Öllere Daagbook-Notizen vun Marlou


22.4.06 ...Hartz IV is to düür...

...un wieldat dat so is, schallt nu de Hartz-IV-Empfängers gauer vun de Arbeitsagentuurn Jobs nawiest kriegen, de se glieks antreden mööt. Ja sooo! Also an de Arbeitsagentuurn hett dat legen! Ut reine Böösaardigkeit hebbt se betherto de armen Arbeitslosen de velen frieen Jobs verswegen, de se op Lager harrn. De vertwievelten Arbeitgever rungen ehr Hannen na Arbeitskräfte un kunnen keen finnen — avers de Arbeitsagentuurn wulln eenfach nich. Dat schall nu anners warrn! Na denn is ja allens good, nich? De Arbeitslosigkeit warrt in Nullkommanix verswunnen ween. Ganz ahn Spargelsteken.


15.4.06 ...Leve Silvio Berlusconi,...

...wi weet ja: Verleern is hart. Avers du wullst doch jümmers een vun de ganz Harten ween. Dat kannst du nu wiesen! De letzten Daag hest du uns ja den Gerd maakt: "Ik heff nich verlaren, dat kann gor nich ween!" Dat weer ja ganz lustig, avers den Gerd harrn wi ja al. Un he harr doch verlaren. Na, sin Afgang mit de Gazprom weer ja ok en Spitakel, avers vun di verwacht wi us noch ganz wat anners! Komm, Silvio, laat us nich in Stich! Lever us de ultimative Show, live in't TV! Nadem dat du den Gerd maakt hest, maak us nu dat Rumpelstilzchen! Dat wüllt wi noch sehn vun di, un denn nix mehr! Du weetst doch, wa dat Rumpelstilzchen güng:

Das Männlein stieß mit dem rechten Fuß vor Zorn so tief in die Erde, daß es bis an den Leib hineinfuhr, dann packte es in seiner Wut den linken Fuß mit beiden Händen und riß sich selbst mitten entzwei.


11.4.06 ...Totaal dörknallt

Wi sünd ja alle froh, dat uns Footballstadien nich mehr so alberne Naams hebbt as "Westfalenstadion" orr "Volksparkstadion". Westfalen! Volk! Park! Wa dat klingt! Dor muttst di ja vundaag meist schamen. Dat Volksparkstadion heet nu "AOL-Arena". Dor kannst di doch glieks wat ünner vörstelln, nich? To de WM warrt se twoors alle in "FIFA-Stadion" ümdöfft (vun de Terrorbande al-FIFA), dorna dröfft se avers wedder de schönen Naams vun de Firmen dregen, de dorför betahlt hebbt. Dor sünd wi alle dankbor. Blangenbi is dat de wohre Demokratie: Jedereen kann sik en Stadion köpen, wenn he bloots noog Geld henleggt! So is endlich ok dat "Volk" ut dat Stadion verswunnen, dat hett dor ja sowiso nix verlaren.

En CDU-Afordnete hett nu eernsthaft vörslaan, dat sik Firmen in Industrierebetten ehrn Stratennaam sülven utsöken dröfft. D.h. wenn Firma Kaluppke in't niege Gewerberebett apenmaakt, köönt se bestimmen, dat ehr Straat "Kaluppke-Weg" heten schall. Un woso dat nich ok in normale Stadtrebetten?, fraagt nu vele. Richtig! Woso schall de Ballindamm in Hamborg nich Hapag-Lloyd-Allee heten? Wenn twee Firmen an desülvige Straat wahnt, bestimmt natüürlich de, de an'n mehrsten Knete henleggt, is ja klaar. Överhaupt is dat Geld de eenzige Beding. För allens. Wenn sik dor en Köper för findt, kann't also ok passeern, dat de Raathusmarkt wedder Adolf-Hitler-Platz heet — as dat al fröher mal weer. Woso nich, wenn't Kohle bringt? De Kohle tellt, süss nix. — De Elvchaussee köönt sik avers nich veel Firmen leisten. Villicht verkloppt wi ehr stückenwies. Orr doch as Ganzes? Denn heet se amenn Mafiachaussee. Naja. Dat muttst even in'n Koop nehmen. Woortwöörtlich.

Avers düt Konzept för öffentliche (ja? nich etwa wedder private?) Innahmen lett sik noch breder anleggen. De Ballindamm (d.h. de Hapag-Allee) liggt blangen de Alster. Woso eentlich Alster? Woso nich Hadag-Barkassen-Paradies? Wi mööt bi Straten nich ophollen. Eentlich ok nich bi Städer. Hamborg warrt afschafft, dat heet nu Airbus-Town! Woso nich, wenn't Kohle bringt? — Dat Chemnitz wedder in Karl-Marx-Stadt ümnöömt warrt, is dorgegen unwohrschienlich. Orr is Chemnitz so billig, dat sik dat ok en Kommunist leisten kann?

Denn warrt sik min Adress ja gewaltig ännern. — Bloots min Adress? Woso eentlich? Schull sik nich en Firma en ganzen Swung Inwahners köpen un ehr ümdöpen könen? Denn heet ik opmaal nich mehr Lessing, sünnern t.B. IBM — orr Coca-Cola. Is ja ok en schöne Naam, nich? Dat ik dat Tüüchs nich drinken mag, speelt keen Rull. Ik heff dor nix bi to seggen. Ik bün en wanneln Konsum-Reklaam, de fröher mal en Minsch weer, un wanneln do ik op Reklaamflächen, de fröher mal öffentliche Levensruum, Straten un Plätze weern. — Is to höpen, dat ik mi min Naam un Adress denn noch merken kann! Avers dorför, dat de Staat us identifizeern kann, warrt sorgt ween. Wi kriggt alle so'n Chip mit'n Nummer inplant, as de Hunnen.

Oha, ik seh al, bi düt Konzept kümmt orrig Profit rut. Na, denn is ja klaar: Dat geiht in private Hannen. So is dat doch jümmers, nich? Wat Profit afsmitt, warrt privatiseert. Also warrt en Privaatfirma dat Verkloppen vun de öffentliche un private Namenswelt övernehmen. De German Name Service GmbH (GNS). Un de warrt nich so dösig ween, dat een för allemaal to verkloppen. Nee, dat warrt bloots op Tied vermietet orr verleast. De Firma köfft sik dat Recht dorför op Tied vun'n Staat. Un denn nöömt se as Eerstes dat ganze Land üm — na sik sülven. GNS-Country. "Düütschland" gifft't nich mehr, dat gifft bloots noch en Firmenparadies vull werbeträchtig nöömte Konsumenten! Ok Deertenaarten köönt privatiseert warrn. Milka köfft sik denn dat Recht an de Deertenaart "Koh" un besteiht op, dat alle Köh — äh: alle Milka-Deerten — lila anmaalt warrt. Beten later geiht dat al dör Genmanipulaschoon. Melk is denn ok lila.

Natüürlich wesselt de Naams vun Städer, Flüss, Bargen, Woolden, Länner, Minschen, Deerten un Straten anduernd, je nadem, welk Firmen ehr Verdrääg mit de GNS utloopt un welk pleite gaht. Koorten, Lexika un Adressverteknen mööt also anduernd ännert warrn. Dat is avers en geschickte Schachtoog, denn de aasigen Terroristen köönt denn in uns Land gor nix mehr opfinnen, an'n minnsten dat ehemalige Volksparkstadion, dat in dat ehemalige Hamborg in den ehemaligen Stadtdeel Stellingen leeg! Un vun de Terroristen kaamt ja Massen to de WM — pardon: to de FIFA-WM. Vör de mööt wi us schulen. Dat is uns gröttste Angst.


10.4.06 ...Platzeck un de Profis

Halv dood weer he, de arme Matthias Platzeck. Twee Höörstörten, 1 Krinkloopkollaps un 1 Nervendaalslag hett em dat kost, dat he dree Jobs opmaal maakt hett: Ministerpräsident, SPD-Bundsvörsitter un SPD-Landsvörsitter in Brandenborg. Dat weer toveel, he maak slapp. Ha! Bi dree Jobs? Dat is doch gor nix. Een as Friedrich Merz to'n Bispill, de hett poor Dutzen Jobs in Parteien, Firmen, Kanzleien, Konzernen un Lobbys, un he maakt keen beten slapp; nee, he is best bi Kräften un strengt noch Verfahren an dorgegen, dat he all sin Jobs (un also all sin Innahmen) apenleggen schall. Dat is doch en ganzen Keerl, de Merz, nich? Platzeck, mutt ik seggen, lett reinweg as en Waschlappen dorgegen. Gifft welk, de seggt, nee, Platzeck is bloots en redlichen Keerl west, de sin Jobs würklich maken wull — de würklich wat för leisten wull, woför he betahlt warrt. Ha! Denkt ji denn, Lüüd as Merz leist nix dorför, dat se betahlt warrt? Dor hebbt ji juuch avers sneden. Ik bün wiss, för jeden Euro, den solk Nevenjob-Helden vun en Lobby kasseert, levert se vulle Gegenleistung. Villicht nich jümmers in Arbeitsstunnen. Avers Arbeitsstunnen sünd ja wat för de Dummen. So as Platzeck. Platzeck weer even keen Profi. He hett sik anstrengt. Un dat kümmt dorbi rut. Echte Profis weet, woans se ehr Geldgevers ahn Anstrengen denen köönt. Bloots wa een dat denn nöömt, düt Nehmen un Geven, dat segg ik hier lever nich.


28.3.06 ...Forsche Parteien

Üm Wahlen rümmer maakt sik in den Medien jümmers en geheimnisvulle Spezies breed: de "Parteienforscher". Wenn een ehr snacken höört, sünd dat eenfach Lü, de ehr Menen seggt; man de Titel "Parteienforscher" lett so, as weer dor wat Wetenschapliches an düsse Menen — un as betahl ehr een för. Dor wunnerwark ik ja nu doch. An uns Parteien is ja nu nix Radelhaftiges, de sünd so langwielig as eh un je; dat hebbt ok de 55% Wählers funnen, de letzten Wahlsünndag tohuus bleven sünd (in Sassen-Anhalt tominnst). Orr hett een vun de Parteienforschers etwa rutfunnen, wonnemher Kohl sin Millionen harr, wokeen he sin Ehrenwoort geven hett orr wa veel Nevengeller Friedrich Merz denn nu würklich verdeent? Pustekuchen! De poor echten Parteien-Geheimnisse forscht de Parteienforschers nich ut. Se sünd as Ünnernehmensberaders: en grote Bluff, süss nix. Dat se dorvun leven köönt, mutt wat mit dat Märken "Des Kaisers neue Kleider" to doon hebben — as bi de Ünnernehmensberaders.

Man ok ahn de Parteienforscher warrt uns Parteien ja forscher un forscher. De Bundsdags-Diäten schallt nu wedder wassen — prozentuaal mit dat Dörsnitts-Arbeitsinkamen. D.h. wenn en lütt Putzbüdelsche (Friseuse) 1000 € verdeent un 3% mehr kriggt, schallt de Afgeordneten ok 3% mehr kriegen. Summa summarum sünd de Diäten nu bi 10.000 €. Per Maand. Wenn dat üm 3% wasst, maakt dat 300 €. Wenn dat Inkamen vun de Friseuse üm 3% wasst, maakt dat 30 €. De Afgeordneten kriggt 10 mal mehr, un dorwegen kriggt se ok 10 mal mehr dorto. Gerecht, nich? "Wokeen hett, den warrt geven." De Düwel scheet jümmers in de gröttste Balje. Un de Afgeordneten hebbt dat ja ok 10 mal nödiger as de Putzbüdelsche; de schall sik mal lever al an wennen, mit Hartz IV uttokamen. — Woso mööt Inkamen över 5000 € överhaupt wassen?! Un woso in Perzent? Woso nich in afsolute Tallen? Denn kriggt jedereen 30 € mehr, un dat gönnt wi uns Afgeordneten jüst noch. Avers de kriggt nüms, denn de Friseuse kriggt keen 3% mehr: de Armen warrt ärmer. Bloots de Rieken warrt rieker.


15.3.06 ...Darwin rott Darwin ut

Nu kriggt wi Düütsche meist gor keen Kinner mehr. Un dat Gejaul is groot. Nee, nich vun de Kinner (de gifft't ja nich), sünnern vun de Medien un vun'e Politik. Wat doon? huult se all. Wat dooooon?! Dorbi is de Saak ganz eenfach: En Sellschap, 'neem bloots de Stärkste överleevt, överleevt gor nich; de ganze Laden geiht togrunn. Wenn jede/r mit jede/n in Konkurrenz steiht, jümmers paraat, mobil un flexibel ween mutt, jede Tokumst unseker is, denn winnt villicht de "Beste", avers nüms kriggt Kinner. Is ja klaar. Kinner sünd bi düt Wettrennen bloots Ballast. Amenn is de allermobilste, allerflexibelste Winner alleen op de wiede Eer, un nüms is mehr dor, em orr ehr to begraven. So rott de praktizierte Weerschaps-Darwinismus sik sülven ut — irrglöövsch bet toletzt. Anners weer't ja in de DDR: Jedereen harr Arbeit, nüms harr Stress, allens weer (orr schien) seker — un de Lü kregen Kinner as för dull. Tjahaaa, höör ik den Kapitalismus triumpheern, avers düsse Weerschapsfoorm kunn nich överleven! — Nee, de Weerschapsfoorm nich, avers dorför de Kinner. — Wat folgt nu ut? Dat de Pille nienich harr erfunnen warrn schullt? Tüünkraam. Dat wi wat Nieges bruukt. En niege, fruuns- un kinnerfründliche Weerschap un Sellschap. Un wenn wi dat nich schafft, hett de Minschheit as Raaß dat even nich verdeent, to överleven. De Evoluschoon maakt dat nämli gor nix ut.


7.3.06 ...Schröder-Recycling

Oh, oh! As ik al ahnt heff: Mit de Weltmeesterschap warrt dat nix. Klinsmann is en Waschlappen. Un Gerd "Acker" Schröder, de olle Flögelstürmer, hett dat wüßt un wull sik dorwegen noch gau wedderwähln laten, ehrdat de WM verlaren is; denn dorna weer he ja wiss nich wedderwählt woorn. Un klappt hett dat ja ok so nich. Angie-Darling regeert nu, un wenn se wedder to Wahl steiht, is de vergeigte WM sachs al vergeten un vergeven. Avers Schröder! Mit em bün ik noch nich so ganz fertig. He hett dat allens wüßt, he hett noch ganz wat anners wüßt, wenn ik dor an den BND in'n Irak denk... Schallt wi em so eenfach ut de Kniep laten? Nee! He hett en Straaf verdeent. Ik weet ok welk: Schröder warrt to'n Football-Bundstrainer maakt! "Bundes-Gerd" warrt wedder "Bundes-Gerd", dwangswies, as gerechte Straaf för all sin Lögen un Öveldoon! En Gurkentruppe rümtokommandeern, dormit kennt he sik ja ut. Un wenn he den Kraam bet to de WM nich ut'n Düüstern rieten kann, so dat wi tominnst de Vörrunn överstaht, denn weet ik noch en drütte Verwennung för em: as Ball...

Avers wenn he dat schafft, un wi warrt sogoor Weltmeester ——— na, as ik uns Düütsche kenn, heet dat denn: Angie, treck di warm an! Gerd rückt denn mit de Football-Naschonaalelf op't Kanzleramt vör un putscht. Dat Volk steiht natüürlich achter em — he is ja de Helden-Trainer! Un in Tokumst is de Bundskanzler jümmers ok Bundstrainer in Personalunion. Dat Kabinett warrt entsprechend ümbuut. De würklich wichtigen naschonalen Belange staht vun denn an in'n Vörrergrunn!!! Angie maakt natüürlich foorts den Trainerschein un rückt mit de Fruuns-Naschonaalelf in Berlin in. De sünd ja al Weltmeester. Denn feddert se Gerd rut to den Kampf üm't Kanzleramt: Ölbenmeter-Duell! Egaal, 'keen winnt: Wahlen warrt afschafft. Endlich! In Tokumst warrt allens per Torwand-Scheten beslaten. Düütschland warrt endlich richtig regeert. Un Bundspräsident warrt natüürlich — Kaiser Franz. Wi hebbt de Monarchie wedder: König Football regeert de Welt.


14.2.06 ...Ehr

Valentinsdag. De Dag vun Galanterie. In Spanien hett en kathoolsche Preester — de kennt sik dor besünners ut — dat Prügeln vun Fruuns verdeffendeert: Mannslüüd, de ehr Fruuns verjackst, reageert doch mehrst bloots op Provokaschoonen vun de Fruuns. Un bavento kaamt op jedeen doodprügelte (!) Fru in Spanien ca. 1350 afdreven Kinner — also vun ehr Moders ermordte Kinner. Seggt de Preester. — So sehn sünd de doodprügeln Mannslüüd bloots de Rächer vun unschüllige Kinner, nich? To de ehr Tostannkamen un Afdrieven se natüürlich nix, gor nix bidragen hebbt. De Doodslah-Opper sünd allens Mördersche.

Över wat stöltert wi düsse Daag besünners in düsse unsääglichen Wöör? "Provokaschoon". Düt Woort warrt faken bruukt, Deders to Oppers to maken — un annersrüm. De Slahdood is eentlich en freedlichen Kierl, un dat Opper — dat nüms doodslaan hett — is de Schüllige, hett "provozeert". Jümmers is dat, wat so rechtfardigt warrt, veel slimmer as de "Provokaschoon". En Wedderwoort — en doodslaan Fru. En Karikatuur — brennen Bottschapen, Moordlust, tweislaan Kulturzentren... O ja, solk Minschen, de so reageern köönt, dröffst nich provozeern! Dat Woort sülven warrt to en Drauhen: Pass op, dat du mi nich provozeerst, du...! Gah den Rest vun din Leven vörsichtig, as op rohe Eier, dat du ja nich een op'n Slips peddst, süss büst foorts doodslaan — un hest sülven Schuld... So schafft de Verbrekers dat, dat wi uns Leven na ehr utricht, wieldat wi't behollen wüllt. Wi geevt uns Leven af, al vör den Dood. Un warrt noch för schamfeert.

Wi dröfft nich över nadenken, wannehr wi provozeert warrt. Dat alleen weer en Provokaschoon. Wi hebbt keen Ehr, de beleidigt ween kann. Ersett doch mal dat Woort "Fru" in de Preesterwöör dör "Muslim". "Muslime prügeln is doch nich so slimm. Lüüd, de Muslime verjackst, reageert doch bloots op Provokaschoonen vun de Muslime." Na? Da brennt glieks wedder de Bottschapen. Un wat maakt de Fruuns?

Ja, düsse Wöör sünd beleidigend. Deep. Wi köönt dat af. Wi hollt stand. Wenn Fruuns överall in Raasch kemen, 'neem se beleidigt warrt, weer de Welt al lang toenn. Denn geev dat bloots noch tweislaan Hüüs, keen Existenz mehr, keen Middageten un keen reine Wäsch, nüms, de achter de Randaleerers den Dreck wegmaakt un ehr Wunnen pleegt. Mannslüüd, Muslime, Spaniers: Lehrt endlich wat! Schafft juun idiotisches Ehr-Denken af, wat bloots Inbilden, Unsekerheit un Komplexe sünd. De Welt brukt dat nich — un wenn ji dat nich opgeevt, brukt de Welt juuch nich.


11.2.06 ...WM: Her mit de Suldaten!

Schall bi de Football-WM in'n Sommer de Bundswehr för Ordnung sorgen orr nich? Binnenminister Schäuble will dat, Verfatensrechtlers seggt: Dat geiht nich. De Bundswehr dröff na uns Verfaten in Düütschland bloots insett warrn

  • wenn Düütschland angrepen warrt,
  • bi en Katastrophe,
  • bi Terror. Dor dröff de Luftwaff t.B. Fleegtüüch afscheten.

Un dat, seggt de Verfatensfritzen, is ja allens nich bi de WM. — Ha! Törfköpp! Natüürlich is dat bi de WM! Wat schall süss ween?

  • Natüürlich warrt Düütschland angrepen warrn! Woto bringt de annern Mannschapen wohl süss ehr Stürmers mit, hä? Mit Flanken, Dweerpäss, Friestötten un anner vigeliensche Waffen warrt Düütschland angrepen — villicht sogoor mit Ölbenmeter! Schall Olli Kahn dat allens alleen afwehrn?! — Suldaten her! Landesverteidigung!
  • Wenn wi in de Vörrunn rutfleegt, wat schall dat wohl anners ween as en Katastrophe?! Dat Oder-Hoochwater is en Klacks dorgegen. Man wenn de Suldaten eerst na de Vörrunn opkrüüzt, is dat to laat! — Suldaten her to Katastrophenbekämpfung!
  • Un Terror? Weet ji denn nich? Wi hebbt al de slimmste Terrororganisaschoon in't Land, de dat överhaupt gifft — de al-FIFA! De Territorien üm de Stadien hett de al-FIFA besett un beansprookt ehr as ehr egen Hoheitsrebett. De Naams vun de Stadien schallt afnahmen warrn, un dorför kriggt se "al-FIFA WM-Stadion" ranschreven. Ok de friee Weerschap, uns hööchstes Goot, is bedrauht: De al-FIFA-Baas un bövelste Terrorist OSeppa Bin-Blatter drauht unverhohlen mit Gewalt, wenn fiendliche Reklaam in un üm de Stadien opduukt!

Se seht also: Bloots en massive Truppeninsatz kann Düütschland, kann de Welt noch retten. Vergeet Afghanistan! Haalt uns Jungs to de WM na Huus! Se mööt ehr Land verteidigen — hier, nich an'n Hindukusch! In Waffen schallt se vör de Stadien stahn, op den Platz un vör uns Tor! Un denn, OSeppa Bin-Blatter, denn drauht wi torüch:

10% vun alle WM-Koorten för de Bundswehr! Gratis! Orr du schast uns kennenlehren!


9.2.06 ...Globaliseert juuch!

Wi weet alle, dat de so nöömte "globaliseerte Welt" in Wohrheit veelfältig spalt, deelt un opspleten is — in Welten un Welten un Welten, de wenigsten dorvun "globaliseert". Armoot un Överfluss, apene Gesellschapen un Diktatuurn, Tradischoon un Postmoderne, Winner un Verlerer — faken gaht de Risse dwars un dweer sogoor dör enkelte Leven. Un nu wiest us de Karikaturen-Striet op noch en Spaltung hen: relatives un afsolutes Wertsetten. De Muslime, de nu so randaleert, sett ehr Vörstelln un Geföhle noch afsolut; dat dat religiöse Geföhle sünd, is Tofall, un in Wohrheit sünd dat ok eentlich bloots kulturelle Geföhle — as meist allens Religiöse. Un mit düt Afsolutsetten hebbt wi "Westlers" al so lang ophöört, dat wi gor nich mehr richtig dormit trechtkaamt. Saken, mit de wi lang ophöört hebbt, gellt us as "rückstännig" — un sünd dat in düssen Fall ok (avers nich in jeden Fall). Wat is bi us noch afsolut? De Minschenrechte? Ha! De "Krieg gegen den Terror" sett ehr man allto gau ut Kraft. De Verfaten? Haha! Mit ehr warrt jümmers jongleert, as dat jüst passt. — De Holocaust as Tabu? Jaaa... dor hett de dörknallte Iraner den Finger in de rechte Wunn leggt, nich? Düt Tabu is noch an'n ehrsten afsolut; dorvör wiekt bi us ok de Pressefrieheit. Man wat överhaupt as eenziges bi us in'n "Westen" afsolut is, is doch de Winnst. Dat Geld. De Prosperität. De Profit. Vör em wiekt jedeen Tabu, Ideaal, Recht un Verfaten. Denn: Eerst kümmt dat Freten, denn de Moral.

Dat (eenzig?) Gode an düt letzte westliche Absolutum is: dat lett sik globaliseern. Wohlstand maakt freedlich. Börgerliche Eegenheimbesitters randaleert nich. Woneem dat Wohlleven opduukt, winnt dat gau de Bavenhand över alle annern Ideen. Vernunft orr wat wi so nöömt, Opklärung, Individualisierung, dat allens löppt in sin Kielwater mit; un wat em togegen steiht, is "unvernünftig", warrt gau torüchstuuft un verleert Bedüden. Allens warrt relativ to den Wohlstand. Hebbt in Düütschland Muslime randaleert? Nee. De mehrsten Muslime in Düütschland sünd integreert in Weerschap un Wohlstand vun uns Land, an den se ok mitwarkt. Dor smittst keen dänische Bottschap twei, dor hest Beteres to doon. Klaar, de Witzbiller funnen se alle smackloos, man...

Dat beed de Welt nu en Schangs: Geevt alle wat to verleren! Laat us de Welt to en satten Freden korrumpieren! Dorto mööt wi uns Wohlstand denn avers würklich globaliseern. Dat langt nich, enkelte to bestechen; de 9/11-Attentäters weern isoleerte Wohlstandskinner, man solang ganze Regionen un Völker utbüüt warrt, wasst Radikalität na, ok in solk isoleerte Wohlstandskinner. Wenn wi uns "Werte" globaliseern wüllt, mööt wi den Wohlstand globaliseern. Laat us de Welt to en börgerliches Paradies maken! Alle Spaltungen laat sik överwinnen, wenn wi alltohoop den Gott Mammon huldigt.


7.2.06 ...Danke!

Danke, leve Karikaturisten, ...

  • ...dat ji 1 Milliarde Minschen gratis Geografiestunnen geven hebbt. Jedeen Muslim weet nu, dat dat en Staat Dänemark gifft. Un dat dor wat fuul in is. Woneem de liggt, weet (to'n Glück?) nich alle.
  • ...dat ji uns wiest hebbt, woans ok dat lüttste un obskurste Land in Nullkommanix wied bekannt un beropen warrn kann — wenn ok bloots na dat twievelhafte Motto "viel Feind, viel Ehr". So köönt ok Andorra un San Marino sik in de Welt bekannt maken!
  • ...dat ji ok enkelte Personen, de sik wichtig maken wüllt, en prima Weg na den Ruhm wiest hebbt. Ok de Fahnenindustrie dankt! Wenn't dor mal Flaute gifft, betahlt se en obskuren Karikaturisten, un batz! löppt dat Geschäft wedder. Mit de exotischsten Fahnen. Dat lett sik ja exakt stüern. Hauptsaak good brennbar.
  • ...dat ji uns nochmaal de Macht vun'n Fedderkiel, vun Wöör un Teknen wiest hebbt. Dat trööst un vermünnert us. Schoonst versöhnliche Wöör un Biller ja wied minner beacht warrt as opwieglerische. Dormit hebbt wi rekent.
  • ...dat ji uns to bringt, nochmal bi Matthias Claudius natoslaan: "Stich nicht leicht in ein Wespennest, doch wenn du stichst, dann stehe fest!" Wenn ji us dat nu noch vörmaken wullt, dat weer dull. Man betherto maakt ji dor en kläägliche Figur — bi de Besonnenheit so as bi dat Faststahn.

Danke, leve Islamisten, ...

  • ...dat ji uns an'n 11.9.2001 vun de Spaaßgesellschap befriet hebbt! De güng us gewaltig op'n Wecker, dat woor hoge Tied. Wi warrt juuch dat nienich vergeten.
  • ...dat ji us nu wiest, dat keen Spaaß verstahn mehrst ok heet: keen Kritik verdragen. Wenn Frieheit miteens "Provokaschoon!" heet, överleggt wi us dat mit de Spaaßgesellschap nochmal.
  • ...dat ji uns wiest, wa veel junge Mannslüüd mit nix to doon dat op de Welt würklich gifft un woto de allens fähig sünd ut Langewiel, överschüssige Energie un anknaxten Sülvstwertgeföhl.
  • ...dat ji uns wiest, dat af un to so'n lütten Krieg villicht gor nich slecht weer — konvenschonell un bloots ünner Juuch natüürlich —, en Krieg, de de ganzen överschüssigen Jungs so richtig wat to doon gifft, un as Helden föhlen köönt se sik bavento. Un wenn't in'e Büx geiht — maakt nix, ji leevt ja sowiso den Dood, nich? Wieldess wi dat Leven leevt, wi nixhaftige dekadente westliche Kreaturen.

5.2.06 ...Benni, Heini, Mohammed

Dat weer ja klaar, dat sik nu ok noch de Papst to de unsääglichen Larm vunwegen de Mohammed-Karikatuurn mellen müss. Un eentlich weer ok klaar, op welk Siet he sin Stimm afgifft, nich? Nich etwa, dat de Vatikan sik jichenswie good steiht mit Meinungstotalitarismus — ach wo, nich doch! Bloots ut Zaartgeföhl kritiseert he de Karikatuurn. Se weern en Provokaschoon, un de Menensfrieheit geev een nich dat Recht, anner Lü op ehr Geföhle to pedden, seggt Benni de Sössteihnte. — Dat Dumme dorbi is bloots, dat de annern Lü dorbi de Regeln bestimmt. De Gesetten vun'n Islam gellt avers nich för uns. Wi köönt us nich willkürliche Regeln ünnerwerfen, an de wi nich glöövt un de wi nich inseht; un schon gor nich, wenn wi ehr mit Gewalt dikteert kriegen schallt. Fangt wi dormit gor nich eerst an! Süss warrt dat jümmer doller un doller, as mit Fru Ilsebill in't Märken. "Wat will se denn nu?" froog de Butt. "Nu", sä de Fischer, "nu will se Papst ween..." Sühst, Benni, dor geiht di dat sülven an't Leder!

Dat gifft Regeln, an de wi us alle hollt, un Sünnerbehandlung gifft't för nüms. Ik kann den Papst, sin Hilligheit Benedikt den Sössteihnten, "Benni" nömen. Basta. Weer Benni en muslimische Prophet (sorry, Benni, nix för ungood!), denn — kunn ik dat ok! Basta. Man de muslimische Mob weet gor nich, wat en Karikatur is; he hett Füer fungen as de Fahnen, de se nu överall verbrennt. (Woneem kriggt de mitmaal de ganzen däänschen Flaggen to'n Verbrennen her?) Düsse Mob bestätigt bloots dat Bild, dat Mohammed mit Bombenkopp wiest. "Bravo!" roopt se den Tekner to. Se blameert un beleidigt — nee, nich Gott, den kann nüms beleidigen, nich Muslim un nich Däne — man ehrn Gloven, den beleidigt se, slimmer as jede Karikatuur. Wa schaneerlich mutt düsse Mob ween för de börgerlichen, normalen, anstännigen Muslime! De doot mi leed. Ja, de Islam is nich so. Weet wi. Man "Weise erdenken die neuen Gedanken, und Narren verbreiten sie", seggt dorto Heinrich Heine, un woneem he recht hett, hett he recht (also teemlich faken). "In dunkeln Zeiten wurden die Völker am besten durch die Religion geleitet, wie in stockfinstrer Nacht ein Blinder unser bester Wegweiser ist; er kennt dann Wege und Stege besser als ein Sehender. Es ist aber töricht, sobald es Tag ist, noch immer die alten Blinden als Wegweiser zu gebrauchen." Ach Heini, Heini! Din Böker warrt de Mob bald ok wedder verbrennen, sodraad he sik truut, ehr to lesen! "Dies war ein Vorspiel nur, dort wo man Bücher verbrennt, verbrennt man auch am Ende Menschen", seggst du. Bi de Fahnen sünd wi al. Wedder. De trostlose Lächerlichkeit vun't Weltgeschehn is enorm.

Schallt wi us nu opregen? Schallt de "uns mal kennen lehren"? Ach wat! Wi laat us nich bangemaken, bedrauhn laat wi us schon lang nich, avers beleidigen laat wi us ruhig mal beten. Düt ewige Licht-beleidigt-Ween geiht mi gewaltig op'n Wecker. Villicht sünd wi Fruuns beter in öövt, Beleidigungen wegtosteken — keen beniedenswerte Fertigkeit, man wi geevt ehr geern wieder an de ganzen (muslimischen) Mannslüüd, de annere so faken beleidigt un sülven so licht op den Slips pedd sünd. Wenn de noch en Gang hoochschalt, schalt wi noch een rünner. Wi laat us gor nich ut de Roh bringen. Villicht beleidigt se dat ja ok. Man villicht maakt dat denn ok Pffft!, un de Luft ut dat ganze Spitakel is rut.


29.1.06 ...Horst Mahler is Düütschland

De Idiot Horst Mahler (fröher RAF, vundaag Nazi) dröff nu nich in'n Iran fohrn. Dor wull he hen, wieldat de dörknallte iraansche Präsident dor en antisemitische Konferenz maakt, un Mahler wull dor sin Leevlingsbeschäftigung nagahn: Holocaustleugnen. Nu mutt he tohus blieven. De Staat hett em för en halv Johr den Pass sperrt. Begrünnung: He wöör süss dat Ansehn vun Düütschland schaden. — Richtig so! Mahler schall vun mi ut för jümmers ünner Versluss blieven. Schöön ok, dat de Staat so üm dat Ansehn vun Düütschland besorgt is. Notorische Football-Hooligans mööt ja al lang tohuus blieven, wenn't Lännerspele in't Butenland gifft. Man woso lett de Staat eentlich de düütsche Naschonaalmannschap noch utreisen? De schaadt dat Ansehn vun Düütschland doch an'n mehrsten! Also echt: Kiekt Se doch, woans de kickt. En Schann. — Un de ganzen Proleten, de sik op Mallorca jümmers bet in't Koma besupt un rümmergröhlt, de dröfft opneegst nich mehr in Urlaub fohrn. Se ruineert ja nu würklich uns Ansehn in de Welt! Pass futsch, Spaaß futsch. Schallt se doch in Düütschland rümgröhlen, dor stöört dat nüms! — Un wat is mit Schröder?! Sin Deal mit Putin un de Gazprom hebbt uns Ansehn in de Welt bannig schaadt! In de Korrupschoons-Weltranglist sünd wi wedder poor Plätze opstegen. Ik fraag Se in'n Eernst: Köönt wi dat verantwoorten, solk Lü as Schröder in de Weltgeschicht rümreisen to laten? Na Russland, na sin Gazprom-Job? Nee, segg ik! Pass weg! Hannover is ok en schöne Stadt.

Wenn Se opneegst op Reisen gahn wüllt, maakt Se sik en naue Checkliste: Siedenscheitel, witte Kragen, Fingernägel reinlich, de Büx frisch bögelt — un dat Se ja de Schoh good poleert hebbt! Grundgesetz ünnern Arm; den Artikel över Freizügigkeit mööt Se vörövergahn vergeten. Bloots staatstragende Lü dröfft reisen, Lü, op de de Staat stolt ween kann. (De Ossis kennt dat noch.) Allens checkt? Denn Nees hooch, en frisches Smüüstern opsetten un los. Jümmers schöön an denken: Du büst Düütschland.


22.1.06 ...Ieskole Rekners

Jüst geiht dat wedder dör de Medien, de Prozess vun en Ollenplegersch, de 8 ole Daams henmaakt hebben schall, erstickt mit'n Kissen. Nu warrt ehr de Prozess maakt.

Ole Lü dröffst nich ümbringen. De Enkelte dröff dat nich. Ok wenn se denkt, se dröff dat. Un dat se dat dacht hett, is gor nich so unwohrschienlich. Överall klingt dat doch so: "Ole Lüüd sünd en Kostenfaktor. Ole Lüüd sünd en Last för de Gesellschap. Ole Lüüd gifft dat veel to vele. Ole Lüüd sünd nich mobil. Ole Lüüd maakt de Krankenkassen arm un föhrt to högere Lohnnevenkosten. Ole Lüüd sünd en Standortnadeel!" Wokeen schafft uns de endlich vun'n Hals? Wokeen sorgt för dat sozialverträgliche Frühableben? De Olenplegersch hett seggt: Ik maak dat. Se landt vör Gericht; de Anstifters, de ieskolen Rekners, nich. Mi dücht, dat is as mit de Folter in de USA: De ganze Stimmung is "Terroristen höört foltert!", bloots de, de dat denn würklich maakt, mutt vör Gericht. As Sündenbuck. Na'n Bookstaven vun't Gesetz warrt he verurdeelt; man de Geist vun't Gesetz in de Sellschap weer lang perdü. Dat is perfide. Gegen de Opper so as gegen de Deders. Mehrst heff ik dat Geföhl, de Deders sünd hier ok Opper. Se hebbt dacht, wat se maken, weer good.

Foltern is leeg, avers... Avers...
Enkelte Minschen ümbringen is leeg, avers för den Standort (dat letzte grote profane Hilligdoom) weer dat ganz good, wenn bestimmte Minschen — Ole, Behinnerte, Langtiedarbeitslose — nich dor weern.
Is dat en Wunner, dat swacke Minschen Good un Leeg nich mehr uteneenhollen köönt, wenn ehr dat so swaar maakt warrt? Is dat Afsicht?

Wat nienich passeert, is, dat de Anstifter sik mal in de Opperrull wedder findt. Laat Putin mal in Tschetschenien leven! — Laat Bush mal foltert warrn! Oh pardon, dat is ja keen Folter nich; "Waterboarding" un de ganzen "effizienten Verhöörmethoden" sünd keen Folter; also laat Bush mal nich-foltert warrn! — Laat de Ieskolen Rekners man oolt warrn. Oolt warrn in Armoot. Leider, dat passeert nich.


8.1.06 ...Guido Häwelmann

Dat gifft ja Hüüchlers in de Politik, welk, de sik verstellt, un dat gifft de FDP. Allens kannst ehr naseggen, Hüchelee nich. Se sünd so ehrlich, dat se sik af un to vör sik sülven verjaagt. Dat maakt denn Spaaß, ehr Verschrakenheit to sehn, etwa dormalen mit den Snack vun de "Partei der Besserverdienenden"; dor weern se achterna doch verbaast: "Huch?! Hebbt wi dat würklich so apen seggt?" Un nu, bi dat Dreekönigsdrepen, sühst Guido Westerwelle stahn un snacken ünner den reesenhaftigen Slogan "Für alle, die mehr wollen". Ha. So slicht un graadut kannst ween. Dor kunnen sik de annern mal en Bispill an nehmen. Is doch wohr: Dat eenzige, wat de Minschheit jümmers wüllt hett, is mehr. Mehr vun allens, mehr för mi — hebben, hebben, hebben! Her dormit! De Fraag na den "Sinn vun't Leven" is reinweg lächerlich gegen düt grote Mehr!, dat de Weltgeschicht bestimmt. Man wokeen truut sik dat uttospreken? De Gewerkschapen? Nee, de verbrämt dat mit dat Gemeinwohl. De Industrielobby un Arbeitgeberverbänn? Hach, de hebbt doch en himmlische Sendung — dat Wassdom, för dat se alleen sorgen köönt. Seggt een: "Ik bün gierig, un dat ist ok good so!" ? Nee, alle schaneert sik, nüms bekennt sik apen to sin Gier — nüms as de FDP. So sehn müss de FDP längst de eenzige un gröttste weltwiede Volkspartei ween! De Partei för de "Besserverdienenden" un alle, de dat warrn wüllt. En Partei för jedereen even.

De Fraag is, woans ut en endliche Welt jümmers Mehr! ruthaalt warrn kann. Dat schert de FDP nich wieder, so wenig as all de Wassdomsanbeter. De maakt dat as de Lütte Häwelmann in dat Märken vun Storm. Düt Märken hett Storm nämli sünnerlich för de schreven, de Wassdom mit Konsum un Konsum mit Wassdom "ankurbeln" wüllt: Häwelmann hielt das eine Beinchen wie einen Mastbaum in die Höhe. Sein kleines Hemd hatte er ausgezogen und hing es wie ein Segel an seiner kleinen Zehe auf; dann nahm er ein Hemdzipfelchen in jede Hand und fing mit beiden Backen an zu blasen. Und allmählich, leise, leise, fing es an zu rollen, über den Fußboden, dann die Wand hinauf, dann kopfüber die Decke entlang und dann die andere Wand wieder hinunter. "Mehr, mehr!" schrie Häwelmann. Dat schriegt he jümmer wedder, bet he amenn in't kole Water vun de Realität lannt. Ja und dann? Weißt du nicht mehr? Wenn ich und du nicht gekommen wären und den kleinen Häwelmann in unser Boot genommen hätten, so hätte er doch leicht ertrinken können!


29.12.05 ...Reisen mit de Kidnap Card

Hu, mit dat Entföhren vun Bunnesbörger warrt't ja langsaam beten veel. Knapp hebbt se de Osthoff frie, de ja anschienend as an'n Gummiband jümmer wedder in'n Irak trüchfluppt, dor hebbt se in'n Jemen glieks fief Mann hooch hops nahmen. Jungedi, wat dat de Stüertahlers kost, de Lü jümmers frietoköpen! Wo de Staat doch keen Geld hett! Bunneskanzlersch Merkel warrt dat nu to bunt. "Dat schallt de Entföhrten in Tokumst sülven betahlen!" höört wi vun good informeerte Krinken ut Berlin. Recht so! De mehrsten "Levensrisiken" (so nöömt een dat ja wohl) muttst vundaag privaat dregen, woso nich Entföhrung? Öller, Süükdom, Arbeitslosigkeit — överall treckt sik de Staat trüch un lett de Minschen mit ehr Noot alleen. Private, kommerzielle Anbeders övernehmt denn gegen Geld de Risiken. Jüst so kann't mit dat Entföhren ok gahn, meent uns Regeern!

De Weerschap freit sik op. De Düütschen reist ja doch so geern, dor lett sik wat verdenen. Denn natüürlich sünd Levensrisiken, de een privaat dregen mutt, en Fall för de Versekerungskonzerne. In Tokumst kannst nich mehr ahn Entföhrensversekern losfohrn, liekso as Pass un Butenlands-Krankenversekern höört dat dorto. Man natüürlich gifft dat ünnerscheedlich Tarife, je na Reiseland un Geldbüdel. De Allianz-Versekern beed t.B. dree Tarife an: Kidnap Card Silver, Kidnap Card Gold un Kidnap Card Premium. Warrst t.B. in'n Jemen kidnappt, denn treckst glieks din Kidnap Card ut de Tasch un höllst dat de Entföhrers hen. De treckt ehr Magneetstriepen-Leesgeräät vör un hebbt foorts alle din Personalien, ja se weet ok, wannehr du toletzt entföhrt woorst un wat dor för di betahlt woor — jüst as bi'n Dokter mit de Krankenkassen-Koort. Op de Kidnap Card steiht ok, an wokeen de Kidnapper sik wennen mööt — de Allianz billt mit Hoochdruck ehr egen Verhannlungs-Spezialisten ut — un wa veel se maximaal för di betahlt. För Kidnap Card Premium-Inhebbers betahlt se bet 5 Millioonen, man de Tarif is natüürlich ok saudüer (mit Sülvstbeteiligung!). Wenn de Jemeniten so een faatkriggt, dat is as en warme Regen för ehr. Kidnap Card Silver-Inhebbers dorgegen warrt faken glieks ümbröcht, wieldat sik dat gor nich lohnt, de so lange dörtofodern, bet de Verhannlungen afslaten sünd. De bringt nix.

Wat anners is dat, wenn du nich in'n Jemen, sünnern vun de CIA kidnappt warrst. Orr in'n Jemen vun de CIA (dat kann di överall passeern). De Allianz verhannelt över en Verdrag mit de CIA, man de wüllt sik op nix inlaten. Kann also ween, dat du lever noch en Tosatt-Versekern afsluten schullst: Gegen Opgeld gifft dat den Tarif Kidnap de luxe mit de Non-torture-Card. Villicht — villicht! — warrst denn nich foltert. Man ok dat Nich-Foltern is bi de CIA ja nich so richtig erholsam.


19.12.05 ...Caligulas Peerd

Bush beswöört sin Landslü, de USA dröffen nich ut'n Irak aftrecken, denn dat weer "en Teken, dat de USA ehr Woort nich to truun is". Süh. Bruukt wi so en Teken noch? Truut wen denn ehr Woort?

De Bush-Regeern gifft meddewiel to: Saddam harr gor keen Verbinnung to Al Qaida. Un Massenvernichtungswaffen gifft dat sowiso keen. Ach wat?! De Kaiser harr gor keen Kledaasch an? Hebbt wi dat nich lang sehn? Wi hebbt; de US-Regeern wüss dat; un dat weer ehr ganz egaal. Bloots seggen schullen wi nix. Nu seggt se: De USA foltert nich. Dor sünd wi aver baff. Wüllt se, dat wi ehr Wöör glöövt? Nee; se weet, dat dat al lang nüms glöven kann. Wi schallt bloots so doon — wi schallt dat Muul hollen.

Wat de US-Regeern aflevert, is en klassisches Schauspeel vun pure Macht. Fröher dach ik, se wullen mit ehr Snacken de Welt betuppsen, man nu bün ik övertüügt: Wi schullen nienich betuppst warrn. Dorto weer dat veel to dörsichtig opmaakt. Dat dat nüms glöven kunn, weer klaar. Nee: Dat weer en Disziplineern. En Dressur. En Ring woor us henhollen, un wi schullen dörjumpen. Poor sünd jumpt. (Nich wohr, Fru Merkel?)

Wat weer dat denn, as Colin Powell in'n UN-Sekerheitsraat de primitivste Fälschung, de sogoor en Kind dörschaun kunn, as "Fakten" präsenteer? Dat weer en klassische Machtgeste. Wi schullen dat nich glöven, wi schullen stillswiegen un pareern. So hett (in Schillers "Wilhelm Tell") Landvogt Geßler en Hoot ophangen: De ünnerdrückte Bevölkerung müss em gröten as ehrn Herrn, schoonst jedereen sehg, dat dat bloots en Hoot weer. So hett Kaiser Caligula (in't Johr 40 n.Chr.) sin Leevlingspeerd to'n Senater ernannt, un alle Römer müßten dat Deert as Senater ehren. Dat weer keen Wahnsinn; de Geschichtsforscher hebbt rutfunnen, dat he dat bewusst dä, üm de Senatoren to demütigen. De Macht triumphiert över de Wirklichkeit. Wenn nüms över ehr is, kann se dat de Minschen driest tomoden. Orr, as Lady Macbeth so schöön sä:

Was haben wir zu fürchten, wer es weiß, da niemand unsre Gewalt zur Rechenschaft ziehen darf? (Macbeth, 5.Akt)

Dat kunn vundaag seggt woorn ween. Jichenswo in't Witte Hus.

Wat de Mächtigen seggt, is faken en Spiet, en Hohn, en afsichtliche Demütigung. Liekers kannst rutfinnen, wat de Mächtigen meent: Bruuk eenfach den sunden Minschenverstand. Wat klaar is, stimmt mehrst. Dat eenzige, wat dat in Irak würklich geev, weer Ööl. Un dat riet sik nu de US-Konzerne mit langfristige Verdrääg billig ünnern Nagel. Dat hebbt wi ok lang wüßt, dat dat so kamen wöör. Wat snackt woor, weer dat een; wat op de Hand leeg, dat annere.


18.12.05 ...Pamuks Prozess

In Istanbul maakt se opstunns den Schrieversmann Orhan Pamuk den Prozess vunwegen "Herabsetzung des Türkentums". Wat de Mann maakt hett, weer dat, to seggen, dat de Völkermoord an de Armenier würklich en Völkermoord west is. Ungewöhnlich; de Trend is ja opstunns, Völkermoorde un Holocausts as "Märken" aftostempeln, as de originelle Keerl in'n Iran dat deit. Nich so Pamuk. Un dat is denn "Herabsetzung des Türkentums". Höört sik för Düütsche bekannt an, nich? Wi harrn ja ok en Völkermoord in uns Geschichte (nee, dat is keen Märken), un wi harrn lange an to knabbern un knabbert noch. Wat nu in de Türkei löppt, lett heel düütsch — as ja överhaupt uns twee Völker veel gemeensam hebbt.

Bi de Anklaag "Herabsetzung des Türkentums" stellt sik glieks twee Fragen: 1. Wat is dat Türkentum?, 2. Wa hooch steiht dat? De twete Fraag toeerst. Wenn een en Saak rünnersetten kann, mutt se tovöör hooch seten hebben. Bi us heet dat fröher maal "Deutschland, Deutschland über alles". Wenn een vun so en Hööcht anfangt, is reinweg allens en Herabsetzung, ok de Satz "Düütsche sünd normale Lü". Wenn dat strafbor is, kannst rein jeden in't Kaschott bringen. Wa veel ehrder för dat Woort vun Völkermoord! Fröher heet dat bi us af un to "Nestbeschmutzung". Herabsetzung even. Man nu is de Idee, dat wi höger staht as annere Völker, to'n Glück vörbi. Wi pendelt nu üm Normal-Null, nich höger, nich deper as annere. Min Prognose: Dor warrt de Türken ok lannen. Bald. Un se warrt weten, dat bi Normal-Null — also bi ganz normale Völker — Moord an annere Völker mööglich is.

De anner Fraag weer: Wat is dat Türkentum? De is sachs so swaar to antern as "Wat is düütsch?" Op jeden Fall nich Völkermoord, dat hett nüms geern in de Familie. Dummerwies is dat wohr. Dat kümmt in de besten Familien vör. De kreative Lösung kümmt mal wedder ut de USA: As de Quäälkraam vun Abu Ghraib an't Licht keem, heet dat vun de Regeern: "Dat is unamerikanisches Verhalten." Vulltreffer! Grenzt wi dat Gresige eenfach ut. In'n Eernst: Dat is beter, as dat doodtoswiegen! Un villicht helpt dat, dormit ümtogahn. De Türken kunnen nu seggen, ja, den Moord an de Armenier, den hett dat geven, man dat weer "untürkisches Verhalten". Dat weer doch en Anfang. — Woso sünd wi eentlich nie op kamen, den Holocaust as "undeutsch" to brandmarken?

Orhan Pamuk warrt teemlich wiss friespraken. De Prozess is al middelöllerlich noog; en Verurdeeln kann sik ok de Türkei vundaag nich mehr leisten. Na buten nich. Man wa süht dat na binnen ut? — Dör Pamuks Prozess kiekt wi as dör en Brennglas op en Stück vun uns egen Geschichte.


14.12.05 ...Ravenvadder Staat

In Hamborg is düt Johr en Kind in en düüster Stuuv insperrt verhungert, wieldat sin Öllern dat eenfach in'n Stich laten hebbt — ignoreert, wegkeken hebbt. Un villicht gifft dat noch mehr Kinner, de dat opstunns so geiht, un nüms weet dat. Gresig Vörstelln. De egen Öllern kiekt weg!

Wenn en Börger in Noot is, hett de Staat — dat Gemeinwesen — to düssen sin Börger datsülvige Verhältnis as en Öllerndeel to en Kind. Dorher kümmt ok dat Woort vun'n "Vadder Staat". Alle Düütschen tohoop bildt un dreegt dat Gemeinwesen, un düt Gemeinwesen steiht de bi, de in Noot kaamt. So steiht achter de, de in Noot sünd, jümmers de ganze Gemeenschap. Un wenn en düütsche Börger in Afghanistan in en düüster Stuuv hollen warrt, hülploos, mit'n Dood bedrauht, denn hett de düütsche Staat för em intostahn as en Vadder för sin egen Kind! Dat is ganz egaal, wokeen dat Kind entföhrt, insparrt un bedrauht — de Vadder Staat mutt doon, wat en Vadder deit! Un he mutt dat vun ganzen Harten doon, nich halvhartig! He mutt kämpen för sin Lanneskind! Man wat hett uns Vadder Staat daan? Wegkeken. Vertell mi nüms, se harrn dat nich wüßt! Un wenn nich — wat deit denn de Vadder, de Moder vun en entföhrtes Kind?! Geevt se Roh? Ignoreert se dat? Kiekt se weg? Keen Momang glööv ik Schily, dat de CIA em nix vertellt hett. Un wenn nich — denn is dat de Job vun de düütschen Behörden un Geheemdeenste, dat ruttofinnen! Un, blangenbi: Dat is egaal, wat de Düütsche, de in Noot is, schüllig is orr nich — sin Staat hett för em intostahn. Dat is liekso as mit den Rechtsanwalt un den Mandanten. Toeerst mutt de düütsche Staat sin Landeskind ut de Bredouille ruthaugn, un denn kannst ünnersöken, wat de sik schüllig maakt hett — na düütsche Gesetten, nich na de vun de CIA!

Man wat doot de düütschen Behörden? Hüüt kriggt wi to weten: Düütsche Geheimdeenste hebbt mitholpen bi dat "Verhören" vun den Düütschen Mohammed Zammar in Syrien (!). De schall nu würklich en Terrorist ween. Eendoont: De Opgaav vun de düütschen Behörden is dat, em hier vör Gericht to stelln — un nich, em de CIA to'n Foltern utlevern un sik to'n Komplizen maken! Verdammt noch mal!

Khaled Al-Masri is nu frie. Man villicht gifft dat noch mehr Düütsche, de in de Hannen vun de CIA smacht? Schüllig orr unschüllig? Un de düütschen Geheemdeenste un bestimmte Politikers weet dat nau un doot liekers nix? Kann dat ween, dat wi mit uns Stüergeller de Behörden un Geheimdeenste finanzeert, de uns achterna in'n Stich laat orr sülven mit "verhört", wenn wi kidnappt warrt? Staats us ruttohaugn? Dat lett as Verraat. Verraat an de egen Lanneskinner. Vadder Staat wiest sik hier as en gewetenlose Ravenvadder.

Man an anner Steed wiest de Staat, dat he sin Plichten doch kennt. För Susanne Osthoff, de in'n Irak entföhrt woor, warrt alle Hebel trocken. Wat is denn de Ünnerscheed? Ik seh twee: 1. Vör de CIA mutt een kuschen, vör irakische Kriminelle nich; 2. Susanne Osthoff is en richtige Düütsche.
Dor liggt na min Menen de Hund begraven: In de ganze Affäär üm Khaled Al-Masri un Mohammed Zammar stekt en grote Schuss Rassismus. Dat sünd doch gor keen richtige Düütsche, nich? — O Mann! Hebbt se en düütschen Pass kregen? Denn sünd se Liddmaten vun uns Gemeenschap, ja: uns Nation, un de ganze Gemeenschap — wi — mutt för ehr instahn! Dat harrn wi doch al mal, dat Lü, de nich "deutschen Blutes" weern, miteens weniger Rechte harrn — un jümmer weniger, weniger... Laat us dat nich nocheens anfangen! Towannerte Düütsche sünd Düütsche. "Spätestens im Himmel erwartet uns die multikulturelle Gesellschaft" — ik heff vergeten, wokeen dat seggt hett, man laat us en beten vun den Himmel al hier veranstalten! De Staat lett Minschen alleen, de in materielle Noot kaamt, nu ok welk, de Opper vun Verbreken warrt. Dat warrt leger un leger. Wi mööt uns Gemeenschap stärken, nich miesmaken dör Utgrenzen un Misstruun! Laat wi nüms vun uns un överhaupt nüms op de Welt verlaten in en düüster Stuuv verhungern.


Öllere Notizen: Hier klicken


na baven