2017

vun Silke Frakstein


Nu is dat sowiet. Ne, ne — enen Ogenblick noch — so, nu. Een Sekunde duert dat dütmol länger.
2016 weer een Sch…… Schaltjahr! Dat hangt mit de Winter- un Sommersünnenwende tosomen. Alle veer Johr hebbt wi düssen Tostand.

Un to verdanken hebbt wi dat — na? Keen annern as Julius Cäsar. De hett Sluss mit den Wirrwarr twüschen Gregorianischen und Julianischen Klenner, den wie hüüt hebbt, mookt.
Ober irgendwie is düt Johr wat scheef lopen. Ik meen, ok Cäsar hett mol Koppien un denn löppt dat op Schiet ruut.

So üm de 80 Schauspeler/Musiker sünd nich mehr op de Eer.
21 Politikers sünd ok no boben un nich to vergeten de Rest vun 75 Lüüd.

Wenn nu, also blots mol so, de Schauspeler un Musiker dor boben so'n Oort TheoterMusikel op de Been stellt, kümmt endlich mol Stimmung bi Petrus in'n Sool. — Manfred Krug mit Zsa Zsa Gabor to'n Bispill. De lütten Engel mookt dat Ballett un to drinken gifft dat Gänsewien.

Bi de Politikers is dat nich ganz so eenfach. Dor mutt villicht een vun de "normalen Minschen" mitmischen.

Ach ja, wat mi allens so dörch'n Kopp geiht. Veele Soken weern so eenfach un doch is't an't Enn allens kompliziert. Ik wünsch mi, dat mien Geschirrspeuler wedder löppt un ok de Trockner wedder sienen Deenst mookt. Dat dat Fohrrad von Schietbüdel wedder op Schick kümmt un de Tähndokter endlich tofreden is.

Eene Spezi kenn ik, de is glücklich un tofreden. Dat sünd de Nandus an'n Schaalsee. Middewiel sünd dat an de 250 Stück. Se köönt freeten, pupen, lütte Nandus moken — keeneen dröff jem wat doon. Na, da is doch wat, orrer?

Ik hool mi an Luther:

Un wenn ik wüsst, dat morgen de Welt ünnergeiht,
so wörr ik noch hüüt mienen lütten Appelboom planten.

Oder mienen Glücksklee.


Foto 2, 3 un 4: Antje Heßler

9.1.2017


na baven