In't Hamsterrad

vun Wolfhard Sauerbrey

Vundaag bemött ik Annegreten —
ik harr de Deern jo meist vergeten,
wüss blots, se weer nah Hamborg hoppt,
wüss, dat se dor abasig jobbt
in so'n vun de IT-Foundations
as Düütsche ünner sösstein Nations;
dat nachens se sogor in't Bett
dicht blangen sik den Laptop hett —

den, un ehr Smartphone: düsse Dinger,
den kreeg se meist nich ut de Finger.
Dat kunn ja ween, dat jeedeen Stunn
ehr Boss bi ehr anropen kunn.
Un se vertell, wo se dor lieden,
sik üm de högern Posten strieden,
un jeder glöövt vun jedereen,
he kunn'n Konkurrenten ween.

De Doktor sä ehr lapidar,
dat se'n krassen Burnout harr;
un de Syndrome passen schon
total in dat Burnout-Syndrom:

Mal kunn se slapen föfftein Stunnen,
man harr dor keen Erholung funnen,
un nächste Nacht, dor lä se waak
vun avends bet to'n eersten Daak.
To'n Eten hett's keen Appetit,
de Blootdruck is marod un sied,
mal is her koold, mal mut se sweten,
dat Lachen harr se meist vergeten,
un wenn se denkt, denn denkt se nur
an't Hamsterrad in eene Tour.

Nu söcht se na een Seelentrip —
dat een un anner is schon hip:
Meditatschon, japaanschen Zen,
Tai Chi un sowat hen un wen,
ok Schattenboxen, Feldenkrais,
to d' Inkarnatschion een Reis,

in Achtsamkeit kann een sik finn',
ok Pantheismus weer noch binn',
nachts Bööm umarmen, Wolken kieken —
de Angebote schull'n woll rieken.
Un letztlich weer ja ok mal good
een Fastenkur mit Eegenblood!

"Ach, Annegret", segg ik to ehr,
"fohr du doch eenfach mal an't Meer,
söch di een Zimmer orrer wat,
un gah söss Stünnen mal an't Watt.
De Schooh, de nimmst du inne Hand,
un denn barft waten dör den Sand!
Un nu stah teihn Minuten still,
weil di dat Watt wat seggen will ...

Hörst du miteens poor Blasen glucksen?
sühst du villicht enn Sandworm tucksen?
Schriegt nich de Mööv mit ehr "Kiwitt"
gedüllig jümmer nee "Kumm mit?"

Un plötzlich warrt dat Hart di wiet:
An'n Horizont, dor gifft't keen Tied,
Dien Sorgen warrt as't Watt so flach,
du leevst as wie an'n ersten Dag.
Un kickst du hooch, denn seggt de Heben:
Der Sinn des Lebens ist:
zu leben.