Alster-Segler

vun Heinz Tiekötter

Dat Hamborg en sünnerlich scheune Stadt is, hett sik rümsproken. Ok, dat de Hamborger nich so dick sünd as de Lüüd annerswo. Woan dat liggt, vertellt düsse lütte Geschicht: Öberall in uns Land stellt sik in de Meddagstiet in de Kontoren un Warksteden desülbige Froog: Wat mookst du hüüt Meddag? Geihst du eten? Wüllt wi in de Kantien orrer goht wi in'n Kroog? Wat 'n Vergneugen för de Hamborgers, wenn se denn seggt: "Loot uns man lebber op de Alster 'n Slag seilen."

Egon hett'n Conger "Sabine" op de Alster liggen. En Conger is 'n fein lütte Kunststoffjull, knapp 5 m lang. Uns Kanzler Helmut Schmidt harr so'n Boot an'n Brahmsee liggen. Bi 'ne Regatta sitten twee Mann dorin un de sünd denn flott ünnerwegens. An Middeweken hett Egon in de Meddagspaus sien Kollegen Michael inlood.

Nodem dat se all tweemol vun St.Georg dwars öber de Alster no de Harvesterhuder Siet un wedder trüch schippert weern, wull'n se noch op'n Beer bi Paolino an de anner Siet röber. No'n blitzsauberen Anlegger sprungen de beiden op den Steeg. Dor stunnen se an de Kant un kregen grote Ogen; keen vun de beiden harr wat in de Hannen. Jede hett sik dorop verloten, dat de Kolleeg de Fastmokerlien mitnehm. Un as se noch dösig keken, wo sowat angohn kann, dor harr de Wind sik all sutje "Sabine" grepen un keen twee Sekunnen loter weer dat Boot all 'n goden Meter afdreben. Se weern noch an öberleggen, wat nu to doon weer un wat man villicht noch achteran jumpen kunn, dor weer dat Boot nochmol 'n Meter wieder weg. Un dormit weer "Sabine" op de Flucht, weer utneiht un nu alleen op de Alster ünnerwegens. Se dreev sinnig dwars röber in Richtung Atlantic-Hotel.

Ut dat Beer bi Paolino is düssen Dag nix worrn. Egon un Michael müssen de Feut in de Hannen nehmen un öber de Kennedy-Brüch röber no de annere Siet pesen. Se müssen vör dat Boot in St.Georg ankomen un de ungetreue "Sabine" wedder infangen. Un bi de Loperee dröffen se "Sabine" nich ut de Ogen verleern. Se harrn noch Glück, wenn dat egensinnige Boot keen Alsterdamper rammt un em womeuglich versenkt!

Kiek, dat is dat: Sowat mookt uns Hamborgers so sportlich. In de Meddagstiet, wo de Minschen annerswo sik de Figur vullhaut, ward hier — merrn in de Stadt — schippert, un achterran rennt wi vun Harvestehude bit no St.Georg. Un genau dat is dat, wat uns in Hamborg so fit hollt.