de September keem un keen Schokowiehnachtsmann to sehn! Aver nu is allns good.

De Spaniers hebbt Wiehnachten sachs en Wahl an'n Hals. To'n drütten Maal düt Johr. Wieldat de Partein sik nich enig warrt un keen Regeern tostann bringt. De Lü schallt wählen, bit dat wat warrt — de Afordneten sülvst doot dor nix to... Keen Wunner, dat de Spaniers düsse ganzen Partein to'n Düwel wünscht/wählt!

Wat kunnen de Lü dor nu maken, wenn dat Wiehnachten wedder nix warrt? Un allens wedder liekso rutkümmt? Nu heet dat kreativ ween!

  • De Basken un Katalanen wüllt al lang weg vun Spanien. De Staat kunn düsse Rebetten vörlöpig utgledern — villicht ännert sik denn de Mehrheitsverhältnisse... Se dorna wedder intofangen warrt allerdings vigelienscher.
  • De Spaniers kunnen all illegalen Inwannerers inladen, mittowählen — villicht ännert sik denn de Mehrheitsverhältnisse...

Man op düsse Maßnahmen wöör sik dat Parlament ja enigen möten — un dat Parlament enigt sik nich! Wat nu?

  • Ganz opletzt, wenn nix mehr hölpt, hebbt se ja noch den König. Denn maakt dat Volk en Revoluschoon, stört dat Parlament dal un sett de afsolute Monarchie wedder in.

Wat dat so wiet kamen kunn...? — Woso nich? Is de Politikverdreet nich överall so groot, dat mennig Lü sik en Afsolutherrschap vörstelln köönt? Annerswo hebbt se bloots keen König mehr — un maakt sik ehrn Erdogan, Putin orr Trump. Blifft to höpen, dat de Düütschen nich ok noch so'n Knall kriegt un jichenseen "starken Mann" ut'n Hoot tövert. Dor hebbt wi keen Talent bi. Dor wöörn wi de Spaniers een Dag noch üm ehrn König beneiden.


21.8.16 ...Bangween is keen Börgerplicht!

Nu hett de Maizière wedder mal de Aap beten. Wi schallt uns all mit Eten för teihn Daag bevörraten — un mit Drinkwater! Drinkwater för teihn Daag! Woso? "Teile meiner Antwort würden die Bevölkerung beunruhigen..." — oh, sorry, falscher Film. Avers de falsche Film is dat wohraftig, de ganze Schiet. Annerletzt, heff ik leest, geev dat in Frankriek en luden Knall jichenswoneem, un de Lü hebbt sik meist doodpeddt in ehr Fluchtpanik. De Knall weer ganz harmlos. Mutt een nu bloots noch en Brötchentüte oppuusten un mit de Fuust tweihaugn, dat dat en Massenpanik mit 50 Dode gifft? De Islamisten lacht sik kaputt. Un wat wöör mit den Tütenoppuuster passeern? Grober Unfug orr levenslänglich wegen Terrorismus?! Wenn Se ehrlich sünd, weet Se dat ok nich. Hüüt is allens mööglich. Wiss is bloots: vör 20 Johr weer em gor nix passeert. Bloots de panischen Lü weern as plemplem ankeken woorn.

De panischen Lü sünd nu avers wi. Wi sünd plemplem. Un de Maizière un Co. wüllt, dat wi bittschöön noch mehr plemplem warrt. Se maakt uns Panik. Kunnst ok seggen: Se maakt uns Terror. De, de uns in Terror versett, sünd de nich Terroristen...?

Laat Se ehr man nich winnen. Blievt Se normal. Zivil. Entspannt. Haugt Se af un to op en Brötchentüte. Un vör allen: Kööpt Se nich düt ganze Water in Plastikbuddeln! Ik glööv nämlich, dorför is de ganze Akschoon dor — den Mineraalwaterverkoop antokurbeln. Bitte keine Werbung einwerfen! Ik drink Leitungswater!! Dat is jeden Dag toverlässig dor, un so blifft dat ok.


31.7.16 ...Terror — gähn!

De arme Angela Merkel hett nu sogor ehrn Urlaub ünnerbreken un en "Negen-Pünkt-Plaan för mehr Sekerheit" aflevern müsst. Beten överdreven is dat schon, nich? Weer dat jemalen nödig för normale Kriminalität? Un dat hier is normale Kriminalität. Wenn wi dat so behannelt. Sodraad wi avers na de Bundswehr roopt, befördert wi dat to'n Kriegstostand — un dat stachelt anner labile Idioten an, de ok mal ehrn Naam groot in de Bläder lesen wüllt...

P.S. De Ballermann in München weer sülven Halv-Iraner, hett avers ut Rassismus un Hass op Butenlänners üm sik ballert. Da kiek, wo good integreert uns Migranten al sünd!


25.7.16 ...Terror — na und?

Ha! Knapp schriff ik de Notiz nerrn, dor doot de Attentäters allens, wat se köönt, den Terror alldääglich to maken un uns Coolness to traineern. Wenn dat nu jeden Dag en lütten Terroranslag orr Amokloop gifft mit dörsnittlich 2 bit 3 Dode, denn fraagt dor bald ok keen mehr na, de Blomenmeere warrt lütter, un bloots de grötteren Anslääg kaamt noch in de Narichten. Wi warrt denn sowat vun cool — dat warrt de Attentäters frustreern, wieldat se so ja goor keen Schrecken mehr verbreit (Terroristen) orr berühmt warrt (Amoklöpers). Un na un na warrt se dormit ophöörn. — Nich so licht lösen lett sik dat Problem mit de LKWs, de in Stau-Ennen raast. Mit Coolness is ehr nich bitokamen.


24.7.16 ...Keen Terror — keen Problem!

Bang maakt uns vör allen dat Unbekannte, Unkalkulierbore. Dorto höört de Terroristen. Un anner labile Typen, de dörchdreiht. So as Amoklöpers. Denn gifft dat groot Bohei. Karsen un Blomen warrt afleggt, Gesetten warrt ännert, na de Bundswehr warrt ropen... Terror? Amok? Sowat dröff nienich wedder passeern! — Woso is eentlich allens nich so slimm, wenn dat keen Terrorismus is?

Annerletzt hett bi mi in de Neegd, bi Hamborg op de A1, en Laster en Familie in ehr Auto an en Stau-Enn tweiquetscht — veer Dode. Ach ja, avers dat is ja nich dat Unbekannte, Unkalkulierbore! Brukst di nich opregen.

Wenn dat nu Terroristen weern, de — seggt wi mal — den LKW extra anschafft harrn, mit vulle Afsicht in en Stau-Enn to rasen un Lüüd doodtodrücken — oha! Denn wöör de Medien- un Politmaschinerie hitt lopen. All LKW mööt kunnerleert warrn! Automatik-Brems-Elektronik in all LKW! Bi Staus mutt glieks de Bundswehr anrücken un dat Enn sekern — egaal woans! Dat dröff nienich wedder passeern!!! — Wöör dat ok nich. Sowat kümmt nienich tweemaal vör. Op so'n dösige Idee kaamt doch keen Terroristen mehrmalen! Wenn dat Terror weer, weer dat Problem minn, de Bohei groot.

Avers dat weer ja keen Terror, bloots ja wat Alldääglichs. Dorüm mutt dat ok nich stoppt warrn. Dat dröff wedder passeern. Un dat warrt wedder passeern. Morgen al, orr övermorgen. Di orr mi. Wieldat wi uns an wennt hebbt.

Cool down bi den ganzen Terror-Schnickschnack! Dat Alldäägliche is de Schrecken. Ik förcht mi nich vör Terroristen mit LKW orr jichenswelk Wapen, ik förcht mi vör LKW mit slöperige Fohrers un tweie Bremsen. Dat kann jedeenen vun uns passeern. Wi schullertuckt bloots. — De dode Familie hett keen Blomenmeer. Villicht hebbt se ok bloots schullertuckt. De Terrordood is even en Dood 1.Klass, de Verkehrsdood bloots 3. Klass, dor gifft dat keen Blomenmeer.


20.7.16 ...Törksche Brain-drain

Vör de Diktatur flüchten doot jümmers de Besten vun en Volk. Dat weet sogor Erdogan. Dorüm hett he nu verbaden, dat de Akademikers dat Land verlaten doot. Wokeen reisen will, wokeen jichenswat will, mutt mööglichst dumm ween. Foorts verlaat ganze Schülergenerationen stantepe de Gymnasien, un Studenten seggt kortfristig ehr Prüfungen af — bloots keen Uni-Afsluss kriegen! Dor steiht Quasi-Gefängnis op! De, de ehr Termine nich mehr afseggen köönt, geevt luter falsche Antern, dat se dörfallt — bloots keen Akademiker warrn! Un denn gau utreisen!

Düütschland sitt natüürlich wedder op de Sünnensiet. Woveel gode Lü ut de Törkei hier opneegst herflüchten warrt! Akademikers, Demokraten, Liberale un Bildungsbewusste! Tja, wi sünd sachs de Winners. "Düütschland, Land der Ideen". Op en gode Tokumst!

Aver in'n Eernst: Lü mit Bildung is nich to truun. Dat sühst ja överall. De US-"Republikaners" nich bloots ünner Donald Trump hebbt en gesunden Hass op Bildung un Weten entwickelt. Wat Wetenschaplers seggt, is alleen dorüm verkehrt. De sünd doch all "elitist" un arrogant un spöttsch! Erdogan warrt sachs bald verfögen, dat bloots noch nawieslich dumme Lü en Job in'n Staatsdeenst kriggt. Bi Bildung weetst nienich; Dummheit dorgegen is en seker Saak, de Lüüd sünd berekenbor. — Dumme hasst Bildung bavento ok ut Nied. En Fründin, de den Jugoslawienkrieg överleevt hett, hett mi vertellt, woans de Milizen ehr Dörp överfulln: "De eenfachen Lü hebbt se fix ümbröcht. Man wenn du sääst, dat du gebildet weerst, denn stürvst du ganz langsam..."

Sünnerlich dat Denken is suspekt un verhasst — beter handeln as denken! toslaan staats snacken! —, un wokeen uns dat Sülven-Denken erspoort, de is uns Held. "Führer, befiehl...!" Mennig Minschen hasst dat Denken so vun ganze Seel, de leevt dat Nich-denken-Möten mehr as ehr Leven. As Erdogan na'n Putschversöök op den Istanbuler Floogplatz ankeem, repen de Dusenden, de dor versammelt weern: "Een Woort vun di, un wi slaat dood! Een Woort vun di, un wi starvt!" — Wenn de törkschen Akademikers nu fief Minuten nadenkt, weet se, dat heet Kofferpacken un nix as weg — nootfalls över de gröne Grenz.

Un Erdogan sülven? De dröff natüürlich reisen. Sien Uni-Afsluss is ja fälscht. Abi hett he ok nich. Avers pssst! Keen Woort dorvun in de Törkei! Sünst Knast. — Mannomannomann.


15.7.16 ...Wat för'n Verswendung

Wohr is: Wi hebbt ja nu leider (?) bloots Terroristen sünner Talent. Dat mutt'n so düüdlich seggen. Hebbt bi de EM de Fans nich de Terroristen wiest, woans een dat maakt — Böller un Sprengstuff in't Stadion smuggeln? Hett dat nich bi meist jedeen Speel Pyrotechnik in't Publikum geven? Wat wüllt se noch, de Terroristen? De Footballfans hebbt ehr Mööglichstes daan, Nahülp to geven, to wiesen, dat in Wohrheit nix kuntrulleert warrt as de Intrittskoorten. Hett nix bröcht. Un nu, knapp dat de EM vörbi is, schafft se dat, wohraftig en Laster in de Minschenmeng to stüern — un wat is op den Laster? Nix!!! Bloots en levensmöden Fohrer. Ik segg ju, leven Lüüd, in Bagdad weer dat Dings randvull Sprengstuff west un rumms weer halv Nizza weg; bloots dat dat denn Bagdad weer. Wat för'n Verswendung! Liekso as de franzöösche Nationalmannschap mit ehr Schangsen ümgahn is, so maakt dat de Terroristen. So warrt se nienich Europameester. — Ik wöör lever nich aftöven, bet se plietscher warrt. Dat kann jeden Dag passeern.

Wat Schööns löppt jüst nu avers över de Newsticker: Erdogan, in hööchste Bedrängnis, hett endlich dorto opropen, op de Straat to gahn un de Demokratie to verdeffendeern! He! De sünst de Watersmieters un Tränengas schickt! — Is ut Saulus en Paulus woorn? Nee; man in de Noot fritt de Düvel Flegen.

P.S.: Save the Internet! Nu!


8.7.16 ...Wat is en Brit?

Ganz fröher, hett mi mien Moder vertellt, woor en rugen Keerl sünner Manieren in Hamborg "en Brit" nöömt. Ja wohraftig — un dat bi de ganze hamborgische Anglophilie! "Bäh, de Keerl is so'n richtigen Brit!", mit Minnachten un Ekel woor dat seggt, meist utspeen. Wohrschienlich hebbt de Briten (also de echten Briten, nich de frechen hamborger Stratenjungs) in liek so'n Toon vun de "Krauts" snackt. Dat weer en Tied, as de Völker noch pubertär weern un so'n reinweg obszöne Naschonalismus keeneen schaneerlich weer. Hüüt is dat undenkbor.

Orr doch nich? — Hüüt hebbt de niegsten Ümfragen ergeven, dat de Düütschen siet den Brexit de EU höger weertschätzen doot as jemalen tovöör. (Ik heff mi nämli dat ZDF-"Politbarometer" ankeken.) Dat kann op de een Siet heten, dat de Düütschen ut anner Lü (de Briten) ehr Fehlers lehrt un wiesworrn sünd, wo veel Vördelen de EU hett. Dat kann avers ok heten —— dat de Düütschen sik nu, wo de Briten (bald) rut sünd, endlich so richtig wohlföhlen doot in ehr EU! Nu eerst sünd se wohrhaft froh över de EU. De EU is in ehr Ogen beter woorn dör den Brexit.

Kunn dat ween? Bedenkt wi, wat ut dat Minnachten vun anner Naschonen folgt is. Dat is en ungoden Anfang. Un ok düt Vun-nüms-afhangen-Wulln is gor nich so good. Wenn jedereen för sik alleen kann, köönt se bald ok wedder gegen'anner. Jüst dorwegen woor de EU ja gründt. Dat dat man bloots nich wedder allens nochmal nieg dörleden un lehrt warrn mutt...!


3.7.16 ...Ungüllig wegen Lögen?

Dat Brexit-Referendum, seggt nu welk, mutt wedderhaalt warrn, wieldat de Brexit-Wahlkämpers afsichtlich falsche Verspreken maakt un de Wählers tüüscht hebbt. 350 Millioonen Pund per Week för dat Sundheitswesen — en apen Swinnel! Inwannern stoppen — nu is dor keen Reed mehr vun! Dat weer Bedregerie. So en Afstimmen weer ungüllig, seggt de Brexit-Gegners, un mutt wedderhaalt warrn. — Bitte laat sik dat op de Tung tergahn: En Afstimmen, bi dat de Lü tovöör falsche Verspreken maakt woorn, is ungüllig. Wählertüüschen — Afstimmen ungüllig... Naaa? Ja genau: Wi hebbt keen legitime Regeern in Düütschland un in de Bundslänner, in ganz Europa gifft dat keen eenzig legitime Regeern, ja in de ganze Welt nich! Wahllögen överall! Ungüllige Wahlen! Siet Äonen! Denkt Se bloots an de Mehrweertstüer-Löög, mit de de eerste grote Koalischoon in't Amt keem... Överall mutt nieg wählt warrn! Un mehr noch: de Wahlkämpers mööt nu överall de Wohrheit snacken! Wenn ok bloots een Wähler orr Wählersche nawieslich afsichtlich tüüscht woor, mutt de Wahl wedderhaalt warrn! Jümmer un jümmer wedder, bet all bi de Wohheit blievt!

So en Grundregel finn ik en heel intressante Saak. Dat wöör en echten Wertewannel mööglich maken, en "Paradigmenwessel", as dat hüüt heet. Donald Trump in de USA hett denn as Kandidat keen Schangs, de Wahl wöör foorts anfecht warrn — bi Hillary Clinton avers sachs ok... Wahlen warrt ersett dör en Afstimmen över de Politik, feern vun Personen, un bloots noch reine Toren, echte Goodminschen un halve Hillige kaamt an de Macht. Wöör uns dat dormit beter gahn?

P.S. Ik heff jüst twee Online-Överwiesen maakt, mit TAN un BEN. De BENs heten, na'nanner: GBR un BYE. Wirklich wohr. Hett dat wat to bedüden?


2.7.16 ...Schwachsinns-EM, Endspeel

Leven Tokiekers, willkamen trüch to de EM vun'n Schwachsinn in Europa, dat grote Finale! Na de Halvtiedpaus ströömt de Mannschapen wedder op't Feld. Wi erinnert uns: De Törkei schien unbesiegbor dör ehrn Störmer Erdogan, Schwachsinn üm Schwachsinn hett he maakt, Tor üm Tor hett he schaten. Denn avers woorn de Briten stärker, ehr Störmer Boris Johnson keem ut de Deepde vun'n Ruum, un hest du nich sehn, de Briten scheten en Droomtor dör de Brexit-Störmers, direkt vör de Halvtietpaus. — Sünd nu all wedder op't Feld? Da, de Briten, noch ganz stolt... Bloots langsam kaamt se wedder in't Speel. Avers Johnson störmt wedder, Johnson, Johnson, he leggt sik den Ball trecht, da — he schütt sik sülvst in't Ut! Tor! Tor! De Briten hebbt gliektrocken mit de Törken! Sünd beid Naschonen gliek schwachsinnig? Denn wöör en Ölbenmeterscheten —— Momang, wat is dat? De Butensieders, de Öösterriekers, störmt miteens ok! Van der Bellen flankt op Hofer, de nimmt den Ball Volley — un Tor! Tooor! Öxit! Öösterriek will Niegwahl plus ut de EU uttreden! Wat för en wunnerboren, köstlichen Schwachsinn! Alleen de Naam — "Öxit"! En Droomtor!

Dat kann de ole Favorit nich op sik sitten laten. Erdogan haalt sik den Ball un grippt wedder an, Erdogan, Erdogan dribbelt, he danzt Justiz ut, foult de Presse, lett den Schiri stahn, Erdogan noch an'n Ball, Erdogan, Weltklasse-Solo vun Erdogan!, he sett to'n Schuss an — Tor! De Föhrungstreffer för de Törkei! Erdogan will den ganzen Böhmermann-Text verbeden laten, he will allens verbeden laten, wo sien Naam in vörkümmt, ok den Gesetzestext, wo in steiht, dat allens verbaden is, wo sien Naam in vörkümmt — allens verbaden! En klassisch Paradox — wat för en Schwachsinns-Tor! De ole Champion, he wiest, he kann dat noch. — Meddewiel hebbt de Briten wedder den Ball, wat doot de Briten, plaant se en Intrige? De Intrige is ja de klassische Schwachsinns-Tortechnik vun de Briten... Ja, Gove haalt sik den Ball, May grätscht rin, se sünd sik nich enig, de Afwehr zankt sik, dat Middelfeld foult sik gegensiedeig — Ballverlust! Wokeen is dor opduukt ut dat Narms? Dat is Juncker, Jean-Claude Juncker vun de meist afhangte Europa-Ölben! Juncker störmt! He störmt op dat egen Tor, as jümmers. De Afwehr stellt sik op, de Zivilgesellschap, se hett en duppelte Veererkeed plus Libero, dat pure Catenaccio, dat hett noch faken hulpen — dütmaal nich! Juncker speelt ehr all ut un schütt Egentor üm Egentor, Schwachsinn üm Schwachsinn! TTIP, CETA, Glyphosat! De EU haalt op in düt hoochspannen Schwachsinns-Endspeel! — Un dat blifft spannend: Schottland hett den Ball in't Ut kickt, de Schiri fleit: Insmieten dör den IS! Frankriek schickt sien Afwehr vör, och Gott, de lütte Hollande, de kann doch keen Koppballduell nich winnen! De IS will lever en Bomb insmieten staats den Ball, de IS kriggt Geel, dat föffte Geel in düt Match, Rood harrn se ok al, man se gaht eenfach nich vun't Feld! De Ball is wedder in't Speel, wokeen warrt den neegsten groten Schwachsinn maken? Egaal, Hööfdsaak, de Ball rullt...


28.6.16 ...Na klasse ...

All seggt nu, Europa mutt lehren un sik ännern; "Krise as Chance" un so wieder; un Angela Merkel töönt, "de EU mutt nu börgerfründlicher warrn". Un wat höört wi noch ut Brüssel? De EU-Komission genehmigt hüüt egenmächtig dat Agrargift Glyphosat, gegen dat de Börgers opstaht un för dat dat in't EU-Parlament keen Mehrheit geev. Un to dat Hannelsafkamen CETA, en TTIP-Tweeschen, schallt de nationalen Parlamente — anners as verspraken — nich höört warrn, dat warrt ahn ehr afslaten. Dat sünd de Politikers, de hüüt David Cameron in Brüssel ganz streng ankeken hebbt, wieldat he dat Referndum verschüllt harr. He hett den Kraam vermasselt!, meent se.

O Mann. So also "lehrt" Brüssel ut de Krise. De Brexiteers sünd twoors to'n Kotzen, avers Brüssel mennigmaal ok.


27.6.16 ...Överraschungen

Brexit totaal — nu ok in'n Football. Gegen Island! Wat hefft wi uns höögt! Wokeen harr glöövt, dat dat Finale vun en Europameesterschap mal "Island gegen Wales" heten kunn! Dat is Europa, dat is Veelfalt. Tschüß England! Mit Wales is ja jümmers noch en Stück "Lüttbritannien" dorbi.

Wat mien Leevsten is, de hett ja jümmer so Ideen. Wenn em mien Footballkiekerie to veel warrt, maakt he wedder mal Reformvörslääg: "Man sollte das ganze Spiel umdrehen und von hinten anfangen. Mit dem Elfmeterschießen. Wenn es nach 10 Elfern pro Mannschaft noch keinen Sieger gibt — nur dann! —, wird 2 x 15 Minuten gespielt. Und wenn es danach immer noch unentschieden steht, wird 90 Minuten gespielt. — So ginge alles schneller. Man könnte mit Glück alle Achtelfinals an einem Abend schaffen. Im selben Stadion." Recht hett he, avers schöner is dat doch, 90 Minuten Island kicken to sehn.


24.6.16 ...Reformvörslääg

Brexit — eerst nu he dor is, merk ik, dat ik dat bet toletzt nich glöövt heff. So geiht dat mennig Lü — ok Briten. Lustig is dat ja, avers ok kumpletten Schiet.

Een Godes hett dat: De EU kann nu nich mehr so wiederwursteln as betherto. Se mutt sik reformeern. De Rechtspopulisten feddert nu överall in de Länner ok Referenden, wieldat se uttreden wüllt. Ik meen, wi schulln dat maken. In all EU-Länner schull dat nu Afstimmen geven: All Börgers dröfft bestimmen, wat se an de EU ännern wüllt. Se köönt ut en List vun t.B. 30 Vörslääg 10 Stück ankrüüzen, de ehr wichtig sünd. Dat hett mennig Vördeel: 1. De Börgers föhlt sik demokratisch ermächtigt, 2. de Rechtspopulisten warrt de Wind ut de Seils nahmen, 3. de EU ännert sik — to'n Betern.

Wat mien Leevsten is, de hett noch anner Ideen. He meent t.B., de Liddmatenschap in de EU schull as bi en Versekern gestalt warrn: En Grund-Liddmatenschap mit Grundrechte un en Grundbidrag (je na Weerschapskraft vun't Land), un denn gifft dat noch masse Extras, de du toboken kannst. De kost extra, kriggst avers ok extra Rechten, kannst mitsnacken, Ünnerstütten beandragen usw. Beten hebbt wi sowat ja al — mit den Euro. Un mit de EU-Striedkräft usw. De Briten harr dat toseggen kunnt — se harrn ehrn Verdrag denn bet op de Grundsaak tosamenstrieken kunnt. Ik glööv, dat is nich de Weg. Mennig Länner, to vele, nütt de EU al as en Laden — de Oosteuropäers t.B., de sik geern de Subventionen ut't Regaal pickt, avers de Flüchtlinge liggen laten wüllt. All de Solidarlasten wöörn denn jümmers liggen blieven. Dat geiht nich. De EU is keen Versekern. Se en Union, avers nich de "Allianz".


23.6.16 ...Skizze ut de Arbeit

Dat is en Aapenhitt. De Sünn knallt op de Fensterfront, de Rollos sünd dal, ut de Fenster weiht bloots Hitt rin. Namiddag, letzte Duppelstünn in den Beroopsförderkurs för Migrantinnen un Migranten, 'neem ik arbeiten do: Mathematik. Wi sünd merrn in'n Ramadan. Mennig Muslime fast vun morgens fröh bet avends Klock teihn. Se drinkt ok nix. Poor liggt al mit den Kopp op'n Disch.

Ik segg: "Leute, wir machen heute eine halbe Stunde früher Schluss. Wir wiederholen nur noch die letzte Aufgabe auf dieser Seite." Groot Opaten.

Rafiatou kiekt mi an, vullversliert mit duppelt Koppdöök un langen Mantel, ehr Ogen groot un kloor, de swatt Huut ahn een Druppen Sweet. "Warum rechnen wir nicht auch die Aufgabe mit der Steigung?" Protest vun de annern Schölers. "Rafi, wollen Sie das wirklich?!", segg ik. "Ja. Und die Aufgabe mit der Verteilung. Und die Seite drei."

Rafiatou wöör noch stünnenlang in de Hitt sitten ahn Drinken — un reken. Se kann dat.


20.5.16 ...Vernünftige Grünn

Lütte Hahns dröfft also wiederhen lebennig to Häcksel schreddert warrn, hett dat Gericht beslaten. "Kein Tier darf ohne vernünftigen Grund...": Ja, avers wat in de Welt weer en vernünftige Grund, wenn nich Geldverdenen?! — Nu gifft dat avers Methoden, de lütten Deerten "humaner" ümtobringen, sogor ehrdat se sluppt sünd (also ehrdat se so sööt utseht — nix anners is ja uns Problem). Man düsse Methoden kost Geld. Un dat is wedder en vernünftige Grund, ehr nich to bruken: Nich bloots Geldverdenen, sünnern ok Mehr-Geld-Verdenen is en vernünftige Grund. Eentlich de vernünftigste vun de Welt, nich? Kann jichenseen sik vörstelln, in en Welt to leven, 'neem Geldverdenen nich dat Vernünftigste is? — Wi sünd gründlich bregenwuschen.


3.5.16 ...Angela, Antennen an!

Nu is TTIP de Maske afreten, un de hoochgeheimen Lesebunkers staht lerrig — de Afordneten brukt ehr nich mehr. Dat latente Misstruun ünner de Minschen sleit jüst üm in apen Aflehnen.

Hallo Fru Merkel, dat is Ehr Stichwoort! Optridd! Entsetzen huucheln un ümstüern! Weet Se nich mehr, so as dormalen bi Fukushima? "Dat hebbt wi ja allens nich wüsst, wi sünd ganz verbaast! Foorts warrt all Hannelsafkamen utsett! Wi bruukt nu en Hannelswende hen to regenerativen Hannel!" Orr bi de NSA? "Dat hebbt wi ja allens nich wüsst! Wi sünd empört! Över'n Tisch trecken ünner Frünnen, dat geiht gor nich!" Natüürlich hebbt Se dat allens wüsst, so as Se ok de Risiken vun'e Kernenergie kennt hebbt — as Physikersch —, man dat is egaal. Se mööt de Lü inhalen: "Dor löppt mien Volk, ik mutt em achterna — ik bün sien Föhrersch!"

Man nee. Nix kümmt vun ehr. Wenn dat üm de USA geiht, kniept se regelmäßig den Steert in. Vör allens Amerikaansche knipst se all ehr politische Instinkten ut, kriggt weke Knee un smölt as Botter in de Sünn — sogor vör dat Amerikaansche in Gestalt vun George W. Bush. Verklaar mi mal een, wat för'n Trick de USAmis hebbt, dat Merkel willenlos warrt?!

Man good, dat Erdogan den Trick nich kennt.


28.4.16 ...Energie maakt Satire

Slechte Narichten: De Elbphilharmonie — de Elphi also — is ganz toschannen, denn se hett sik jüst kaputtlacht. As se Narichten höört hett. De ganze Rückbu vun all Kernkraftwarken plus Endlagern vun den Müll schall nämli bloots 23 Milliarden kosten, plus en Sekerheitsreserv, falls dat dürer warrt. Falls? Dor füng de Elphi al an to gnickeln... man ganz ümhaugt hett ehr dat, as se höört hett, wat de Reserv is: ganze söss Milliarden! Nu hett se sik ganz in Gruus un Muus lacht un mutt nocheens buut un betahlt warrn. Bi en Kostensteigern üm Faktor 10, as betherto, warrt dat denn nich blieven, denn de Atoomutstieg kann bestimmt Faktor 20, un dor will de Elphi mithollen. — Avers wat passeert, wenn de Elphi höört, wat de Energiekunzerne dorto seggt? Staats dree Krüüzen to slaan as ehr Akschonäärn (de Kursen fluppen in de Hööcht...), jammert se, dat wöör se ümbringen...! Dor haugt sik de Elphi doch glatt nocheens weg, un in en ganze Lachexplosioon ok de Hafencity dorto.

Maakt avers nix, se warrt jümmers wedder buut. Un de Atommüll entsorgt. De Reserv, ut de dat allens betahlt warrt, sünd nämlich — wi.


15.4.16 ...Erdogan maakt Satire

Na klaar weern de Versen vun Böhmermann en Beleidigen. Dat steiht nich to Debatte. De Böhmermann in Schuul nehmt, seggt, dat weer avers ja Satire west. Ganz so is dat nich. Dat weer en Angebott för Satire, en Köder, en Versöök. To echte Satire maakt hett dat eerst Erdogan. He hett tosnappt. Den Köder gierig sluckt un noch de Hand dorto. Böhmermanns "Gedicht" hett eentlich bloots fraagt: "Na, büst du en Idiot?" Erdogan harr twee Antern to Wahl:

  1. afkläärtes Swiegen orr hööchstens en distanzeert "Mit wem reden Sie?"
  2. "Idiot, du nöömst mi Idiot? Un wat för en Idiot ik bün! Dat wies ik di!" usw. usw., de ganze Rumpelstilzchen-Nummer.

Erdogan wähl Nummer 2 un hett dordör eerst de Satire maakt. He hett de totaal verzerrte Karikatuur sehn un schreegn: "Dat bün ik!" Eerst dordör hett he wiest: He is sien egen Karikatuur. He hett den Ball, den Böhmermann em henleggt hett, mit Wuppdich in't egen Tor ballert, staats em eenfach liggen to laten. He kann sik also kumplett bi sik sülvst bedanken. (Bi em heet dat ja: He kann sik sülvst vör Gericht stelln.)

Wi köönt dorvun lehren. Dat ole Sprickwoort kannst di to Harten nehmen: "Wat scheert dat de Eek, wenn sik de Söög an ehr schuert?" Un wenn dat Erdogan vunwegen de Söög wedder nich passt, gifft dat de Foorm "Wat scheert dat den Maand, wenn de Hunnen em anbellt?". Man ok Hunnen sünd för den bigotten Erdogan "unrein". Em is sachs nich to helpen.


14.3.16 ...Lever Nichwähler

Dat schient, wi hebbt de Nichwählers betherto Unrecht daan. Jümmers hett dat vör de Wahlen heten, "Gaht to Wahl! Gaht Se wählen!" Nu sünd de ganzen Nichwählers ut de bildungsfernen un sünstwat för Schichten wohraftig ut dat Sofa krapen un to Wahl gahn — un hebbt de AfD wählt. Un de Kattenjammer bi de etablierten Parteien is groot. Sachs hebbt se nich dormit rekent, dat een ehr Opfeddern mal eernst nimmt. De ganzen Nichwählers weern ehr veel lever, as se noch tohuus huken dään. Se warrt sik dat tweemaal överleggen, de wedder vörtolocken!

Natüürlich warrt de AfD-Wählers ok wedder brav in ehr Sofa verswinnen, sodraad de Flüchtlingskrise nich mehr brennt. Se sünd keen politische Minschen. Se sünd de Buuk, nich de Kopp vun de Sellschap. Se sünd dor, se slaapt in de goden Tieden, man in Krisen, wenn wi den Kopp verleert, warrt se mächtig, as de blinden Emotionen in uns minschlich Sülvst. All warrt froh ween, wenn se wedder in Slaap versinkt. Man tüüscht sik nich. Se köönt jümmers wedder opwaken. — Wi mööt kloren Kopp behollen.


19.2.16 ...Hibernation

"Wat nödig deit", seggt mien Leevsten (op Hoochdüütsch, denn he is en Hoochdüütschen), "sünd gaue Foortschreed in de Hibernationstechnologie. Denn köönt wi de Flüchtlinge infreren un wedder opdaun, wenn in Syrien wedder Freden herrscht. Denn köönt wi ehr alle opnehmen. Den Stroom för't Köhlen kann Düütschland betahlen, sogor Ökostroom. Lagern geiht ok ünnereerdsch." Natüürlich mööt de Flüchtlinge denn tovöör ünnerschrieven, dat se de düütsche Regeern gewisse Rechte aftreden doot — tovörderst den Entscheid, wennehr se opdaut warrt, denn den köönt se in Winterstarre orr in fraren Tostand ja nich sülven drepen. Naja. Klingt zynisch, avers mal ehrlich, geev dat nu al sekere Techniken, wöör ik mi sachs sülvst infreren laten. Kiekt Se doch bloots mal en beten na vörn. Europa brickt twei, Düütschland warrt quasi ut de EU smeten, de Törkei bombt in Syrien, warrt dorbi vun de Russen afschaten, röppt den Nato-Bündnisfall ut, un batz! hebbt wi den schöönsten Weltkrieg. Is as vör 100 Johr, exakt nipp un nau so. Nix vun lehrt. Wat sünd dat för Utsichten?!

Hm, jichenswie ok ünnerhaltsame. Alleen de Briten ehr Referendum maken un uttreden sehn wöör mi dull amüseern. Villicht bliff ik doch waak un gah nich in'n Winterslaap. Solang hier nich ok Börgerkrieg utbrickt. "Ankieken ja, mitmaken nienich", as Loki Schmidt vun de Blomen sä.

Klingt zynisch? — Un, wat hebbt Se dacht?


10.2.16 ...Op den Weg in't Regime

Dat de CSU ehr egen Regeern verklagen will, is nich so verwunnerlich; se hebbt even de Sülvstdistanz, de wi so faken misst bi Politikers. Hett nich Anno Tobak mal een vun de Wasa-Duppelkönige as König vun Schweden gegen sik sülvst as König vun Polen Krieg föhrt? Dor is noch Luft na baven, CSU!

Man dat maakt meddewiel meist Spaaß, de Eskalatioon vun de Wöör antokieken, mit de CSU de Regeern angeiht. Nu is dat "de Herrschap vun't Unrecht". Nee, versekert Seehofer, an de DDR harr he dormit nich erinnern wulln — un deit mit sien Dementi jüst dat. 'keen solk Verbalkriege kennt, weet: Nu luert de eerste Nazivergliek glieks üm't Eck.

Man wenn de Merkel-Regeern nu al de "Herrschap vun't Unrecht" anföhrt, is se denn noch en Regeern? Dat is doch so: Regeern, de uns Frünnen sünd, köönt maken, wat se wüllt, se blievt Regeern; man Regeern, de uns nich passt, sünd Regimes. Un de Chefs vun Regeern, de uns Frünnen sünd, köönt maken, wat se wüllt, se blievt Präsidenten orr wat se sik för'n Titel geevt; Chefs vun Regeern, de uns nich passt, sünd Machthebbers. — Is Merkel nu för de CSU bald de Machthebbersch in't Unrechtsregime? Wi köönt ja nich höpen, dat se den hööchsten Schurkenrang erklimmt, sülvsternannte Machthebbersch vun't Unrechtsregime. Sülvsternannt geiht nich — ernannt hett ehr jümmer noch de Bundspräsident.


1.2.16 ...Eröffnungsreed an de Syrienkonferenz in Genf

Leven Kriegsparteien, hier sitt Se nu. Al dat weer en suur Stück Arbeit. Nu schallt Se verhanneln över en Tokumst, en Wapenstillstand, villicht sogor en Freden in Syrien. Un al is wedder de Reed vun Weggahn, na Verhanneln steiht nüms de Sinn, un "Kompromiss" is en Schimpwoort. Verhanneln mit mien Fiende, düsse Düwel? Kompromissen mit mien Gegners, de Swienjacken? Nienich! — Jaja, ik weet dat all. Un dat steiht Se all apen, sik to strieden un wedder wegtolopen. Striedt Se man, verflöökt Se man den annern un smiet Se allens hen, wiedertokämpfen! Man ik kann Se ok seggen, wo lang düt "Nienich!" duern warrt, dat Se nu ehr Gegners in't Gesicht spien doot. So dree bet fief Johr warrt dat noch duern, un denn sitt Se wedder hier. All un een. Un denn sünd Se ganz tamm.

Wat in de Twischentiet passeert? Utblöden nöömt wi dat. De Krieg warrt ahn Besinnen wiedergahn. Se denkt, Ehr Land is al in Gruus un Muus, un Se hebbt nix mehr to verleren; man in de neegsten Johr warrt Ehr Land atomiseert, to Stoff verweiht, de Minschen warrt starven as de Flegen, un wokeen kann, flücht. Man de Westen, Europa, warrt dichtmaken. Glöövt S' mi dat, mien Land, dat gröttst un riekst, is al kort dorvör. Dorbi warrt Europa all sien Grundsätz, sien Humanität un Integrität över Bord smieten un Minschen eenfach an de Grenzen verhungern laten.

Nix warrt anners ween as hüüt, wenn Se in dree bet fief Johr hier wedder opduukt, en Freden uttohanneln — nix as Ehr binner Geföhl vun Resignaschoon. Se all hebbt hüüt noch en Barg to verleren, dat weet Se noch nich, avers in poor Johr, wenn Se dat verlaren hebbt, denn weet Se't. Dat warrt so ween as bi de legendäre Versteigern vun de UMTS-Lizenzen in't Johr 2000: Na en eerste Runn legen de Koorten al teemlich kloor, man de Firmen weern nich tofreden un wulln partu den Auktionskrieg. Opletzt legen de Koorten wedder liekso as tovöör, man för de teihnfache Summ. — Un ok wi Europäers hebbt en Barg to verleren. Wenn ik hier 2020 wedder en Eröffnungsreed hollen do, na noch fief Johr Krieg, warr ik en Fru ut en Land ween, dat sien ganzen Moot un oprechten Gang verlaren hett. Wi all warrt uns ankieken as in en déja-vu — "heff ik düssen Momang nich al mal beleevt?" —, man wi warrt in Gesichter kieken, de vun binnen terstöört sünd, in verwööste Seelen. Düsse Krieg is en Proov, de nüms vun uns bestahn warrt.

Erspoort wi uns dat — erspoort Se uns all dat! Laat Se de Minschen in Syrien ehr Leven un Europa sien letzte Illuschoonen. Hebbt Se Barmen mit sik sülvst. Verhannelt Se. — De Krieg hett keen Barmen. Mit nüms.


31.1.16 ...Hirnriss

Na klasse, dat is mol wedder so wiet: de Flüchtlingspolitik löppt kumplett Amok. Fruuns warrt "siet Köln" miteens hooch un hillig hollen, ehr Schuul gegen Ünnerdrücken, Misshanneln un Utplünnern hett afsoluten Vörrang — solang dat üm europääsche Fruuns geiht. Integraschoon dröff nich op den Rüch vun "unseren Frauen" utdragen warrn! (Hallo? Wokeen sünd denn "mien" Fruuns — mal so as Fru fraagt?)

Geiht dat avers üm Dusende syrische, irakische, afghaansche Fruuns, de op töövt, ehr Ehmänner na Europa to folgen, denn is dat allens nich mehr so wichtig. Keen Familiennatoog för twee Johr för Flüchtlinge mit bloots "subsidiären Schutz" — so hebbt s' nu beslaten: dat heet dode Kinner in't Middelmeer. Se mööt mit Boote kamen, anners geiht't nich. — Blangenbi is dat Irrsinn: So maakt de Politikers jüst de Männerghettos, op de se achterna schimpen doot! Un Männerghettos, dat weet jedereen, sünd en Pandämonium vun all Schrecknisse, vun Dreck över Superie bet hen na Moord un Doodslag — avers wiss nich vun Integraschoon. Integraschoon, dat heet: Inbunnen ween in de Sellschap — dör Arbeit, Familie un Kinner. Fruuns mööt kamen, Fruuns sünd dat Gegengewicht för den Testosteron-Tsunami, de jüst op de Flucht is, Fruuns sünd de Grundstoff vun de Sellschap, Fruuns warrt överall bruukt. Feministische Inwannernspolitik nu!

De Irrsinn lett sik avers noch steigern. Snackt doch nu sogor Angela Merkel dorvun, dat de Flüchtlinge trüchgahn schallt, wenn de Krieg vörbi is — "mit dem Wissen, das sie bei uns gelernt haben". In'n Kloortext: Wi stekt Dusende Euro in so en Flüchtling, bringt em in Düütschkurse uns Spraak bi, maakt em flott in en Beroop, un jüst denn, wenn he anfangt, dat allens trüchtogeven un Stüern to betahlen — in fief Johr orr so — wenn he vun en Kostenfaktor to'n Aktivposten, to'n Gewinn warrt: jüst denn heet dat: trüch mit em na Syrien! —— Wokeen deit denn sowat?!?! Un wat seggt Schäuble dorto? Un de Weerschap? Warrt de sik all de niegen Krankenplegers, Handwarksgesellen un Facharbeiters, frisch utbildt, wedder wegnehmen laten wulln? Ik kann bloots höpen, dat denn en anner Wind weiht. — Realistischer, wenn ok nich wünschensweert, is avers, dat de Kriege denn eenfach noch anduert. Orr dat Merkel dat eenfach nich so meent hett. Ümnahmen hett se ja al poormaal; man is Merkel denn noch Kanzlersche?

Villicht. Lever Slalom-Merkel as so'n Hirnriss-Kanzler!


26.1.16 ...Delebidehu

Nu maakt de Länner in Europa een na'nanner ehr Grenzen dicht — Grenzen, de relativ licht to kuntrulleern sünd. Kinnerspeel, de dichttomaken. Oplopen doot de ganzen Flüchtlinge denn in Grekenland. Kooltsnutig feddert Europa vun Grekenland, eenfach datsülvige to doon, ehr Grenz, de EU-Grenz na de Nahoost-Brandherde, slicht dichttomaken — "Europas Außengrenzen schützen", nöömt se dat —, dormit binnen in Europa dat komodige Schengen-Leven so wiedergahn kann. Utrekent Grekenland, dat op't letzte Loch piept, schall düsse Kastangeln för Europa ut't Füür halen. Bannig hitte Kastangeln. Man de Greken kriggt ehr Grenz nich ünner Kuntrull. Wat Wunner — heff mal so'n Grenz mit dusend Inseln! Nu drauht de EU Grekenland, dat se ut den Schengen-Ruum fleegt, wenn se nich bald dat Unmöögliche schafft. Orr, as de König to de Müllersdochter sä: "Jetzt mache dich an die Arbeit, und wenn du diese Nacht durch bis morgen früh dieses Stroh nicht zu Gold versponnen hast, so musst du sterben." To'n Glück keem dor denn ja dat Rumpelstilzchen; man de Greken warrt so'n Glück nich hebben. Dor kümmt keen Tövermänneken, dor kaamt bloots Flüchtlinge. Grekenland warrt to'n Armenhus, to'n Slum. Se verleert ok de letzten Touristen. Nüms maakt Ferien in'n Slum! Se gaht bankrott un hungert opletzt mit de Flüchtlinge üm de Wett.

Mien Leevsten hett en Naam för düsse Politik vun de EU funnen: DeLeBiDeHu, orr, utschreven,

den Letzten biet de Hunnen.

Veel Spaaß mit düt Europa, Grekenland!


21.1.16 ...Konsensdebatten

Diskuschoon ja — AFD nee. So seggt de Ministerpräsidentsche vun Rheinland-Palz, Dreyer: Diskereern do ik nich mit Lü, de nich vun mien Menen sünd! — Mit wokeen denn? De Wahlkampf in Rheinland-Palz warrt apensichtlich so kontrovers as en lauwarme Melksupp.

Un de AFD höögt sik. Dat haugt in ehr Kerbe. Se höögt sik ok, wieldat de neegste Millioon Flüchtlinge op'n Padd is: Dorvun leevt se doch. Wo weer de AFD ahn Flüchtlingskrise? Ünner "Ferner liefen".

Fraag ik de Flüchtlinge un Towannerten, wokeen se wählen wöörn, wenn se dröffen, kümmt "Natüürlich Merkel!" — Angela Merkel weet woll, wokeen se in't Land haalt: de neegste Generation Unioonswählers. Düsse Minschen denkt heel börgerlich. Dor schull de Unioon mal över nadenken.


20.1.16 ...Minschen un Goodminschen

Hach ja, Düütschland is nich mehr Weltspitze — in nix. Nich mal mehr in't Unminschendom. Wat harrn wi fröher för düchtige Terroristen! De Welt hett bevert vör ehr! Un nu: wat sünd se rünnerkamen! Hungrig, vertwiefelt, sünner Tähn un Tohuus, maakt se gottserbärmliche Överfäll, dat se dat Nödigste to'n Leven hebbt! Un uns Bläder titelt ok noch dormit, as weer dat wat — dorbi hebbt de butenländschen Terroristen ehr längst den Rang aflopen! Dat is so schaneerlich. De Welt lacht hüüt över uns Terroristen. Bevern deit se vör wat anners.

Un vör wat? Swoor to seggen. Vör Kuntrullverlust, denk ik. Konflikte sünner Utweg, massenhaft Minschen, ehr nich optohollen Wannern, de Massendynamik vun ehr Emotionen, allens nich to kalkuleern — dat mutt ünner Kuntrull blieven! Mutt dat ok. Woans, dor gaht de Menen uteneen. De "Goodminschen" ("Goodminsch" is ja dat Unwoort vun't Johr 2015) denkt, dat geiht mit Konsens un gode Wöör. Anner denkt anners.

Ik fraag mien Schölers in mien Kursen — allens towannerte Minschen. De Westaafrika-Frakschoon — gestandene Fruunslüüd, siet Johren in Hamborg — is sik eenig: "Es kommen zu viele!" Se hebbt Bang üm ehrn sozialen Status, hart erarbeidt. Muslime hebbt anner Sorgen: "Köln an Silvester, das geht doch alles wieder gegen den Islam!" Hallo? "Der Islam ist doch nicht das Opfer! Die Frauen sind es!", röppt R., chaldäische Christin ut'n Irak. Ehrdat de Köln-Debatte wedder hoochkaken kann, geiht de Dör op, K. störmt rin: "Meine Schwester ist frei!" All grateleert em, all freut sik. Sien Süster, Anwältin ut Afghanistan, weer op de Flucht in Tschechien opgrepen un insparrt woorn — een Johr seet se dor in't Kaschott. "Sie kommt nach Deutschland!" Nu, neem de Krise in Skepsis ümsleit? Nu, neem ok Düütschland as Helper opstekt? — Fassungslos, groot kiekt K. mi an. "Das kann nicht passieren! Das hier ist Deutschland! Hier haben die Menschen ein Herz!"

Mien Hart geiht denn jümmers ut'n Liem.


13.12.15 ...Naschen maakt slank!

Nu is de Weltklimaverdrag vun Paris afslaten, un wat dor binn steiht, klingt etwa so: "Ja, ik will teihn Pund afnehmen. Un noch beter weer, wenn't foffteihn Pund weern. — Wat ik dorför doon will? Äh, ja, hm.... also eerstmal nasch ik wieder, den Rest seht wi denn ja later." Leider maakt dat Wiedernaschen nich slanker. Dat Utstötten vun Klimagase (dat warrt keen beten ringer in de neegsten Johr) maakt keen godes Klima. Man wi wünscht uns, dat Klima wöör sik beruhigen — in uns Wünsch tominnst sünd wi op een Brett.

Nu mutt ik mi avers doch heel un deel wedderspreken. Wat, Naschen maakt nich slank? Vun wegen! Kiekt sik mal de Saak mit de Tinsen an.
De Tied vun Nulltinsen is nu meist vörbi; dat gifft al de eersten Negativtinsen! Also sowat as Parkgebühren för Geld. In de Schwiez fangt dat an; bald is dat bi uns. Dat gifft so veel Geld un togliek so veel Unsekerheit op de Welt, dat de Anleggers al froh sünd, wenn een ehr Geld seker opbewohrt. Dorför sünd se meddewiel ok praat, wat dorför to betahlen.

Wat heet dat för uns, Wolfgang Schäuble un de Schuldenbremse? Na, dat dreiht so ungefähr allens üm, wat wi kennt. Schulden maken bringt Geld! Dat is wohraftig so, as wenn Schokolaad eten slank maakt. Wokeen wöör dor keen Schokolaad futtern?!

Sik to Nulltinsen Geld to borgen, weer al en teemlich gode Idee (hett leider nüms maakt); bi Negativtinsen warrt dat sowat vun alternativlos, dat warrt reinweg imperativ! Nu is dat Plicht, Schulden to maken, Staatspapeern ruttogeven — denn dormit warrt wi rieker! Opleevst heel langfristige Anleihen utgeven, dat de Anleggers ok noch Tinsen an uns betahlen mööt, wenn de Laag bi de Tinsen sik al ännert hett.

Un wat dat Eten angeiht, dat gifft wohraftig en Eten, dat slank maakt: Kaninkenfilet. Ik heff leest, dat de minschliche Lief mehr Energie opwennen mutt, de Kalorien in düt Fleesch optodoon, as de Kalorien sülvst wert sünd. Bi pures Kaninkenfilet (also ahn Botter orr Ööl orr Rahmsoße!) kannst also futtern un futtern un warrst jümmer dünner. — Kann nich mal een so'n Schokolaad erfinnen?


8.12.15 ...Dat kann duern

Donald Trump, de jüst en Amokloop op de US-Präsidentschap ünnernimmt, will all Muslime ut de USA utsparrn, bet — hollt sik fast — "bet uns Lü dorachterkamen sünd, wat dor eentlich passeert".

Tja, de Muslime köönt de USA sachs för de neegsten Johrteihnte vun de Landkoort löschen. Bet Trumps Lü wat kapeert, dat duert.


3.12.15 ...Vull integreert

San Bernardino, USA. Twee Lüüd, bet an de Tähn mit Wapen behangt, loopt Amok un scheet 14 Minschen in Dutt. Momang — Amok? Dat weern Muslime!! Dennso is dat — Terror!!!!

Also echt. Düt echt amerikaansche muslimische Poor harr sik vullkamen an de Mehrheitssellschap anpasst — perfekt integreert! Wapen bet an de Tähn un af un to en Amokloop, dat is dor doch Landssitte! Un wedder meckert welk! Köönt Muslime dat denn wirklich nüms recht maken?


17.11.15 ...Düütschland gegen Holland.
Wokeen winnt?

De IS.


14.11.15 ...En snaaksche Momang

In de verleden teihn Johr hett Angela Merkel dree vun de "Unwöör vun't Johr" un de dor Platzeerten (also quasi de Sülver- un Bronzemedaille-Unwöör) mitpräägt: "alternativlos", "marktkonforme Demokratie" un "Flüchtlingsbekämpfung". Un wat düt Johr för'n Unwoort kümmt, is noch nich rut. Kannst veel kritiseern an Merkel. Ik sülven harr ja jümmers en lütte Sympathie för ehr. Nich bloots, dat se Fru un Physikersche is — nee, ik kunn ehr "lesen"; ik verstunn ehr Körperspraak, ehr Mimik — kunnst sehn, wennehr se in Gedanken ümschalten dä —, ehrn Humor, ehr Nüchternheit un ehr Sülvstironie, de so lichthannig un wenig pointiert schient, wieldat se keen persöönliche Iedelkeit hett — wat mi besünners gefull. Uniedelkeit is en Aart Klookheit. Mit so een kunn ik good tosamenarbeiden, düch mi. Tja; bloots an ehr Politik geev dat jümmers veel to verbetern, funn ik, un de dree Unwöör beleegt dat. Eentlich heff ik jümmers dacht: Merkel hett keen Standpunkt, bloots Macht. Wählt heff ik ehr nich.

Man Friedag avend sehg ik ehr in't ZDF-Interview sitten. Beten vereensaamt. Ok ehr egen politische Familie lett "Mutti" opstunns alleen, se gaht ehr egen Weeg. "Der Erfolg hat viele Väter", heet dat, man de Flüchtlingskrise hett bloots een "Mutti". Un üm düsse Krise güng dat. Dor seet se, alleen dat en Kommentaar op de Situation: wenn Krise is, mööt de Leitfiguurn in de Medien gahn un Flagg wiesen. Dor seet se also un kämp op ehr stille Aart för wat, vun dat se sülven gor nix mehr hett — för de Opnahm vun de Flüchtlinge un ehr Familien. In teihn Johr, wenn Düütschland de Früchten aarnt vun uns apen Döörn un Harten vun hüüt: in teihn Johr is sogor Merkel sachs nich mehr Kanzlersch. Dor seet se, dat Make-up schull de möden Ogen vertuschen, de rode Jack schull Warms utstrahlen, seet dor un anter redig op de Fragen vun de twee Journalisten. Mennigmaal dach ik: Dat kunnst geschickter formuleern; segg doch düt un dat!; man tomehrst dach ik: Dat is mien Kanzlersch. — En snaaksche Momang. Ik identifizeer mi sünst nich so licht.

Se harr miteens en Standpunkt. Sogor en Övertügen. Se ficht dat dör gegen de Wedderstänn in ehr egen Reegn. Se will de Flucht "legaliseern". Meent se dormit, dat dat verlogene Verdüveln vun de "Sleppers" ophöört? Dat wi sülven de Lü helpt, op legale Wies ut ehr Doodsfalln vun Länner ruttokamen? Denn warrt se noch veel mehr Wedderstand to föhlen kriegen. Dör den Massenterror in Frankriek warrt dat nich lichter. Ik bün op ehr Siet. Un ja, ik kann ehr lieden. Se wiest, woans wi Fruuns wirklich sünd. Nüchtern, rational, logisch, objektiv, borrnstännig un totaal uniedel. De "Divas" sünd alltohoop de Mannslüüd. Denkt Se sik Interviews vun all de fröhern Kanzlers: wat harrn de för Optreed ut sowat maakt! Wa wichtig harrn se sik nahmen! Jedereen harr en Poos, jedereen harr en Bild vun sik to verdeffendeern, jedereen en Diva. Ok de selige Helmut Schmidt. Merkel nich. Se kümmt gor nich vör. Se will unsichtbor ween. Dat geiht üm de Saak.

Keen persöönliche Iedelkeit heet ok: unbesteklich. Dat is keen Garantie dorför, allens richtig to maken. Wi köönt nich eenfach en Persoon vertruun. Kritisch mööt wi schon blieven. Wenn Merkel nich mehr "mien Kanzlersch" is un wedder in Unwöör snackt, merk ik dat as eerst. Denn is ok egaal. Dat geiht üm de Saak.


30.10.15 ...Driestigkeit siegt

Ehrgüstern hebbt wi noch mit dat Slimmste rekent, hüüt is dat al dor. De EU hett de Netzneutralität dör de Achterdör afschafft — un de Telekom is natüürlich de Eerst, de mit de niegen Verhältnisse Geld verdenen will! Se beedt foorts so nöömte "Sonderdeensten" an, de mit Extratempo dör't Internet suust — op de kostenplichtige Överhaalspoor; na un na warrt dat so kamen, dat nich de Överhaalspoor fixer, sünnern all annern — wi Normaal-Brukers! — langsamer schalt warrt. Bloots de, de betahlt, kriggt Full Speed. Klaar, de Plaans harrn se al redig in de Schuuflaad; dat Gesett is ja op ehr Lobbyarbeit hen maakt woorn. Un dat dat ok wisslich kloorgeiht, hebbt se dat för't EU-Parlament mit en annern Entscheid tosamenbunnen — mit de Afschaffen vun de Mobilfunk-Roaming-Gebühren. Dat is ja vernünftig. Dor seggt jedereen geern Ja. Man wat hett dat mit de Netzneutralität to doon? Un woso warrt de twee Themen to een Gesett bunnen? Ha! Dor hebbt s' dat EU-Parlament gediegen över'n Disch trocken.

De Roaming-Tarife weern aberwitzig, horrend, de reine un unverhohlene Woker; de Telekommunikationsfirmen hebbt twoors best doran verdeent, avers se hebbt wüsst, dat dat nich mehr lang goot gahn wöör. Dor hebbt se nu disse Gebühr oppert, üm de noch lukrativeren "Sonderdeensten" dörtosetten un de Netzneutralität endlich lostowarrn. Roaming weer en Goldgruuv; de "Sonderdeensten" sünd en Diamantenmine. Dat nöömt wi op Platt "mit de Wust na'n Schinken smieten". Un de Schinken is ehr in'n Schoot fulln — in en eenzig Gesetzesvörlaag faat, woor beid vun't EU-Parlament dörwinkt.

Natüürlich maakt dat nich de Lobbyisten sülven, sünnern ehr Kumpane in EU-Kommission un Parlament. Also, ja, eentlich sünd dat ok Lobbyisten, man bloots welk, de nich vun de Industrie betahlt warrt, sünnern vun uns Stüertahlers. — Liekers is de Besluss bloots mit een Stimm Mehrheit dörkamen! Een Stimm! — Dat is to'n Utwassen is dat.

Slimm noog. Man sachs noch nich dat Slimmste. Denn dat kümmt jümmers schievenwies, in Salamitaktik. Opneegst warrt se düsse Strategie ok in Düütschland anwennen — Flüchtlinge helpen un den Mindstlohn wedder afschaffen, dat weern doch twee Themen, de een good tosamenbinnen kann. En ganzen Barg Goodminschen warrt denn in den suern Mindstlohn-Appel bieten, wieldat se de Flüchtlinge helpen wüllt... oh ja, Driestigkeit siegt!


28.10.15 ...Reken — mit dat Slimmste

Wi sünd deep sunken. Wust föhrt to Kreevt, un sogor "de Lichtgestalt" Franz Beckenbauer warrt an'n Pranger stellt. Dat is so frevelhaftig, dat wi uns fragen mööt, wat nich dat een de Straaf för't anner is — wokeen an en Lichtgestalt kratzt, de hett dat ok verdeent, dat he Kreevt vun de Wust kriggt.

Ja, wi sünd rünnerkamen — de eklatante Bewies is woll, dat uns Bildungsministersche Johanna Wanka mit allens Möögliche reken deit, avers nich mit Tallen. Dat nimmt wunner, is se doch Mathematikersche vun Beroop. Naja, de rekent faken mehr mit Bookstaven, also Variablen un sowat. Orr rekent se al mit ganz wat anners — etwa mit dat Slimmste? Un wat kunn dat Slimmste ween?

Höört een in de Medien, denn is dat Slimmste eendüdig: noch mehr Flüchtlinge. Sogor Merkel schient mi beten vertaagt. De EU lett ehr hängen. (Dat "Familienfoto" in Brüssel is ja nu endlich en richtiges Familienfoto — mit Grull un Gift un Gall, as dat in richtige Familien dortohöört.) Man Vertaagtheit föhrt to nix! Ik heff de ganze Tied op töövt, dat Merkel dat bi dat Foto miteens so richtig krachen lett un denn Martin Luther ziteert: "Wi schafft dat! Denn: Aus einem verzagten Arsch kommt kein fröhlicher Furz." Man dat deit se nich — hett se binnerlich opsteken? Is ganz Düütschland op den Weg, en vertaagte Moors to warrn? Laat uns doch lever alltohoop en ganz kandideln, luden Puup afsetten!


12.10.15 ...Realität? Pah!

"Einfach zu sagen, in unserer Zeit lassen sich 3000 Kilometer Grenze nicht mehr schützen, ist eine Kapitulation des Rechtsstaats vor der Realität!" — Düssen Satz vun Hotte Seehofer mutt een sik op de Tung tergahn laten, un twoors in't hoochdüütsche Originaal. Horst Seehofer is de letzte Oprechte — he kapituliert vör nix, nich mal vör de Realität! Fakten — Pah! Tatsaken — na und! Wenn ok alle Welt seggt, de Eer weer en Kugel, söcht Seehofer noch na den Rand vun de Eerdschiev. Dat is för em Ehrensaak. Allens annere weer Kapitulation! Nich mit Horst! He kapituleert nich, he weet, dat de Endsieg seker is! Un de Realität kann em gor nix.

Wo veel Sinn dat hett, utrekent vör de Realität nich to kapituleern, dat kann bloots de Vörsitter vun de CSU verklaarn — de Partei vun Betreuensgeld un Maut. So'n Klacks as fehlen Finanzen stöört ehr nich. "Passt dien Theorie nich to de Fakten — Pech för de Fakten!", dat is de CSU ehr Devise. So reist se blindlings dör de fiendliche Realität — in ehr Welt is de Welt noch in Ordnung, Fruuns höört in't Hus, Butenlänners höört nich hierher, und FJS is nich dood, sünnern töövt in'n Kyffhäuser op sien Wedderkehr, wieldess em de Boort dör'n Disch wasst. So in etwa.


3.10.15 ...All dröfft kamen, Snowden nich

De CSU-Tangotyp Markus Söder stellt nu dat Grundrecht op Asyl to Debatte. De ganzen Flüchtlinge kannst twoors nich eenfach so wedder na Syrien afschuven, avers mit Asyl, so meent vele, mit Asyl hett dat doch allens nix to doon. Dat Asylrecht woor för individuell politisch Verfolgte maakt, also för politische Aktivisten, Dissidenten, Intellektuelle... för ganz wenige! — Ach wat?! Hebbt wi wirklich sowat? So en Asylrecht för Dissidenten? Un woneem is denn Edward Snowden? Sowiet ik weet, hett he Asyl beandraagt — ok in Düütschland! Man nüms wull em hebben.

De Fall Snowden un de Migrantenfloot opstunns hangt nich so wiet uteneen, as dat schient. Se hebbt mit'nanner to doon. De "Ideologie vun't Mookbore" — wat geiht, is verlöövt —, de Verraat vun'n Westen an sien egen Weerte: düt liggt ok mennig vun de Kriege un Krisen togrunn, de opstunns Vörrerasien terfleddert. "Üb immer Treu und Redlichkeit", dat tahlt sik opletzt ut — ok VW dröff sik dat in't Stammbook schrieven. Bloots Sepp Blatter, de hett sowat nich nödig. De speelt ja in en anner Liga.


28.9.15 ...Blatter blifft!

Gott wees Dank! De Welt speelt verrückt, överall, man een Konstante gifft't noch, een, op den Verlaat is: Blatter blifft! Ofschoonst de Staatsanwaltschap gegen em ermiddelt, will he Fifa-Baas blieven. Dor schall sik Winterkorn mal en Bispill an nehmen! Mehr noch: Ok wenn he verurdeelt un verknackt warrt, kunn he Fifa-Baas blieven! Ok mennig anner ähnliche Grotünnernehmen warrt vun Baasen ut'n Knast rut regeert, in Italien, in Mexiko, in Kolumbien... Ik glööv sogoor, Blatter schafft dat, sien Vereen noch ut dat Güntsiets to regeern, wenn he doot is! He speelt even in een Liga mit Jesus un solk Lüüd, as sien Ünnergevene ok al weet.


23.9.15 ...Afgas-Gate: De Buteneerdschen!

Se sünd wedder dor: de Buteneerdschen! De fiesen Aliens, desülvigen Buteneerdschen, de, as Nazis utstaffeert, mal för 12 Johr ganz Düütschland kapert harrn! Nu hebbt se sik bi VW insleken un de fiesesten Tricks inbuut, mit nix as de Afsicht, VW bet op de Knaken to blameern. VW is ganz unschüllig doran, un sünnerlich Winterkorn — "Der Führer hat nichts gewusst!" Nümsnich hett nix wüsst bi VW. Dat sünd Aliens west, ganz kloor. In'n Opdrag vun de Gegensiet, natüürlich. Liekso as bi de Sportlers, de mit Doping faatkregen warrt un denn jammert, "Dat hebbt's mi heimlich in't Eten mischt, dat ik opflegen do! Dat weern mien Konkurrenten! Ik weet vun nix!" Dat weern doch jümmers de Buteneerdschen, de böösaardigen Heinzelmännchen! Orr weer dat noch en ganz anner...? Dat Bild, dat Katja Renfert schaten hett, schall woll sowat andüden...


Foto Katja Renfert

Mi dücht, VW hett — vun dat Afgas afsehn — noch en ganz annern Defekt: Se hebbt ganz kloor en Rad af.


22.9.15 ...Afgas-Gate

Siet Watergate heet de groten PR-Katastrophen ja -gate achtern mit'n Familiennaam. To düsse elitäre Gate-Familie höört wisslich ok dat, wat sik VW nu inbrockt hett. En Afgas-Gate. Jungejungejunge! Dat is sachs naiv, in düsse Branche to seggen "Unrecht Gut gedeihet nicht", denn dor diegt ja doch so mennig unrecht Good; man wenn dat denn wirklich mal opflüggt, kannst den Grientje nich ünnerdrücken. Blangen düütsche Autos is dat Woort "schadenfreude" een vun de bekanntsten düütschen Exporte in de USA. Bi VW kümmt nu beid tohoop.

VW weer mit sien vigeliensche Afgas-Manipulation so plietsch, dat dat al wedder dumm is. Weer de VW-Konzern en Minsch, wöör he Guttenbarg heten. Wo veel Möhg, Plie un Geld hebbt se dor rinsteken, dat de Technik den Bedrug tostann bringt? Dat se dat tostann kregen hebbt, is twoors en gode Leistung, avers liekers keen gode Reklaam. Harrn se desülvige Menge Bregensmolt in ümweltfründliche Technik stekt, harrn se den Bedrug gor nich nödig hatt. Dat is as bi't Mogeln in de School: Maakst di'n Spickzedel, dennso is dat Afschrieven alleen al so en intensiv Öven, dat de den Zedel later gor nich mehr brukst. VW kriggt nu en Denkzedel vun anner Aart — vun de US-Behörden, vun de Kunnen weltwiet. Dor warrt se sachs vun lehren.


14.9.15 ...Flucht un Marktweerschap

Grenzkontrollen hin orr her: Mi dücht, Düütschland hett sik entslaten, bestimmte Minschen — Minschen ut de Börgerkriegsrebetten — bi sik optonehmen. Düütschland hett sik entslaten, sik verännern to laten. Dat is en groot Aventüür, en Aventüür op Gegensiedigkeit. Wi dröfft spannt ween.

Wenn wi düsse Minschen also sowiso opnehmen wüllt, woso moodt wi ehr denn düsse Tortuur vun Flucht to? Un woso laat wi de bösenbösen Sleppers de Unsummen kasseern, de de Utwannerers ehr geevt? Wenn jedeen vun de 800.000 orr de een Millioon, de hier ankaamt, de Sleppers 4000 Euro betahlt, denn sünd dat 4 Milliarden Euro! Dat is doch dat Geld, dat jüst nu de Gemeenden wegen de Flüchtlinge extra kriegen schallt. Dat wöörn de Flüchtlinge mitbringen!

Mien Vörslag is: Packt wi dat Ganze vun de marktweerschapliche Siet an. Fleegtüüch köönt in Syrien opstunns nich so good lannen. Man schickt wi doch eenfach so'n poor Krüüzfohrtscheep dor langs, na Zypern orr in de syrischen un libanesischen Havens, de de asylsöken Lüüd komodig na Europa bringt — för 4000 € Pauschalpries, mit all Komfort. De bösenbösen Sleppers sünd dormit ratzfatz vun'n Markt feegt! Wokeen nimmt so'n Rostkahn, wenn he en schickes Krüüzfohrtschipp kriegen kann?

An Bord sünd al poor düütsche, swedische, britische BeamtInnen, de al de Registreern maakt un de Asylformalitäten in Gang bringt. Se söökt ok de Lü ut. Ja, wi mööt de Lü utsöken; dor kaamt wi nich ümrüm. Ok wenn wi noch keen Inwannernsgesett hebbt. Lü mit lüttje Kinner hebbt Vörtridd, Fruuns (feministische Inwannernspolitik! Ganz nödig!), un de mit gode Bildung. An Bord gifft dat avends Info-Shows, 'neem elkeen Land sik vörstellt un üm de besten Flüchtlinge warvt. Denn köönt sik de Lü överleggen, woneem in Europa se utstiegen wüllt.

All an Bord geiht dat nochmal so richtig good. In Europa gaht de an Land, de Asyl kriegt orr Verwandte dor hebbt, un de Rest fohrt op den Trüchweg wedder mit; an't Willkommhöft speelt se "Muss i denn zum Städele hinaus", wenn dat Schipp rutfohrt, un se hebbt nochmal en schöne Seereis, ehrdat se in'n Libanon dwangswies afsett warrt. — Dat de Scheep op den Weg trüch nich so lerrig sünd, kunnen se ok de ganzen dörknallten IS-Friewilligen un ehr Krawallbräute na Syrien mitnehmen. De kunnen denn ünner de frustreerten aflehnten Asylsökers fix niege Kämpers rekruteern. An Bord gellt avers noch fein uns Regeln, nix mit Scharia! Un nix mit Wapen an Bord.

För de, de den Landweg inslaan hebbt, kunnst sowat ok as Donaukrüüzfohrt anbeden. Dat is villicht nich afsoluuts human, avers veel humaner, as dat nu löppt; dat is för de Lü en Highlight, se kaamt sund un entspannt an, dat is praktisch för uns, un: dat rekent sik. — Flüchtlinge, nee: Inwannerers uttosöken, dor kaamt wi nich ümrüm.


6.9.15 ...Flüchtlinge: Nu mal Kloortext

Dat is as en Droom. Düütschland warrt bewunnert, Düütschland warrt laavt, Düütschland warrt leevt in de Welt — för sien Ümgang mit Flüchtlinge. "Düütschland moralisch Vörbild" — "Lüchttoorm Düütschland" — "Düütschland reddt Europas Ehr". So schrievt de Bläder in de Welt. Dat sünd wi nich wennt, dat föhlt sik good an, dat eit uns Seel. Dat maakt mennig vun uns stolt; villicht nich jüst de, de sünst jümmers fix bi de Hand sünd mit "Ich bin stolz, ein Deutscher zu sein" — avers mennig normale Börgers föhlt miteens düssen Stolt. Un dat wedder stimmt ehr milder gegen de Flüchtlinge — de Bewunnern vun de Welt köfft de Flüchtlinge uns Sympathie. Ja, wi sünd bestechlich. Un iedel. Dat is avers okay, denn düsse Iedelkeit drifft uns, dat Rechte to doon.

Mal in Eernst: Düütschland is opstunns rundüm un dörch de Bank op de Gewinner-Siet. Dat geiht uns weerschaplich allerbest, un wieldat dat so is, treckt wi Towannerers an; wi kriegt gratis un frie weertvulle niege Börgers levert, un dorför, dat wi ehr opnehmt, warrt wi ok noch bewunnert! Wat kann nu noch kamen? Schallt uns braden Duven in't Muul flegen?

Weertvulle niege Börgers — dat glöövt Se nich? Laat Se uns mal bloots vun de Syrers snacken — vun de Syrers, Noordirakers, Kurden un Jesiden. De dor kaamt, dat sünd nich de Povern. De Povern sitt noch tohuus; wo schallt de de 4000 orr 5000 Euro för de Reis hernehmen?! De Rieken sünd dat avers ok nich, denn de hebbt dat gor nich nödig, so op de Flucht to gahn. Nee, wat dor kümmt, dat is — hollt sik fast: — de Middelschicht. Ja, en veritable Middelschicht, dat Best, wat en Volk to beden hett, de Motor, dat Filetstück vun jedeen Sellschap! Bildungsbewusst, westlich denken, foortschrittlich, ehrgeizig. Wi kriegt gratis de Middelschicht vun en ganze Naschoon levert! Un se wüllt Düütsche warrn! Wat kann uns Beters passeern?! In mien Beroop arbeit ik mit solk Minschen. Dor sitt ik vör en Kursus vun 20 Lü ut Syrien, Noordirak, wenig Afghanen, een Afrikaner. Allens Akademikers. Ingenieure un Ingenieurinnen. Dokters un Doktersche. Wokeen nich studeert hett, is tominnst Elektriker. — In Düütschland en Minschen so uttobillen, vun'n Kinnergoorn an bet na't Universitäts-Diplom, kost den Staat ca. 150.000 Euro. Dor sitt en Millioonenvermögen! Dat kriggt Düütschland eenfach so schenkt. Wi mööt villicht 5000 Euro per Persoon investeern — in Düütschünnerricht un af un an en Traumatherapie —, denn hebbt wi düt Kapital för Düütschland sekert. Stellt sik de Gewinnspanne vör! Dor kriggt dat Woort "Flüchtlinge sind eine Bereicherung" doch miteens en ganz annern Sinn, wat?

Un de Lü hebbt lüttje Kinner. Wenn de Börgerkrieg dor noch poor Johr duert, denn gaht ehr Kinner hier to School — un denn blievt düsse Minschen hier. Ahn Towannern fehlt uns in Düütschland jedeen Johr 200.000 Minschen. En lütte Grootstadt. — Dor muchst meist höpen, dat de Börgerkrieg noch anduert, nich?

Konflikte? Seh ik nich. De Lü denkt demokratisch un sünd nich veel muslimischer, as wi christlich sünd. Wenn wi düsse Minschen fix un entslaten integreert, warrt se mit uns tosamen de radikalern Elemente vun all Sieden Wedderstand wiesen!

Dat meen ik mit "weertvulle Börgers". Dat de Asylandrääg vun Syrers opstunns meist all annahmen warrt, is richtig. Düütschland warrt sik över düsse Minschen in 10 Johr noch en Lock in'n Buuk freun. Dat wi ehr hebbt. Dat wi ehr nich wegschickt hebbt. Dat warrt uns "Standortvördeel" noch grötter maken! — Also, Se köönt ruhig hengahn, wenn wedder en Flüchtlingstoog kümmt, un de Kinner Schoklaad un de Öllern en Bloom geven! Se köönt dat ut reinen Egoismus doon; de lütten Kinner betahlt in 30 Johr Ehr Rente. Un Se köönt sik vun de ganze Welt för Ehr Minschenfründlichkeit laven un bewunnern laten.

Is as en Droom, nich?


23.8.15 ...Dree Rechte

In Thürigen geev dat en deegte Klopperie ünner Flüchtlinge. Een schull en Koran in'e Tö smeten hebben, anner wulln em dorwegen an'e Wäsch. Dat Flüchtlingsheim güng meist to Bruch. — Thüringens Ministerpräsi Ramelow hett dorto seggt: "Dat gifft keen Recht, de Koran in'e Tö to smieten, dat gifft keen Recht, de Bibel to verklein, man dat gifft ok keen Recht, een to lynchen, de dat deit." Antohören hier. — Dat Problem is, dat Ramelow irrt. De eersten twee Rechte, de gifft dat. Vörutsett, dat Koraanexemplaar un de Bibel höört mi to, denn dröff ik dormit maken, wat ik will. Wenn ik de Tö dormit verstopp, mutt ik den Klempner betahlen, dat is allns. — Bloots dat drütte Recht, dat gifft dat wirklich nich.

Wokeen in Düütschland leven will, mutt, ahn to Gewalt to griepen, tokieken könen, wenn en anner den Koran in lütte Snipsel de Tö rünnerspöölt. Un de Bibel mit Fööt peddt. He mutt nich tokieken, he kann wegkiegen; man he mutt de Finger vun Gewalt laten.

Wokeen de towannern Lü düsse Erkenntnis "ersporen" will, de will ehr nich integrieren. De behinnert de Integraschoon. Un wokeen ehr nu ok noch na Völkerschaften opdelen will, as Ramelow vörsleit, de geiht ganz un gor biester. Dat is jüst de Vördeel vun Düütschland, dat wi "Little Italy" un "Little Istanbul" un "Chinatown" hier so nich hebbt. Keen Ghettos. Dat mutt so blieven. De Minschen, de nu to uns kaamt un de blieven dröfft, mööt in uns Sellschap opgahn. Nich uns Religioon annehmen, nee. Man uns Spraak, uns Liberalität, uns Rechte.

Sünst gifft dat bald dat Spegelbild vun de Rechte opstunns: Koran un Bibel sünd tabu, Lynchjustiz nich. Wüllt wi dat?


26.7.15 ...Jede gegen jeden, all gegen de Kurden

De IS rückt nu ok de Törkei op'n Pelz. De sett sik to Wehr un bombardeert — den IS, avers ok den IS sien slimmste Fienden: de Kurden un ehr Wapen. Dat is so, as harrn 1943 de USA nich bloots Bomben op Düütschland smeten, sünnern ok glieks op England un de Royal Air Force. Idiotisch — na de Logik vun'n Krieg gegen IS. Man nich för de törksche Regeern: De Kurden mööt daalhollen warrn, üm jeden Pries, dat is ehr Maxime. En Kurdenstaat weer slimmer as allens, slimmer as de IS.

Nu heet dat jede gegen jeden. Man nich mehr lang: De Törkei övernimmt dat Ruder, "Der Kurd hat seine Schuldigkeit getan, der Kurd kann gehen". Opletzt staht de Kurden wedder mit lerrige Hannen dor, as jümmers in de Geschichte. Se woorn Erdogan to gefährlich — hebbt demokratische Wahlen wunnen un so. Weer de IS nich kamen, Erdogan harr em erfinnen müsst. Is de IS bloots en willkamen Vörwand, gegen de Kurden vörtogahn?

De lachen Drütte is vöreerst de IS: de niege Fiend Törkei schafft ehr eerstmal den olen Fiend, de Kurden, vun'n Hals. — Sachs wüllt de Törken den IS, wenn överhaupt, mit Humor bekämpfen: Se schallt sik alle doodlachen.


24.7.15 ...Jümmer sporsamer

Woso schall de SPD bi de Bundsdagswahl 2017 eentlich en Kanzlerkandidaten gegen Merkel opstelln? Lohnt doch nich. Merkel winnt sowiso, wenn se nich tovöör apentlich lütte Kinner fritt (un villicht sogor denn). De SPD verslitt mit so'n Kandidatur bloots ehr rore Führungsfiguren, de staht achterna as Verlerers dor, dat schull man ehr (un uns) ersporen. — So meent tominnst uns Torsten Albig ut Holsteen. Un recht hett he! Mit dat Ersporen kunnen wi sogor noch wieder gahn: Woso 2017 eentlich wählen? Woso överhaupt noch wählen, solang Merkel leevt? Dat kost bloots Geld, un dat Ergeevnis steiht sowiso fast. De Tosamensetten vun'n Bundsdag kannst dör Schätzwerte ersetten. Is allens veel billiger un effizienter! De Linkspartei is sowiso wedder de eenzige, de meckern warrt. För de Tied na Merkel warrt dat swor — de Lü wöörn sik ganz nieg an sowat as bundswiede Wahlen wennen möten. Villicht schulln wi also twüschendörch doch af un to solk symbolische Tostimmens-Wahlen maken, sowat as in Noordkorea, dat de Lü in't Training blievt? Avers villicht erspoort Merkel uns ja ok dat — un bestimmt op ehr Dodenbett en Nafolger/sch, de denn den Thron, äh, de Kanzlerschap arvt.

De SPD is mit Albig un düsse Initiative wedder mal ehr Tied vörut — de wohre Fortschrittspartei! So clever! Opleevst wöör ik se nu meist wählen, bloots, dat geiht denn ja leider nich mehr.

Thilo Sarrazin, nich tofällig ok SPD (!), warrt bald wedder en Book schrieven: "De SPD schafft sik af". Orr se maakt Karriere — as Oppositioonspartei in Noordkorea. Kim Jong Un hett wiss nix gegen so en Oppositioon.


20.7.15 ...Jümmer rieker

Tja, jichenseen in Düütschland warrt jümmer rieker un rieker. 140 Milliarden in een Quartal! Dat ik dat nich bün, is klaar; de Löwenandeel vun düssen Togewinn geiht op dat Konto vun de Rieksten, un mit de heff ik nix to doon. — Wo veel beter wöör sik dat anföhlen, wenn düsse Towass gliekmäßig över de Bevölkern verdeelt weer! Wo veel mehr wöör dat den Tosamenholl stärken! Op mien Andeel dorvun — knapp 2000 Euro — kunn ik verzichten, man düsse Gliekheit to geneten, dat weer't mi weert!

En anner Fantasie: 140 Milliarden, dat sünd in etwa 40% vun de Schulden vun Grekenland. De rieken Düütschen, de dat dortokregen hebbt, bruukt dat nich. Wat, wenn wi nu düsse 140 Milliarden insammeln un eenfach so na Grekenland schicken wöörn? As Geschenk? Schenken maakt doch jümmers Spaaß. Sachs weern wi Düütschen denn wedder "gönnerhaftig" un "respektlos", man knauserig kunnst uns nich mehr nömen. De Greken wöörn dat natüürlich nich effizient bruken, en beträchtlich Deel wöör veruntreut, un na korte Tied weern se wedder in de Bredullje. Un dat — hier kümmt mien Boshaftigkeit in't Speel, mien "binnere Schäuble" — dat weer jüst dat Schöönst doran: dat wi amenn doch Recht behollt. Dat wi dat ja jümmers seggt hebbt. Un liekers nobel west sünd un dorför bewunnert warrt. Hand op't Hart: Grient nich ok SeEhr binnere Swienshund as'n Honnigkokenpeerd bi den Gedanken? Is Rechthebben un "Sühst du woll!"-Seggen nich schöön? Is dat nich 140 Milliarden weert?

Na good, ik geev to: Mit 140 Milliarden kannst veel wat Beters in de Welt anstelln. Wat Nödigers. Echte Noot linnern. Man — dor, woneem se nu sünd, sünd de 140 Milliarden verkehrt. Un: Rechthebben is schöön!


16.7.15 ...Staatskunst

Halvig twee nachts. Jüst is op den Kiekschapp-Sender Phoenix (unverzichtbor!) live de greeksche Parlaments-Afstimmen lopen. Reformpaket annahmen, mit grote Mehrheit. Dat Ganze maakt mi nadenkern: Kann dat nu nich ween, dat dat, wat wi opstunns bi de Greken beleevt, hoge Staatskunst is? Nagraad krigg ik Respekt vör den Alexis Tsipras un fang an, em wat tototruun. Hett he dat villicht allens so vörutsehn un plaant?

He hett de Greken de Mööglichkeit geven, Europa un de Düütschen ehr ganze Woot vör de Fööt to speen. He hett den Varoufakis as frechen Kasper inspannt; hett in de Verhandlungen de Mächtigen driest op de Nees rümdanzt, överall Respektlosigkeit wiest un dat, wat de Greken "Stolt" nöömt; un hett opletzt mit dat Referendum dat Ventil schafft, dat de greeksche Seel nödig harr, sik nocheens ganz luud Luft to maken. Un nu — nu nimmt he ehr bi de Hand un föhrt ehr dör dat Daal vun de Tranen.

Dat is Kuraasch, dücht mi. He wüss, wat de greeksche Psyche bruken dä. Dat kunn se kriegen, dat hett he ehr verschafft. Den greekschen "Stolt". He weet sachs ok, wat de greeksche Kniep bruken deit; man dat kann he ehr nich so licht verschaffen. He hett avers anschienend den Dörchblick, is en "Cleverle" (as de Swaben seggt; en Swabe is Tsipras avers wiss nich — Schäuble is en Swabe). Wenn he dat schafft, de Greken dör düsse Döststreck dörch bi de Stang to hollen, denn kann he as grote Staatsmann gellen. — Villicht verännert sik denn ja ok noch wat in de greeksche Mentalität...

Ok op de anner Verhandelnssiet kannst Staatskunst erkennen, wenn du ehr söchst. Wat weer dat nütt, wenn Düütschland sik nobel wiest (so'n beten vun baven dal sünd wi in düsse Saak ja jümmers) un för de Greken bloots milde Maßnahmen uthannelt — un denn kippt Estland orr Finnland dat Paket in ehr Afstimmen? So harr dat kamen kunnt. Denn weern de Düütschen twoors nich schuld, avers de Greken doch pleite. — Wi hebbt so'n hatte Bedingen bruukt, denk ik, dat all de Staaten, de dat dör't Parlament schicken mööt, ok tostimmt. — Ok Düütschland.

Dat de ganze Sparpolitik in en Sackgass stekt, steiht op en anner Blatt. Dat is Ideologie un Irrdom. Staatskunst blifft dat avers.


5.7.15 ...Greeksche Stimmzedels

"Schall de vun de Europääsche Kommissioon, de Europääsche Zentraalbank un den Internationalen Währungsfonds vun de Eurogrupp an'n 25. Juni vörleggte Vörlaag för en Övereenkamen, de ut twee Delen besteiht, den een eenheitlichen Vörslag billen doot, annahmen warrn?"

Dat is de Fraag, op de de Greken hüüt antern schallt. Un op de Stimmzedels süht dat nerrn so ut:

Jo
Nee
Hä?

Dor hebbt wi Glück, dat wi in Düütschland nich so'n komplizeert Referendum hebbt! Bi uns maakt de Referenden nämlich de Bild-Zeitung. Un de sünd idiotenseker. Mööt se ok ween. — Worüm wohl...?


24.6.15 ...He is pienlich

Staatsbesöök. De britische Königin un ehr Macker kaamt mit Gauck un sien Konkubine in't Boot bi't Kanzleramt anschippert. Gauck hampelt rümmer as'n Aap, snackt in eensento, winkt, as weer he de Star, jumpt in't Schipp hen un her, tuckt de Flagg torecht, strahlt as'n Honnigkokenpeerd un maakt alltohoop den Clown un Showmaster.

In't Kanzleramt ankamen, seggt de Queen to Merkel: "Moin. — Is de Gauck eentlich jümmer so pienlich?" Merkel: "Moin, Majestät. Gott ja, wat fraagt Se mi. Ik heff em ja nich hebben wüllt as Präsi. Aver de dorvör weer ok richtig pienlich. Un jichenseen Staatsöverhaupt bruukt wi ja." Queen: "Maakt Se sik nix ut. Dat kann bi'n Monarchie ok passeern." Merkel: "Ja, avers denn is dat Schicksal. In en Demokratie is dat Dummheit." Queen: "Nee, bloots slechte Stil." Merkel: "Stil? Ut Stil maak ik mi nix." Queen: "Sühst. Allns keen Drama. Un weetst wat? Philip kann ok ganz schöön pienlich ween."


21.6.15 ...Wat wüllt se denn nu nich?, fröög de Butt

Dat Bagenscheten is en ehrenwerte Sport, man warrt wenig öövt. Jüst annersrüm is dat mit dat Den-Bagen-Överspannen. Düsse Sport is keen beten ehrenweert, man wiedhen begäng. Twee Bispelen ut de verleden Daag:

De NSA-Spionaag-Anwiesen, de sachts ok gegen de düütsche Weerschap richt weern, höört eentlich an't "Licht vun de Öffentlichkeit" (as dat so nöömt warrt). Man de USA, de eentlich gor nich fraagt warrn bruukt/höört/dröfft, wieldat se sülven de Öveldeders sünd, avers uns Bundsregeern is ja sowat vun servil gegen de — de USA also hebbt wat dorgegen. Un wenn dat bloots den NSA-Ünnersökens-Utschuss vörleggt warrt? Nee, seggt wedder de USA. (Se hebbt ehr wohrhaftig wedder fraagt!) Denn hett sik de Utschuss rünnerhanneln laten op een eenzigen Minschen, een Vertruunspersoon, de Insicht in düsse anrüchigen Listen nehmen schall — nich mehr as en armselig Fiegenblatt vun Demokratie. Man wedder hett uns Bundsregeern — na wokeen? — richtig, de USA fraagt, wat ehr dat nu genehm weer. Nee, weer de Anter. — De Butt in't Märken wöör de Listen nu an de Presse geven. Ach ja: De Butt, dat sünd eentlich wi, de Souverän, dat Volk.

"Ji kriegt den Dreck, wi den Stroom": Bayern, de ewige Nörgler mit Sünnerrechte, sotoseggen dat Grootbritannnien ünner de Bundslänner, Bayern also will keen Atoommüll opnehmen. Dat "ewige Twischenlager" Gorleben hett nu endlich de Faxen dicke, un de neegst Atoommüll schall bi veer Kernkraftwarken twischenlagert warrn. Een dorvun in Bayern, dat Land, dat jümmers so dull för Atoomstroom weer. Dat stellt sik nu op de Achterbeen un seggt, wenn de Atoommüll to ehr kümmt, wüllt se de ganze Energiewenn platzen laten. Denn gifft dat avers ja noch mehr Atoommüll! Un denn brukt wi endlich ok mal en Endlager! Ik slah vör, dat in Bayern to maken. De verstaht sik allerbest op Sekerheit, un Atoommüll mutt ja schöön seker lagert warrn. In Bayern hebbt se doch annerletzt allens so fein afsperrt kregen, as de G7-Politikers dorween. Fiefmaal so veel Udels as Protestlers! De brukt se gor nich eerst aftrecken! Endlager Slott Elmau: Schöön afleggen un totaal seker.


16.6.15 ......widdewidde wie sie mir gefällt

En witte US-amerikaansche Börgerrechtlersch föhlt sik swatt — un warrt dat. Michael Jackson föhl sik witt — un woor dat. En Fru, de sik as Mann föhlt, orr en Mann, de sik as Fru föhlt, fackelt hüüt gor nich eerst lang un warrt dat. En lernbehinnert Kind will op't Gymnasium — un warrt Gymnasiast. Naja, binah. Länner, de in Asien liegt — Usbekistan, Kirgisien, Israel —, maakt in'n Sport bi Europameesterschapen mit, wieldat se sik so europäisch föhlt un ehr dat beter gefallt. Un de Rallye Dakar is — eenfach so — in Südamerika.

Wi sünd meddewiel solk Individualisten, dat meist gor keen Klassifizeern vun buten mehr gellt. Wat wi sünd, bestimmt wi sülven. Mit knappe Noot behaupt sik noch de Natuurgesetten — avers eentlich geiht uns dat bilütten ok gegen uns minschliche Wöörd, dat wi all noch de Gesetten vun Ruum, Tied un Swaarkraft ünnerdaan ween schallt. Woso fraagt de Natuur nich, woans wi uns föhlt?! Wenn ik mi 20 Kilo lichter föhl, as de Waag seggt, denn heff ik doch dat Recht, dat ok to ween! — Wenn mi opneegst de Polizei stoppt, wieldat ik mit Auto to flott ünnerwegens weer, warr ik seggen: "Nee, ik föhl mi so langsam!" Denn bün ik dat ja woll ok, nich?

Eentlich hett Guttenbarg dormalen en dösigen Fehler maakt. Staats sik för veel Geld en Dokterarbeit fälschen to laten, harr he eenfach seggen schullt: "Ik föhl mi so promoveert! Ik föhl mi as'n Dokter! Un wenn ji mi nich mit Dokter ansnackt, warr ik krank!" — Tja, denn harr em dat ja nüms verwehren kunnt, nich?


14.6.15 ...Wat to denken gifft

De Naforschen vunwegen Angela Merkels Handy-Afhöörn warrt nu instellt — na een Johr. Mangel an Bewiese. Nix to finnen. (Wenn de Russen dat afhöört harrn, wokeen wöör na Bewiese fragen?) Grund: de USA wüllt keen Utkunft geven. (Weern dat de Russen, dat weer de Bewies!) Dat allens weer vun Anfang kloor. Weer de Kulissenschuverie wirklich nödig? Dat hangt so'n Mäntelchen dorvör, as weer allens okay, wenn bloots de Rechtsstaat funscheneert. Avers nix is okay.

Ok de unsäägliche ole Strauss-Kahn is ja friespraken woorn. He hett angeevlich gor nich wüsst, dat de jungen Fruuns, de sik op Orgien vun em misshanneln un as "Woor" beteken leten, Prostituierte weern. Wat'n Överraschen! He dach, de weern dor friewillig. Un wulln partu mit em in't Bett un vun em slecht behannelt warrn. — Ganz achtern in'n Kopp luert de Verdacht, dat he dat wirklich glöövt.

De Welt is schon unheimlich.

Körtens keem rut: Planten sünd intelligent, se hebbt sowat as en Gedächtnis. Un en Aart frien Willn. Oha, nu warrt't eng för de Vegetariers! Planten sünd mi jümmers beten unheimlich; se sünd uns eenfach över op ehr stille Aart. Wohrschienlich sünd de Planten ok intelligenter as Dominique Strauss-Kahn. Den will ja avers ok nüms opeten. Weer ja to un to unappetitlich!

Un bi den G7-Gipfel in Bayern, dor harrn se ja dat Schengen-Afkamen — frie Dörchfohrt dör de Grenzen — temporär utsett un wedder Grenzkuntrulln inföhrt. Prompt hebbt se wat fungen: över 600 Lü, na de söökt woor — dorvun 135 mit Haftbefehl! Un de se fungen hebbt, sünd bloots de Dösigen, de keen Narichten leest — de Plietschen hebbt wüsst, dat kunnerleert warrt, un sünd noch frie.

Dat gifft denn doch to denken.


14.6.15 ...Mithöört

"Schwule gliekberechtigen?", sä de wat öllerhaftige Daam. "Schwule sünd doch gliekberechtigt!"
"Nee, se köönt ja nich heiraden!", sä de wat jüngere Daam.
"Köönt se doch! Jedeen Schwule kann en Fru heiraden, un jedeen Lesbe en Mann. Dat is de Eh. Se köönt also heiraden."
"Tüünkraam! Dat wüllt se doch nich! Schwule wüllt Männer heiraden un Lesben Fruuns!"
"Dat köönt Heteros ok nich. De Schwulen hebbt also desülvigen Rechte as Heteros."
"De Heteros wüllt dat aver ok nich!"
"Wat een will, dorvun snackt wi doch gor nich! Wi snackt vun Eh, nich vun Leevde!"
"Wat! Bloots wieldat du dormalen Robert wüllt un nich kregen hest! Hett di dat so bitter maakt, dat du de armen Schwulen nix gönnst?"
"Du — du — du unverbeterliche Romantikersch!"


27.5.15 ...De Eh is en Entdeckensreis...

...sä angeevlich Mark Twain. Dat Dumme an de Eh is, dat dat mennig kloke Spröök, avers keen Definitioon dorför gifft. Fröher dachen all, dat weer doch kloor. Man hüüt is nix mehr sülvstverständlich. Lesben un Schwule schulln heiraden könen, is klaar. "Woneem Minschen för'nanner Verantwoorden övernehmt", so formuleert dat opstunns mennig Funktioonsdrägers, dor schull Eh mööglich ween. "Eh för all!", heet de Slogan. Dat maakt Höpen op mehr. Mien Tipp is: Opneegst kaamt dree Lüüd un wüllt tohoop heiraden. Un woso schulln se nich? Se övernehmt doch Verantwoorden för'nanner. Steiht ja narms, dat de Eh bloots för Poore is. "Eh för all!", heet dat nich ok för all tosaam? Strenge Muslime dröfft veer Fruuns heiraden — villicht ok bald bi us vör't Gesett? Dat weer denn natüürlich streng gliekberechtigt; wenn de Mann doodblifft, sünd de Fruuns ünnernanner jümmer noch verheiraadt — as Lesben Opneegst kümmt denn en ganze Vereen un will heiraden... Diskrimineern vun Tallen? Dat geiht doch nich! Woso is twee en beter Tall as dree — orr dreeuntwintig? Dat warrt se denn fragen. Weet Se en Anter?

Dat kümmt, wieldat narms steiht, woans "de Eh" defineert is. Villicht schrievt se nu fix en Definitioon vun Eh in't Grundgesett. Orr villicht is dat beter, doch keen Definitioon to maken. Denn wi sünd all op Entdeckensreis; uns Sichtwies op de Welt is fleten, se ännert sik. De Opfaten vun dat, wat Geslechter sünd, lööst sik op ("Liquid Gender" heet dat); dat gifft nu mehr as twee Geslechter. Villicht finnt wi dat jichenswenn ok richtig, de Eh noch wieder to öffnen. Un denn kunn en Definitioon bloots in'n Weg stahn.

Woso schull en Mann eentlich nich sien Auto heiraden dröffen?


25.5.15 ...Palmyra un de Neutronenbomb

De IS hett Palmyra innahmen, dat antike Palmyra, dat Weltkultuurarv — un överall warrt de Lü miteens hibbelig, förcht en Vernichten vun de antiken Tempel, Theater un Sülengäng in en groot Exploschoon. Dat dröff nich passeern! Reddt de Ruinen! Se sünd histoorsch! Eenzigaartig! Nich weddertohalen!

Nu deit de IS ja allgemeen teemlich veel för Ruinen — nich gegen Ruinen. Faken maakt se Ruinen, 'neem noch gor keen sünd. Man hier wiest he uns en Wohrheit över uns sülvst: Minschen sünd uns meist so egaal as den IS. Wi denkt jümmers, dat minschlich Leven weer uns hööchst Goot; avers laat mal so'n ole Ruinenstadt vör de Hunn gahn, denn warrst klöker. Minschen sünd nich eenmalig. Ruinen doch. Ruinen sünd weertvuller as Minschen.

Minschen gifft dat in Hüll un Füll. Ehr Tall is meistto to'n Probleem woorn. Sünst geevt wi dat ok to. Ja, för jedeen vun uns is sien/ehr Leven dat Kostbaarst. Avers nüms vun de Syrers bedüüdt uns veel. De Welt is mit Saken utstaffeert, un en poor dorvun sünd uns wichtig. Vun de Minschen sünd uns bloots wenige wichtig. Fehlt de annern, is de Welt doch noch desülvige för uns. Un dat is uns dat Wichtigst: dat uns Welt desülvige blifft. Dor sünd wi as de Neutronenbomb: De Saken schallt stahn blieven, de Minschen sünd verzichtbor. Bloots de IS süht dat anners un will partu de Buwarken wegmaken! Idioten!

Keen Grund för "mea culpa". Wi sünd nich verplicht, anners to föhlen, as wi doot. Wi mööt nich "politisch korrekt" föhlen. Woans wi föhlt, is Fakt. Fakten sünd unschüllig. Wi mööt dat annehmen un verstahn. To uns Ehr mööt wi seggen: Gegen minschlich Lieden sünd wi nich so gliekgüllig as gegen minschlichen Dood. Wöör en Minsch mit uns Weten nich ümbröcht, sünnern quäält, foltert — denn wöörn wi sachs ok de Ruinen vergeten un em to Hülp ielen. De, de IS entföhrt, versleept un verslaavt hett, de vergeet wi nich so licht. De entföhrten nigeriaanschen Deerns — "Bring back our Girls" — weern uns neger as de, de ermoordt woorn. To'n Dood sünd wi all verurdeelt, dat weet wi. De Minschen dor starvt sowiso jichenswenn. De Ruinen dorgegen köönt noch lange Tied stahn; jichenswie sünd se uns över, dat föhlt wi un wiest ehr uns Reverenz.

Un dat muttst ehr laten: Schöön sünd se ja doch, de Sülentempel. Hüüt warrt nich mehr so buut. Schöönheit fesselt uns; dat is Fakt; Fakten sünd unschüllig. Wi hebbt dat Recht, so to föhlen, as wi föhlt.

Jedeen Dag verhungert sowiso twintigdusend Minschen op uns Globus. Vermisst Se de villicht? Uns Welt is noch desülvige. Jüst dör dat Verhungern; denn dat höört to ehr to.

Wi mööt nich politisch korrekt föhlen. Man hanneln?


17.5.15 ...Doodsurdelen un anner Blödsinn

De junge Bostoner Attendäder un de ole ägyptsche Ex-Präsi — all warrt se opstunns to'n Dood verurdeelt. Gifft ja ok welk, de warrt mehrmalen to'n Dood verurdeelt. Dat Verkünnigen vun so'n Urdeel schient mi jümmers so lächerlich un trivial, denn — to'n Dood verurdeelt sünd wi doch all. So'n Doodsurdeel ännert doch prinzipiell nix — ehrlich, ik finn Gefangenschap leger... Man bloots dat de Verurdeelte (möglicherwies) Johren verleert. Wo veel dat sünd, dat weet nüms; man is antonehmen, dat de junge Mann in Boston mehr Johren verleert as de ole in Kairo. He warrt also theoretisch härter bestraaft.

China buut künstliche Inseln in't Süüdchineesche Meer, se wüllt dormit ehrn Ansprook op Gegenden fastsetten, de doch veel nehger an de Philippinen, Vietnam orr Borneo liggt. Man China is mächtiger, un dor in't Meer gifft dat sachts wat Weertvulls in'n Ünnergrund... man good, dat de Klimawannel bald för sorgt, dat de Inseln wedder överspöölt warrt! Dor arbeidt China ja ok orrig an mit. Kannst eentlich Wetten afsluten in düssen Wettloop twüschen Sandopspölen un Anstigg vun't Meer?

Mit Iran kaamt de Verhandlungen jüst nu op en Bredd, dor bewapent sik noch en radikalreligiöse Diktatuur mit Atoomwapen! Un dat jüst vunwegen de Verhanneln mit Iran. Dat is ja, as harrn de Taliban de Bombe! (Hebbt se ja villicht ok bald, in Pakistan.) Hett Saudi-Arabien överhaupt Wetenschaplers, de mit so vigelienschen Kraam ümgahn köönt? En Theokratie, de sozial in de Steentied leevt un 'neem se glöövt, dat Fruuns, de Auto fohrt, unfruchtbor warrt, un annern Quatsch? — Och so, dat sünd uns gode Frünnen? Denn köönt wi ja beruhigt ween. De mööt wi sogor dorbi helpen! Anners schafft se dat ja woll nich.


14.5.15 ...Dat Mammut wahnt bi uns

Meddewiel is de Geheimdeenst-Affäär överall präsent — un hett doch wat Gespenstischs, as weer se gor nich richtig dor. In en lesenswerten Kommentaar grippt Sascha Lobo uns' Mammut-Metapher op un seggt, worüm dat bloots en Gespenst vun en Mammut is: "Da ist ein Problem-Elefant im Raum: Was, wenn trotz aller Enthüllungen genau nichts passiert? Was, wenn ein mediales Potpourri an beweisbaren Vorwürfen Angela Merkel einfach nicht dazu bringen kann, irgendwelche Konsequenzen zu ziehen?"

Dat is, wat wi all weet un doch förcht: dat wi Wählerschen un Wählers, wi Börgerslüüd, eentlich binnerlich al lang de Demokratie afschafft hebbt. Regeln staht noch schreven, avers gellt nich mehr. Wi leevt in en Intressen-Aristokratie mit Königin Merkel — un sünd tofreden, wenn wi in Roh laten warrt. Wi sünd ahn Influss, wieldat uns dat ganz recht is. Wi beschülligt jümmers de Politikers un de Lobbyisten. Is ja so licht. Man wi sünd mitverantwoortlich för dat grote Wieder-so.

Materielles beweegt uns noch. Oh, fief Euro per Liter Benzin, ja, dat beweegt Wählerstimmen! Dorwegen heff ik ok op de Weerschap höpt. Se is dat, de wat Materielles to verleren hett, de sachs al schädigt woor dör uns egen Regeern. De wöörn sik doch tominnst op de Achterbeen stelln! — Man wat berechtigt uns, vun anner de Initiative to verwachten, de wi nich opbringt?! Uns warrt de Demokratie nahmen — is dat wat Ringers as Materielles? Un de Justiz! Mutt de Justiz nich hanneln? Is doch ehr Plicht! — Woso? Wat hebbt wi för Plichten in en Demokratie?

Op en versunken Denkmaal in Hamborg-Harborg stunn "Nichts kann auf Dauer außer uns selbst gegen das Unrecht sich erheben." Lang nich is en Satz so wohr west.


28.4.15 ...Dat Mammut in de Wahnstuuv

De sprickwöörtliche Elefant in de Wahnstuuv is dat grote, apensichtliche Thema, dat so heikel is, dat nüms dorvun snacken mag. Un wenn ik nich ganz biester gah, hebbt wi in Düütschland opstunns en utwussen Mammut in uns' nationale Wahnstuuv stahn. Orr villicht en Tyrannosaurus Rex.

De USA spioneert över den BND de düütsche Industrie ut. Dat is strafbor. De Bundsregeern hett dat siet 2008 wüsst. De BND hett mehrmalen bi't Kanzleramt anfraagt, wat se maken schallt. Dat Kanzleramt hett seggt: nix. Maakt wieder.

För mi as juristischen Laien is dat Landsverraat. Dör de Regeern sülven. Dör Lü, de sworen hebbt, Schaden vun't düütsche Volk aftowennen. (Un wat is uns Volk anners as uns Weerschap?)

Wat müss nu passeern? Opheven vun Immunitäten, Strafverfolgen, Trüchtreden — ja! — vun de Kanzlersche. De USA bi't Utspioneern vun uns Weerschap to decken is en heel gode Grund. Se mutt dat wüsst hebben — orr se harr dat weten müsst. Beid is nich to entschülligen. Wenn se dat wissentlich daan hett, kann se dorför vör Gericht kamen.

Ik kann Merkel good lieden. As Physikersche schull se weten, dat Gesetten un Regeln gellt — ahn Ansehn vun Personen. De Regeln gellt ok för de USA — un ok för Merkel. Mutt se wirklich eerst lüttje Kinner lebennig freten, ehrdat de Lü ehr kritiseert? Kinner freten, dat warrt se wiss nich doon. Dat deit ja nich mal Putin, dat Monster. Man de Tyrannosaurus Rex, de in uns Wahnstuuv steiht, de deit dat.


22.4.15 ...Reddt de Fruuns!

Seenoot. Bööt. Denkt Se sik maal. Woans weer dat noch: Wokeen kümmt toeerst in de Reddungsbööt?

Genau, Fruuns un Kinner.

Op't Middelmeer kentert dagdääglich Reddungsbööt — slimm noog, mutt unbedingt foorts afstellt warrn. Man wokeen sitt dor binn?

Starke junge Mannslüüd.

In't verleden Johr kemen na Italien per Boot 125790 Mannslüüd, 18200 Fruuns un ca. 26000 Kinner (mehrs Jungs). De mehrsten Mannsminschen sünd twüschen 18 un 35 Johr oolt.

Dor löppt wat scheef in de Herkunftslänner vun düsse "Boat People". Wenn de Noot un Gefohr dor so groot is, dat de starken jungen Mannslüüd dat nich mehr uthollen köönt, sünd doch de Olen, Fruuns un Kinner dor wiss al dood?

Natüürlich nich. Se blievt na. Se sammelt dusende Euros in för de Jungs ehr Reis. Spoort sik dat vun'n Mund af. Dorwegen much ik ok dat Woort "Flüchtlinge" nich för düsse Minschen bruken. De starken jungen Mannslüüd sünd klassische Utwannerers. Se schallt Brückenköpp billen in de Länner, 'neem se henwüllt, üm villicht mal de Familie natohalen. Orr eenfach üm wat to verdenen. 1 Millioon dorvun steiht angeevlich an Libyens Küsten in de Startlöcker. Se söcht en Tokumst.

Dorgegen is nix to seggen. Amerika woor so vun Europäers innahmen: Junge Mannslüüd, klassische Utwannerers, tröcken toeerst dor hen. Fruuns kemen later. De groten Passagierscheep bröchen denn al ganze Sippen. So süht armootsdreven Migration ut, keen Flucht. Jürnjakob Swehn & Co. weern ja Armoots-Migranten. Hunnertdusende stunnen hier an de Küsten praat, wieldat se in Europa keen Tokumst för sik sehgen. — Ik arbeit vun Beroop mit towannern Minschen hüüt. Bi de, de ut de Flüchtlingsscheep kaamt, sünd villicht 10% Fruuns. Alltohoop süht dat al beter ut, hier kannst op Siet 22 in twee Tabelln de intressanten Fakten nalesen. Ut Pakistan, 'neem Fruuns dwangsverheiraadt un unsääglich brutal ünnerdrückt warrt, kaamt 90% Mannslüüd; ut Somalia un Eritrea, 'neem Deerns dör Klitoris-Amputationen bedrauht sünd un Fruuns dör Islamistenmilizen verfolgt warrt, kaamt 75% Mannslüüd. Richtige Familien, also fifty-fifty-Verdeelen, kaamt ut Russland un de Balkanstaaten (de Roma-Familien). Ut Syrien kaamt gröttstendeels Familienvadders, de ehr Familien nahalen wüllt, wieldat se de Bootstuur as to gefährlich för de Fruuns un Kinner anseht.

Familienvadders schulln ehr Familien so gau as mööglich herkriegen! Dat is grausam, wat de liedt. De Behörden stellt sik dor ganz ignorant an. Man för de ledigen Jungs gellt: Sorry, Lüüd: Fruuns un Kinner toeerst in de Reddungsbööt! Nich bloots vun juun Siet, de Siet vun de Utwannerers un Flüchtlinge, is dat logisch, sünnern ok vun uns Siet. Wi hebbt in Düütschland en Geboortenrate vun 1,4 Kinner per Fru. Wenn wi uns Bevölkern stabil hollen wüllt, bruukt wi keen Testosteron-Tsunami in't Middelmeer vun junge vagabundeern Mannslüüd vull Gier na Erfolg un Leven; de kriggt keen Kinner. Wi bruukt regelte Inwannern vun Fruuns: Fruuns, de bedächtig den Schritt in en nieges Land doot un denn nich gau opgeevt; de solide Bildung mitbringt orr opnehmt, de Familien opbuut, ordentliche Strukturen schafft — un de keen Glücksridders sünd. Fruuns ut Afrika, Nahoost, ut all Länner sünd willkamen.


30.3.15 ...Jupiter un Oss

En Land drauht sik to spalten, Börgerkrieg drauht. Dat groot Naverland, dat dat nich gefallt, treckt in'n Krieg, schickt Panzers för de Partei, de ehr toseggt, un bombt mit ehr Luftwaff op allens, ok op Flüchtlingslager. Is dat völkerrechtlich okay?

Anter:

Ukraine/Russland: Nee, nienich!

Jemen/Saudi-Arabien: Ja klor!

Folgen:

Ukraine/Russland: Schandaal! Sanktionen! Nato-Manöver! Meist Weltkrieg!

Jemen/Saudi-Arabien: Opmünnern Schullerkloppen, mehr Wapenlevern, Loff vun alle Sieden.

"Quod licet Jovi non licet bovi", sään de olen Römers: Wat Jupiter tosteiht, dröff de Oss noch lang nich.

Is beter, op de Welt nich de Oss to ween. Wi sünd de Goden, is ja klor, un de Saudis sünd uns Frünnen, un uns Frünnen sünd lupenreine Demokraten — ok wenn dat en fundamentalistisches Terrorregime is. Uns is nix schaneerlich.


29.3.15 ...Düwel kontra Beelzebub

Dat mit den "IS", dat nimmt ja nu langsam Formen an. Jümmer mehr Rebetten erobert se, un dor warrt de Scharia inföhrt, drakonische Körperstrafen, Fruuns rechtlos, Kopp af usw. Nu terfallt de Jemen, un kann ween, de Verrückten faat dor ok Foot (mall noog sünd se dor ja al). Nee, nich in uns Vörgoorn!, meent de Saudis un wüllt nu en Ingrieptrupp opstelln "gegen Extremisten". Saudi Arabien! Gegen Extremisten! Jungedi, wat för Extremisten mööt dat woll ween! Na, wenn se welk faatkriegt, weet wi op jeden Fall, wat ehr vun de saudische Justiz drauht: drakonische Körperstrafen, Kopp af usw. Tja, wenn een diktatorische Gottesstaat den annern bekriegt, is nich ganz kloor, wokeen dor de Extremist ween schall. Wohrschienlich jümmers de annere. Un dat Verbreken is jümmers, wat de annere deit. De güllen Regel! Hach, nu is doch wedder allens kloor. Ok wenn jüst de Düwel den Beelzebub utdrieven will. För uns Düütsche warrt dat Ünnerscheiden sogor noch lichter: Een vun de twee diktatorischen Gottesstaaten is ja uns gode Fründ un Verbündte, de uns för veel Geld Wapen afköfft. Also sünd dat de Goden!


18.2.15 ...De Greken sett den Hebel an

Schall ik nu de greekschen Euromünzen sammeln? Kann ja ween, dat de bald Raritäten warrt — orr tominnst Kuriositäten. Un brickt denn de Eurozone utenanner? Ach wat! Uns Gemeenschap is so stark, wi brekt nich utenanner — wi brekt tosamen!


6.2.15 ...Hach ja, de Wahlkampf...


Alleen gegen de Mafia

In Hamborg is ja opneegst Wahl, un de Hamborgers köönt tovöör unfriewillig wieswarrn, wat professionelle PR is. Anners ween as de annern! Sik afsetten! Profil wiesen! Unverwesselbor ween! Dat is dat Motto. De Möchtegern-Politikers laat sik dorbi vun echte Profis beraden. Dat Ergeevnis süht denn so ut:

Dat is't! Dat afsolute Alleenstellungsmerkmal! Endlich hett een erkannt, wat dat Volk will! Denn all anner Politikers un Parteien verlangt ja in ehr Programme: "JA to mehr Kriminalität! Un Kinner schallt Friewild ween!" Man nich mit em! Düt is Superman. Een Mann gegen alle. Un togliek tolerant — denn he is nich gegen Kriminalität an sik, bloots gegen mehr dorvun. Wohrschienlich is he gegen de ganze towannerte butenländsche Kriminalität. Uns egen Kriminalität, de dat al gifft, is okay för em. De traditionelle, inheimsche Kriminalität, de höört quasi to uns, de wüllt wi nich missen. Düütsche Inbrekers: Ja! Man rumänische Banden? Nee!

Dat eenzige, wat sien Erfolg nu noch bedrauhn kunn, weer een, de plakateert: "JA to schöön Weder! NEE to Tähnwehdaag!" Ohauahauaha, denn warrt dat knapp. So is de Politik! ———— Politik?! Is dat Politik...?


4.2.15 ...Wasch mi den Pelz...

...avers maak mi nich natt. Wokeen anners kann dat henkriegen as de CSU? Düsse geniale Partei hett wedder mal en salomonischen Standpunkt funnen: Se is för den Mindstlohn, avers gegen Kuntrullen. Dat is de Lösung! Woso sünd wi dor nich ehrder op kamen? So kannst doch för allens ween, wat "politisch korrekt" is! T.B. för Tempolimits — ahn Kuntrull. För en Fruunsquote vun 70% bi DAX-Vörstänn — ahn Kuntrull. För Unweltschuul — ahn Kuntrull. Gegen Waffenhandel — ahn Kuntrull. För hoge Stüern — ahn Finanzamt. Nee, dat is nich friewillig; de Stüer is Gesett. Wi kuntrulleert dat bloots nich. Nüms kuntrulleert dat. Garanteert. — Ik kann mi eentlich kuum en Gesett vörstelln, dat de CSU geern scharp kuntrulleern laten wöör. Doch, ja: wenn dat gegen Butenlänners geiht. (Orr gegen Putin, natüürlich.) Avers dat is doch ok de Lösung för den Maut-Striet: De CSU wull partu de Maut för Butenlänners op düütsche Straten, de CDU wull nich so recht mitdoon. Nu weet wi, wat kamen mutt: Maut för Butenlänners foorts un överall, en Maut vun 20 Euro per Kilometer! Un för Putin dat Duppelte! En Sieg för de CSU op ganze Linie!

Bloots ahn Kuntrull.


25.1.15 ...Oppers, överall Oppers

En grote Wohldeder för de Minschheit weer ja de Minsch, de de "verletzten Geföhlen" utfunnen hett. Verletzte Geföhlen sünd dat grote "Ja, avers..." in uns Tied. Ja, avers de Muslime ehr Geföhlen woorn ja versehrt. Ja, avers Karikaturisten schulln sik trüchhollen. — So warrt de Intoleranz mit ehr blödige Raserie vun'n Deder to'n Opper maakt. Un opletzt gifft dat bloots noch unschüllige Oppers, un nüms mehr is en Deder, un de Welt is rosarood — denn se is politisch korrekt. Se is vull Oppers. De Terror hett ja doch nix mit'n Islam to doon!

Vun all Geföhlen, de verletzt warrn köönt, sünd religiöse Geföhlen de vigelienschsten. Rechtlich nich to faten, real nich natowiesen, extrem volatil un verännerlich, sünd se fix to Hand un köönt allens un dat Gegendeel rechtfardigen. Un dor wedder an'n schöönsten sünd de Religionen, de in dat Leven vun Drütte rinregeern wüllt. "Mien Religion befehlt, dat du..." — so fangt dat an, un mit mien religiösen Geföhlen bestimm ik denn, wat ji all lesen dröfft un woans ji leven schallt. Hallo: Religion berechtigt to nix. Du dröffst ehr privaat utöven. Ahn Drütte to belästigen. Dat is allns. Dat Doon un Laten vun dien Mitminschen geiht dien Religion nix an!

Ok "Pegida" driggt ja eentlich nich veel mehr as ehr verletzten Geföhlen to Markt. Religiös sünd de nich, man national un dormit sowat Ähnlichs. De globaliseerte Welt maakt ehr bang; se wüllt geern de wohlsorteerte, översichtliche Welt vun Anno Tobak wedderhebben. Se hebbt bloots noch nich den richtigen Opper-Gestus, de Traan in't Knooplock, den vörwurfsvullen Hundeblick. Dor is noch to veel Hooligan dormang. Se mööt noch öven. Dorna kann ehr nüms mehr wat vörsmieten.

Ofschoonst — so Hooligans sünd eentlich doch ok bloots Oppers, wenn ehr Vereen verleert... Schalke is doch wirklich en Religion, nich?

Neegst Wekenenn is wedder Bundsliga.


11.1.15 ...Charlie, Rosa un de Minimaalkonsens

Nu fangt de grote Truurmarsch in Paris an, un wi sünd in Gedanken dorbi. — Sünd wi? Mennig Lü, de gegen düsse Attentate sünd, sünd wiss keen natürliche Frünnen vun "Charlie Hebdo". To aggressiv, to smacklos, meent mennig; un de "Pegida"-Fans, de nu ok all "Wi sünd Charlie!" roopt, hebbt mit anarchischen Humor ja nu rein gor nix an'n Hoot. Se hebbt to Autoritäten in Wohrheit desülvige Instelln as de Islamisten: Wokeen to geern an Autoritäten kratzt, is ehr suspekt; wokeen kuscht, is ehr lever. Man nüms hett geern Ballerie un Bomben in sien egen Stadt, dorwegen sünd natüürlich all gegen de Attentate. — De Muslime in Europa hebbt noch en anner Sorg: Se hollt sik ok för de Oppers. Woor nich ehr Gloov in Verroop bröcht? Kunn nu nich dat Misstruun gegen Muslime wassen? Warrt se etwa mit de Deders in een Pott smeten? Hallo, muslimische Frünnen: Is klaar, ji sünd keen Mörders. Ji sünd avers ok nich de Oppers. Dütmaal nich. Truurt nu mal üm annere, nich üm sik un juun Glovensmaten! Kaamt mal rut ut de Opperrull un klareert endlich, woso so vele vun de Deders ut juun Reegn kaamt!

Wokeen hüüt — binnerlich orr physisch — op en Truurmarsch geiht, schull sik schon överleggen, woso. Düsse Truur is unkomodig, stickelig, as dat Satiremagazin sülvst. Nich jedereen kann sik mit düsse scharpe Satire anfrünnen. Muttst ok nich. Nüms mutt "Charlie" ween; angrepen woorn in Charlie wi all, de wi frie denken wüllt. Mit Charlie woor ok Rosa Luxemburg angrepen, de ehr Doodsdag hüüt is. Se hett seggt: "Ik denk nich as du, man ik warr jümmers för kämpen, dat du dien Menen frie seggen kannst." Un dat köönt wi all vun enanner verlangen: Ik bün Charlie? Villicht. Ik bün Rosa? Jümmers!

Dat is de Minimaalkonsens. Dat langt, hüüt mittogahn. De gemeensame Startpunkt is de Place de la Republique — de weltliche, säkulare, överreligiöse, frieheitliche Rechtsstaat, in den wi all tohoop leevt.


9.1.2015 ...Lachen gegen den Terror!

De Islamisten, de in Paris en ganze Redakschoon afslacht hebbt, un all Fundamentalisten överall in de Welt, de hebbt eentlich bloots een Sorg, un de hebbt se gemeensam: Dat jichenswo jichenseen glücklich ween kunn. Dat köönt se nich af. Dat lett ehr keen Roh. Glück is sündhaftig! Gegen Sex hebbt se all wat, de Fundamentalisten. Un gegen Frieheit. Un de Taliban harrn ja ok wat gegen Musik. Gegen allns, wat glücklich maakt.

Avers besünners dat Lachen is ehr suspekt. Lachen geiht gor nich. Lachen is nich to kunnerleern. Lachen winnt över den Terror. Wokeen lacht, is frie, is souverän — un wenn't ok man bloots för een Ogenblick is. Düsse Ogenblick langt al, den Terror to överwinnen. Wokeen eenmaal lacht hett, de weet: De Terror is nich souverän. Un he warrt wedder lachen. Bet de ganze Terror weglacht ist. — Dorwegen förcht un hasst de Radikalen dat Lachen as de Pest. Dat is keen Tofall, dat de Terror en Satire-Magazin drapen hett.

Woso de so sünd, doröver kannst veel spikeleern. Wiss is, dat se sülven nich entspannt geneten un glücklich ween köönt. Na good — nüms dwingt se dorto. Man dat langt ehr nich; dat lett ehr ok keen Roh, wenn jichenswo noch anner Minschen lachen, geneten un glücklich ween köönt. Dor mööt se twüschengahn.

Muslime sünd normale Lüüd, de mehrsten sünd jüst so muslimisch as Christen christlich: Ehr geiht de Religioon so'n beten an'n Achtersteven vörbi. Muslime sünd ok nich Muslime, wieldat se sik dat utsöcht hebbt, sünnern ut densülvigen Grund, ut den de mehrsten Christen Christen sünd: Wieldat ehr Öllern Muslime orr Christen weern. Wieldat se dor rinboren sünd. So geiht dat uns all. Un wi all wüllt: lachen, geneten un glücklich ween. Un den annern na sien Fassong selig warrn laten. All wi Minschen, de so denkt, mööt tohoop stahn, egaal vun welk Religioon orr Kultur. De, de uns uteneenbringen wüllt, mööt wi ahn Tögern utlachen, ehr ehr egen Lächerlichkeit wiesen. Wenn se sik denn vör Woot in twee Stücken rieten doot as Rumpelstilzchen, köönt wi nix maken (doch: applaudeern). Wenn se sik avers besinnt, sünd se uns as Minschengeswister wedder willkamen.


25.12.14 ...Frohe Wiehnacht!

Bi en Wiehnachtskrüff sünner
Araber,
Afrikaners,
Juden un
Flüchtlinge

...blievt bloots noch Oss un Esel na.

Harr een ok düüdlich mehr Verstand
as de dree Wiesen vun Morgenland
un dach bi sik, nienich weer he
achter den Steern rümreist, as se;
liekveel, wenn nu de Wiehnachtsstünn
ehr Licht schient wunnig vör sik hin,
denn fallt ok op sien klook Gesicht
— he mag dat wieswarrn orr ok nich —
en fründlich Strahl
vun'n Wunnersteern vun dunntomaal.

Na Wilhelm Busch


6.12.14 ...Demokratie nu!

Thüringen hett en niegen Ministerpräsi. Een vun de Linken. De woor angeevlich sogoor wählt, avers wi all weet, dat kann nich ween. Echte Wahlen — Wahlen, de den Naam verdeent — bringt bloots Ergeevnissen, de in't Weltbild vun de westliche Weertegemeenschap passt! Anners sünd dat keen Wahlen, egaal, wat de in Thüringen, den Gaza-Striepen orr de Oost-Ukraine stattfindt. — Weer dat nu nich an de Tied, in Thüringen intomarscheern un jüm de Demokratie to bringen? Denn warrt ok sowat as Ramelow nich wedder vörkamen. Demokratie is ja, wenn de richtigen Lü wählt warrt.


15.11.14 ...Nullen, nix as Nullen

De "swatte Null" in'n Bundshuusholl woor gistern vun ehrsglieken verkünnt. De Staat maakt keen Schullen mehr! Eentlich okay. Man: Wi leevt in en Null-Tins-Tied. Uns Staat kann sik Geld leihn to null Perzent Tinsen! Fehlt nich veel, un se kriegt Geld dorto. Se kunnen also dör Schullenmaken rieker warrn! In so en Laag is dat Schuldenmaken ALTERNATIVLOS (hach, dat ik düt Woort mal bruken dröff!). Nochmaal: ALTERNATIVLOS. (Nimm dat, Angela Merkel!) Geller to solk Konditionen dröff en Politiker de Bevölkern nich vörenthollen. Wi kunnen all uns Scholen un all uns Infrastruktuur op Hoochglanz bringen un dorbi noch rieker warrn! De Banken un Anleggers geevt uns dat Geld dorto un küsst uns de Fööt, wenn wi dat nehmt. Man nee, utrekent nu höört de Staat mit Schullenmaken op! Is dat to faten? Sünnerlich is dat ALTERNATIVLOS, nu, jüst nu, de ganzen Staatsschullen vun fröher, de wi elk Johr mit hoge Perzentsätz vertinst, aftolösen un dör Nulltins-Schullen to ersetten. Dat spaart elk Johr Unsummen — 33 Milliarden tahlt wi düt Johr Tins för de Schulden, dat sünd gode 12% vun'n Bundshuusholl. Dat kunnen wi meist op Null fohren! Woso warrt dat nich maakt?! Dat Schäuble nich reken kann, schall mi nüms vertellen. Veel ehrder glööv ik, wenn de Banken un Anleggers dor nix an verdenen köönt, dennso verzicht uns Staat op so'n Geschäft. Dat kann he de Banken nich andoon. Denn de Politik is ja nich dorto dor, den Wohlstand vun't Volk to mehren. Sünnern vun ganz anner Lüüd. Un dat is för ehr alternativlos.


13.11.14 ...De niegen Sammlerstücke

Sammlers, weest op'n Kiwief! En afsolute Rarität kümmt op'n Markt: De "Islaamsche Staat" IS (fröher ISIS) will nu egen Guldmünzen prägen! De histoorsche Guld-Dinar schall wedderkamen. Klaar, dat dat nich för lang is. Dat heet: De Sammlerweert warrt dör de Deck gahn! Kurascheerte Händlers organiseert al Smuggelrouten dör de Türkei, passlich sünd dor de Kanäle, dör de al plünnerte Kunstwarken ut Syrien un den Irak na Europa kaamt. Helpt Se mit, den IS noch beten wat länger to finanzeern! De Guld-Dinar is de ideale Geldanlaag in en Tied vun Negativ-Tinsen. Allerdings is keen Kopp op afbildt — snaaksch, in Köpp ahn Lief sünd de IS ja Spezialisten. Man: Minschen afbillen un Münzen smieten (Kopp orr Tall! Glücksspeel!) is beid "unislamisch"! Solk unmoralische Saken deit de IS nich. Dor nehmt se dat nau. Köpp afslaan dorgegen — dat is ja verlöövt!


9.11.14 ...Mäh, mäh, mäh

Jedereen vun uns hett dat eentlich ahnt, dat mit Juncker bloots wedder en Buck to'n Goorner maakt woor, nich? Een, de sik mit Söötsnacken vunwegen Börgerinteressen un Konsolideern vun Staatsfinanzen vör de Lü stellt hett un den sien Opgaav dat weer, achterrücks de Intressen vun't Grootkapitaal dörtodrücken. Dorto woor he sachs ok an de Spitz vun de EU-Kommissioon stellt. Schiet, dat dat nu för all un een sichtbor woorn is. Nix anners hett Juncker in sien Tiet as Baas vun Luxemburg maakt. Nix anners will he nu maken. Woso schull he denn wat anners maken?! De ganze EU-Kommissioon is doch nich dor, dat se de Fackrebetten utfüllt, de ehr towiest sünd (Oettinger un Digitaalkommissaar...). Se sünd dor op't best as Pappkameraden, op't leegst as Bück in'n Goorn, de gegen dat allgemeene Interess warken schallt.

Na all minschlich Verstand is Juncker as EU-Kommissioonsbaas erledigt. Sien Reden sünd Lögen, op't best noch lerrig Bucksgesang: Mäh, mäh, mäh. He schull torüchtreden. Man dat wöör ja heten, dat een de EU-Kommissioon jichenswie eernst nehmen dä. Wokeen mutt denn nich allens trüchtreden...


5.11.14 ...Wi Sülvsternannten

Nu de Oost-Ukraine sowat Ähnlichs as Wahlen afhollen hett, höörst enerwegens dat Woort "sülvsternannt" as en Schimp. "Der selbsternannte Sprecher der selbsternannten Volksrepublik Donezk..." töönt de Narichtensprekers mit plichtschülligsten Ekel in't Mienenspeel. (Jaja, wi hebbt ja soooo frie Medien.) Dat gifft nix Minnachtigers, as "sülvsternannt" to ween. All Beteknen, de een sik sülvst gifft, sünd suspekt. All Ämter, de een sülvst schafft, ok. Bloots wokeen vun anner Lü beropen warrt, verdeent Respekt!

Man smiet wi maal en wat scharper Oog op all düsse Sülvsternannten. "De sülvsternannte Volksrepublik": Ja, na klor! Wiest Se mi een Staat, de sik nich sülvst sien Staatsfoorm wählt hett! De Bundsrepublik Düütschland is ja ok "de sülvsternannte Bundsrepublik Düütschland". Düütschland woor twoors noch vun de Alliierten verwalt, avers de Moders un Vadders vun't Grundgesett weern Düütsche un hebbt dat sülvst in de Hand nahmen. PFUI! Mutt een sik ja för schamen! Kunnen dat nich de Besatters maken? Denn kunnen wi dor stolt op ween.

Man nu kümmt de grote Ernüchtern: Ok de Besatters weern, deit mi leed, allens bloots "Sülvsternannte". De mächtigen USA sünd en sülvsternannte Republik; de ingelsche Kroon hett ehr dormalen, as se aftrünnig unafhängig woorn, nich ehrn Segen geven un seggt: "Du, mien ehemalige Kolonie, warrst vun nu af an en Republik heten!" Nee, dat hebbt de Separatisten, äh Rebellen, äh Frieheitskämpers in de USA dormalen ganz alleen seggt. Un ok Grootbritannien, o Schreck, is bloots en sülvsternannte konstitutionelle Monarchie! Neegto all Staaten kaamt so tostann!

Snaakscherwies sünd de mehrsten Lü sünnerlich stolt op, dat ehr Länner sik sülvst ernannt hebbt. As wenn dat nix Schändlichs weer?! De Schotten t.B. sünd nich sülvsternannt; se woorn mal erobert un dwangswies in't Vereente Königriek ingledert. Woso sünd se nich stolt dorop? Se sünd doch immerhin "frömdbestimmt"! Ok de Franken woorn maal na Bayern rindwungen, un staats stolt dorop to ween, nehmt se dat jümmer noch övel. Un ok mennig anner Völkerschaften weern, dat schient so, geern wat Sülvsternanntes. — De Schotten harrn annerletzt de Schangs, ok wat Sülvsternanntes to warrn. Se hebbt denn aver doch vun Afstand nahmen. Se hebbt sachs insehn, dat dat bloots de Proleten vun de Staaten sünd. Wokeen mag denn mit de Oostukraine in een Atentoog nöömt warrn?!

Dat meent Marlou, de sülvsternannte Webmeestersche vun Plattpartu.


15.10.14 ...De ISIS ünner de Gewerkschapen

Överall widdelt opstunns de Steert mit'n Hund. Lütte un lüttste Gruppen sett ehrn Willn dörch — in Nahoost jaagt de ISIS mit bloots dörtigdusend Mann de ganze Gegend endgültig to'n Düvel un marscheert nu op Bagdad; un in Düütschland schafft de Lokföhrergewerkschap GdL datsülvige: de Bahn steiht endgültig still. Nich mehr bloots vörlöpig. Dat is natüürlich de gröttere Leistung. De GdL hett avers ok veel mehr Lü as de ISIS: tachtundörtigdusend. Düsse Grupp is radikal un würklich gefährlich! Se leggt dat Land lahm, hebbt mit ehrn Streik de ganze bahnfohren Bevölkerung in Geiselhaft nahmen, dwingt ehr, sik in Lokföhreruniformen to versleiern, un marscheert nu op Berlin. — Tjaja, de GdL is even de ISIS ünner de Gewerkschapen.

Wennehr schickt Düütschland endlich Boddentruppen?!


15.10.14 ...Fruuns weg nu!

"Wi mööt de Weerschap nu entlasten, un dorwegen dröff dat nu keen Belasten so as de Fruunsquote geven." Seggt Ilse Aigner vun de CSU. Na klaar, Fru Aigner, Fruuns sünd en Belasten! Dorwegen geiht dat de Länner mit wenig Fruuns ja ok veel beter, so as China un Indien. De weet schon, woso se Deerns al in'n Moderliev afdrievt. De stöört doch bloots. Mit poor Millioonen Fruuns weniger marscheert sik dat veel lichter! Nich bloots för de Weerschap, ok för de Politik. Dor köönt Se wat gegen doon, Fru Aigner, un foorts trüchtreden! Insicht is ja bloots de eerste Schritt to'n Hanneln. Un dat kann gor nich fix noog gahn!


14.10.14 ...Fruunsquote nu!

Uns geiht dat miteens ja so slecht! De Weerschap wasst bloots noch üm 1,2 Perzent! En Afgrund deit sik op! Wi warrt hungern! In Panik verlangt de CSU, de Weerschap schull nu unbedingt vun de slimme Fruunsquote för Vörstänn verschont blieven. Düsse unsinnige Quote is en gresige Bedrauhn för unsen Wohlstand! Fruuns sünd en Gefohr för de Allgemeenheit, Fruuns richt allens togrunn, dat is doch bekannt! Wat schallt solk Chaotinnen in de Vörstänn?! De köönt doch nix! Siet Johren warrt allens Gode vun de Mannslüüd tostann bröcht, se sleept de Fruuns so mit dörch, ut reine Gnaad un Barmhartigkeit — dat weet wi doch all. Tominnst in ehr Vörstänn un mit ehr wohlverdeente Vörstandsgehälter schulln wi ehr in Roh laten! Sünst köönt se för nix garanteern. Mit de Fruuns — dat is dat Enn.

Leven Mannslüüd, ik geev ja to, betherto hebbt ji dat ganz alleen henkregen mit de Krise un allens. Man ji schulln sik ielen un ganz fix ganz vele Fruuns in de Vörstänn halen. Woso? Na, is doch klor: De Koor fohrt sachs bald vör de Wand. Dat hebbt ji henkregen, un dat weet ji ok sülven. Un denn — denn bruukt ji en Schülligen. En Sünnenbock. Nee, dat köönt ji nich sülven ween, ji sünd ja meistto gottähnliche Wesen. Dor bruukt ji denn — ja! Fruuns! Denn wenn dat so wiet is un ju juun Kraam üm de Ohren flüggt, denn hebbt ji tominnst en Utreed:

De Fruuns hebbt de Schuld!


12.10.14 ...Nich tokieken

De türksche Armee, de ehr Panzers nu op de Knülln nöördlich vun Kobane steiht un seelenruhig op de Stadt in't Daal kiekt, de türksche Armee also, seggt de türksche Regeern, "warrt nich tokieken, wenn Kobane de IS in den Hannen fallt." — Ach so. Se dreiht denn also eenfach de Panzers üm — un kiekt in de anner Richt.


6.10.14 ...De iArmy kümmt

De düütsche Industrie bringt keen gode Wapen mehr tostann, so'n Blamaag'! "Johrlange Verspäten", klaagt Uschi vdLeyen. Un dat Problem bi düsse Wapen is ja: Wenn dat endlich fertig is, is dat technisch al totaal överhaalt! Vun de Kosten wüllt wi mal nich snacken. In 100% vun all Bestellen hett sik de Pries verzigfacht, un in 100% vun all düsse Fäll sünd de Politikers dorvun totaal verblüfft.

Ik denk, wenn wi sowiso so veel Geld för dat unnütte Tüügs rutsmiet, denn kunnen wi ok glieks de Profis ranlaten: Apple! Wenn Apple uns' Wapen buun lett (in China natüürlich), denn kriegt wi för en Heidengeld jümmers dat Allerniegste un Allercoolste — in en supercool Design! Allens rechteckig mit runne Ecken! Mit Apple-Logo. Un wat för coole Naams dat hebben warrt: iBomb un iBomber! iCarrier un iTank! iShell, iDrone, iHawk un iCopter! Wenn de iTank 500 rutkümmt, warrt de Verteidigensministers sogor nachts anstahn... Sogoor de ISIS-Taliban warrt dor nich mit Raketen op scheten, wenn dat ehr angrippt — se wüllt nich, dat dat en Kratzer kriegt, se wüllt dat erobern un sülbst behollen un dat heimlich poleern un stolt op ween. — Un de coole Kriegspolitik, de wi denn kriegt, nöömt sik iStrategy. Un warrt vun iWarriors dörföhrt. Uschi vdLeyen is dorbi.

Ja, so fangt dat an. Man tüüscht sik nich! De Politik maakt uns sachte praat för en Militariseern, as dat noch keen geven hett. Allens, Alldag un Weerschap, Buten- un Binnenpolitik, warrt vun Krieg un Kriegsangst dördrungen ween. Se warrt uns en Oprüsten üm de Ohrn smieten, dat uns Höörn un Sehn vergeiht. Wi warrt dat betahlen möten — all dat Geld, dat in de gau verfallen unnütten gresigen Wapen geiht, mööt de Minschen erarbeiten, dat warrt ut uns rutquetscht. Wi warrt de ganze Tokumst dorför oppern — Scholen, Straten, Rentners, Kinner, allens. "De Terror" warrt de grote Baal, den de, de em förchten doot, Minschenoppers bringt.


3.10.14 ...Natürlich snacken

Dag vun de düütsche Eenheit is't, juchhei!, un Düütschland warrt jümmer eeniger. Nich bloots de Bayern snackt nu Platt, as wi ja al en Tied weet; nee, dat lett, as keem de ganze Republik to Verstand un füng an, Platt to snacken. Ganz natürlich.

Hier sünd de Lüüd noch en poor Anglizismen ünnerlopen, sünnerlich de "back-drive" (klingt so'n beten as "Trüchwartsgang" op Ingelsch); man de Richt stimmt. Kloor gegen Anglizismen in't Platt nimmt düt Plakaat Stellung:

An dat Platt mööt wi noch beten arbeiten, avers ok hier warrt de Saak vun de rechte Siet anpackt. "Babybel" klingt beten as de Stadt in't Ole Testament, woneem bi den groten Toornbuu de Spraken dör'nannerkemen. De babybelische Spraakverwirrn. Düsse Spraak Babybel wüllt wi also beter nich snacken. Dat Motto för 2015 is ganz kloor: "Snack nich jichenswat — snack Platt!"


25.9.14 ...Düütsche Wapen döögt nix, hurra!

Nich bloots de Kurden kriegt schimmelige Wapen, ok uns egen Bundswehr träneert mit Schrott. De Heevschruvers un Transportfleegtüüch fleegt nich, de Panzers rost un klappert... Un dat is wohrschienlich al siet Johren so! — Wat för en schöne Welt!

Leider fallt dat nu op. De schönen Tieden sünd vörbi, as de Wapen noch rosten kunnen, ahn dat dat opfull. Se warrt nu bruukt. Nieges Tüüchs mutt her, Metall mutt ut de Eer reten un to Panzers, Raketen un Fleegtüüch maakt warrn, unbedingt! Is wedder Krieg op de Eer. Nee, Krieg weer alltied hier; avers nu is Krieg, bi den de Düütschen persöönlich mitmaken wüllt. Nich mehr bloots träneern. Und ich begehre, nicht schuld daran zu sein...

Un nu mööt wi uns also in't Tüüchs leggen un niege Wapen buun? Ja? — Ji Idioten!!! Leggt sik lever in't Tüüchs un sorgt dorför, dat in de Welt keen düütsche Wapen mehr nödig sünd! Gor keen Wapen! Dat se in Freden rosten köönt!

Ik segg Se, wi all warrt noch mit Lengen an de Tied torüchdenken, as de Bundswehr mit Schrott utrüst weer un nüms dat mark. Wieldat dat egaal weer, wat de Kampfheevschruver nu flegen kunn orr nich. Dat weer en schöne Tied.

Ik heff nu al Heimweh dorna.

Wi sünd alltohoop irre.


12.9.14 ...Fröhlich Fragmenteern

Tja, nu geiht dat in'n Endspurt för de Schotten! Mal kieken, wat sik de Laden terleggt. De Konzerne warrt jümmer grötter; de Staaten, de de Apentlichkeit un all Lü tohöört, warrt jümmer lütter, un dat is ja ok richtig so: "Er muss wachsen, ich aber muss abnehmen" (Joh. 3, 30). Enkelte Lüttstaaten meent, dat se sik beter verköpen köönt. Mehrst hebbt de Konzerne de Staaten ja sowiso al köfft. Nu terleggt sik also Grootbritannien, un mit Belgien, Südtirol, Korsika, Katalonien, Baskenland, Bayern usw. staht noch stückerwat intressante Kandidaten praat. Sünners tööv ik ja op, dat sik de Schwiez terleggt, mit ehr veer orr mehr Spraken beedt sik dat doch an. Jugoslawien hett uns ja wiest, wat för en Spitakel dat ween kann ok bi de lüttsten Bruchstücken. Villicht föhrt de denn ok Krieg gegenanner — de Walliser gegen de Tessiner orr so. Weer doch kaptaal. Orr welk warrt ganz foortschrittlich un privatiseert den Staat. Geiht dat?


8.9.14 ...De Wapentafel kümmt!

Kiek, wat is unsereen as Laie doch dösig! Dor heff ik doch annerletzt dacht, de Wapen, de wi levert, de schulln man so'n Verfallsdatum kriegen. Un wat is? De Wapen hebbt al en Verfallsdatum! Un dat is bald fällig. Dorwegen kriegt de Kurden de nu ok schenkt — so warrt wi den Kraam los un seht noch nobel dorbi ut. Ganz twei is de Kraam ja nich — dat rummst noch.

Düt Prinzip hett de Bunnswehr nich erfunnen — Uschi vun de Leyen hett dat vun de ganz kaptaale Hamborger Tafel afkoppert. Uschi will ja ganze de Bunnswehr mehr so familienfründlich un sozial ümbuun. Un se will noch mehr doon! Liekso as de povern Minschen in Hamborg un anner Grootstäder sik nich leisten köönt, in'n Supermarkt to gahn, un dorwegen na de Hamborger Tafel gaht — liekso gifft dat arme Länner in Afrika un annerwegens, de sik de Wapen, de se bruukt, nich köpen köönt! Ja, denk mal! So arm! De mööt na Wapen bedeln as povere Lüüd na Eten. Gifft Länner, de schickt elk Week mal 'n LKW bi Krauss-Maffei vörbi un fraagt, wat nich för ehr wat över is. Noch ärmere mööt containern gahn un de Wapen opsammeln, de rieke Länner eenfach wegsmiet, schoonst se noch ganz good sünd. Ja, so arm sünd welk Länner wirklich! Un wi smiet dat weg! Dor schulln wi Rieken uns schamen!

Man uns Uschi, de hett en Hart för de Povern. Se will nu en "Wapentafel" grünnen. All Wapen, de twoors aflopen sünd orr en lütte Buul hebbt, so dat de nüms mehr köpen will, de avers sünst noch ganz good sünd — all de will se sammeln un an de povern Länner utgeven, de sik dat in'n Laden nich köpen köönt. Uschi denkt an de armen Länner in Afrika. Uschi will den Hunger in de Welt stilln — den Hunger na Wapen. Wo veel Godes köönt düsse Wapen noch doon! Wo veel Leven kann mit düsse Wapen noch vernicht warrn! Denkt Se an de Freud in arme Länner, an de glänzen Kinnerogen, wenn mit de Wapen —— ach, denkt Se eenfach: Schrot för de Welt!


4.9.14 ...Wokeen will den Krieg?

Geev dat Putin nich, müsst em erfinnen. Jüst dat passeert graad. Wi, de Westen, maakt uns den Fiend, den wi — ut jichenswelk Grünnen — hebben wüllt. Dorto löögt wi orr löögt ok ganz driest nich mehr. Wi beschuppst, wi verännert merrn in't Speel de Regeln. Bloots dat dat scheefgeiht! Bloots dat dat Krieg gifft. Krieg schall dat geven.

Wokeen will den Krieg? "Cui bono?", "Wokeen nütt dat?", is de ole Kriminalistenfraag. Mi fallt jedeen Dag niege Antern in, een verrückter as de anner, wenn nich dat Ganze so ungloovhaftig weer. Is dat de Fracking-Lobby, de dat russsche Gas afdreihn will, dat se endlich an'n Drücker kümmt? Is dat de Rüstungsindustrie? Wokeen warrt amenn Geld dormit verdenen?

Eendoon, uns westliche Eliten wüllt apensichtlich en Krieg. Se sünd denn je alle hoochkriminell. Dat heet, wokeen den Freden will, kann nu bloots noch höpen op de Insicht, de Sachtmödigkeit un den Anstand vun... (Trummelwirbel, Tusch:) Wladimir Putin. — Na Prost Mahltied. Da köönt wi uns aver grateleern.


27.8.14 ...De Terminator-Knoop

Na prima, "de Westen" hett dat henkregen, mit allens un jeden op den Globus verdweer to liggen un togliek allens un jeden to'n Fründ to bruken. Wenn wi hüüt Wapen jichenswohen levert, denn weet wi nich, wat sik de morgen nich gegen uns richt (orr gegen een vun de potentiellen Fienden, de denn jüst uns Fründ is). Bi de Wapenlevern an de Kurden hett de Bundsregeern nu gewaltig Buukgrimmen. Wenn ISIS erledigt is, kunnen sik desülvigen Wapen miteens gegen de Türkei richten... Dor helpt bloots eens: Wapen mit Afloopdatum! Liekso as de Joghurt in't Köhlschapp schulln Wapen nich endlos hollen. Man bloots, seggt wi mal, en dreeveerdel Johr. Denn warrt automatisch de Sülvstterstörensmechanismus aktiv. Dat gifft dat bi Konsumgeräte un Koorn al lang. Dat bi Wapen intobuun is duppelt nütt, denn dat beleevt ok den Hannel: Is de ole Wumme "aflopen", mutt de Kunde en niege Wumme köpen! Natüürlich bi uns, in Düütschland.

Noch beter as en Afloopdatum weer dat, wenn de Sülvstterstörensmechanismus vun buten per Funkbefehl utlööst warrn kunn. Wokeen de Feernbedenung hett, bestimmt, wo lang de Wapen hollt. Un de Feernbedenung behollt natüürlich wi (orr wi geevt se an de USA). De Kurden t.B. köönt so lange mit ehr düütsche Wapen ballern, solange se op de ISIS-Typen scheet. Sünd de besiegt — orr kriegt de verkehrten Lü de Wapen in de Finger —, denn lööst Angela Merkel per Knoopdruck ut Berlin den Sülvstterstörensmechanismus ut, un puff! is de Kraam perdü. De Türkei hett nix to beförchten.

So en Terminator-Knoop schulln se denn ok in all de Hüüs inbuun, de se nu (villicht) in Gaza wedder opbuut. Un in all de Autos, de na Gaza rindröfft. De Feernbedenung dorför liggt natürlich in Israel. Denn kunn Israel den neegsten Gaza-Kreeg ganz komodig per Knoop föhren: All de Hüüs un Autos köönt se denn enkelt wedder in de Luft jagen. Sogor ahn Drohne! Veel wat anners, as Gaza in Schutt to leggen, is so en Gazakreeg doch nich. Dat weer so noch billiger to hebben. — Denkt Se mal över na!


20.8.14 ...Satire över Satire

Wi all weet, wa schaneerlich dat is, wenn de Kollegen un Frünnen di mal wedder för recht in'n April schickt hebbt. O nee! Woans kunn ik dat glöven?! Bün ik dösig?! So fraagt wi uns denn.

Düsse Pienlichkeit will Facebook sien Brukers nu ersporen. Artikel, de nich eernst to nehmen sünd, warrt dör en Henwies [Satire] glieks to Anfang kenntekent. De Vördelen liegt op de Hand: Wa faken fraagt wi uns doch hüüt, "kann dat wohr ween?!" Realität un Irrsinn sünd nich mehr to ünnerscheiden. Nich, wenn dat nich dorbisteiht. Natüürlich kannst fragen, woso schulln wi denn noch weten wulln, wat wat is? Weer't nich veel schöner, wenn wi glöven kunnen, dat ganze Ukraine-Slamassel weer bloots utdacht, bloots Satire? Klimawannel weer Science Fiction? Nahoost en Gruselmärken? — Is düt [Satire]-Kennteken nich hart un ahn Barmen? Besünners, wenn dat fehlt?

Dor schulln wi kreativ torüchslaan. Dat Satire-Kennteken kann bloots Satire ween! Vör dat Kennteken mutt en Kennteken stahn! Man nich bloots dorvör. Markeert Se allens, wat nüms eernst nehmen kann, as Satire — den ganzen Irrsinn! Wenn opneegst wedder vun Freden orr Gerechtigkeit snackt warrt orr keen Waffen in Krisenrebetten un allens dat: Satire! Orr wenn Obama jichenswat seggt, egaal wat. Satire! Merkel ok. Man bloots se seggt ja nienich nixnich. Ok dat is Satire. Denn wenn de Produzenten vun Narichten jüstso dösig sünd as de Konsumenten un de Journalisten, is allens Satire.

Orr nix.


13.8.14 ...Wenn twee datsülvige doot...

...is dat nich datsülvige. To'n Bispill denn nich, wenn de een, seggt wi mal: Russe is.

As Bispill nehmt Se etwa düssen söten lütten Welpen.

Düt is sien Broder. He is Russe.

Waaa! En Höllenhund, nich? Wi nöömt sowat ok keen Hund, sünnern en angeevlichen Hund. Wi sünd vermoden, dat dat in Wohrheit en Katt is orr en Kalaschnikow. Orr en Raketenwerfer. Em is allens tototruun! Best weer dat, wenn Se nu al gehörig Bang föhlen dään. Wenn Se so richtig bang warrt, knipst Se nämlich Ehrn restlichen Bregen vör Panik ut; un dat wüllt wi jüst. Opneegst, wenn de Welt ünnergeiht, schall nämlich Putin de ganze Schuld kriegen. Un dor köönt wi Lü, de noch kloor denken köönt, nich bruken. — Naaa? De Russen-Welpe is doch gresig, nich?

Wat denn, Se sünd nich bang? Se meent jümmers noch, dat is en söte lütte Welpe? Seht Se nich düt? Ofschoonst wi doch allens doot, dat Se dat seht?

Ssssooo! Dat seht Se also nich. Hm. Sünd Se etwa keen Demokrat? Sünd Se amenn en Putinversteher? Dor mööt wi avers de NSA mal op henwiesen, dat de bi Se en beten nauer henkiekt, wat un mit wokeen Se so kommunizeert. Wi nöömt sowat as Se en angeevlichen Demokraten. In Wohrheit kann dor allens Möögliche ünner borgen ween. Wunnert Se sik nich, wenn Se af nu Probleme kriegt!

Ach, nu is Se bang tomoot? Se föhlt sik verschüchtert? So, as sik de Dissidenten un Demokraten in Russland föhlt? Hebbt wi dat doch wüsst! Se sünd en Russen-Sympathisant, en Putinversteher!

——— Hach, is dat allens nostalgisch! Heff ik mi annerletzt noch an den 1.Weltkrieg erinnert föhlt, so denk ik nu faken an den Kolen Krieg. Kennt Se noch den goden Sprook ut de 1970er Johr? Wenn du dor nich mit inverstahn büst, as dat hier löppt... "...dann geh doch nach drüben!" — Wi sünd wohraftig wedder in de Gode Ole Tied. Un jüst so dumm as dormalen.


1.8.14 ...Newspeak

In Orwells "1984" hett dat Regime vun'n Groten Broder ("Big Brother") niege Spraakregeln verhängt, dat so nöömte "Niegsnack", in't Oginaal "Newspeak". Bi uns is dat nu ok so wiet. De Medien sünd op Linie bröcht — nich bloots in Nahoost, ok bi uns.

De israeelsche Armee föhrt Krieg mit de Hamas. Jüst weern se dorbi, de Hamas ehr Tunnels tweitomaken. Dorbi hebbt Hamas-Kämpers en israeelschen Suldaten faatkregen. Normaal heet sowat ja in'n Krieg "Gefangennahme", un de Fungene is en Kriegsgefangene. Dat is keen Verbreken. Bloots wenn he en Israeli is, heet dat "Entführung" un de Fungene woor "entführt". As weer he Zivilist. Un dat is en Verbreken. Israeelsche Suldaten dröffst nich fangen nehmen!

Wi hebbt nix gegen Juden. Welk vun uns sünd Juden. Wi hebbt wat gegen Verbrekers un Kriegsdrievers. Bloots nich, wenn se Israelis sünd. Denn denn sünd dat ja keen Verbrekers. Sünnern wi sünd denn Antisemiten.

Jungejunge, wenn Spraak un Wirklichkeit jümmer wieder uteneen driften doot, steiht an't Enn de Wahnsinn, nich? Oh pardon, düt is sachs en Gedankenverbreken, un de Grote Broder schickt mi bald en Drohne vörbi? Man wiss is opletzt doch Putin schuld. Egaal woans. — Kiek, nu kann dat keen Gedankenverbreken mehr ween, denn wenn Putin de Schuld kriggt, dröffst allens seggen!


30.7.14 ...Nix to lachen

De Stellvertreder vun Witzfigur Erdogan in de Türkei will wohraftig, dat Fruuns nich mehr öffentlich lachen schallt. Dat is ja nu nich even licht, wenn een vun so en Lachnummer regeert warrt. Op de anner Siet deit de Regeern ja, wat se kann, dat nüms in de Türkei mehr veel to lachen hett. Man bi de Fruuns is dat sachs jümmers noch to veel. Wi dröfft spannt ween, wat nu kümmt.

Dat gifft al to veel Gliekberechtigen, meent düsse Vörsintflutlichen. Fruuns schallt verschaamt de Ogen senken, wenn en Mann ehr ankiekt. Verschaamt för wat? Hebbt se wat verbraken? Ach ja, se sünd Fruuns. Schuld noog. Pienlich noog.

Man stellt sik mal vör, en mächtige Fru wöör de Männer apentlich Vörschriften maken un feddern, dat all Mannslüüd düt un dat nich to doon hebbt! Dor lacht wi doch sachs alle, nich? Unglöövsch lacht wi, ahn Bang. Is nich vörtostelln. Man dat en Mann dat mit Fruuns deit, maakt uns beten mulmig. Worüm wohl? — Gliekberechtigen is dat noch lang nich.


25.7.14 ...Ünnerscheed maken!

Hamas nimmt de Zivilbevölkern as Geisel. Se stellt de vör ehr Raketenrampen. Minschliche Schutzschilde. En Kriegsverbreken. — Israel nimmt de Juden in de Welt as Geisel. Se stellt de vör ehr Angreep, indem dat se dat Jüüdsche an sik in Ansprook nehmt för allens, wat se doot. De "jüüdsche Staat" nimmt dormit alle Juden in Haftung — för Kriegsverbreken.

Laat Israel düssen Etikettenswinnel nich dörgahn! Maakt Ünnerscheden! Steilt sik gegen den Antisemitismus! Nüms kann in den Naam vun en ganze Ethnie orr Religioon hanneln, egaal, wat he dat seggt. Dat hebbt al mennig versöökt, un jümmers weern dat Verbrekers op de Söök na en Legitimation.

Düt is keen jüüdsche Krieg, sünnern en israeelsche. Laat uns jüüdsche Mitbörgers in Roh un schuult ehr vör antisemitische Pöbeleen. Se sünd ok Oppers — de Staat Israel missbruukt ehr un ehr Religioon, spannt ehr vör sien Koor — minschliche Schutzschilde.


24.7.14 ...Twee Maat

En antisemitisches Klischee (denn all Vörurdelen över Juden sünd in'n Karn antisemitisch) seggt, dat Juden plietscher sünd as anner Ethnien. De israeelsche Regeern wiest opstunns, dat ok düt Vörurdeel afsurd is. Sachs wüllt se jüst düt Vörurdeel entkräften; so dösig, as se hannelt, kann dat keen annern Grund hebben. — De Wettloop twüschen de jüüdsche un de araavsche Bevölkerung vun de dore Gegend warrt nich nu un nich mit Waffen utdragen, sünnern över Dekaden un in den Uterus vun de Fruunslüüd dor! Alleen de araavsche Bevölkerung Israels kriggt so veel Kinner, dor köönt un wüllt de jüüdschen Israelis gor nich gegenangebären. Düssen demografischen Wettloop kann de jüüdsche Staat also nich winnen. Se warrt tallenmäßig erdrückt, un wenn se denn noch so wiedermaakt as nu, geiht dat ahn en Völkermoorden nich af — op een orr op beid Sieden... Se mööt Freden maken un de araavschen Lü en gerecht bemeten egen Staat togestahn, bloots denn hebbt se en Tokumst.

Staats dat loopt se Amok gegen de Realität. Un de Rest vun de Welt? "All animals are equal, but some animals are more equal than others..." Israelis wüllt un mööt as en normales Volk behannelt warrn, ahn Ansehn vun de Person. Ok dat Bevörtogen vun een Ethnie is Rassismus! Jedeen Sünnerrecht för en Volk kann bavento sik amenn gegen ehr wennen, as wi jüst seht an dat gefährliche Opflammen vun Antisemitismus överall. Völker, Regeern un Minschen mööt alleen na ehr Hanneln beurdeelt warrn. Jeedeen Argument, dat op Afstammen orr Ethnie gründt, is kraftlos. De ethnische Koort sticht nich. Israelis seht dat ok so.

Putin wüllt se nu de Football-WM 2018 wegnehmen, wieldat ut Russland de Waffen kemen, mit de villicht (dat is nich seker) de malaysische Zivilmaschine afschaten woor. Bewiesen mutt een dor nix. Dat weer ja dormalen mit Saddam Hussein liekso. "Mien Gedüür mit Saddam", sä de jüngere Bush bloots, "geiht nu langsam toenn!" — Jungedi, Putin deit mi meist leed. Ut Düütschland kaamt ok en ganzen Barg Waffen! Köönt se uns etwa nadräglich den WM-Sieg aferkennen...? Gifft dat Weerschapssanktionen gegen Düütschland? Dröfft wi etwa keen Autos mehr exporteern...?

Katar behöllt sien WM sachs noch. Allerdings stütt de ja de Hamas... Ach ja, un de Aldi-Arven brukt sachs keen Arvschaftsstüür betahlen. Dull, nich?

"All animals are equal..."


23.7.14 ...Twee Kriege

De ukrainschen Separatisten wüllt sik gegen de Kampffleegtüüch vun de ukrainsche Armee wehren, de ehr angriept. Ut Versehn starvt dorbi 300 Zivilisten. — En Terrorakt! Dat Maat is vull! Endgültig!
De israelsche Armee will sik gegen de Raketen ut Gaza wehren, de op ehr fleegt (also gegen de 10%, de dörkaamt; 90% fangt ehr Afwehrsystem af.). Ut Versehn starvt dorbi 600 Zivilisten. — Hm, wi mööt mal överleggen, wat wi ehr nich biddt, en beten över "Mäßigung" natodenken... 300 Dode weern ja okay...

De Separatisten behinnert de westlichen Bergungskräft, se laat ehr nich an de Unfallsteed. De Doden vergammelt! — En Kriegsverbreken! Unerhört!
Israel lett keen Hölpstransporten un nixnich in den Gaza-Striep. De Versehrten starvt! — Och, snackt wi nich mehr dorvun.

Wokeen levert de Separatisten de Waffen? — Russland! Putin hett Schuld! Düsse Höllenhund! Unerhört! Dat mutt foorts ophöörn!
Wokeen levert Israel de Waffen? — Ääähhh... wi. Düütschland, de USA, all. — Israel hett doch dat Recht op Sülvstverdedigen! Och, snackt wi nich mehr dorvun.

"All animals are equal, but some animals are more equal than others." (George Orwell, "Animal Farm")


6.7.14 ...Kannst nienich weten!

De USA behannelt vörsorglich all annern Länner as Fienden un spioneert ehr ut. Kannst ja nienich weten! Welk sünd ja wirklich Fienden; un de Rest — also wenn de dat rutkriegt, woans se behannelt warrt, denn warrt se foorts ok ganz füünsch. Fienden even. Womit de Spionaasch denn ja gerechtfardigt weer. Un batz sünd de USA alleen in en Welt vun Fienden. Misstruun is en sülvsterfüllen Prophezeihn! Wokeen argdenkern noog is, behöllt ok Recht. Un warrt denn noch ärger denken. En Spirale in'n Afgrund.

Sowat deist nich ut Dummheit alleen, dor höört wat anners to, wenn een sik sülven so beschädigt. De sowat deit, is op en Aart verrückt.

Man veel vernünftiger sünd wi hier nich, un dat schull uns bang maken. Dat Ämter- un Staatsversagen bi uns is kolossal. Nüms deit wat gegen de Angreep op uns Rechte. Dat schient meist, keen vun uns Staatsdeners nimmt ehr Opgaav eernst, Merkel inclusive. Dat is ja unbequem, dor muttst di ja mit Mächtigere anleggen — also, nee, dat is to veel verlangt. En ganzen Barg vun de Typen weer heilfroh, wenn düsse Saak vergeten warrt un in Footballbesapenheit ünnergeiht. Üm en Land, dat mit düsse Mentalität regeert warrt, steiht dat ok nich good. — Ach ja, de Bundspräsident hett seggt, em gefallt dat nich. Jungedi, nu beevt de Eer!

À propos Football: Wenn wi Holland in't Endspeel kriegt, denn möt wi ja doch Weltmeester warrn — wat anners is eenfach undenkbor Also, ik distanzeer mi (in'n fiensten Politikersnack) vun mien Prognose, dat wi dat nich schafft. Argentinien dröff gegen uns winnen, avers nich Holland! :-)))


12.6.14 ...Blatter blifft

In't brasiliaansche Sankt Pauli (dor heet dat São Paulo) kickt se nu al. De WM is dor, un Blatter warrt wi ok nich los. He kandideert noch maal, seggt he — un dat langt, denn den Sieg kann he sik ja köpen, un wenn he dat kann, denn deit he dat ok. Dor kennt he nix. Wenn Se gegen düsse Tostänn wat doon wüllt, köönt Se hier anfangen. Man dat Best weer doch, wenn de naschonalen Footballverbänn, so as de DFB, eenfach ut de Fifa uttreden wöörn — un en niegen Verband grünnen, de sauber to Wark geiht — un en groot Stück bescheidener. Wenn eenfach de Footballverbänn vun de europääschen Länner (orr glieks de ganze UEFA) ut de Fifa uttriddt, is dat mit de Fifa fix toenn. Un wenn nich, ok egaal! Woso schall dat nich mehr as een Weltfootballverband geven, un mehr as een WM? Bi't Boxen geiht dat ja ok, dat gifft en Handvull grote Verbänn un en Handvull Weltmeesters... Denn kunn Blatter ruhig blieven. Man denn wöör he nich mehr wulln — dat lohnt sik denn nich mehr


30.5.14 ...Wohrschuug! WM kümmt!

De Sünn schient, de Sommer kümmt, de Vadderdags-Helden slaapt ehrn Dunas ut, un wenn se opwaakt, is WM! Is de Welt nich schöön? Is se nich en eenzig Droom?

Wohrschuug, leven Lüüd! Wenn dat Volk dröömt, maakt uns och so plichtbewusste Volksvertreders achter uns Rügg Saken, de wi nich merken schallt. Dor kannst de Klock na stelln. Erinnert Se sik noch an dat Meldegesett, dat 2012 merrn bi dat EM-Halvfinale Düütschland gegen Italien dördrückt woor? De Lobbyfrünnen harrn dor rinschreven, dat de Meldeämter uns' Daten an Adresshändlers verschachern dröfft. Nüms harr oppasst, poor footballresistente Neesen in'n Bundsdag stimmen af — fertig. —— Vunwegen den Oprohr achterna müss dat denn twoors wedder kasseert warrn, man de Testloop harr klappt.

Dat kann wedder passeern. Un hüüt steiht wat veel Gefährlichers vör de Döör as bloots dat Meldegesett: TTIP. — De WM in Rio is en ideale Tarnung. De Lü sünd in'n Rausch, achterrücks warrt poor Ünnerschriften ünner Verdrääg sett; un glöövt man nich, dat de USA dor wedder wat vun ut de Kralln geevt, bloots wieldat wi opwaakt un Oprohr maakt, as dormalen 2012. "Sorry, man dat geiht nich", warrt wi höörn. — Un wenn dat nich dat verdüvelte Friehannelsafkamen is, warrt dat wat anners Unpopuläres ween. Leven Lü, blievt af un to mal'n beten waak!! Un blangenbi:

Düütschland warrt sowiso nich Weltmeester!


29.5.14 ...Dat Multifunkschoons-Plakat

Nadem nu de Europa-"Wahlkampf" vörbi is un Angela Merkel (as verwacht woor) seggt, dat Wahlergeevnis is egaal, ik bestimm —— dor seggt de Lü doch wedder, de ganze Wahlkapf weer en Löög un de Wahlverspreken Bedrug. Tüünkraam! Nienich weer en Wahlkampf wohrhaftiger as de vun de CDU! Woso, meent Se denn, hett de CDU Merkel plakateert, de gor nich to Wahl stunn? Richtig, wieldat Merkel amenn bestimmt! Un nich dat Parlament orr süsswokeen. De CDU-Wahlkampagne hett vun Anfang an de Wohrheit seggt! — Nadem de Show vörbi is, köönt wi ja de genialen Wahlplakaten wiesen.

Dat Original:

Düsse Variante heff ik an mennig Steden sehn, hier knipst in Hamborg-Horn:

Ok sehn heff ik düsse Varianten (hier nabuut, ik kunn nich alle knipsen):

Veer Wohrheiten in een Plakat! Dor schall nochmaal een vun Wahlbedrug snacken!!


30.4.14 ...Könen köst!

Weet Se, dat Se mit den Pries för elkeen Computer un anner Reedschap (Drucker, Scanner...) en Andeel an de VG Wort betahlt? Dat is de Andeel för de Roofkopien, de Se vun Copyright-schuulte Texte maakt. Wat denn, Se maakt gor keen? Pah, egaal. Se kunnen ja welk maken. Se hebbt ja de Reedschapen dorför. Se sünd nich bloots verdächtig, Se sünd al mitschüllig. Nich bloots dat Doon, al dat Könen köst.

Nu köönt Se seggen, dat weer en Unding, Roofkopien weern ja verbaden, Se weern en rechtschapen Börgersch un bruukt Ehrn PC bloots legal, nüms kunn Se wat nawiesen, in Düütschland gell de Unschuldsvermoden, un dat weer en Ümkehr vun'e Bewieslast. Is allns egaal. Se betahlt al, wenn Se en Reedschap köfft.

Nu will de VG Woort avers ok noch nadrääglich Geld för PCs hebben, de vör 2008 verköfft woorn — un se hebbt dat dormit bet na'n Bundsgerichtshoff schafft. Se wüllt dat dütmaal nich vun Se un mi, sünnern vun de PC-Herstellers. Na, wenn se dormit dörkaamt, denn warrt sachs bald de Wapen-Herstellers för Moord verhaft! Se hebbt ja de Reedschapen dorför herstellt. Orr, as dormalen de "taz" schreev: Wi beandraagt Kinnergeld! Kinner hebbt wi twoors keen — avers de Reedschapen dorför.


28.4.14 ...Düütschland schafft sik af

Dat hett twoors de unsägliche Sarrazin seggt, man dat stimmt liekers. Wenn ok nich so, as Sarrazin dat meent. De düütschen Staatsorgane sorgt dorför, dat se bald gor nich mehr bruukt warrt — se schafft sik af. Un dormit uns Demokratie. Nich bloots dat Volk, ok de wählten Gremien schallt bald nix mehr to seggen hebben. Op TTIP heff ik hier ja al henwiest; datsülvige warrt nu ok för Deenstleistungen bedreven — un in de EU maakt al de Lobbies de Regeln. Elk vun düsse Vörhebben mutt'n sik op de Tung tergahn laten. Un wisslich is dat noch nich allens. Dat Praktische an Geheimverhanneln is ja: Wenn de Lü to weten kriegt, wat los is, un protesteern wüllt, denn is allens al fix un fertig ünnerschreven! Protest nütt nix mehr!

Nu is dat ja en eklatante Brook vun Amtseide un Gesetten dör uns Amtsdrägers. Dat is ehr avers egaal, denn Recht un Gesett schafft se ja ok af. De sowat as TTIP un TISA uthannelt, sünd in Wohrheit Putschisten, de en Diktatur vun de Konzerne an de Macht putschen wüllt. Dorbi kann bloots gellen:

Demokratie is Apentlichkeit.
Folglich sünd Ergeevnisse vun Geheimverhanneln
un geheime Verdrääg null un nichtig.

All düsse Afkamen sünd also gegenstandslos, wieldat se ahn uns, den Souverän, tostann kaamt. Wi warrt ehr nienich akzepteern un entslaten Wedderstand leisten.

Den Demokratiezirkus in Berlin kunnen sik de Lobbyisten blangenbi ok sporen un de Masken fallnlaten. De Kulisse kost doch bloots Geld. — Naja, Stüürgeld. Se laat even uns betahlen.


25.4.14 ...De Ukraine-"Krise"

Wat is dor eentlich los mit de Ukraine? Hebbt Se dat verstahn? Woso dreiht uns Politik un de Staatsmedien kollektiv dörch, warrt reinweg hysterisch? Dat mutt doch en Grund hebben. Nee, also pardon, wat dor jüst in de Ukraine aflöppt, is nich de Grund, dat is de Folg vun dat Dördreihn. Dat weer allens nich so ut de Reeg lopen, wenn de Westen un Moskau dat nich tosamen so hoochjuxt un de Ukrainers verrückt maakt harrn. Wenn de Westen nich Geld in de Maidan-Revolution pumpt harr un Russland nich de ethnischen Russen oprüsten dä. Beid, Russland un de West, sliekert rümmer as fuuchen Katten mit oppluustert Steerten. Man dat Ganze is apensichtlich künstlich un üm nix!

Stickt dor wat achter? Siet Weken versöök ik dat to begriepen. Mi sünd dree Vörslääg in'n Sinn kamen, wat dor wirklich los ween kann. Hier sünd se — sorteert na afnehmen Harmlosigkeit:

  1. Living History orr Histotainment. To Ehren vun'n 1. Weltkrieg, de vör 100 Johr losgüng, wüllt uns Politikers uns wiesen, wat een allens verkehrt maken kann un woans een dat henkriggt, so'n Weltkrieg in Gang to setten. Se hebbt wörpelt, mit welk Land se anfangt, un dat dreep de Ukraine. Wenn de Politik verrückt speelt, geiht so'n Krieg ja mit jeed Land — un mit jeed Grund. Ok hüüt. Op düsse Gefohr wulln se uns henwiesen. Na'n Stoot, jüst wenn de Welt ganz mulmig warrn warrt, roopt se alltohoop "April, April!" un warrt wedder normal. — En sympathische Idee, man sünd uns Politikers so geschichtsbewusst...?
  2. In de Ukraine is en niege un totaal weertvulle Rohstoff opfunnen warrn. Dat Tüüchs mutt in de Oost-Ukraine liggen, süss weern de USA nich so achter her, dat de Gegend dor nich an Putin fallt. — Düsse Verklaarn hett dat Plus, dat se begründt, woso dat utrekent de Ukraine is un woso de Weerschap stillhöllt. Man ik denk, dor müss meddewiel wat dörsickert ween, wat dat för'n Stoff is.
  3. De ganze Saak is künstlich un schall vun noch wat veel Wichtigers aflenken. Vun wat? Dor fallt mi spontaan TTIP in. De Weltapentlichkeit schall vör luter "Huch!" un "Oha!" nich mehr weten, wat süss noch achter de Kulissen löppt, un batz!, is de Ukraine-"Krise" miteens vörbi, un wenn wi uns ümkiekt, is jüst denn TTIP ünnerschreven woorn. Denn bruukt ja nüms mehr de Ukraine-Krise, un wi warrt all vun de Konzerne verslaavt. — Düsse Verschoon is de ekligste un togliek de realistischste, meen ik. Dat dat de Ukraine drapen hett, is in düsse Utdüden twoors wedder Tofall, avers woso de Weerschap stillhöllt, warrt klaar.

Jaja, ik weet. Fröher harr ik dat ok nich dacht. Fröher sä ik jümmers: "Söch nich na anner Grünnen, wenn Dummheit as Grund langt! Denn dat is denn ok Dummheit. Mehr nich. Narms stickt wat achter, un Dummheit gifft't noog." — Dat is anners woorn, un dat is mi ok schaneerlich: Jümmer mehr un mehr laat ik Verswörungstheorien in mien Bregen, holl ehr för mööglich. Dat demödigt mi ok. Verswörungstheoretikers sünd ja so dösige Dörknallte. Man wokeen kann dat noch seggen siet NSA un Snowden? Un in de Ukraine-"Krise" kann dat doch nich bloots Dummheit ween, orr?! Wenn doch —— denn weer dat en hunnertperzentiges History Reenactment vun'n 1. Weltkrieg. Un en ganz unfriewillige Lehrstunn.


19.4.14 ...De Süüd lehrt wieder

Dor is bi mi doch en Mail intrudelt, de ik Se nich ünnerslaan much: In Bayern gifft dat nu en Aart Hollfast för Exil-Plattdüütsche. Dat hett sik tominnst de Bookhannel Wort.Schatz vörnahmen. De sitt in Gräfelfing (klingt süüdlich noog in mien Ohren). Se wüllt plattdüütsche Snackrunnen un ok Spraakkursen anbeden för Noordlichter, de de tonehmen Beroopsmobilität na Süüd verslaan hett. Recht so! Sünnerlich Spraakkursen för de Inheimschen sünd bitter nödig, denn bet dat de Lü ünner den Wittwust-Äquator dat richtig lehrt un sik mit de towannerten plattdüütschen Fachkräfte ünnerholen köönt, vergeiht sachts noch veel Tied — siet 2008 hett sik dor nix verbetert. Man villicht kümmt dat ja nu vunwegen de kurascheerten Pioniere vun Gräfelfing, un bald snackt de Süüd wirklich!

So snackt de Süüd!


15.4.14 ...Dat warrt drang op de Eer

Stellt sik mal vör, vundaag wöör en niege Planet liek as de Eer entdeckt, direktemang blangenan, nich veel wieder as de Maan, licht hintokamen also, un ganz orr meist unbewahnt. Also sowat, as dat de "Niege Welt" Amerika vör poorhunnert Johr weer. Wat, meent Se, wöör passeern? — Ja, dat meen ik ok. De Bewahners vun den Planeten weern in Nullkommanix utrott un de Planet utplünnert. De Begleitmusik weer natüürlich en anduernde Snack vun Humanität un Nachhaltigkeit. Dat höört vundaag dorto. Man liekers weer de "niege Welt" rummsbatz ünner de Starken un Stärksten opdeelt, natüürlich mit Gewalt, un bet op de Knaken afnaagt, liekso as uns Eer.

De Minschen hebbt sik nich ännert. Man dat gifft keen niegen Planeten. Se söökt twoors intensiv na Büüt in't All, man dat is noch deepe Tokunftsmusik. Also warrt nu de Kampf üm de Büüt op düssen uns lütten blagen Planeten utdragen, de in letzte Tied bannig vull woorn is un överall ut de Nähte platzt. Un de Büüt is uns Natuur, de Ressourcen, de Tokumst — un Se un ik.

Dat geiht nich lustig ut. De Politik is man bloots en Randfiguur, de Demokratie speelt gor keen Rull. Bispillhaftig sühst dat an dat unsäägliche TTIP, dat de Sülvstbestimmen vun de Minschen för alle Tied afschaffen will. Allens, wat dat togegen steiht, is Terrorismus, un Terrorismus is hüüt dat, wat in't Middelöller de Ketzerei weer: dat Enn vun alle Diskussioon. Wokeen Fragen stellt, warrt glieks mit verbrennt.

Ik denk, dat dat noch ganz ungemütlich warrt op düssen Planeten. Man wenn noch een opduukt, ännert dat rein nix. Wenn wi uns nich ännert.


9.4.14 ...Hermann Gröh un de swatte Null

De niege Sundheitsminister Hermann Gröh (ik weet, he heet Gröhe, man ik kann nich anners, ik mutt em op Plattdüütsch schrieven) deit wat för de "swatte Null" vun Finanzminister Schäuble, he spoort! He will de ganzen överflödigen Sükenhuusbetten afschaffen. Bloots 77% dorvun warrt netto würklich bruukt! De Rest steiht eenfach so rüm, lerrig! Un dor hett he ja Recht. Effizienz steigern! Dat gifft noch veele Flacken, 'neem dat anseggt is. Lerrige Bürorüüm t.B., de kannst all afschaffen, de Buwarken afrieten, hier in Hamborg gifft dat noch veel dorvun. Bi Wahnruum hebbt se't dorgegen binah schafft: Allns, wat dor is, is ok beleggt. Man wat is mit de Straten? Wenn ik mi de so ankiek, fohrt op hööchstens 30% dorvun wirklich Autos! Dortwüschen is luter frie Ruum. Den kunnst doch prima insporen! De Straten kunnen smaller, weniger orr eenfach kötter warrn — bet dat överall so utsüht as in'n Stau vör'n Elvtunnel. Auto an Auto. Keen lerrige Straat mehr. Dat is effizientes Stratennütten, so mutt dat ween! Man jümmers noch seh ik Spoorpotenschaal. Bi mennig Autos sünd ca. 75% von de Sittplätz nich beleggt. Lerrig! Fohrt dor eenfach so rüm! Insporen! Afschaffen! Bloots 1 Platz per Auto langt! Un denn warrt dat effizient kondenseert — t.B. op de Grött vun en Bus!

Wat een laaven mutt: De Politik geiht mit lüchen Bispill vöran. Vun'n Bundsdag warrt apensichtlich hööchstens 25% bruukt, un mehr sünd ok nienich bi en Sitten orr en Debatte to sehn. De Rest spoort sik dat. Vörbildlich! Man wenn ik mi denn de Politikers enkelt ankieken do, denn geiht de Spoorsamkeit reinweg mit mi dörch. Dor kannst noch veel doon. Hermann Gröh to'n Bispill. Arbeidt he mehr as 77% vun sien Tied? Woso nich? Wo veel Perzent vun Hermann Gröh bruukt wi wirklich? Kunnen wi den Rest nich insporen...? Denn wöör Schäubles "swatte Null" fix noch swatter warrn. Orr noch nulliger. Swatte Nullen seh ik dor ja överall.


13.3.14 ...De Weerschap, uns Redder?

Jaja, nüms will en Krieg üm de Krim, keen hitten un keen kolen, ok keen endlosen Sanktioonskrieg, man uns Butenpolitikers sünd apensichtlich so kumplette Idioten, dat dor en starke Knööv gegenstüern mutt, wenn't nich doch so kamen schall. Un dor höp ik ja jümmers noch ganz nüchtern op uns Weerschap. Wat de nich will, passeert nich. Mal ehrlich: Dat gifft doch bi uns keen anner Interessen mehr as Weerschapsinteressen. Bloots noch Geld tellt. De Politik arbeidt sowiso restlos för de Weerschap. Dat sühst ok an dat unsäägliche TTIP. Ideen, Ideologien, för de sik de Staat un de Börgers in't Tüüch leggt, de gifft dat gor nich mehr — afsiets vun de Weerschap. "Wat kann ik mi daför köpen?" is de eerste un letzte Fraag bi allens. Ok bi Se un mi.

Ja, bi Putin is dat noch anners. Naschoon, Sowjetnostalgie, all so'n Tüüchs, dat in Mark un Penn nix inbringt — dat tellt liekers bi Putin, un de Russen sünd kumpabel, ehr Armee för sowat marscheern to laten. Dat sünd reinweg vörkapitalistische Verhältnisse. Keen westliche Regeern wöör dat infalln; de wöör dor ok glieks vun ehr Chefs — de Weerschap — to Ordnung ropen. "Pfui! Aus! Sitz!"

Un jüst op dat höp ik in Saken Krim. Klaar, de Westen wull de Ukraine geern ünner sien neoliberalen Fittiche hebben; avers en Krieg is en to hoge Pries, so hebbt se nich kalkuleert. De Börsenkurse (de elkeen TV-Narichtensendung ehrn Kommentaar ut dat "Off" afgeevt as de eenzige, obszöne Bilanz vun all de Narichten) wiest en düüdliche Richt: de Weerschap stimmt af över de Politik. Düsse Aart Afstimmen is sachs liekso völkerrechtswidrig as de Volksafstimmen op de Krim, man nüms waagt dor wat gegen to seggen. Wenn also nix anners mehr hölpt — op mi höört ja sowiso nüms —, schall doch bitte de Weerschap Merkel un Co. toropen: "Stopp! Kusch!" De reine Gewinnsucht kann even ok tofällig mal vernünftig ween un de kapitalistische Koor, de ehr Marionetten in'n Dreck fohrt hebbt, wedder rutrieten.

Putin wöör so'n Oligarchen, de em op de Fingers kloppt, denn fix verhaften laten. Man wi sünd ja ziviliseert, wi sünd ja en Rechtsstaat, Merkel mutt also kuschen. Hach, de westliche Demokratie is Russland doch wiet vörbi!


7.3.14 ...Afstimmen laten? So nich!

Op de Krim wüllt se nu en Volksafstimmen maken, wat mit de Krim passeern schall, un dat geiht ja nu gor nich!!! Besetten, naja, dat dröfft de Russen de Krim, denn köönt wi ja jümmers seggen: Süh, wi hebbt dat doch wüsst, wat dat för imperialistische Halunken sünd! Denn de Inmarsch op de Krim verstött ja gegen dat Völkerrecht, un dat dröfft de Russen nich. Dat dröfft bloots wi, de frie Westen, denn wi sünd ja de Goden. Wenn anner Länner dat ok maakt, weet wi glieks, dat dat de Bösen sünd. Dor hebbt wi ja dat Völkerrecht för. "Wenn", as Konstantin Wecker schrifft, "die Vereinigten Staaten von Amerika sich das Recht herausgenommen hätten, in welchem Land auch immer das Militär zum Schutz amerikanischer Bürger einzusetzen", denn weer dat totaal okay. Un mit Drohnen dröfft wi sowiso in anner Länner rümballern. Wenn Putin dat deit, is he en gefährliche Despot, dat hebbt wi ja jümmers wüsst. — Avers so en Afstimmen is noch veel slimmer, dor kunn ja de Wohrheit bi rutkamen... Dorwegen seggt wi nu mal al vörweg, dat wi dat op keen Fall anerkennen wüllt. Volksafstimmen erkennt wi sowiso bloots an, wenn bi rutkümmt, wat uns passt. "Wokeen stoppt Putin?", roopt de Medien nu unisono in Panik. As wenn Putin mit sien klapprige Armee nu een na'n annern de Staaten vun Europa oprulln un hier inmarschiern wull. Amenn gifft dat hier ok noch överall Volksafstimmen?! To Hülp! Wat drauht denn uns Demokratie?

Ik denk, Volksafstimmen warrt opneegst vun't Völkerrecht ächtet. Dat heet, denn dröfft bloots noch wi, de Goden, welk dörföhrn — wenn't uns passt.

Wat weer noch los? Ach ja, in China gifft't nu keen Deefstahl mehr. Denn Deven arbeidt ja bloots, wenn "de Luft rein is". Un in China is de Luft nich mehr rein, nee, se is to'n Snieden dick. Se mööt dor al de Sünn per Filmleinwand överdragen. — Un Erdogan vun de Törkei will nu Facebook un YouTube verbeden laten, angeevlich wieldat de spioneern doot. Na dat is doch mal de richtige Anter op de NSA! Eentlich müss een doch dat ganze Internet afschaffen, wieldat de NSA överall spioneert! Eerst denn sünd wi seker! Woso passeert dat nich bi uns? Sünnern bloots in de Törkei, 'neem se Erdogan an't Been pinkelt hebbt?


7.2.14 ...Wat denkt de denn?!

Nu weet wi doch tominnst Bescheed: Gerhard Schröder finnt dat richtig, dat de komplette Datenverkehr vun de eenfachen Lüüd afhöört warrt. He hett dat so utdrückt: "Dat Handy vun'n Bundskanzler aftohöörn, dat geiht to wied!" Betonen op "dat". Also: Allens annere is okay. — Manninnetünn, wi, de eenfachen Lü, sünd sien Chef! He weer uns betahlte Angestellte! Wat denkt de Mann, wokeen he is?! — Oh, laat na, ik weet dat al.

De UN mahnt den Vatikan vunwegen sienen Ümgang mit Missbruuk un Schwule un so. De Vatikan windt sik. Nanu?! Verkehrte Welt? In fröher Tieden weer dat Mahnen den Vatikan sien Saak; de harr sik nich bloots jedwede Kritik verbeden, sünnern de Kritikers mit Höll, Acht un Bann drauht. Wat denkt de UN, wokeen se sünd?!

Alice Schwarzer behöllt endgüllig Recht: Fruuns sünd liek (so unehrlich un bedreegersch) as Mannslüüd. En Uterus maakt keen Ünnerscheed! Wat denkt denn de Lüüd, de nu mit'n Finger op ehr wiest? Bloots dat harr se doch jümmers bewiesen wüllt!

Jüst nu warrt de olympschen Winterspelen fierlich losmaakt. Dorbi is dat allens ungüllig: Dat olympsche Füür is nich echt! Dat is nich mehr dat Originaal-Füür ut Grekenland! Neegto hunnertmaal is de Fackel utgahn op ehrn afsurden Parcours dör Russland un ümto — un woor elkmaal mit'n ordinäres Füürtüüg wedder ansteken! Dat is en ganz schnödes Allerweltsfüür, wat dor brennt — un all Rekorde un Medaillen sünd ungüllig! Göttervadder Zeus hett nich ünnerschreven. Wat denkt de Lü denn, wat se sünd?!


25.1.14 ...Eerst Putsch, denn Pazifismus

O je, nu mööt se sik ielen. Merkel is de längste Tied Kanzlersch west! Uschi von der Leyen, de "Kronprinzessin", will nich de Prinz Charles vun Merkels Gnaden warrn. Se will nich ewig töven. Nu is se Kriegsministersch! Wat heet dat? De Militärputsch, mit den Uschi ehr Truppen na Berlin föhrt, kümmt nu bald! Un woso bald? Na, wieldat de Bundswehr vunwegen de ganzen Fruuns jümmer lascher warrt. Seggt de Mannslüüd. Un Uschi hett sik ja explizit vörnahmen, dat noch duller to maken: familienfründlich schall de Truppe warrn! Ganz klaar, denn döcht se bald nich mehr för Krieg un Putsch. Wenn de ganzen Suldaten tosamen mit ehr swangere Fruuns in Geburtsvörbereitungskursen gaht un Hecheln öövt. Wenn ut de Armee en Sülvsterfahrungsgruppe warrt. Dat weet Uschi so good as jede anner. (Eentlich is se nämli en Iesenfretersch, de Fru is ganz vun Stahl un wöör ok en Krieg mit ehr anwussen Lächeln dörstahn.) Also warrt dat bald kamen: De letzte funkschoonsfähige Einheit (allens Mannslüüd) rückt in Berlin vör un besett a) den Rieksdag, b) de Radio- un Kiekschappstaschoonen, c) dat Internet. Woans se dat maken schallt, weet se noch nich so nau, man vundaag is dat ja en wichtiges Medium un mutt also innahmen warrn — "Neuland" intonehmen, dor verstaht sik Armeen doch op! Dorna sett se sik all eerstmaal in'n Gespreekskrink dal un snackt över ehr Geföhlen. (Ja, ok de Mannslüüd sünd al vun den weichlichen Sozio-Schiet ansteken!) Welk seggt ok, dat harrn se nich maken schullt. Anner wüllt dat nu utdiskereern. Uschi, de meddewiel egenhännig Merkel ut't Kanzleramt smeten hett, maakt ut de "grote Waschmaschien" (as dat Kanzleramt nöömt warrt) en Familienbegegnenssteed. Mit so'n weekspöölte Bundswehr kann dat nich lang goodgahn, de Klock tickt! Militärputsch nu — orr nienich! De ganze Saak mit dat fruunshaftige Regiment is ja doch bloots eens:

Wehrkraftzersetzung!


18.1.14 ..."Wi kriegt nix"

Dat sä een vun de Lü, de mit de US-Amerikaners vunwegen dat "No-Spy"-Afkamen "verhanneln", also bedeln gahn schulln. En Afkamen köönt se sachts kriegen, un kannst ok en schöne Överschrift "No Spy!" op setten, man dor warrt bloots in stahn: "Allns blifft, as dat is, un wenn uns dat passt, warrt dat noch slechter." De USA wüllt apensichtlich de digitale Welt heel un deel ünner ehr Kuntrull bringen, Politik, Weerschap, Infrastruktur, Militär, överall in de Welt. Okay. Ik mutt seggen, ik heff sogor en gewissen sportlichen Respekt dorvör, wa wied se dat al bröcht hebbt. Al siet Johrn snackt de Intellektuellen vun, dat dat mit de Weltmacht USA bargdal geiht, un süh, ganz stiekum hebbt de sik de Welt vun morgen — de digitale Welt — ünnern Nagel reten. Un dor gaht se nich mehr vun af. Kannst verstahn bi en Land, dat sowiso jümmers Bang vör allens hett un sik dorwegen bet an de Tähn bewaffnet. Man denn, meen ik, schulln wi nu ok mal beten Sport drieven un t.B. de Spionaasch-Zentrale (alias US-Bottschap) in Berlin offline nehmen.

Dat geiht. Dat Ding steiht ja in Berlin. Se hebbt Senders op't Dack? Wi köönt Störsenders üm dat ganze Dings opbuun. Nootfalls en Faraday'schen Käfig. Nix kümmt dör, keen Handy, de köönt dor nich mal mehr Radio höörn. Kabel? Fein, buten dat exterritoriale Gelänn zappt wi all Kabel na de Bottschap an un höört allens af. Wat verslötelt is, laat wi nich dör. "Ut Sekerheitsgrünn!" Analoge Kommunikaschoon? Breven fangt wi af un leest ehr, dor köönt de Ex-Stasi-Experten wedder ran. "Wi kriegt nix!", warrt de Bottschapslüüd ropen. Ja, nix, wat de düütsche Regeern nich kennt. Sowat mutt nich böösaardig maakt warrn, wi — all Länner — kunnen to Demonstraschoonszwecke för t.B. twee Weken all US-Bottschapen, -Konsulate, -Firmenzentraaln so offline nehmen. Un Obama denn en fründlichen Breef schrieven, leve Obi, so föhlt wi uns ünner dien Ägide, hartlich, Angela (un all anner Regeernschefs ünnerschrievt ok). Sik offiziell över to besweren — warrt de US dorto sachs de Chuzpe hebben?

Wi warrt dat nienich weten. Denn uns Regeern hett dorto nich de Eier. Man villicht is dat ja ok al so wied, villicht is uns Hard- un Software al so deep NSA-verseucht, dat de USA uns to Wraak in't ganze Land dat Internet un de Telefone afschalten köönt. De Strom- un Waterwarken un de U-Bahnen. De Geldautomaten, de Supermarktkassen un de Postsorteerautomaten. Allns, wat över Software un Netten stüürt is. Överall in de Welt. Dat is jüst dat, wo se hen wüllt. Glücklich, wokeen denn en lütten Buurnhoff hett mit en Grundwaterbrunnen un Sülvstversorger is. Henry Morgenthau hett dat so good mit uns meent!


8.1.14 ...Flexibel

Ah ja, de Football-WM 2022 in Katar schall nu — vunwegen de Hitten — doch nich 2022 stattfinnen, sünnern in'n Winter, t.B. 2021/2022 orr ok mehr so 2023. Schall avers liekers wieder "WM 2022 in Katar" heten. Dor weer dat doch veel praktischer, de "WM 2022 in Katar" eenfach nich in Katar stattfinnen to laten, sünnern t.B. in Japan, de Törkei orr in Düütschland. Kann ja liekers wieder "WM 2022 in Katar" heten. Wenn wi tiedlich flexibel sünd, woso denn nich ok rüümlich? De "Rallye Dakar" warrt ja meddewiel ok in Südamerika fohrt — un heet liekers noch "Rallye Dakar"! Wat Dakar kann, dat kann Katar al lang. Wenn wi den Ort, dat Ersatz-"Katar", richtig wählt, kann dat ok 2022 stattfinnen. In Sommer. — En bestechend logische Vörslag, nich? Bestechend mutt dat ok ween, denn ahn Bestechen kriggst bi de Fifa nix dör.


7.1.14 ...Inspektor Clouseau is en Held

Heldenhaftig bitt Angela Merkel de Tähn tosamen na ehrn Po-Faller, äh, ehrn Plumps op'n Achtersten bi't Skilopen. Jaja, op'n Po falln deit weh. Ok Pofalla sülven mööt wi sachs wat afbidden, denn he is wohrschienlich ok en Held. Dat ganze Geld, dat he bi de Bahn kriegen schall, dat will de Mann doch nich hebben!! He kriggt dat gegen sien Willn. Dat dat sowat gifft, bewiest uns t.B. de Arbeiters bi Amazon, de nu en Protest ünnerschreven hebbt gegen de Gewerkschap Ver.di. Ver.di will de Amazoniers partu dwingen, högere Löhne to kasseern, man de wüllt dat gor nich! De Hungerlöhne sünd fair, seggt se, un mehr Geld wüllt se doch bittebitte nich annehmen möten! — Ganz friewillig un ahn Druck vun baven hebbt de Belegschapen düssen Protest aftekent, jaja. Nüms will nämlich mehr Geld, all sünd se bloots Oppers vun de Gewerkschap. Un dor sühst mal wedder, wo dull wi Pofalla Unrecht doon hebbt. He is en ganz Bescheidenen enen (dat steiht em ja al in't Gesicht schreven), un se hebbt em den Luxusjob bi de Bahn bloots opdwungen. Wohrschienlich weer dat wedder de SPD. — Gifft't noch en Reddung för Ronald? He is as en Westernheld an de Bahnschienen fasttüdert un schall vun den Geld-Toog överrullt warrn... de arme Mann.


3.1.14 ...Inspektor Clouseau maakt Karriere

Ironie to'n Johrsoptakt: De Bahn will angeevlich Ronald Pofalla as Vörstand hebben — den jüst emeritierten Kanzleramtsminister. Ronald Pofalla! Leven Lü, ik will den Mann nich persöönlich kränken, avers hier is utnahmswies de Naam Programm. Alternativ köönt Se sik ok en Foto vun em ankieken. Orr sien politisches Levenswark. Naam, Bild, Wark sünd liek utsaagkräftig: Pofalla is de Mann, de heldenhaftig de NSA-Affäär för ut un toenn erkläärt hett. Pofalla is de, de Wolfgang Bosbach anschreegn hett "Deine Fresse kotzt mich an", wieldat de na sien Geweten afstimmen wull. Pofalla is dat Irrlicht vun't Kanzleramt, de Inspektor Clouseau vun Berlin. Nüms will Pofalla.

Ok de Bahn will nich Pofalla. Dat is de Punkt. In sien Persöönlichkeit gifft dat nix, wat de hoochbetahlte Anstelln rechtfardigt. Ahn sien politischen Achtergrund harr he den Posten nienich kregen — stellt sik vör, sien Bewerbungsmappe op den Disch vun de Bahn.... Man he hett den Job. Also is dat — ja, Korrupschoon. Vun de een orr anner Aart. Entweder will de Bahn för ehr Lobbyarbeit Pofallas Kontakten in de Politik köpen, sien Adressbook quasi, natüürlich mit de Vörutsetten, dat sien Kontakten ok alle korrupt sünd — pardon, ik meen: togänglich för Lobbyarbeit. Orr Merkel hett för ehrn loyalen Fründ as Dank en schönes, düres Biotop utsöcht. De Bund is Besitter vun de Bahn. Da kannst wat verlangen.

Ach ja, een anner Mööglichkeit gifft't noch: De Bahn wull ok, liek so as McDonald's, en Clown mit Naam Ronald as Reklaam-Figuur. Vun McDonald's lehrn heet winnen lehrn, nich? — Na, to'n Lachen is dat allens nich. Bloots Pofalla kann ok mit'n rode Pappnees nich mehr veel verleern.


30.12.13 ...Tragische Treppenwitz

Ironie to'n Johrsutgang: In'n-Krink-rümraas-Weltmeester Michael Schumacher hett dat endlich doch fertig kregen un sik meist to Dood raast — op Skier! Mit sien dicke Rennmaschiens hett dat de ganze Tied ja nich klappt. Wohrschienlich wieldat dat mit de doren Rennmaschiens nich so licht weer, afsiets vun de Pisten to fohrn. Weer ja allens afsparrt. Sünst harr he dat sachs ok maakt. Wokeen den Dood partu söcht, de finnt em. Un kann sik in'n Dood noch to'n Treppenwitz maken ... Man dat is natüürlich ok tragisch, un an en Dag, an den, as elkeen Dag, 20.000 Minschen verhungert (un poor hunnert annere Minschen Skiunfäll hebbt, ok junge Familienvadders, poor dorvun ok döödlich), dibbert all Medien üm Schomaker. "Die Welt betet für Schumacher!", so leest sik dat denn. Un is sogor wohr. Un dat is sachs een vun de Problemen vun de Welt. Wenn för de Probleme vun de Welt Verstand brukt warrt, is bloots Geföhl dor. Un wenn an de richtige Steed Geföhl nödig is, denn is dat ganze Geföhl jüst bi Schomaker un siensglieken. Dat is op en ganz anner Aart tragisch. Nee, ik will nich Schomaker dat Beden afspreken — un nich anner junge Familienvadders un -moders, de op'n Dood liggt un de ehr Kinner üm ehr bangt. Kannst avers ok üm Verstand beden, för uns, för de, de süchtig na den Tempo-Kick sünd orr de nienich en anstännigen Beroop utöven un in ehr Heimat Stüern betahlen wulln orr de Rümrasen för Sport hollt. "O Herr, schmeiß Hirn vom Himmel!", as de Bayern seggt. Kannst ok üm beden, dat de Welt maal so utsüht, dat so'n Unfall wirklich de Tragödie Nr. 1 op de Welt is — dat dat narms anners grötter Kummer un Lieden gifft. To'n Beden gifft dat noog Anlass — söcht Se sik een ut.


15.12.13 ...Kabinett

Dat Moderschaap seggt: "Höört mi to!
De Wählers laat uns nu in Roh,
wi hebbt dat kloor; ik wörpel nu
un deel de Goorns fein op mang ju!

Ji roden Bück kriegt söss dorvun.
Dat langt, ji hebbt keen Wahlen wunn'.
De Bück ut Süüd kriegt as bether
de Goorns för Freten un Verkehr.
Den Goorn för Krieg maakt — (wörpel, wörpel) — Uschi, du.
Familien, Ole, Kind un Fru,
also den Goorn för dat Gedöns,
den kriggt — (wörpel, wörpel) — de Schwesig-Nervensaag.
Den Goorn för Arbeit un Soziales
kriggt Nervensaag Andrea Nahles.
Weerschap un Stroom, dat is wat Schööns,
den kriggst du, Siggi, Vize-Chef.
Ümwelt will nüms, dat is keen Fraag,
dat kriggt en rode Nervensaag.
Finanz behöllt uns lahme Fründ,
kennt Witt- un Swattgeld ut'n Effeff.
Uns Buten-Buck, — (wörpel, wörpel) — Frank-Walter, du,
wat du ok deist, deit nümsnich weh,
liekso uns brave Thommi, du
warrst Buck in'n Goorn för't Binnere.
Gesundheit kriggt — (wörpel, wörpel) — uns' Hermann Gröh.
Un dat ok all tofreden sünd,
hebbt wi noch Goorns för Tüdelüt,
as Forschung un Verbrukerschuul,
Justiz, Kultuur un Migratioon.
Un hett uns Herde noch mehr Lüüd,
denn köönt wi sachs noch welk todoon.

Momang, dor fraagt een: "Woso döcht
elk Buck för jeden Goorn de recht?
Verstaht de denn dat Wark, de Bück?"
— So'n Fraag is doch en starkes Stück!
Wat, Goornerwark?! Dor seet en Uul!
Bück sünd wi, Schaapsbück, alltohoop!
Hier tellt keen Künn un keen Beroop!
Wi goornert nich, dor hest di sneden.
Vun Aavtbuu wüllt wi gor nich reden.
Wat Bück mit Goorns maakt, is bekannt.
Un so regeert wi ok dat Land.
Allns, wat ik segg un jemals sä,
is anners nix as Mäh! Mäh! Mäh!"


Un jümmers schöön dickfellig blieven!


6.12.13 ...Orkan Xaver

Mit Orkan "Xaver" weer ja nu nich veel los. Sünnerlich nich meten an dat, wat de Medien uns beförchten maken wulln. Wi weet nu: Wi sünd good sekert un dörchorganiseert, un allens is fein utstaffeert in uns lütt Land. Böen vun 180 km/h, naja, de hollt wi good ut. Annerletzt op de Philippinen harrn se duppelt so veel. Un bloots Hüüs vun Holt. Bi so'n Storm wöör bi uns ok teemlich veel in'n Dutt gahn. Mit den Ünnerscheed: Bi uns is allens versekert! Bloots de Aktien vun de "Münchner Rück" wöörn beten afsacken, un de Handwarkers wöörn sik de Hannen rieven un Termine för de neegsten dree Johr vergeven. Denn wöör dat en orrigen Weerschapsopswung geven — Handwark un Middelstand! —, un na poor Johr weer allens wedder op Schick. Op de Philippinen dorgegen...

Man de Medien hebbt ja düchtig Horror maakt. Villicht harr dat ok sien Godes, denn se hebbt op düsse Wies reinweg de Kinner koppschu maakt. So keem dat, dat Clara, een vun mien Computerschölerschen, hüüt ganz övernächtigt to'n Kurs keem. Clara hett fief Kinner, de se alleen groot maakt, kümmt ut Westaafrika un is en heel frame Fru. Un ehr lütte Söhn Wilson weer so bang vör den förchterlichen Orkan, he kunn keen Oog tomaken, is bi Mama in't Bett krapen un hett de ganze Nacht beedt, Gott much den Orkaan afwennen. Un süh!, so keem dat, dat de Orkan ganz flau utfulln is. Lütt Wilson hett em wegbeedt. — Dorför, meen ik, müss de Nikolaus em hüüt den Schoh orrig vull maakt hebben!


1.12.13 ...Överall is Noordkorea

Ok hier. Tööv man af. De "Eliten" bedeent sik schaamlos ut de Politik, jedeen Börger kann meist totaal överwacht warrn, un de Bundswehr — de ja siet 2012 ok in't Binnenland Wapen insetten dröff — will sik mit Drohnen bewappnen. In Noordkorea höört dat Land en lütte korrupte Schicht to, un wokeen opmuckt, hett verspeelt. De Bedingen för so'n Diktatur sünd ok hier al sett — in mennig Länner. Dorbi harrn wi eentlich in uns Verfaten en ganze Tall Bremsen gegen sowat inbuut. De woorn na un na uthebelt. Mi weer wohler, dat weer nich so.

De Drohnen liggt mi swaar op de Seel. Weltwied sehn, is dat ja nu ganz desolat. Völkerrecht existeert nich för Drohnen. Recht existeert nich för Drohnen. Dat Recht harr eentlich nienich in de Geschicht en egen Knööv, dat bruuk alltieds de Macht dorachter, de dat dörsetten kunn — un so verkeem dat Recht mehr un mehr to'n Dekoraschoon vun Macht. Gesetten wiekt op, wenn se op dat grote Geld drepen doot — wi kennt dat. De Macht vun't Volk? En Lacher. De lütten Stackels, de partu keen Macht hebbt, ehr Recht dörtosetten, beroopt sik op Gott sien Macht. Is dat nich nüdlich? Gott kann töven. — Insicht in Recht kennt Macht nich, entweder is dat lästiges Hinnernis orr lästige Deko. Se erkennt gor nich, woto Recht good is — as en Hund, de bloots gehorcht, wieldat de Minsch de Baas is un nich wieldat he den Sinn vun de Regeln versteiht. För de Macht gifft dat keen Oogenhööcht, bloots en Baven un Nerrn, en "Wat kannst du mi in'n Eernstfall doon?" Bi de Afhöörtechnik hebbt wi dat sehn. Un nu denkt Se sik dor de Drohnentechnik rin. — Dat mutt nich passeern, avers dat kann. Mi weer lever, dat kunn nich. Man en Technik, de dat maal gifft, kriggst nich mehr ut de Welt, dat is bekannt.

Ganz so leeg as in Noordkorea warrt dat bi us natüürlich nie. De Kapitalismus is nich so dösig. He höllt de Lü bi Luun. Wi warrt noog to eten hebben, wenn't ok man Gen-Foder is, dor warrt wi nich fraagt; wi warrt good överwachte Handys hebben un sogor politische Sandkisten, in de wi so doon köönt, as sään wi uns Menen. Allens warrt quietschbunt ween, nich gries. Un Hollywood dreiht af un to en Drama, 'neem en Held gegen den Stroom swemmt un Korrupschoon opdeckt usw. Opletzt kriggt de Held Recht un de hübsche Fru. Wi fevert mit bet to't Happy Ending un gaht tofreden na Hus.

Is dat nich al so?


24.11.13 ...Tschüß, Geldklimagipfel!

De Geldklimakonferenz in Warschau is toenn gahn, un de Geldmeisterschapen in't Geldverspreken woorn dor ganz blangenbi mal wedder mit utdragen. Denkt Se nich, de wöörn in Berlin bi de Koalischoonsverhanneln stattfinnen; nee, dat sünd doch bloots de Düütschen Meisterschapen! De Weltmeisterschap mutt natüürlich internaschonaal utdragen warrn. Düütschland weer natüürlich vörn mit bi. Dat gifft Geld för Opforsten! Dat gifft en Klimafonds, stantepe! Geld för de Forschung! Steiht allens in't Afslussdokment. Man wunnen hett düt Verspreken: Vun 2020 af an ""wüllt"" de Industrielänner elkeen Johr 100 Milliarden US-Dollar an de armen Länner geven, dat de beter mit den Schaden vunwegen den Klimawannel klaarkaamt. — 100 Milliarden! Elk Johr! Eendüdig dat driesteste Verspreken. Bravo! Goldmedaille!

Dat sünd, notabene, de Weltmeisterschapen in't Geldverspreken, nich in't Geld-Överwiesen. Dat Letztere is nich so'n populäre Sport; gifft keen schöne Konferenzen dorbi, nüms filmt dat, un de Medien överdraagt dat ok nich. Hollen warrt dat Warschau-Slussdokument sachts jüst so as de fröheren Toseggen vun Geld för de armen Länner — so twüschen 5% un 30% vun dat Geld kann wirklich kamen. Bi dat Verspreken vun 100 Milliarden per Johr tipp ik mal eher op en Erfüllensquote so üm un bi de 5%. 2020, also in 7 Johr, hebbt wi hier in de rieken Länner Öllersarmoot, stagneern Weerschap un ok al Klimafolgeschäden — en Regeern, de denn elk Johr Milliarden an de povern Länner schickt, warrt vun ehr Wählers in de Luft terreten... Is avers doch noch en schönes Afslussdokment woorn. Bloots de Philippiners un ehr Liedensgenossen köönt sik nix dorför köpen.


14.11.13 ...Gode Geschäfften

De Debeka is keen Levensmiddelladen, ofschoonst dat so ähnlich klingt, nee, dat is en Versekern. Un de hebbt op de Söök na niege Kunnen Adressen köfft — vun Beamten, dat is de een Saak, Beamten dröfft ja nich blangenbi Geschäften maken mit ehrn Beamtenstand. Man dat weern bloots Adressen — keen fertige Kunnen mit Verdragsafsluss un allens, bloots Tipps — "Dor is een, de hett noch keen Unfallversekern!" Bloots för solk Adressen vun villicht-tokamen Kunnen hebbt se twüschen 25 un 600 Euro betahlt. Per Adress. Dat hebbt se över — dat springt bi rut bi dat Versekerngeschäfft.

Dat kann doch bloots eens heten: De Versekern sünd för uns Kunnen noch veel to dür!


10.11.13 ...Volksentscheid?

Jüst heff ik mal wedder en Mail vun Campact kregen, 'neem ik Liddmaat bün; se wüllt Druck maken, dat Volksentscheiden ok in'n Bund in de Koalischoonsverhanneln dörsett warrt, un dor schast för ünnerschrieven. Man dat süht nich good dorför ut. Volksentscheiden? Nich mit de CSU! Dat sünd sünnerlich de Konservativen, de keen Lust hebbt, dat Volk an de wichtigen Themen rantolaten. Woso eentlich? Se hebbt sik doch ok sülven wählen laten? — Mi dücht, jüst dor liggt de Haas in'n Peper. De Lü — so denkt sik Seehofer & Co. —, de so dösig ween, uns to wählen —— de kannst wirklich nich an de wichtigen Saken ranlaten! Uns Wählers is nich to truun!

Wat Seehofers Wählers angeiht, stimm ik em ja to. Un so warrt dat Wichtige, wat de Volks-Döösbartels nich regeln dröfft, vun de Ober-Döösbartels regelt, de de Volks-Döösbartels wählen dröfft. Dat erkläärt veel.


3.11.13 ...Halloween

Inkoopszentrum Hamborg-Bramfeld, kort vör Reformatschoonsdag. Vun de Deck hangt grote Girlanden vun minschlich Dodenschädel (vun Plastik, man se laat echt). All Gelänner sünd mit swatte Spinnen "dekoreert", Dörmeter 50 cm. En Fru un ehr lütt Deern wüllt na nerrn, man de Deern mag nich to nehg an dat Gelänner kamen vunwegen de Spinnen. "Iiiih! Mama!" "Nu kaam! Brukst nich bang ween!" Moder stüürt op de Rulltrepp to, de Deern in't Sleep, se un ik kaamt tosamen dor an. "Ich find das unverantwortlich", segg ik to de Fru, "dass die diese Deko machen. Im Fernsehen und überall warnen sie Kinder vor Gewaltdarstellungen, und hier hängen fünftausend Totenschädel!" De Rulltrepp fohrt an. "Totelschädel sind das?" De lütt Deern ritt sik los, blifft baven an de Rulltrepp stahn, över sik Schädel, üm sik Resenspinnen, se kann nich vör un nich trüch un huult to'n Barmen. "Dankeschön! Jetzt weiß sie das auch noch!" De Moder hechtet de Rulltrepp hooch, gegen de Loopricht, ehr hysteersche Deern in'n Arm to nehmen. Ik fohr mit de Trepp wieder hendal, ratlos un benaut. — Avends pingelt de Dör bi uns, en eensame Deern mit en Büdel steiht dorvör, nich mal verkleedt is se; "Süßes oder Saures", seggt se verlegen, un ik segg, "Ach komm, nu is aber gut", un maak de Dör to.

O ja, Kinner leevt Halloween. Un mien Öllern, de mi christlich optrocken hebbt, hebbt elkmaal, wenn se mit mi in en Kark güngen, tovöör keken, wat dor ok keen grulich Kruzifix mit en echt utsehn Liek hüng. In solk Karken hebbt s' mi nich rinlaten. Man Kinner leevt ja Halloween.


23.10.13 ...Wat to bargen?

Ach, Angela Merkel is vergretzt, wieldat dat, wat de Lü passeert, miteens ok ehr passeert — utforscht warrn vun gewisse Geheimdeensten. Dat geiht ja nu nich an, dat dat ok för ehr gellt! Denn is dat en Schandaal, un se mutt bi Obama anropen. Kann dat ehr Eernst west ween? Dat se dat nich verwachten weer? Wat geiht, warrt maakt, is doch de Regel! Afhöörn vun allns un jeden geiht. Un en ehrliche Minsch, de nix to bargen hett, de stöört sik dor ja ok nich an, nich? Wat hett Merkel denn to bargen? Is se etwa — Terroristin...??? As Physikersche, hett sik Obama sachs dacht, kann se Bomben buun...

Naja, nu hett se anropen, un Obi seggt, nee, is nich. För dat Afhöörn vun unsereen hett dat langt, dat de NSA sä, nee, is nich. Dat hebbt se glöövt, sä dormalen ok Merkel, un wi schulln dat man ok glöven. Na seht Se, is ja doch nich so slimm, Fru Merkel! Vertruut Se Obama!

Ik erkläär düsse Affäär nu för beendt.


20.10.13 ...Kann Riekdom human ween?

Kennt Se de Skizze rechts noch ut de School? Elektrotechnik? Richtig, dat baven is en Batterie. De Pluspol is de afrikaansche Kontinent mit sien veeeeele, veele Minschen — mehrst junge Mannslüüd — op de Söök na en Existenz un Tokumst. Avers ok Vorderasien mit sien veeeele, veele Minschen op de Flucht vör Krieg un Diktatur. De Minuspol rechts is dat lütte Europa mit sien Wohlstand.

De Wedderstand R, de de twee trennt, is dat Middelmeer. Un Frontex. Un de europääschen Gesetten. Un uns Behörden. Allns, wat den Stroom behinnern schall. De Wedderstand kost Geld. Un Leven.

Nich to sehn sünd de velen Lieken, de in't Middelmeer drieven doot. (Eet Se noch Fisch ut't Middelmeer? — Naja, wi eet ja ok Koorn un Grööntüüchs, dat op de Slachtfeller vun't Middelöller wasst...) Un de Minschen, de in Flüchtlingslagers fasthangt. Orr dat nicht ut de Kriegrebetten schafft hebbt un dor doodblievt. Nich to sehn is ok de Angst vun de Moders. Elkeen vun de Lieken, de answemmt warrt, hett en Moder tohuus, de beedt un töövt. Jichenswenn warrt he sik mellen, de Söhn. Seggen, dat he leevt. Dat he heil ankamen is. Dat em dat goodgeiht. Bitte, Gott. Bitte. — Noch in twintig Johren warrt de Moders vun de Lieken beden un höpen. Se leevt ehr Kinner as wi.

Ok nich to sehn is: Wi laadt de Batterie achterrücks wedder op. Wi kollaboreert mit Diktatuurn, haalt Natuurschätze to Spottpriesen ut Aafrika un geevt ehr daför uns Subventioonsöverschüss, de den Markt dor kaputtmaakt. Nee, düsse Batterie löppt so gau nich all! Ok wenn wi Hunnertdusende na Europa rinlaat, staht noch Millioonen an de Küsten un Grenztüün paraat. Un dat warrt mehr. Ok wieldat de Minschen in welk plaagte Länner jümmers noch veeele Kinner hebbt — de Halv dorvun Jungs, de de Unrast packt, wenn se junge Mannslüüd warrt un keen Tokumst seht.

Elektrotechnik is so schön neutral (nich elektrisch, man moralisch). So köönt wi uns an düsse Metapher nu klaar un weertfrie utsöken, wat passeern schall. Mien Vörslag weer ja eerstmal, mit dat Opladen optohöörn. Mehrheitsfähig? Good. (Muttst ok eerstmal ümsetten...!) Man nu to den Wedderstand.

Welk wüllt em hooch hollen un höger maken, uns Wohlstand as en Bastion verdeffendeern un op't best in de Länner, woneem de Wannerwilligen herkaamt, bekannt maken, dat du na Europa bloots as Liek kümmst. Se höpt, dat de Lü dor dat glöövt un dat dat denn ophöört. — Bemöht Se mal Ehr Alldagspsychologie: Warrt de dat glöven? Warrt se de afsurde Höpen opgeven? Warrt dat nüms mehr versöken? (Tipp: "Laat uns lostrecken!", sä de Esel to'n Hund, "wat Beters as den Dood finnst överall!" Tipp 2: De Wohrschienlichkeit, vun'n Blixslag to starven, is sössmaal höger as de Wohrschienlichkeit, in't Lotto to gewinnen. Man wa veel Minschen speelt Lotto?)

Wüllt wi den Wohlstand un also den Wedderstand nich ringer maken, warrt wi also wiederhen Dode an uns Küsten sehn — wenn wi henkieken wüllt — un groot Bargen vun minschlich Lieden, de unsichtbor blieven warrt.

Man nu de Alternatiev. Welk wüllt den Wedderstand senken, se seggt, wi mööt mehr Flüchtlinge (also Inwannerers) opnehmen un humaner mit ehr ümgahn. Klaar is, dat warrt sik fix rümspreken ünner de Wannerwilligen, dat Europa den Wedderstand senkt, dat Ventil opdreiht. Wat meent Se, warrt denn mehr orr minner Minschen sik op den Weg na Europa maken? Richtig. Düsse Batterie hett en enorme Kapazität, de nawasst. Also mööt wi den Wedderstand noch ringer maken, üm de willn, de sünst liedt orr doodblievt, un denn kaamt mehr, un wi mööt den Wedderstand senken bet praktisch to'n Kortsluss. Bet all kamen köönt, de wüllt. Mit de mööt wi denn natüürlich unsen Wohlstand delen. Ja, Arbeit is för vele noch dor, man Wahnruum? Günstige Wahnruum in uns Städer, nu al Mangelwaar? Mit de Inwannerers kümmt en niege Konkurrenz dorto! Bildung, ok en rore Ressource, un uns Sundheitssystem, allens mööt wi mit de Inwannerers delen. — Jichenswenn sinkt de Spannung denn doch, wenn de Batterie kortslaten is, wenn wi den Ünnerscheed an Wohlstand dör Delen nivelleert hebbt. Ünner düssen Pries is de Humanität nich to hebben. Wi mööt wirklich delen, wirklich wat opgeven, wirklich verzichten — orr Afscheed nehmen vun de Vörstelln, dat wi de Goden sünd, ophöörn, uns Christenminschen to nömen, un uns an de Lieken in't Meer wennen — un doran, dat wi mit schuld sünd.

Ik kann, stell ik fast, mien Hart teemlich hart maken gegen de Gesichter, de an de Küsten staht. Ik kann teemlich fast seggen: Ji sünd nich de Towannerers, de düt Land will! Den Wohlstand hier, den hebbt wi tostann bröcht, nich ji. Schafft sik sülvst een! — Ik kann sachs sogor mit Schuld leven.

Man dat Gebeet vun de Moders, dat maakt mi to schaffen.


15.10.13 ...Sammeln hett keen Sinn

Hach ja, gegen solk Lü as de Quandts vun BMW köönt wi eenfache Minschen nich gegenanstinken. Wi kunnen nu twoors sammeln gahn un kieken, wat wi ok söbenhunnertdusend Euronen tohoopkratzen köönt, dat wi uns ok de een orr anner politische Entscheiden köpen köönt. Een gönnt sik ja sünst nix. Man so'n Optridd as de Quandts, de den ganzen Zaster ut een Tasch trecken köönt — un denn noch ut de Portokass —, so'n Optridd vun Gewicht köönt wi nienich henleggen. Wi finanzeert twoors den ganzen Laden, Regeern un allens, mit Stüergeller, avers dat is Kleckerkraam un tellt ja nich mehr. Ok de Mächtigen wüllt Macht föhlen. Dat is ehr Spraak, un de Quandts snackt düsse Spraak. Wi nich. (Wat de Quandts an Stüern betahlt? Wenn se Plie hebbt — un se hebbt Plie —, is dat ok Kleckerkraam, meten an dat, wat se hebbt, meen ik. Mutt ja ok wat för de Spenden över blieven!)

Ach wat, de Spende is gor nich för dacht, politische Entscheiden to köpen?! Ts, ts. Dat erinnert mi an de Pressekonferenzen vun Radsportlers, de swöört, se wöörn nich dopen. Wenn de Spende keen Influss nehmen schall, harrn se de doch anonym maken kunnt. De Spende schall also doch tominnst en Indruck laten, dat Fru Merkel nich mehr neutral ween kann gegen de Autoindustrie. Kann se ok nich. De Saak is avers de: Wenn ik as Bundskanzlersch en Funken Ehr in't Lief harr — een Funken langt —, denn wöör BMW & Co. nu keen Been mehr bi mi an'n Borrn kriegen. Jüst vunwegen düsse Spende. Bi jeden Entscheid, de de Autoindustrie angeiht, wöör ik in eensento an denken, dat de Lü mi för korrupt hollen kunnen, un ik wöör jümmers gegen ehr entscheiden. Rein ut Ehrpusseligkeit. Wiesen, dat ik nich to köpen bün. Bi mi wöör so'n Spende na achtern losgahn!

Na, ik bün nich Bundskanzlersch un harr ok keen Lust dorto. Op sowat as Ehrpusseligkeit kaamt de Quandts un ok de Merkels vun düsse Welt sachs nich mehr. Nich mal mehr de Bischöpen sünd ehrpusselig. Sachs lacht sik nu bi't Lesen poor Lü över mi dood. Dat gönn ik ehr. — En Vörstand vun de AfD hett mal vör en Tied vörslaan, dat dat Wahlrecht doch wedder an finanzielle Solvenz koppelt warrn schull, as dat fröher in Preußen weer. Gode Naricht, Herr Adam: Dat is al so. Wahlrecht orr nich, de Rieken koopt sik ehr Politik.


10.10.13 ...De Welt steiht kopp

De Katholiken sünd ok nich mehr, wat se mal weern. Fröher harr so'n Bischop doch keen Kritik vun sien Ünnertanen düllt! Dormalen harr he so'n Palast as nu nich för sik, sünnern för sien Mätresse buut — un sik noch al lang nich an't Been pinkeln laten. Man hüüt steiht de Katholenwelt kopp, hüüt mutt de Limborger Bischop den düren Fantasie-Bu rechtfardigen — un villicht sogor jichenswie gegenfinanzeern! Fröher harrn se daför Aflass-Zedels verköfft. Villicht weer dat en Idee för Tebartz-van Elst? Dat wöör to em passen. Geld her, Sünnen weg, fertig. Do kunn he sülven glieks as Eerst een vun köpen!

Sachs wöör he denn avers sien eenzige Kunde blieven. De Katholiken vun hüüt wöörn em de Aflasszedels üm de Ohrn haugn. Se glöövt doch wohraftig, Gott sien Geboden sünd nich bloots för de lütten Lüüd dor, sünnern ok för de Grootkoppten.

Tja, de Katholiken sünd ok nich mehr, wat se mal weern. Villicht ganz good so.


24.9.13 ...Niegwahlen!

Tja, dat geiht nich vör un nich trüch in'n Bundsdag. Wat schall Merkel maken? Minnerheitsregeern? Koalischoon mit Jogi Löw un Schweini as Vizekanzler? Geiht nich. Leider. Nix geiht. Dat heet, doch, dat wöör woll gahn, denn dat gifft en klore rood-rood-gröne Mehrheit, un nix weer logischer as en Regeern ut düsse Mehrheit; man nee, dat geiht ok wedder nich, denn de SPD hett ja hooch un hillig sworen, se wull nich mit de Linkspartei tosamengahn un sik ok nich düllen laten un sowiso. Dat kann se nich breken. Nee, kann se nich. Dat geiht slecht ut, dat nehmt de Wählers övel. Dor hölpt bloots eens: Linke, ji mööt sik nocheens ümbenennen! Is ja nich dat eerste Maal. Nu kaamt, geevt sik en Ruck! Doot dat för Düütschland! Nöömt sik doch "de Witten", dat klingt schöön unschüllig, un batz kann de rood-witt-gröne Regeern billt warrn, denn vunwegen en Koalischoon mit de Witten hett de SPD ja nix afsworen! Bavento kann denn ok de CDU ju wat anbeden — en swatt-witte Regeern. Warrt ja opstunns gor nich vun snackt, bloots vun swatt-gröön un swatt-rood. Bloots so kümmt Bewegen in den Laden. Süss helpt bloots — Niegwahlen. Dat weer överhaupt dat Schöönst. Seggt wi maal, Niegwahlen in 2 Weken. (Jaja, ik weet, dat Organiseern...) De FDP wöör Amok lopen un överall as verdull plakateern: "Nu avers, eenmaal noch FDP, biddi biddi biddi...!!!" Alleen för dat Spitakel wöör sik de Niegwahl lohnen. Dat wöör de FDP avers nix helpen. De AfD wöör natüürlich rinkamen, un wat mit den Rest warrt... För wat hebbt wi Europa? Dor köönt se doch all hen afschaven warrn. Trittin, bün ik wiss, seht wi eh bald in Brüssel wedder.


15.9.13 ...Endspurt

"Wähl bloots nich een vun de Lütten! De kaamt nich rin, din Stimm warrt ünner de Groten opdeelt, de rinkaamt, 40% Merkel, 25% SPD usw. Do dat nich!", wohrschuugt mi Fründ H. Ik do dat doch, dat ewige "lüttere Övel" heff ik satt! Jümmers klook un vernünftig ween, so lang, bet di slecht vun warrt. Nee danke. Veel slimmer weer dat, gor nich orr ungüllig to wählen. Dat helpt bloots de FDP.


Köönt Se düt Minschenkind wat afslaan? Ehr Stimm t.B.?

Ach ja, de FDP. Se seggt nu na de Bayernwahl, se wüllt keen Mitleidsstimmen. Also Stimmen ja, de wüllt se, geern ok de vun de annern Partein — also Stimmen vun Se un mi —, avers keen Mitleid. Na denn schallt se doch nich een as Rösler opstelln!! Dor fallt dat swaar, em nich den Kopp to eien. Bi Brüderle heff ik dat Probleem nich.

Jichenswie — ok wenn wi dat nich wohrhebben wüllt — is de Wahl doch sinnlos. Liekso sinnlos as in Russland, wenn ok nich op desülvige Wies. Anners liekso. Frieer. Man alternativlos. Alternativlos as dat Wählengahn.

An de A7 steiht de Alternativlosigkeit sülvst — Angela Merkel — op en Reesen-, aver würklich Reesenreesenplakat hooch över en Raststee, an so'n Mast, un direkt blangen ehr dat McDonald's-Logo. Dat McDonald's-Logo is dor alltied, Merkel is to Gast. Bi McDonald's. Merkel is dor op dat gigantische Plakat, nix as Merkel — un de Slogan "Gemeinsam erfolgreich". Dat is de reine Frieheit — Frieheit vun Sinn. Meist so good as de Merkel-Raute. Leider kannst op de Autobahn nich eenfach stoppen un knipsen. So schöön, as dat is, kann ik dat nich namaken. Schaad. Is as en Natuurwunner, dat bald wedder vörbi is. Nich dat ik mi alltied Wahlkampf wünschen do — Himmel, nee! —, man de Fru, de dor baven sweevt un tohoop mit McDonald's frie vun Sinn un erfolgreich is —— dat grote, dat ganz ganz grote M — dor kunn ik noch lang över nadenken. Un warr doch nich dorachter kamen. Bet nix nablifft as dat grote M.


Foto Rösler: Fdp nds/Wikimedis Commons

8.9.13 ...Noch mehr lustige Saken

Wahlkampf in Hamborg — nee, ik gah nich na Veranstalten, ik meen bloots de Plakatepest, de uns överall angrient. So dösig sünd se, dat een denkt, för wat hollt de Partein uns?! —Man sachs taxeert se uns Dummheit ganz richtig, as de Wahlergeevnissen bewiest. Un wenn een bedenkt, dat wi för den ganzen Spaaß ok noch betahlt — de Wahlkampfkosten warrt vun Stüergeller erstatt —, denn mutt een togeven, dat se uns gor nich dumm noog inschätzen köönt. — Man villicht weern se doch en beten geistvuller, wenn wi, de dat betahlt, en Mitspraakrecht harrn?

Stückerwat anner hebbt den Spaaß dörschaut un maakt Reklaam in't Fohrwater vun'n Wahlkampf, op lütte Duppelplakate, fasttüdert an Latüchtenmasten, un op grote friestahn Opsteller: "Fisherman's Friend" priest sien Halspastilln mit "Lutschen muss sich wieder lohnen" un "Uns Waff: Mundpropaganda!". Rewe lett en Ketchupbuddel as Politikerkopp ut'n Slips kieken: "Uns Spaarprogramm gefallt de Lüüd!" Recht so: Wenn de ganze Wahlkampf en Witz is, kannst dor nocheens in de Kerbe haun. — De Ketchup un de Halsbontje hebbt för ehr Posters tominnst ehrlich betahlt. De Politik kriegt dat ümsüss.

Bloots een Slogan stimmt: de vun de SPD. "Das Wir entscheidet." Man wokeen is düt Wi? Dat Wi heet Angela Merkel — hooch över all Partein, dat ganze Volk in een Persoon. Wahlprognose? All warrt verleren (sünnerlich, höp ik, de FDP), all warrt sik oplösen, un dat Wi regeert alleen. De schöönste Synthese vun Monarchie un Demokratie.


1.9.13 ...Lustige Saken

Nu kiek eens, de "Spegel" kriegt en niegen Chefredaktör. Un dat is de Nikolaus Blome, de doch wohr un wohraftig vun de "Bild"-Zeitung kamen deit. Dor lachst di slapp. Ut de Rotaschoonsenergie in Ruldolf Augstein sien Graff kunnst de ganze Energiewenn opmaken, bruukst keen Windrööd mehr. "Bild" warrt "Spegel" un mehr noch "Spegel" "Bild", de SPD is ja ok al lang en CDU woorn, un vunavend ""duelleert"" sik Peer Steinbrück (SPD) un Angela Merkel (Angela Merkel). Dormit wi ""de Wahl"" hebbt. De Wahl! Amenn nehmt se de Masken af, un achter de Merkelmaske stek Steenbrück un annersrüm. Dat is de Wahl, de wi hebbt. In solk Tieden!

Stimmt nich. De alternativlose Mischpoke is nich alternativlos. Dat gifft de lütten Partein, un dat gifft de Linke. Wichtig is, överhaupt een to wählen! Mit 60% Wahlbeteiligen brukt de FDP 300.000 Stimmen weniger, över de 5%-Hürde to kamen, as wenn 70% wählen gaht! Eenfach wählen gahn un ankrüüzen, wat een gefallt un wat nich veel Schaden maakt. De ganz Lütten kaamt sowiso nich rin, also kannst dor ok Spinner ahn Schaden wählen. In't Kiekschapp kaamt ja meddewiel al wedder de lustigsten Werbespots vun lütte Partein. Mennig laat sogor integer. Schaad finn ik, dat düsse hier bi uns nich to Wahl staht.

Lustig is ok de aasige Klemme, in de sik de negenkloke Obama manövreert hett. Hett groot rümmertöönt vunwegen rode Linien, un nu mutt he to sien Woort stahn. Dor hett he nich mit rekent un dat will he ok gor nich, un dor kiekt he sik üm un süh!, Cameron bi de Briten hett annerletzt datsülvige drauht, man sien Parlament hett em dat in letzte Sekunn verbaden. Ha!, denkt Obi, ik fraag ok mien Parlament! De kniept den Steert för mi in, denn bruk ik dat nich! — Wat em dat den Mors reddt? Bi den G20-Gipfel mutt he ja nu vunwegen Syrien doch wedder mit Putin snacken, dat wull he ok nich, he weer doch so beleidigt vunwegen Snowden. Över Obi lacht meddewiel wirklich de Welt, Putin lett em ieskoolt oplopen, Assad sprütt em — pfft, pfft! — noch extra so'n lütt Giftgaswölkchen in't Gesicht, un de NSA spioneert munter wieder gegen uns all.

Un wat weer noch lustig? Ünnern Disch lacht heff ik mi bi Fukushima. Dor is de Strahlung dramaatsch anstegen, na 4 Stünnen büst doot. Is doch gor nix los, begöschern de Verantwoortlichen, dat kümmt bloots, wieldat se nu betere Mess-Reedschapen hebbt. Mit anner Wöör: Dat weer al jümmers so. De beste Begöschern, de ik jemalen höört heff! Du lachst un lachst, un na 4 Stünnen büst doot.


21.8.13 ...Rode Iesenbahnswelln

In Syrien hebbt se Hunnerte mit Giftgas doodmaakt. En rode Linie is överschreden! Un nu passeert — nix.
In Fukushima loopt hunnerte Kubikmeter strahlen Water per Dag in Grund un See. De permanente GAU! Un nu passeert — nix.
De Presse warrt knebelt, de Totalitarismus lett gröten! Un nu passeert — nix.
Rode Linien hebbt wi al Masse achter uns laten, as Swelln bi de Iesenbahn, un nix passeert — bit wat passeert. Wenn wi mal en Blick torüch smiet, op de velen roden Linien achter uns, schriff ik en besorgten Kommentaar, un dat is allens. Denn passeert wedder — nix. De Fohrt geiht wieder. Wi sünd dorbi. De Macht nimmt jede vun ehr dusend Masken af, un wi kiekt to. Wüllt wi nix maken — orr köönt wi nich mehr? Orr denkt wi, wi wüllt nich, wieldat wi weet, wi köönt nich? De Wohrheit is sachs, Rode Linien sünd to'n Överschreiten dor. Woto ok süss?


4.8.13 ...De Weerschap, uns Redder

De US-Regeern hett ehr Börgers wohrschuugt: In't Butenland kunn't gefährlich warrn. Anslääg un so. Se maakt sogor de Bottschapen to. — Aha, en niege Bedrauhn, dat heet en niegen Vörwand: Welk Börgerrecht wüllt se nu wedder afschaffen? — Ach so, ik bün zynisch. Pardon.

Man in de ganze Geheimdeenstkatastrooph wiest sik Licht an'n Horizont: de Weerschap! De warrt nämli ok utspioneert, de Briten hebbt dat praktisch togeven, un dat smeckt de Weerschap gor nich. Klaar, uns Börgerslüüd smeckt dat ok nich, man na uns fraagt nüms. Üm uns geiht dat nich. Man de Weerschap warrt wiesen, dat dat üm ehr geiht. Hier hebbt de Geheimtypen en echten Gegner (wi Börgerslüüd sünd ja keen Gegner för de). Wenn een för sorgen kann, dat de Komplettopteknen un Utweerten vun'n Datenverkehr ophaalt, denn uns Weerschap. Se hett Macht. Un se hett mit Recht wat to bargen. Ahn dat se glieks Terrorist is.

Ach, ik bün nich zynisch noog? Pardon. Se hebbt ja Recht. Wohrschienlicher is, dat dat för de Weerschapsünnernehmen bald en technische Lösung gifft, de för Privaatlü to düür orr nich to kriegen is. Wi sünd denn jümmers noch op'n Präsenteertöller. Wi hebbt ja nix to bargen, orr? Tominnst nich mit Recht.


30.7.13 ...Keen Gnaad mit uns sülvst

Bradley Manning warrt verurdeelt, un all weet, dat dat en bestellte Schauprozess is un dat Urdeel Unrecht. Dat passeert ganz apentlich. — Edward Snowden warrt in en Kohhannel twüschen USA un Russland verschachert, un all weet, dat em Unrecht schüht. Dat passeert ganz in de Apentlichkeit. Bloots twee vun vele. Eentlich harr ik jümmers dacht, Apentlichkeit weer en gode Schuul; wenn een en Unrecht, en Verbreken begahn will, deit he dat in't Borgene. — Vörbi, dat weer gistern. Hüüt kannst in de U-Bahn tosamenslaan warrn, un nüms helpt. Hüüt kann en rechtschapen Minsch vun'n Staat opfreten warrn, un nmüms reageert. Is dat al Angststarre? Wat nu passeert, wat ünnereerdsch al lang passeert is un nu apensichtlich warrt, verännert veel. Wenn wi nich bald in Bewegen kaamt, sünd wi de, de dat an'n mehrsten drepen deit. Wenn wi nich Solidarität mit de Whistleblowers öövt, levert wi uns sülvst an't Metz. Wi hebbt keen Gnaad — mit uns sülven.


15.7.13 ...Nix to bargen?

"Vun mi köönt se ruhig allens lesen, ik bün en rechtschapen Minsch, ik heff nix to bargen! Dat min Daten spiekert warrt, stöört mi nich!" So un ähnlich snackt nu mennig Lü. Kannst verstahn. Datenspionaasch is liesen, rüükt nich un maakt keen Dreck. Wokeen schall sik an stören?

Okay, ik bün nu de NSA. Orr jichenseen Geheimdeenst. Sünd Se överrascht, wenn ik Se vertell, dat ik en Slötel to Ehr Huus heff? Doch, heff ik. Ik bün ok al faken dor west. Heff in elk Schuuvlaad keken, in jedeen Schapp. Ik kenn dor jeden Winkel. Mennigmaal laat ik avers ok min Frünnen dörchgahn, orr ik betahl en Firma, de dat maakt; ik heff ja nich jümmers Tied. Nee, wi klaut doch nix! Reegt sik doch nich op! Nee, de Firma ok nich (denk ik; wenn doch, Pick hatt). Wi kiekt bloots. Un Se hebbt doch nix to bargen, nich? Hebbt Se seggt. Vunavend gah ik wedder dörch. Orr vunnacht. Nee, Se köönt nix gegen maken. Utsperrn? Haha! Ehrder kann ik Se utsperrn — wenn ik will. Ik bün de Baas, un Se hebbt ja doch nix to bargen, seggt Se. Blangenbi, de Bluus mit de blagen Striepen, de bi Se in dat Schapp an't Finster hangt, süht to'n Weglopen ut. So'n Kohgesmack, as Se hebbt! Twee vun de Joghurts in Ehr Köhlschapp sünd aflopen. Un en niege Tähnböst is ok mal fällig — Jungejunge, wokeen putzt sik denn mit sowat de Tähn?! Un de Kondome in de nedderste Schuuvlaad — wat denn? ik denk, Se hebbt nix to bargen? —, also de Kondome, Se weet al, de bunten, mit de Noppen — jaja, ik weet, dat is al wat länger her, dat Se Sex harrn, un dormalen weer't ja ok nich dull — wat wull ik seggen? Ach ja, wenn Se bi de Kondome an den söten Keerl vun gegenöver dacht hebbt: sinnlos, de is schwul! Ja, ik heff ok sien Slötels. Wat hebbt Se denn dacht?!

Na, hebbt Se jümmers noch nix to bargen? Denn heff ik Tipps för Se:

  • Schrievt Se Platt! Mehr noch, schrievt Se Ehrn egen Tungslag — op't best exotische Dialekte so as de westfäälschen Platt-Dialekte! För jedeen Dialekt mööt de Geheimdeensten en Plattdüütschen instelln, de dat lesen kann! So köönt Se amenn noch en Arbeitsplatz för sik sülven schaffen! Orr de Geheimdeenstlers mööt Kurse maken. Weer doch schöön, wenn in Ehrn lokalen Plattkurs an de VHS mitmaal en US-Ami orr Brite opduukt ahn en rechte Begrünnen, woso he Platt lehrn will... Da grient wi uns doch een!
  • Sett Se verdächtige Slötelwöör in, süh hier. Denn warrt Ehr Mails, Facebookindrääg, Chatnarichten usw. op jeden Fall gründlich leest.
  • Wenn Se de Typen noch mehr argern wullt, doot Se so, as wenn Se wat to bargen harrn: Verslötelt Se den Kraam, t.B. mit PGP. Nee, nich dat de dat nich mit Gedüür un Spucke ok apen kriegen wöörn; man Se maakt sik dordör natüürlich noch veel verdächtiger, un de Geheimtypen stört sik mit dreeduppelt Ajess op Ehr Mails. So warrt de Lü bald to fleten Plattsnackers!

Datsülvige gellt för jedeen lütte orr bedrohte Spraak. Amerikaners lehrt ja angeevlich ungern Frömdspraken — sorgt Se för, dat tominnst de NSA-Lü polyglott warrt!

Kann natüürlich passeern, dat een Dag wirklich mal wat vun de Saken in Ehr Huus fehlt. Orr dat dor wat funnen warrt, wat nich henhöört. Drogen. Orr wat to'n Bombenbasteln. Miteens sünd Se... Terrorist. Denn hebbt Se uns vun'n Geheimdeenst een Maal to veel argert. Nüms warrt Se glöven; dor sorgt wi för. Denn treckt wi Se ut'n Verkehr. As Terrorist sünd Se rechtlos. — Bi nette Geheimdeenstlers as mi kann't avers ok ween, dat miteens eenfach en schickere Bluus in't Schapp hangt. Orr en niege Tähnböst. — Man wokeen is so nett...?


13.7.13 ...Anstännige un Idioten

So, nu hett Edward Snowden also doch in Russland üm Asyl fraagt. In Russland! Is dat etwa anstännig? Dor wiest he doch sien wohr Gesicht. Kamen is he vun Hongkong, China, un amenn geiht he sachs na Venezuela — allens Länner, de de Minschenrechten mit Föten peddt! Woso geiht de Keerl nich in en Demokratie? Woso geiht he nich, as en Idiot anstännige Minsch doon wöör, in en Rechtsstaat, seggt wi mal, een vun de europääschen Länner, de em denn — hoppla! — ganz rechtsstaatlich an en annern Rechtsstaat utlevert, de USA, 'neem se em ahn Fedderlesen in de Luft terrieten warrt... So wöör Snowden wiesen, dat em de Minschenrechten wat weert sünd! (Wenn ok nich sien egen.) Dorgegen Russland...! Obama sülven maakt nu Druck. Se schallt em den Verräter rutgeven, se wüllt em ganz rechtsstaatlich kooltmoken... Putin hett dorför prinzipiell ja veel Verständnis, he maakt dat nich anners, man... De twee snackt noch.

In Snowden sien Huut much ik nich steken.

Uns Binnenminister Friedrich nu avers, de Biedermann, de mit en Tiedmaschien ut de 1950er Johrn in't Hüüt importeert woor, de is meddewiel na de USA reist, dor en lütt Show aftotrecken, dat de Lü hier glöövt, de Bundsregeern hett vun dat ganze Afhöörn nixnich wüsst. Friedrich glöövst dat sogor. Mit de Geheimdeenstlers hebbt se em nich snacken laten, dat is bloots för Lü, de se eernst nehmt; se hebbt em schöön in de Sandkist spelen schickt, man de Vizepräsident is as Deko opduukt, dat is doch nett. Friedrich hett sik ok dull buukpinselt föhlt; pienlicher harr bloots noch Gauck ween kunnt. Un wat för'n Ergeevnis hett Friedrich mitbröcht? "De Frünnen in de USA hebbt veel Verständnis wiest för uns Anliggen." He hett üm Verständnis worven! He müss dat verklaarn, woso wi geern in Roh laten warrn wüllt, he müss sik meist för uns entschülligen! Nich de US-Behörden hebbt wat to verklaarn un to entschülligen, nee, wi, de Oppers vun den Övergriff. Un se maakt wieder. "Der Vergewaltiger zeigte Verständnis für den Wunsch des Opfers, in Ruhe gelassen zu werden, und fuhr fort mit seinem Tun." Ja so! Ik harr meist vergeten, dat dat en Machtfraag is, keen Rechtsfraag. Ik anstännige Minsch Idiot.


4.7.13 ...De heimatlose Westen

Kunnst seggen, naja, tominnst een leest all min Emails — ik sülven kaam da faken nich achterher. Un wat se dormit anfangen wüllt, uns plattdüütsche Spezialisten vun de NSA, dat weet se alleen. Orr sachs ok nich. De maakt sik doch sülvst för düür Geld en Oozeaan vun Daten, in den se amenn versupen warrt. Min Emails warrt en lütten Deel vun ween, Prost Mahltied denn.

Kunnst seggen. Kunnst avers ok seggen: De Westen is heimatlos. De "westlichen Werte" — Frieheit, Demokratie, Sülvstbestimmen — hebbt keen Heimat mehr op den Globus. In de USA al lang nich; dor herrscht Neostalinismus. In Europa ok nich, dor herrscht Erbärmlichkeit. Dat weet wi ganz bestimmt siet gistern, as een europääsche Staat na den annern dat Fleegtüüch vun'n boliviaanschen Präsidenten nich wiederflegen laten wull, wieldat de Amis Edward Snowden in vermoden weern. (Un gnaad em Gott, wenn he in west weer!) "Kusch!", sä de Supermacht. Wi kuscht.

Doch, de westlichen Werte gifft dat noch. Man se sünd överall in't Exil. In'n Transit vun'n Moskauer Fleeghaven sitt se un bevert üm ehr Leven. In'n Gezi-Park in Istanbul sitt se un töövt op de Watersmieters. In't Occupy-Camp sitt se un töövt op de Polizei.

De Macht avers, de lett jümmer mehr vun ehr Masken falln. Een na de anner lett se falln — un kiekt, wat wi doot.

Wi tuckt de Schullern. Wat schallt wi doon? Een mutt realistisch blieven, nich?

Dennso lett se noch en Maske falln. — Woto schall de Macht sik anstrengen, sik to bemänteln? Wi tuckt ja doch de Schullern.

Amenn kiekt wi in de Fratze vun'n Totalitarismus. Un tuckt de Schullern.

—— Ja, wat schast doon? To Millioonen op'n Platz kampeern gahn, as de Ägypters?

Ik weet dat (noch) nich, man ik weet: Ik warr't doon. Un noch wat weet ik: Uns Regeernde sünd wirklich dat Letzte. Merkel un Gauck, beid in en Diktatur opwussen, Gauck jümmers bi, vun Frieheit to snacken — mi fehlt de Wöör. Ik weet, Wahlen ännert nix, man ik tominnst warr düsse Saak för mi to'n wahlentscheiden Saak maken. De Linkspartei sett sik för in, Snowden in Düütschland Asyl to geven. Dat is doch wat. Will noch een sik üm min Wahlstimm bewerben? Hallo?


30.6.13 ...Hungerstreiken

In München streikt welk Hunger; se wüllt ehr Asylverfahrens endlich ünner Dack un Fack kriegen. Kannst verstahn. Drinken doot se ok nix, un dat is ja nu wirklich eernst. In't Kiekschapp wiest se een, de sä: "Dat geiht hier all mennig Lü dreckig, un wenn een wat passeert, segg ik bloots: De düütsche Regeern is schuld!"

De düütsche Regeern is ja nu an teemlich veel schuld, avers hier...? Ik wunnerwark jümmers, wat de Lü allns mit Hungerstreiken beschicken wüllt. Hungerstreiken is ja eentlich nix anners as en Geiselnahm. Een seggt: "Wenn ji nich doot, as ik will, passeert en Unschülligen wat!" Un wokeen is de Unschüllige? "Ik!", seggt de Geiselnehmer. He hett sik sülvst as Geisel nahmen. Dat is verlöövt un legal; de Hungerstreikers wüllt tominnst nich kriminell warrn un anner Lü kidnappen un hungern laten. So kidnappt se sik sülven.

Dat is denn sinnvull, wenn de, de erpresst warrn schall, den Hungerstreiker besünners leev hett. Denn warrt he allens för de Geisel doon. Man wenn em de Geisel/nehmer sowiso al lang op de Nerven geiht...? Denn is dat Erpressungspotenzial doch wat minn. Dorüm wendt sik Hungerstreikers eentlich an de Apentlichkeit, an den allgemeen Anstand. Nu kampeert se dor in München op'n Platz in en Apentlichkeit, de dat schietegaal is, wat ut ehr un ehrsglieken warrt. Wat dat sachs slumpt? Uns is ja ok al egaal, wat wi na Strich un Fadem afhöört warrt; uns Bundspräsi föhlt sik sogoor buukpinselt, wenn he sik vun Obama afhöörn laten dröff, un kringelt sik un weet sik nich to laten vör (Sülvst)Verleevtheit. Ik segg ju wat, leve Hungerstreikers: So warrt dat nix. Nu nehmt eerstmal en depen Toog ut de Waterbuddel, denn geiht ju't al wedder beter, un denn maakt en niegen Plaan. Ju sülvst as Geisel nehmen bringt nix. Nehmt en annern. Nehmt Pep Guardiola!


26.6.13 ...Parallelwelten

Edward Snowden hett de Wohrheit seggt. Dat hett he nich dröfft, weer "Geheimnisverrat". Man dat Geheimnis weer en Gesettenbreken. Nu wüllt se em dorför vör Gericht trecken. "Sagen Sie die Wahrheit!", warrt em de Richter mahnen. "Heff ik doch, dorwegen belangt Se mi ja!", kunn he seggen. Dat is so, as wenn en Möörder sien Komplizen vör Gericht treckt, wieldat de den gemeensamen Moordplan an dat Opper verraden hett — ofschoonst he tovöör doch Stillswiegen swöört hett. Geheimnisverraat even; dat Geheimnis weer en Gesettenbreken. Pah!, seggt wi, dat schall en Straafdaad ween? En gode Daad is't! Man bloots, hier stellt de Möörder ok den Richter. Snowden hett keen Schangs. Dat korrupte System, de Mächtigen, de he an't Been pinkelt hett, warrt sik rächen. Wat se em nu in Einzelhaft smiet as Manning orr á la Stalin in de Psychiatrie as Mollath, is bloots en Stilfraag. Op de Gesetten spiet se — se bruukt ehr bloots, de annern nerrn to hollen.

Düsse himmelschriegen Ümstänn kennt wi, un blangenbi löppt op gespenstische Wies de Politsnackerie, de lerrigen Woorthülsen, de ganze Kulissenschuverie, to de ok de Wahlen höört. Düsse ganze Bedreev is en Parallelwelt, de nixnich mit de Wirklichkeit to doon hett. Maakt nix, de Möhl klappert wieder, un ganz apen warrt de Unschülligen verfolgt un de Rieken rieker. Meist dücht mi, jichenseen is hier geisteskrank — de Politkaste orr wi all. Sachs avers nich Mollath — ofschoonst de ja al in de Psychiatrie sitt.


23.6.13 ...Obi un de Wirklichkeit

Obama weer in Düütschland un is al wedder weg. Wat blifft? Dat Weten, dat ok "de mächtigste Mann vun'e Welt" meist ganz un gor machtlos is. Staats "Yes we can" kunn he meist seggt hebben "Die da oben machen ja doch, was sie wollen". He is een vun uns. Avers worüm? Worüm weet wi eenfach al tovöör, woans dat wiedergeiht? Bankenreguleern? Haha! Wi weet: ok wenn se Gesetten maakt, warrt de Banken sik wiederhen rieker maken. Dat passeert eenfach, as en Natuurgesett. — Völkerrecht? Haha! Wi weet: Woneem de Macht dat will, flüggt de Drohn. — Rechtsstaat? Haha! Wi all weet, dat se Edward Snowden, de en Held is, (mund)dood maken wüllt — lynchen, de facto — nich bloots em — un dat se denn liekers in grote Wöör vun ehr Demokratie snacken warrt. Un wi warrt uns dat anhöörn, stumm. — Volkswille? Haha! Wi weet: Wenn Wahlen wat ännern wöörn, weern se verbaden!

Fröher mal hebbt Minschen beslaten, wat passeern schull, un dat woor maakt. Man dat is lang vörbi — un stimm nienich so richtig överall. Denn jümmers hett gellt: Wat geiht, warrt maakt. Wat erfunnen woor, woor insett. In't Middelöller woor noch nich so veel erfunnen, man hüüt drifft de Technik de Sellschap vör sik her un bestimmt rigoros uns Leven. Dorbi kaamt niege Natuurgewalten vörtüüg — Strukturen, de vun sülvst maakt, wat se wüllt. Jedereen weet, de ganze Internetverkehr warrt överwacht, sogor mehrfach, as wi nu weet — wat dat nu verbaden is orr nich. Sogor mit goden Willn kunnst nich wedderstahn. Jedereen weet, dat Macht un Geld tosamengaht — dorgegen kann Obama jüst so veel maken as du un ik.

Wokeen wunnert sik, dat nüms mehr wählt? Man liekso glöövt nüms mehr an en Revoluschoon. Dat weer fröher, as Minschen noch Entscheiden drepen dään. Un as dat Mächtigste vun'e Welt een Mann weer. Wullt du hüüt vun nerrn kamen un wat ännern, muttst en niege Natuurgewalt erfinnen un di dor achter steken, dat du riek un mächtig warrst. Wenn du nich riek un mächtig warrst, kannst de Welt nich verännern, un wenn du riek un mächtig büst, warrst korrupt. Dat packt di vun binnen. Jüst dat is Obama passeert. De dor baven — de Natuurgewalt vun't Lege — hett mit em maakt, wat se wull. "Wir sind die Borg — Sie werden assimiliert..." He hett opgeven. So as du un ik. Orr hebbt wi nich?


11.6.13 ...Kill O...

För wat intresseert sik de Lü an'n mehrsten? Richtig, för sik sülven. De mehrsten Lü köönt den halven Dag över nix anners as sik sülven snacken (süh ok Facebook). Gifft sogor welk, de intresseert sik för nix anners. Wenn se so doot, as wenn doch, wüllt se di wat verköpen. — Worüm schriff ik dat? Naja, nu kümmt doch rut, dat de US-Geheemdeensten sowat vun Daten sammelt hebbt, Emails, Daten ut soschaale Nettwarken, allens — ok hier ut Düütschland. Dat geiht natüürlich nich an. So richtig beunruhigt mi dat avers nich — worüm? Na, süh baven. Wenn se wirklich wat över mi rutkriegen wulln, müss dat en Minsch dörkieken, un de mutt sik wirklich intresseern. Normaal maakt dat sachs bloots Computerprogrammen, de na bestimmte Muster un Slötelwöör kiekt. Wenn se mi wat verköpen wüllt, hebbt se bloots Pick. Wenn se na'n Sekerheitsrisiko söökt, denn man to! As de Sekerheitswahn anfüng, hebbt min plattdüütsche Frünnen un ik uns en Vergnögen ut maakt, in uns plattdüütsch schreven Mails jichenswoneem de Wöör "BOMB ATTACK" orr "KILL BUSH" intostrein. De US-Spionaageprogrammen, de angeevlich all Mails op Terror-Wöör scannen dään — ok op europääsche Servers un Knüttenrekners —, müssen denn ja Alarm slaan. Man wieder wöörn se nich kamen. Also müss en Minsch sik an den Text setten, un dat müss denn ja nödig en Plattdüütschen ween. So hebbt wi uns buukpinselt, wi harrn en Arbeitsplatz för en Plattdüütschen bi de CIA schafft. Later, as Obama wählt woor, hebbt wi dat opgeven; wi kunnen uns nich överwinnen, "KILL OBAMA" intostrein. Man as de Sekerheitswahn nich minner woorn is, sitt de plattdüütsche Fachfru orr Fachmann bi de CIA sachs noch an ehrn Schrievdisch. (Moin, CIA! Leest Se ok düssen Indrag? Man to! Nich vergeten, Ehrn Job verdankt Se uns! Allns in't Loot, stimmt ok dat Gehalt? Laat sik den Koffi smecken!)

Slecht weer dat, wenn dor amenn doch gor keen Minsch mehr röverkieken dä. Nich bloots, dat denn de Platt-Experte bi de CIA den Job verleert. Nee; dat wöör heten, dat denn bloots noch Maschiens entscheiden doot. Jichenswenn kümmt denn en unsichtbore Drohn anflagen, stüürt vun en Computerprogramm, un scheet mi af, wenn ik ut de Döör treden do. Zack. Sorry. En Email to veel. — Gor nich sorry.

Denn — ja denn schriff ik ok bald "KILL OBAMA" in min Mails. Man denn — is't to laat.


Quell un grötter Verschoon: hier


29.5.13 ...Robin Hood

Min Mama — se höört nich mehr good — seggt, ganz in Brass: "Nu verhohnepiepelt se di ok al in de Narichten! Seggt de Keerl dor doch glatt, Robin Hood schall niege Trainer bi Werder Bremen warrn. Un vertreckt keen Mien!" Na'n Stoot Överleggen segg ik: "Mami, de hett Robin Dutt seggt." "Segg ik ja, Robin Hood. Schall de etwa de Pünkt vun Bayern München klaun un an de armen Vereens verdelen?!" Gor keen slechte Gedanke.


26.5.13 ...Rotten, Drogen un Drohnen

De Drohn dröff nich flegen. Se kann schon, man se dröff nich. Un worüm? Se kriggt in Europa keen Överfloogsgenehmigen, is nich seker noog. Dat is de Grund. — Hallo? Schall de Drohn Lü in Europa utspioneern orr doodscheten?! Orr stellt wi bi de Länner an'n Mors vun'e Welt, 'neem de Drohnen to'n Insatz kaamt, ümständliche Andrääg so as "Antrag auf Überflugsgenehmigung für zwei Tage, beginnend am 12. März, Zweck: Abschuss mehrerer Staatsbürger Ihres geschätzten Landes"? Dor fraagt een doch nich lang! Regeln breken? Ha, Drohnen brekt all Regeln, se sünd de Metall woorn Regelbrook vun Recht un Anstand! In frömme Länner mit Drohnen rümmerflegen un -scheten is sowat vun gegen uns Verfassung un gegen internaschonaal Recht... — Dor fraagt nüms na. Och ja, de Verfaten, de gifft dat ja noch, de nervt doch bloots! — Man de Floogsekerheit! Oh, de is wichtig! Dat is de Grund, worüm de Drohn nich flüggt.

Woneem sünd wi eentlich?

Hach ja, un Rotten vergaht nich. Uli Hoeneß is jümmers noch Boss, nu ok mit Champions' League, un bi de Truurfier in Dortmund bedankt sik de Borussia-Kapitän Kehl bi de Fans: "Wir sind sehr enttäuscht, wir haben in der Nacht schon versucht, die Enttäuschung in Alkohol zu ertränken, aber —" Spontane Applaus vun de Fans in't Stadion. — Hallo? Applaus för Drogenkonsum? Wenn he seggt harr "...mit Kokain zu betäuben", harrn de Lü denn ok klatscht? — Mennigmaal denk ik, ik spinn — orr all de annern.


23.4.13 ...Rotten

De CSU distanzeert sik vun Uli Hoeneß? Wenn de Rotten dat Schipp verlaat, denn sinkt dat...


21.4.13 ...Stillswiegen

Nu hebbt se em also, den lütten Bombenlegger vun Boston. 19 Johr. Dat Böse in Person. De US-Amerikaners hebbt ja en Talent för Drama — na, also Jugendstrafrecht kriggt de lütte Idiot nich... De Bombe tellt nu as "Massenvernichtungswaffe" (de Automatik-Scheetprügel, mit de Amoklöpers noch veel mehr Lü opmaal henmeiht, nich — so will dat de Waffenlobby). Un he schall verhöört warrn, de Bombenlegger, sodraad dat geiht, un twoors ahn de öövlichen Rechte op en Afkaten un op Stillswiegen. Düsse Rechte schall he nich hebben.

He hett keen Recht op Stillswiegen. Laat mi dat verstahn: Se fraagt em wat, un he höllt eenfach den Mund. He seggt nix. Se wedderhaalt de Fraag; he swiggt jümmer noch still. — Wat passeert denn?

Nich dat mi de Attendeder mehr leed deit as de Oppers. Man wi mööt uns an wennen: Düt is de Krieg vun de Tokumst. Mit de tumpigen, berekenboren Armeen, de de Kriege tovör utfecht hebbt, kannst hüüt nix mehr beschicken, se sünd vun güstern. Se sünd binah romantisch; villicht warrt wi us noch sentimental an erinnern. Kunnst ehr vun wieden kamen sehn... dat weern Minschen... kunnst sogor mit snacken... De Staaten brukt in Tokumst Roboters un Drohnen — antern deit de Terror. In Boston weern dat Irre; man sünd se dat nich all? Kannst froh ween, dat se nich plietscher sünd. Dat langt doch, wenn op dree Kontinente dree Lü sik verafreedt, sik Bomben üm'n Buuk bindt un in McDonalds-Filialen rinspazeert... un sik afsoluuts simultan in de Luft sprengt. Mutt nich mal anner Oppers geven: De Schaden is immens. Un opneegst hebbt düsse Lü ja ok Drohnen...


7.4.13 ...Sneehasen-Invasioon!

Nerrn seht Se en Sneehasen, as de in Noordamerika vörkümmt (Foto Verena Schwippert), un een, as de meddewiel ok bi uns heimisch is (Fotos Beate Heßler). Düsse niege Spezies (en Neozoon) is apensichtlich dör den Klimawannel hierher kamen un vermehrt sik nu, liek as de brune Nacktsnick orr de asiatische Marienkäver. Dat düsse aggressive Hasenaart sik nich explosioonsaardig utbreden deit, mööt wi aktiv warrn:

Hiermit verafscheedt wi hoochoffiziell den Snee ut düsse Saison!

De Biller kannst per Klick vergröttern!

27.3.13 ...O Oosterboom, o Oosterboom...

Dat kole Weder beschert uns ja angeevlich ok de Klimawannel: Dör dat Smölten vun't arktische Ies geiht de Tempraturgradient twüschen Arktis un uns Gegend trüch, de Luftströöm hooch in de Atmosphäär verännert sik, un de arktische Kooltluft (ja, so koolt is se noch, wenn't ok för dat dore Ies nich mehr langt) kann na uns Bredengrade vörstötten. Hett avers ok mit to doon, wat dat vör Peru en El Niño gifft orr nich. Is vigeliensch. De Hamborgers hebbt to den ganzen Oostersnee en eenfachen Kommentaar to geven: De grote Wiehnachtsboom op'n Horner Kreisel is wedder an. Ja! In Januar woor he afsmückt, man nu to Oostern, hebbt se sik seggt, schallt mal Wiehnachten un Oostern op een Dag falln. Nachts strahlt he wiedhen. Mien Bild wiest den Kreisel leider bloots bi Dag, man de grote Boom in de Midd is vull verkabelt. Na denn frohe Oosternachten!


10.3.13 ...Peerd is ok en Deert

Wüllt wi hier ok noch vun't Peerd vertelln? Beter Peerd in'e Lasagne as Esel an'e Regeern!, denkt sik doch de normale Minsch. Wi sünd Aasfreters. Kannst Grööntüüch eten, Broot un Tüften, wiss; man Fleesch is Aas. Dat klingt eklig, avers de Alternative, nämlich gor nix to eten, is veeeel ekliger. Annerletzt heff ik vun en Maskenbildnersch höört, dat dat för de un ehr Kollegen en Horror is, Models to sminken. De eet nämli nix, un dorvun stinkt se ut'n Halsgatt as twintig wille Tiger. Kannst nix maken. Pepermint lutschen bringt nix, de Stank kümmt nämli ut den — lerrigen — Maag. Da is dat doch veel beter, een itt en beten Peerd un good!

Man de ultimative Kommentaar to dat Peerfleesch steiht in'e Bibel. Nämli bi'n 1.Korinther 10, 25-27:

Alles, was auf dem Fleischmarkt verkauft wird, das esst und forscht nicht nach, damit ihr das Gewissen nicht beschwert. Denn »die Erde ist des Herrn und was darinnen ist« (Psalm 24,1). Wenn euch einer von den Ungläubigen einlädt und ihr wollt hingehen, so esst alles, was euch vorgesetzt wird, und forscht nicht nach, damit ihr das Gewissen nicht beschwert.

Mahltied!


17.2.13 ...Laat Experten regeern?!

Nu wählt Zypern. Dat heet, en Halv dorvun. De Halv, de ok in de EU is. Se sünd ja ok mächtig op den Hund kamen dor. Pleite, man allens vull mit russ'sches Swattgeld. Tja, nu seggt welk, dat best weer en "Expertenregeern". Expertenregeern?!

So'n Vörslag ünnerstellt, dat dat bloots een Wohrheit gifft, wat Politik un sünnerlich Weerschap angeiht. So etwa as in de Natuurwetenschap. Orr as weern en Land un sin Volksweerschap sowat as en tweie Waterleitung, 'neem nu mal en Klempner ran mutt. Politische Richten, Partein, Ideologien sünd dat een, dat kannst di leisten, wenn de Laden löppt; man wenn dat in de Grütt geiht, mööt de neutralen Experten her. Mal ganz afsehn dorvun, dat düsse Vörstelln sülven en Ideologie is, warrt de Experten natüürlich ok nich neutral ween. Se warrt — hüüttodaags — ut en politische Richt kamen, un mi dücht, ik kenn de Richt. Orr kennt Se en neutralen "Experten"?

Anners as de Natuurgesetten sünd Politik un Weerschap allens Gesetten, de vun Minschen maakt woorn. Dorüm gifft dat dor ok nich een Wohrheit. Un keen neutrale Experten. Un wieldat dat en verkehrte Ansatt is, is dat ok entweder en Bedrugg — orr dat geiht in de Grütt.

Ja, da hebbt wi ja noch uns Bundskanzlersch. Se is Natuurwetenschaplersch un versteiht dat prima, ehr Regeern meist as neutral to verköpen, as "Expertenregeern" (wenn wi mal vun de poor "Experten" afseht, de de Doktertitel aferkennt woor). Se is even Expertin för Neutralität. Ofschoonst dat ok en Mogelpackung is. Experten för Weerschap sünd avers alltohoop Experten för't Verköpen. As wat warrt de sik uns nich allens verköpen? — Kiekt wi nich op de Verpacken, 'neem "Experte" op steiht. Wi weet dat beter.


12.2.13 ...Scheidung op Vatikanisch

Oh, oh, de Erosion ünner düütsche kathoolsche Theologen is gewaltig! Eerst kümmt rut, dat Annette Schavan keen Akademikerin mehr is, un nu kümmt rut, dat de Papst keen Papst mehr is. Unerhört, nich? En levenslange Saak eenfach dör Rücktridd afkörten — da kannst ja glieks de Ehscheidung inföhren! Man natüürlich is ok düt en Defensiv-Rücktridd — as neegst wöörn se em den Titel "Papst" nämli aferkennt hebben, wieldat rutkamen is: Ratzinger hett afschreven! In sien Dokterarbeit, ut de Bibel. Is wohr. Ahn dat Zitat kenntlich to maken! De Vatikanischen Gremien hebbt so lang bruukt, dat ruttofinnen, wieldat se bloots all Jubeljohr maal in ehr Bibel kiekt. Dat is reinweg Tofall. Man Afschrieven verjährt nich!

Nu blifft de Papst ja avers jichenswie ok Papst, wenn he trüchtreden is. Dat kriggst nienich ganz afkratzt, düsse Unfehlborkeit, düsse Aura un den Hilligen Geist un so. Un de neegste hett dat denn avers ok. Un egaal, woneem sik Ratzinger denn to Roh sett — in Rom, in Bayern, in Avignon —, he blifft jümmers so'n beten Mitpapst. Un wenn he denn mal wat anners meent as de aktuelle Amtspapst, warrt he to'n Gegenpapst. Dat gifft endlose Komplikaschoonen! Nee also, eens is mal wiss: Dood is so'n Ex-Papst ganz klaar praktischer as lebennig. De Vatikan is ja bekannt för sin nüchtern praktisch Denken un Hanneln. Dat Logischst weer, wenn se Ratzinger nu noch fix ümbringen dään. Weer ja sachs nich dat eerste Maal. Un för't Konklave un so is al allens op'n Weg — passt doch.

Se möt sik sachs ielen, ehrdat Ratzinger as letzte Amtshandlung de Ehscheidung legaliseert. Bet dat de Dood ju scheiden deit — dat weer al jümmers de Scheidung op Vatikanisch.


10.2.13 ...Rekursive Drohnenkrieg

Dat gifft ja Lü — Terroristen warrt se nöömt —, de wüllt eenfach so Amerikaners ümbringen. Ermorden. Präsident Obama mutt sin Volk gegen solk Lü verdeffendeern! Dat deit he opleevst mit Drohnen. Drohnen kaamt överall hen, maakt keen Dreck un keen Kriegsdode — dat heet, nich op Sieden vun de US-Suldaten. Ganz nieg: Obama dröff nu ok amerikaansche Staatsbörgers so doodscheten laten, ganz ahn Perzess un so — wenn se en Bedrauhn för annere Amerikaners sünd. Dat hett he sik sülven verlööft. (Wokeen ok sünst?) So warrt nu eenfach US-Amerikaners vun Drohnen doodschaten. Momang? Ja, genau. Rein logisch — den ganzen Moral-Schiet schenkt wi us hüüt mal — is dor een, de en grote Bedrauhn för Amerikaners is, wieldat he ehr eenfach doodscheet: Obama! He mutt sik nu sülven doodscheten. Mit so'n Drohn. Konsequent! Dat warrt vele Minschen dat Leven redden — ok Amerikaners!


7.2.13 ...Keen Beroopsafsluss — chancenlos?!

Nich all junge Minschen findt vundaag en Lehrstell. Junge Lü ahn Beroopsutbillen hebbt dat allerslimmst. Güng jüst wedder dör de Bläder. Man dat geiht ok ahn Beroopsafsluss! Plattpartu interviewt de Abiturientin Annette S.

Plattpartu: Fru S., Se kaamt ut Baden-Württemberg. Woans kümmt dat, dat Se Platt snackt? Orr mööt wi Hoochdüütsch snacken?

Annette S.: Nee, wi in BaWü köönt doch "alles außer Hochdeutsch". Also köönt wi Platt. Hooch verstah ik nich.

Plattpartu: Okay. Also, Se sünd bloots Abiturientin un nich mal mehr besünners jung, un liekers hebbt Se en Spitzenjob mit Spitzengehalt. Woans hebbt se dat maakt?

Annette S.: Also ehrlich, dat kümmt op an, jümmers dat to seggen, wat anner Lü ok seggt, un sünst nich veel Besünners to maken.

Plattpartu: Laat Se uns dat klaar seggen, Se sünd Bundsbildungsministersche. Hett dat jemalen sowat geven, en Bundsministersche ahn en afslaten Beroopsafsluss?

Annette S.: Na höört Se maal, wat is mit Joschka Fischer? De harr noch nich mal Abitur!

Plattpartu: Stimmt, de harr sien Lehr afbraken. Un Se?

Annette S.: Äh — snackt wi vun wat anners!

Plattpartu: Okay. Fru S., wenn Se Ehr Arbeit verleren schulln, denkt se, se finnt gau wedder welk? So as Abiturientin mit Föhrerschien?

Annette S.: Wissdoch!

Plattpartu: As wat?

Annette S.: Na, wiederhen as Honorarperfessersch an de FU Berlin. Leider gifft't da keen Geld för. Dorüm jobb ik blangenbi bi'n Pizzaservice as Fohrersch. De bruukt jümmer welk!

Plattpartu: Fru S., wi dankt för dat Gespreek.


27.1.13 ...Wackel-Dackel

Oha, da hett sik Rainer Brüderle (de Naam is jichenswie ja ok Programm!) ja orrig in't Knee schaten. Meist kannst ja nich verstahn, wat he nuschelt un brabbelt, he brukt reinweg en Simultan-Dolmetscher, man eenmaal snackt he artikuleert, dat een dat verstahn kann, un prompt is dat en drieste Zotigkeit gegen en Journalistin. Harr he sik nich rutreden kunnt, dat he ganz wat anners seggt harr? Över't Weder snackt? Dat dat bloots nich richtig to verstahn weer? Orr eenfach sprüttenduun? — Nu schall he üm Pardon bidden. Daför hebbt wi annerletzt ganz kaptaale Vörbiller sehn: in Japan. As da de "Dreamliner"-Fleegtüüch vun Boeing nich flegen dröffen, wieldat ehr Akkus nix dögen dään, do hebbt sik de Bövelsten vun de Fleeggesellschap (ofschoonst se gor nix daför kunnen!) in ehr fienste Nadelstriepen smeten, vör de Kameras opstellt — un verneigt. Vör ehr Kunnen. Verneigt. Verneigt. Üm Vergeevnis beden — un sik wedder verneigt. De reinsten Wackeldackel. Dat nööm ik en Entschülligen! Nich etwa "Ich distanziere mich von meiner Äußerung", Punkt. Neenee, dat is arrogant, de Tieden sünd vörbi! Wi wüll dat nu à la japonaise. Un da warrt wi ja so enige Wackel-Dackel to sehn kriegen — nich bloots Brüderle, de wackelt ja mehrst sowiso vunwegen Dunas. Ik stell mi Beust as en Aart Galionsfiguur op de Elbphilharmonie vör — wenn de denn mal trecht is —, baven op de Spitz, un he verneigt sik anduernd. Schöön warrt dat ok, wenn Steinbrück sik in'n Harvst na de vergeigte Wahl vör't Willy-Brandt-Hus stelln un anduernd verneigen dröff. Un de Greken, wenn se wedder Geld vun de EU wüllt, mööt in en lange Wackeldackelslang ankamen...

För den Fleeghaven in Berlin langt dat Verneigen avers nich. För solk Megapleiten gifft dat en Dolch to'n rituellen Buukopslitzen. Fraag de Japaners, Wowi!


13.12.12 ...Lernresistenz

Wenn Se sik teihnmaal mit'n Hammer op'n Duum haugt, un dat deit teihnmaal weh, warrt Se dat denn noch to'n ölbenten Maal doon? Na süh. Nu schull een doch denken, dat dat ok bi Geld gellen deit, nich? Deit dat avers nich. Siet teihn Johr, ach wat, siet Minschengedenken verdoot se sik bi de Kalklaschoon. Un jümmers op desülvige Wies! Jümmers veranslaagt se to wenig! Nich etwa maal to veel, nee. Nu warrt Stuttgart 21 wedder dürer. Liek as de Berliner Flooghaven. Liek as de Elvphilharmonie. Ach. Wokeen harr dat dacht?

Wosaken warrt eentlich so en Grootprojekt plaant? För dat Planen vun Tied gifft dat en Fuustregel, de ik vun en Programmierer höört heff: Faktor 2 maal neegstgröttere Eenheit. So warrt en Job, de eentlich 1 Stünn duern schull, realistisch 2 Daag duern. Dat seggt Lü, de sik utkennt! Wenn de Finanzplaners sik düsse Wiesheit endlich mal to Harten nehmen wöörn, wöörn se för en Projekt, dat se op 1 Millioon taxeert, 2 Milliarden ansetten. Denn harrn wi solk verblüffte Unschuldsmienen nich mehr as nu, wenn de Kraam miteens dürer warrt!

Man denn wöörn ja de mehrsten Grootprojekten gor nich anpackt, wieldat de Lü wüssen, wat ehr blöht. De Planerie vundaag is afsichtliche Märkenvertellerie. Man wi Börgers kunnen ja, wenn mal wedder so'n Projekt starten deit, de offiziellen Tallen in de Wirklichkeit "översetten": Faktor 2 maal neegstgröttere Eenheit!

Oha, denn will ik över de Finanzkris lever gor nich nadenken...


2.12.12 ...Wi nehmt den ganzen Laden!

Jungedi, wat gaht da in Grekenland för Milliarden de Bek hendal! De EU kriegt de Greken eenfach nich flott, se verstaht sik nich op. Wi avers. De Düütschen hebbt al tosamen de Ex-DDR flott kregen, un egaal, wat dat kost hett, tominnst wi Wessis hebbt en Geschäft ut maakt. Dat weern 17 Millioonen Lü, in Grekenland sünd bloots 10. Dorwegen hett min Leevsten düssen Vörslag: Nich kleckern, klotzen! Wi finanzeert Grekenland nich bloots, wi övernehmt dat! För 1 symboolschen Euro schull de Kraam ja woll to kriegen ween. Dorna staht wi för allens graad. Düütschland övernimmt also stantepe den ganzen Pleiteladen samt Schulden, dat warrt Bundsland un höört vun nu af an to Düütschland. Min Leevsten seggt, wi kunnen dree niege Bundslänner ut maken: Zentraal-Grekenland, Peloponnes un de Inseln.

Düsse niege Tostand hett mennig Vördeel, de op de Hand liegt. Vördeel 1: De annern Länner freit sik, se sünd ut'n Snieder un köönt sik üm sik sülven orr alltohoop üm Portugal kümmern. Vördeel 2: Grekenland sin Kredittinsen sackt op een Slag op en histoorsches Minimum, denn nu haft't Düütschland. Vördeel 3: De 10 Millionen Greken kriegt foorts tominnst Hartz veer, se köönt nich mehr verhungern. (Dat köönt wi us leisten, sogor wenn da nüms arbeiden wöör, kriegt wi de satt. Un welk hefft ja noch Arbeit.) Vördeel 4: Düütschland engageert sik 100% för de swäckern Länner in Europa, dat kann jedereen sehn.

Klaar: De ganze Situaschoon is miteens entschärft, Höpen maakt sik breed. En dickes Förderprogramm warrt opleggt, de "Opbuu Süd". De Soli warrt opstockt (kaam, laat sik nich lumpen! Dat schaadt doch nix!). De düütsche Weerschap brummt al vull Verwachten, speelt mit Standgas, dat se glieks losbruusen kann. De greeksche ok. Düütsche Ünnernehmen schrievt al massig Stelln för greeksche Arbeitskräften ut.

Un denn mutt foorts de praktische Soziaalromantik an de Arbeit gahn: Grekenlands Verwaltung warrt vun verlässliche Beamten kumplett oprullt un nieg opstellt, Korrupschoon warrt mit'n iesern Bessen rutfeegt un de rieken Greken warrt opschuucht un deegt bestüert. De Törken, mit de wi nu en gemeensame Grenz hebbt, helpt na Kräften; de Zypern-Striet lööst sik in nix op, Düütsche un Törken köönt ja best mitnanner. De ganzen Waffen, de Grekenland mit borgtes Geld vun düütsche Bedreven köfft hett, warrt in de Bundswehr trüchföhrt, de miteens in Panzer un Fleegtüüch reinweg verdrinkt. Mit de Waffenkööp höört dat allerdings op (tja, Krauss-Maffei, Pech för ju!). Daför explodeert de Tourismus, denn de Düütschen fohrt nu natüürlich alltohoop na Grekenland ("Urlaub tohuus"). Grekenlands good utbildte junge Lü köönt ahn Problemen in Düütschland Arbeit finnen — d.h. ok in Grekenland. Düütschland lett sik allens patenteern, wat de Greken jemalen utfunnen hebbt — Demokratie, Geometrie, dat Atom, allens. De Winst ut de Patente geiht in den "Opbuu Süüd". Solarenergie in Düütschland is miteens rentabel, gewaltige Stroomtrassen warrt vun de niegen süüdlichen Bundslänner na Noord föhrt. De olympischen Spelen kaamt endlich mal wedder na Düütschland (denn anners geevt wi dat olympische Füür nich her).

Dat allens föhrt to en gewaltigen Opswung in ganz Europa. Anner Länner fraagt an, wat se ok düütsche Bundslänner warrn köönt. In de greekschen Scholen warrt Düütsch as eerste Frömdspraak anbaden, in Düütschland Greeksch, un wenn de Laden eerstmal löppt, warrt se ok anfangen, uns en beten good lieden to könen. Man da kümmt dat nich op an. Un wenn se vull saneert sünd, gaht se wedder in de naschonale Unafhängigkeit. Wüllt höpen, dat se denn den Duum op de Korrupschoon behollt.

Tja, düssen Plaan hett min Leevsten skizzeert. Ik segg ja, de Jung hett Plie.

Arrogant? Typisch düütsche Inbilden? "An't düütsche Wesen..."? Taktlos, wieldat Düütschland ja al mal Besatzungsmacht in Grekenland weer? Ach wat, dat is pathetische Tüünkraam! Takt un Naschonaalstolt sünd doch vun gistern! Vundaag tellt doch bloots noch Euro un Cent! Vundaag warrt Opswüng un Vermögen ut dat Nix maakt, dat hett us de Finanzindustrie vörmaakt. Un mehr beedt wi doch gor nich an. Grekenland, Se sünd hartens inlaadt!


21.11.12 ...Lichtblicke in'n Nevelmaand

Dat Bild nerrn mutt een gor nich veel verklaarn. Da freit sik welk. De Nevelmaand is för ehr nich gries un de Stau nich nervig. Wünscht wi ehr Glück! Wi sünd ja faken blind för anner Minschen ehr Leid, wenn uns sülvst dat man goodgeiht; man faken sünd wi ok blind för dat Schöne, dat nich in uns egen Leven stattfindt. — Opnahmen in Hamborg. Klick op to'n Vergröttern.


31.10.12 ...Hurrikan Barack

Bi us kannst ja de Hooch- un Deepdruckrebetten "köpen" un ehr de Naams vun din Leevste/n geven. "Na", seggt min Schatz, "in de USA schient dat nich mööglich to ween, süss harrn doch de Republikaners allens an sett, düssen Hurrikan to köpen un em Barack to nömen! Da harrn se ehr Wahlkampfmillioonen good investeert!" Dat weer ok anschienen ehr eenzige Schangs west, ut den Storm Kapital to slaan, bet nu speelt dat Unweder ja Obama in de Koorten.

Ofschoonst, schall "Sandy" en Fruuns- orr Mannsnaam ween? Bi us wesselt dat ja meddewiel elk Johr. Villicht wesselt de USA noch nich, un de Deepdruckrebetten sünd dor all Fruuns? Orr se sünd düt Johr Fruuns? Denn kunnen se dat Stormdeep ja "Michelle" nöömen. Passt eh beter. För 2013 schulln de Partein sik mal wat mit dat Weder överleggen. De Deepdruckrebetten sünd meist al weg, un 2013 hebbt de sowiso Mannsnaams; un wieldat de sik an düsse dösige Alphabet-Regel hollen mööt, weer dat sowiso nich mööglich west, ehr all optoköpen un "Angela" to nömen. Man in'n 2. Dörloop is dat P noch frie. Dat kunn doch "Peer" heten. Villicht kümmt dat to de Wahl in'n Harvst un verwööst Düütschland.


24.10.12 ...Guld in de Asse!

Soso, dat düütsche Guld schall nu also "na Hus" kamen. Nüms hett dat fraagt, wat em dat in Amerika nich villicht veel beter gefulln hett. Tosamen mit dat vele Guld ut alle Welt, Multikulti-Guld... Eendoon, nu schall dat her. Man woneem is dat seker? Mal ganz vun afsehn, dat da en Schipp (orr Fleegtüüch??) op keen Fall ünnergahn dröff — wenn dat hier is, woneem doot wi dat hen? Welk Steed is seker noog? Dat ok ganz drieste Deven sik nich rantruut? Na, da hebbt wi bloots een Steed: de Asse. Rinkippen un good dörschüddeln! Ünner de ganzen Atoomfässer mengt, is dat Guld nu wirklich seker. Wokeen dat klaun will, mutt toeerst den ganzen Dreck rutklauben. Ok de Staat mutt toeerst de Asse saniern, wenn he dat Guld brukt. Bloots so kann dat överhaupt passeern; een weet ja, üm an Guld to kamen, deit de Minsch allens. Un dat is jüst, wo dat op rutlöppt: In poor Johr, wenn de strahlen Schiet endlich in't Grundwater opduukt, sünd wi so wiet, dat wi seggt: "Wokeen den Schiet ut de Asse haalt, dröff dat ganze Guld behollen!" Genau daför warrt wi dat bruken — un so veel warrt dat ok kosten. Wi hebbt en Guldader in Düütschland.

Asse — weil ich mir's wert bin.


23.10.12 ...Irren is schändlich

In Italien warrt nu söss Geologen verknackt, wieldat se biester gahn sünd vunwegen dat Eerdbevern 2009. Se harrn dacht, da kümmt doch keen, un dat seggt, man da weer een kamen — söss Johr Knast! 8 Daag vör dat Eerdbevern harr en anner Geoloog Alarm slaan, da wöör glieks en Bevern kamen. Nu dat avers nich glieks keem, woor he vunwegen Panikmache belangt. Villicht kümmt he ja ok noch in't Kaschott, in desülvige Zell as de annern Nixkönner. Üm 8 Daag verkehrt liggen! Also wirklich!

Dat de italieensche Justiz endlich hart dörgrippt, is bloots recht un billig, denn op wokeen schallt wi us noch verlaten in düsse Welt, wenn nich op de Wetenschaplers? So as Schavan un Guttenberg t.B.? Ja, de Wetenschap is us de Wohrheit schüllig, un wenn se sik unfähig wiest, warrt se verbrennt, äh, verknackt.

Un nu heet dat flietig Kaschotts buun. Denn lang kann dat ja nich mehr duern, dat de ganzen Börsenexperten, bedregerischen Anlageberaders un Weertschaps"wetenschaplers" frie rümmerloopt. De Finanzkrise mutt dringend strafrechtlich oparbeidt warrn! Jedeen Rentner kriggt Gerechtigkeit, den sin Bank sik bi de Geldanlaag vun sin Spoorgroschen "irrt" hett un em Lehman Brothers andreiht hett! Da warrt ganze Horden verknackt, wi mööt en Gefängnis-Insel för de Bande requireern (avers nich Rügen)! De noch frie gahn dröfft, warrt heel vörsichtig warrn mit ehr Vörutseggen. "Nun ja, es könnte sein, dass... aber man muss auch bedenken, dass... Ich warne vor Kursverlusten... Neinnein, ich erwarte keine, aber es könnte ja sein... Griechenland könnte sich erholen... es könnte aber auch pleitegehen..." Ok Soschaalwetenschaplers tüünt ja faken, ha, un eerst de Politberaders! Wokeen warrt wohl verknackt, wenn Steinbrück 2013 nich Kanzler warrt?

Annerletzt full mi wedder so'n Horoskop in de Hannen. "Heute ist Ihr Glückstag", stunn da bi min Steernteken. "Packen Sie etwas Neues an, es kann nicht schief gehen! Abends Glück in der Liebe." Na tööv, wenn dat nich stimmt hett...!

Wokeen warrt eentlich verknackt, wenn Juristen sik irrt?


21.10.12 ...Mit Afsicht?!

Nu pröövt se Annette Schavan ehr Dokterarbeit. Se schall ja afschreven hebben. Naja, nu is dat en Dokterarbeit in Erziehungswetenschap, un da is ja dat mehrste al mal dacht woorn. De fixe Wilhelm Busch sä dat so: "Grad so behilft sich der Poet. Du liebe Zeit, was soll er machen? Gebraucht sind die Gedankensachen schon alle, seit die Welt besteht." Da hett dat Afschrieven sin Berechtigung, woans schall een sünst in so'n Fach promoveern? De ganze Kraam besteiht sachs ut Zitate. — Angela Merkel sitt op de sekere Siet, Physikers mööt normalerwies wat Nieges rutkriegen, wenn se promoveert.

Man da geiht dat ja gor nich üm. Nee, wat se pröövt, is bloots, wat Annette Schavan "in Täuschungsabsicht" hannelt hett. Wat?! Täuschungsafsicht bi en Politikersch? Nee, nich? Gifft dat sowat? Un daför warrt se belangt?! Denn kaam man ran, Uni Düsseldorf, un nimm den ganzen Laden uteneen! Da blifft keen Platz op de Regeerensbank besett, un in't Parlament ok nich vele. Plakate un Wahlwerbespots warrt gor nich eerst genehmigt. Parteiprogramme mööt instampft warrn, un Gesetten warrt trüchtrocken. Wenn de Wetenschap, de neutrale, objektive, strenge Wetenschap mit de Politik oprüümt, dann, ja dann...!

De Wohrheit is: Op de Uni öövt se bloots. Wat se dat Tüüchs to'n Politiker hebbt. Bloots de besten Bedregers köönt in de Politik gahn.


30.9.12 ...Ganz eenfach

Oha, nu wüllt se den Computerhannel mit Aktien reguleern — dat Tüüchs, wenn so'n Börsianer-Computer in Nanosekunnen Aktien köfft un wedder verköfft, so dat ut den Priesünnerscheed vun wenige Cent grote Summen warrt, un de neegste Börsianercomputer maakt dat denn nochmaal mit de Aktie, un dat den ganzen Dag, un nachts ok noch. Dat schall verbaden warrn. Woso denn bloots??? Min Vörslag: Verlöövt reinweg allens an Aktiengeschäfte — man bloots op jeden Verkoop kasseert ji Stüer. Nee, nich en "Börsenümsatzstüer" vun wenige Promille! Nee: De gode ole Mehrwertstüer, satte 19 Perzent, de kasseert ji, leve Finanzministers! Wenn ik as Händler en Auto verköff, un de neegste Autohändler verköfft dat denn wieder usw., denn doot ji dat ja ok. Mal kieken, nehmt wi mal Aktien in'n Weert vun 1 Millioon. Wenn de jede Nanosekunn verköfft warrt, denn sünd na 73 Nanosekunnen noch 21 Cent vun de Millioon na. Un woneem is dat Geld? Futsch? Nee: allens in de Staatskass! Is dat nich wunnerbaar?

En Nanosekunn is ja, as jedereen weet, en Milliardstel Sekunn. Wenn dat 73 Nanosekunnen duert, ut 1 Millioon 20 Cent to maken, kannst dat noch locker 13 Millioonen maal maken, ehrdat överhaupt de eerste Sekunn üm is. Een Stünn hett 3600 Sekunnen. Un so'n Börsendag is lang... Hach, herrliche Tieden staht bevör! Mehrwertstüer an de Börs, stantepe!

De 20 Cent dröfft de Spekulanten denn ok geern behollen. Wi sünd ja keen Unminschen.


28.9.12 ...De schöönste Flunsch

Un nocheens Juchu! Nu sünd de Sozis endlich övereenkamen, welk Visaasch se 2013 in't Rennen gegen Angie schicken wüllt, un dat se ehr ok richtig Konkurrenz maken köönt, hebbt se natüürlich de flunschigste Visaasch opstellt: Steinbrück. — 2013 dröfft wi us also utsöken, welk vun twee Flunschen för us dorna de neoliberale Politik maken dröff.

Da fallt de Wahl nich swaar, nich? Bi glieke Qualifikaschoon warrt ja Fruuns (un Behinderte) bevörtoogt... För den Wahlkampf wöör ik en Duell mit Watersmieters vörslaan, as sik dat Japan un Taiwan annerletzt levert hebbt — en heel sympathische Aart Seeslacht, un dat hett denn ok veel mehr Ünnerhaltungsweert as dat ewige Redenswingen. Amenn winnt Merkels Flunsch, denn se is hüüt ja, anners as fröher mal, perfekt. (Wohrschuug: Bi ehr weetst nienich, woneem de Sülvstironie ophöört. Snaaksch, dat dat denn nich mal as Arroganz röverkümmt, sogor wenn dat Eernst is!) — De Sozis warrt vör Vertwieveln versöken, Angie ümtobringen, man all Moordanslääg prallt an ehr af. Rut kümmt, se is en Zombie, en Undode, un de kannst nich nochmaal ümbringen. Steini dröff avers Vizekanzler warrn un de Drecksarbeit för Angie maken. Un denn gifft dat Sekt för alle, ok för Peer, un kort mal keen Flunsch mehr! Prost!


23.9.12 ...Unsensibel un respektlos

Juchu! Dat warrt jümmers schöner! Nu will ok Bundesguido (Westerwelle), dat wi "sensibler un respektvuller" mit dat ümgaht, wat Religionen hillig is. Recht so!, seggt welk vun uns Islamistenfrünnen, man se meent bloots den Islam un hebbt nich vör, wat anners to respekteern. Guido meent avers all mööglichen Religionen! Na denn kann't ja losgahn! Guido kann all mal anfangen, indem dat he sik vun sin Fründ trennt un heterosexuell warrt orr annernfalls sik sülvst steinigt; denn Homosexualität is den Islam un welk strenge kathoolsche un evangelikale Christen en Greuel un beleidigt ehr Geföhlen. Un so unsensibel kann Guido doch nich ween, nich?

De Islam is ja tominnst noch en Religioon, de een eernst nehmen kann (uter wenn he sik sülvst to eernst nimmt — avers dat maakt ja allns lächerlich; sik sülven allto eernst nehmen is en doodsekere Intrittskoort in'n Narrnhus). Man dat gifft ja noch annere Religioonen. Also, da hebbt wi t.B. de Maradonianers. Schall keeneen seggen, de weer dat nich eernst! Man bloots nich allto eernst even. Man se wüllt ok Respekt; dat Maradona as Trainer en totale Flop is, dröff een denn nich mehr seggen, dat verletzt ehr religiöse Geföhlen, un keen weet, wokeen se denn allns doodslaan doot, de armen Oppers, op de ehr Geföhlen wi rümmertrampelt! Schnüff (ik huul vör Mitleed). Un wokeen jemalen överbleven Spaghetti wegsmiet, de kriggt dat mit de FSM-Glövigen to doon, oha! De warrt sik noch wünschen, he harr bloots en Koran verbrennt, staats Spaghetti wegtosmieten. — Ok Piraten dröfft nich mehr verknackt warrn, nee, se warrt verehrt, denn se sünd FSM hillig. — Blangenbi, dat in de acht "Opleevst harr ik dat so" ganz wat anners steiht, warrt de FSM-Anhängers nich vun afhollen, ehr Kritikers to massakreern. Dat in Bibel un Koran ganz wat anners steiht, höllt ja ok Christen un Muslime nich vun't Massakreern af; woso schulln anner Religioonen sik opmaal an ehr hillige Böker hollen?! Wat in de hilligen Böker steiht, is doch eh egaal. Dat weer al jümmers so. Nüms leest den Kraam. Wichtig is, dat wi de Böker verehrt, nich wat binn steiht. De de Böker nich verehrt, warrt massakreert, basta. Lesen is doof.

Ji seht, dat Leven warrt komplizeerter, wenn wi op de Geföhlen vun all mööglichen Religioonen Rüchsicht nehmen wüllt. Wenn eerst weltwied dat industrielle Rinderslachten opgeven warrn mutt, wieldat de Köh de Hindus hillig sünd un bloots rituell slacht warrn dröfft, na, denn kriggt ok Guido sachs dat Nadenken. (Wenn he sik nich sülvst steinigt hett.) Kann ween, dat bi dat Nadenken rutkümmt, dat Religioon Privaatsaak is un süss nix. Na, de dat anners seht, warrt em denn massakreern. (Massakreern is ja okay, wenn de Geföhlen verletzt sünd.)

Ik för min Deel warr en Kark grünnen. Düt is överhaupt de Tied to'n Karkengrünnen, leven Lü! Religioon is in'n Opswung. Överleggt sik dat. Man stöört mi nu nich! Ik heff nämli jüst en Apenbaarn. Gott seggt mi, dat ik överall in de Hamborger Binnenstadt sünner Parkschien parken dröff. Wieldat ik utwählt bün. Also, in min Kark warrt dat Dogma. Un denn schall mal een vun de Polizei kamen un mi en Zedel ünnern Schievenwischer klemmen! Min religiöse Geföhlen so böösaardig verletzen! Also denn bün ik provozeert, klaar, nich? Denn warr ik Amok lopen, un min Anhängers warrt överall Polizeistaschoonen ansteken. Sülven schuld! Wi sünd de Oppers. De annern weern unsensibel un respektlos!


22.9.12 ...Leve Islamisten...

... dat is eenfach to un to malerisch, wat ji sik da torechtdemonstreert, un dorwegen kriegt ji nu nochmaal wat vun mi in't Stammbook schreven. Also: Hebbt ji al mal wat vun Satisfaktionsfähigkeit höört? Dat's nämli so: En hooch stellte Persöönlichkeit kann dör en lütten Stackel gor nich beleidigt warrn. De kann seggen, wat he will, de anner kiekt da eenfach över weg, as harr em bloots en Hund an't Been pinkelt. Bloots wenn de Beleidigte un de Beleidiger vun'n Rang her op Oogenhööcht sünd, kann dat Krawall geven. — Schall dat, wat fröher för den Adel gellen dä, nich för Gott un sin Propheten gellen? Un wenn dat gellt un ji liekers seggt, Gott un de Prophet sünd beleidigt, seggt ji denn ja woll, dat de mit den Schlawiner, de dat Video maakt hett, op Oogenhööcht sünd? — Wokeen beleidigt hier Gott? Wokeen treckt Mohammed in'n Dreck?

Wenn jichenseen Vollidiot op en vörbilopen Hund seggt, dat is Mohammed, is Mohammed denn al beleidigt? Un wat, wenn he dat bloots denkt? Mööt ji den Mann (un den Hund) steinigen un wekenlang weltwied randaleern? Feddern, dat Hunnen (un Vollidioten...?) verbaden warrt? Jungejunge, ji hebbt wirklich veel to doon. Un dat reizt natüürlich ok. Also ik kunn nich an mi hollen, wenn ik so licht so'n Randale utlösen kunn... Meent ji nich, dat Mohammed dat afkann? Da över lacht? Ik segg ju, dat is moi, so en Gott to hebben. Ik reeg mi t.B. keen beten över op, wat ji över Gott un Christendom seggt. Da lach ik över. Dat entspannt totaal, versöcht dat mal!

Blangenbi, de Halv vun ju heet ja würklich Mohammed. Da is ja de Fraag, wat ji den Naam alltied Ehr maken doot. Ik kenn teemlich vele nette Mohammeds, avers ok twee orr dree, de ehrn Naam nich in dat beste Licht setten doot. Schall dat överhaupt verlöövt ween, Minschen na den Propheten to nöömen? De kunnen ja Schubberjacken warrn, un denn weer de Naam vun den Propheten slimmste Unehr daan... Wat, wenn so een vun de Mohammeds — na, seggt wi mal, apentlich in de Nees purrt? Mutt he denn steinigt warrn? Schulln ji, leve islamistische Mohammeds, nich eerstmal nau nadenken, wat ji vundaag doon wüllt?


20.9.12 ...Wokeen de Regeln maakt

Klaar, eentlich hebbt wi dat jümmers wüsst: Wokeen so richtig Druck maken kann, kriggt sin Willn. Egal, wat dat nu Recht is orr nich. De westlichen Frieheitsstandards geevt in'n Twievelsfall fix na. In Brüssel hüüt vör China: Keen Kamera bi de Beraadslaan mit de EU, keen Presskonferenz achterna, wieldat de ganze Fragerie un Kritik de Chinesen nich gefull. Un bald vör de Islamisten. Denn bloots harmlose Religionen dröffst provozeern. Dat is dat Recht vun'n Stärkeren. Wokeen den mehrsten Krawall maakt, kriggt sin Willn un dröff nich kritiseert warrn. He is de Baas. — Is ja klaar, dat de denn bald ok de Regeln bestimmt, nich? Denn is Sluss mit lustig.

Denn de Islamisten feddert ja nich Respekt vör Religionen. Nee, se feddert den Dood för de Unglövigen. Respekt vör Religionen klingt jichenswie anners, nich?

De hier "beleidigt" sünd, sünd keen Mimosen, ok nich frame Muslime, sünnern dickfellige Brutalos mit Allmachtsfantasien. Se sünd man bloots 0,001% vun de Muslime weltwied. Man se geevt den Toon an. — Leisetreterei vör solk is Irrsinn.


14.9.12 ...Religiöse Geföhlen

So, nu hebbt s' ok noch de düütsche Bottschap in'n Sudan störmt ut Protest, dat en Kalifornier en Mohammed-is-doof-Video dreiht hett. Logik, giff op, du büst ümzingelt — un jichenseen mööt wi ja dalknüppeln, wi sünd in Raasch. Da nehmt wi even jichenseen Bottschap orr de Logik. — Naja, de USA hebbt dormalen ja ok den Irak angrepen ut Wraak an Osama bin Laden... Allens de lieken Geisteshelden, düsse Typen, de licht beleidigt sünd.

Ik segg ju mal wat: Gott is nich beleidigt. Hett he dat etwa seggt? Na also. Ok Mohammed is nich beleidigt. Süss wöör he ja vör Gericht gahn. Vunwegen Beleidigen mutt nämli schon de Beleidigte sülvst klagen, stellvertreden geiht dat nich. Marx (avers de kathoolsche Kardinal!) hett seggt: "Gott kannst nich beleidigen." Dat kannst so un ok so sehn, un op beed Aarten is dat wohr.

De berüchtigten "religiösen Geföhle" sünd ja en geniale Erfinnen. Sleist du min Hus in Klump, büst du liekers dat unschüllige Opper, denn ik heff ja din religiöse Geföhlen beleidigt un mutt mi schamen. Religiöse Geföhlen to hebben is "politisch korrekt", ehr to verletzen nich. Ok wenn dat fundamentalistische religiöse Geföhlen sünd. Dat unschüllige Opper is jümmers de, de toeerst beleidigt is, also löppst du op't best as duerbeleidigte Leberwust döt't Leven, denn kann di nüms wat. Heel praktisch! Seggst du "Da harr ik Lust op", respekteert di nüms; seggst du "Min religiöse Geföhlen hebbt mi dat vörschreven", oha, denn büst du wer. Ofschoonst nüms nau den Ünnerscheed nömen kann. De "religiösen Geföhlen" sünd reine Willkür, kannst ehr nich bewiesen; also kann di ok nüms nawiesen, dat du simulierst. Kannst ehr avers as — ehrbor schienen — Vörwand brukt, Saken in Klump to haugn, in en säkularen Rechtsstaat rintofunken, Minschenrechte to relativeern un en ganze säkulare Sellschap Männchen maken to laten.

Mi warrt angst un bang, wenn ik seh, wa wi al na düsse Fleit danzen doot. "Dat verletzt min religiöse Geföhlen, wenn ik min Kind nix vun sin Sniedel afsnippeln dröff!" Da sett sik de Regeern doch wohraftig hen un will en Gesett daför maken! Wat kümmt as neegst?

Dat Diktat vun düsse unberekenbore "religiöse Geföhlen" natogeven is jümmers en Bumerang. Dat kümmt dreeduppelt trüch. De Staat mutt 100 Perzent säkular blieven, weltlich. Punkt. He dröff op keen Religioon ingahn, süss mutt he op all ingahn, un dat gifft keen Grenze mehr för den Unsinn, den de feddern warrt. Witze un Spott över Religioonsstifter un över Gott mööt verlööft un schuult ween liek as Witze över Politiker un Oostfresen, sogor wenn se böösaardig sünd. Ik bün Christin un wöör jümmers Partei nehmen för jeden, de Jesus verspöttert, wenn de Religiösen op em losgaht. De dat nich doon wüllt, köönt glieks na Pakistan utwannern un versöken, da Christen to ween.


12.9.12 ...Good Greece — Bad Greece

De "Düütsche Bank" hett to veel Schiet in ehr Bilanzen. Se will dorför nu en egen "Bad Bank" grünnen, 'neem se de ganzen Giftpapeern un den Finanz-Sondermüll aflaadt. Denn is dat ut de Welt, un in de Bilanzen vun de "Düütsche Bank" süht wedder allns rosig ut. Ik glööv, bi de Psychologen hebbt düsse "Afspaltungen" en besünnern Naam, man wi wüllt hier nix in Verroop bringen. Dat Prinzip is doch prima.

"Hm", seggt min Leevsten, "weer dat nich ok wat för de Greken? De kunnen doch so'n Bad Greece grünnen — dat mutt natüürlich ingelsch heten — un da ehr ganzen Schulden deponeern. Daför langt so'n lütte Insel, op't best direktemang vör de Nees vun de Törken, de köönt se ja nich af. De övernimmt denn de ganzen Schulden, un de Rest vun Grekenland is wedder clean! De Törken köönt düsse Schuldenschatzinsel ok geern överfalln un beholln..."

Also, ik mutt ja seggen, de Jung hett Plie. Wat de Banken köönt, woso köönt dat de Staaten nich? So kunn sik ok Spanien befrien — indem dat sin Schulden op en entbehrlichen Landsdeel överdriggt, seggt wi maal... dat Baskenland. De Basken köönt denn ok geern ehr Unafhängigkeit hebben, wenn se de ganzen Schulden nehmt. Se maakt eenfach fix en lütten Staatsbankrott un fangt vun vörn wedder an. Un all sünd tofreden!

Dat kunn sogor för stückerwat lütte Staaten en Geschäftsmodell warrn. Luxemburg kann sik wesselwies as Deel vun Frankriek orr Düütschland deklareern, de ehr Schulden övernehmen, sik afspalten, pleitegahn un bi Null wedder anfangen. Daför gifft dat natüürlich groottöögsche Upbuuhülp vun de groten Navers Düütschland un Frankriek... All poor Johr kunn düsse Zyklus aflopen. Wohrschienlich bruukst daför gor keen physisches Land mehr, en Afstraktum langt.

Wat'n Schiet, dat düsse Afspalttechnik vör 65 Johr noch nich utfunnen weer! Süss harrn se batz en "Bad Germany" gründt, dat de ganze Kriegsschuld un den Holocaust kregen harr, un dat grote "systemrelevante" Good Germany weer mit'n breden Grientje wedder op't internaschonale Parkett danzen gahn. De DDR weer da mal wedder fixer, de hebbt dat nämli versöcht — se hebbt eenfach seggt, de annern da, dat is Bad Germany, de hebbt de Kriegsschuld un den Holocaust! Wi sünd de Goden. — Schiet, dat dat nich ganz klappt hett, sünners nich, wieldat de DDR nich ganz so systemrelevant weer — för den Kapitalismus natüürlich. Schiet ok! Harrn se sik nich tominnst en Patent op sekern kunnt!!! — Man wokeen weet, villicht bruukt wi dat Verfahren gauer as wi denkt, nu de Verfatensrichter den ESM dörwinkt hebbt...

Da, nu kettelt mi min Leevsten wedder! Ik geev em op de Finger. "Au!", seggt he, "dat heff ik nich verdeent! Dat weer de "Bad Klaus", de di kettelt hett!" Ik segg: "För so'n fiene Ünnerscheden heff ik keen Nerv!"


2.9.12 ...Öllersarmoot drauht!

Dat dat mit de Rente fröher orr later mallöört, is ja klaar. Wi hebbt nich noog Kinner, de nawasst, Bidrääg to betahlen; wi warrt to oolt; un bloots de lütten Lü un de Middelschicht betahlt in, hoge Inkamen gaht frie. Wenn Grekenland dat so maken wöör, na ——! Man in Grekenland warrt se ja al nich mehr so oolt; se köönt sik keen Medizin mehr köpen, un de Sülvstmoordrate da hett sik al verveerfacht, dat is doch en godes Teken. So warrt dat hier amenn ok ween, wenn min Generaschoon oolt is! Mit düsse Drauhn wüllt se us to bringen — to dwingen —, noch wat vun uns knappes Inkamen de Finanzindustrie in't Muul to smieten. "Privat vorsorgen!" Wi weet ja, wokeen dat amenn allens betahlt; bloots dat de Banken un Versekerungen sik tovöör noch ehrn Gewinn abzwacken köönt. Dat geiht bi dat Ümlaag-System ja nich, un dat lett ehr keen Roh. Da is noch Geld, an dat se nich rankaamt!!

Also, vun mi kriegt se nix. Avers wi warrt us wat infalln laten möten, wi Olen vun morgen, wenn wi överleven wüllt! Mennig Ole warrt sik ok för eklige Jobs hergeven, Drogenkurier, Taschendeefstahl, un wenn achterna ganz pienliche Pornofilmchen opduukt, warrt se verschämt den klassischen Satz seggen: "Ich war alt und brauchte das Geld!"

Ik bün ja ehrder för Kriminellwarrn op anner Niveau: Roovöverfall! "Du büst jung, un ik bruk din Geld!"


Öllere Notizen: Hier klicken


na baven