Bülgenrieden

vun Hannes Frahm

Wat weer dat doch schöön so vör bummelig een Johr, as wi an'n Strand vun St. Peter-Ording bi Wind un Wedder spazeren gahn sünd! Warm antrocken, dormit de Wind een nich ütköhlen kunn. Wat heet Wind? Dat weer meist mehr as Wind, anner Lüüd seggen dor al Storm to. Witte Schuumkronen weren op de Bülgen to sehn un so teihn bet twölf stevige junge Lüüd in Neoprenantöög weren in't Water und swümmen mit ehr Breed vun'n Strand wiet rut op de See, dükern mit ehr Breed in de Bülgen rin un dat duer nich all to lang, un se weren denn op de Bülgen un de op de Breed. Nu gung dat op'n Strand to, so wiet un so lang as dat gung. Nich jümmers graad, ne ok mal mit vele Schisslavengs, so as de Bülgen dat toleten.

Wi hebbt uns den in een vun de velen op Pahlen bote Holthütten bi Glöhwien, Grog oder ok mal en Tass Kaffe mit en Stück Tort hinsett un vun dor ut tokeken.

Doch nu hett de Corona-Pandemie uns fast in de Kniep. An Sport op'n un an'n Strand is nu jüst nich to denken. Dorbi schull doch dütt Johr wedder en Weltmeesterschop in Bülgenrieden in uns Land Sleswig-Holsteen an uns Noordseeküst losgahn! Mi dücht noch, dat dat op Sylt in Westerland utricht warrn schull.

Na goot, töövt wi af, jichtenswann is dat denn ok wedder an de Tiet, dat wi sowat wedder to sehn kriegt. Nu is eerst eenmal Corona mit de twete Well togang.

Maak wi nu vunavend Puuschenkino, Kamin an, schönen hitten Tee un de Fööt hoochleggen. Doch de Tagesschau ritt mi denn doch ut mien kommodigen Sittels hooch. Dat RKI vertellt jüst, dat direktemang na den tweten Dalslag de drütte al in't Anrullen is.

Un nich blot dat, dat de Dwarsdrievers alltohoop an't Bülgenrieden op de neegste Corona-Bülg opspringen doot. Ahn Gesichtsmasken, to Hunnerte sünd de op de Corona-Bülg an't Rieden. Nich mit en Brett, bi Corona geiht dat ok ahn een.

"Also ganz ahn Brett geiht dat nich — vör'n Kopp muttst schon een hebben!"

Bülgenrieden op de Corona-Well, nich an'n Strand in St.Peter oder in Westerland, ne, merrn in Dresden, Stuttgart, Leipzig, Köln usw. Bülgenrieden! Wi mööt winnen! Wokeen de meisten Gesunnen ansteken deit, de hett wunnen. As weer dat en Meesterschop!

Wo krank mööt düsse Lüüd ween?

Corona! Viren! … Ik kann de nich sehn, ik kann de nich rüken, ik kann de nich smecken un ik kann de nich anfaten! … Ik kann de Viren aver wiedergeven an mien Naver direkt blangen mi. De markt dat nich foorts, ik mark dat nich foorts. Dat is jüst so mit de Radioaktivität, de rüükst du nich, du sühst de nich un du smeckst de nich. Du kannst aver böös krank dorvun warrn un ok starven.

Dor kannst du predigen, dor köönt de Fachlüüd predigen, aver dat gifft Dumme, de richt sik na de dree chinees'schen Wiesheiten: nix sehn, nix hören un nix seggen!

De Dwarsdrievers hebbt dorut maakt: Nix sehn, nix hören, aver luut schriegen.

Un dat is jüst dat Bülgenrieden, wat wi nich hebben wüllt, wat wi nich sehn wüllt, wo ik mi tominnst bannig vör grugen do un bannig Angst vör heff.
Stoppt düsse verdüvelten Corona-Bülgenrieders.