En egenwillig Peerd

Karl leggt dal de Heckenscher‘ un röppt sik sienen Schecken her.
Staats de Hecken all to meihn, plaant he, sien Peerdchen mal to ei’n.
Karl hett sienen Schecken geern – de deit sik nich üm Gecken scheern.
Bloots Rieden maakt den Schecken wild! Dorop wiest an’n Weg en Schild:
„Viele tapfre Recken schieden, wulln se düssen Schecken rieden.“
Wenn Recken düssen Schecken riedt, denn roopt bald alle Recken: „Schiet!
De smitt mi in de Hecken rin!“ -- Dorna sünd alle Recken hin.

Moinmoin, leve plattdüütsche Maten un Frünnen!

Keen Corona in uns Schüddelriemel baven! Ha! Deit dat good orr deit dat good? As bi de Briten dat Brexit-Drama op sien Hööcht weer, nöhm sik een Kiekschapp-Senner egens vör, "Brexit-free" to ween: keen Berichterstatten över den Brexit! Dormit hebbt se Reklaam maakt. Mi dücht, dat bruukt wi bald ok in Saken Corona. Jaaa, düssen Maand hebbt wi op Plattpartu ok en ganzen Barg Kommentaarn, Betrachten usw. to Corona bröcht, avers dat schall beter warrn -- also weniger. Dat Phänomen warrt wi ja sachs so bald nich los, un wenn dat so wiedergeiht, warrt wi deegt ramdösig dorbi!

De April bröch uns mit Palmsünndag, Karfriedag un Oostern en Tied so fierlich un schöön, dat Corona dor nich an pingeln kann. De gewaltigen Psalmen in de Överdragen vun Adeline Decker sett an elk Dag den Grundtoon, an Karfriedag leest wi dorto en Andacht vun Christiane Stahlmann, an Oostern singt wi niege Leder vun Cord Denker, de Moot maakt in jedeen Tied. Aver ok de Oosterspazeergang ut "Faust" in de kongeniale Översetten vun F.H.Schaefer is to lesen un en Erinnern an de vöröösterlichen Bruukwiesen vun fröher. Op dat Kinnerflack gifft't düssen Maand glieks dree Bidrääg, avers keen ut de Märken-Reeg: Wi klareert, woans dat Ooster-Datum tostann kümmt, Hanne Hinz vertellt vun en besünners leckermuligen Oosterhaas un Herbert Timm stellt de Deerten in sienen Goorn vör.

För de Corona-Kniep, in de wi sitt, gifft dat mennig Biller. Cord Denker brukt dat Bild vun Jona in den Wal-Buuk, för Hildegard Tölke is dat slicht Düvels Köök, Ewald Eden hett Moachpien dorvun, wat sik in düsse Köök tosamenbruut, un Silke Frakstein denkt glieks an't Klo -- un an dat Papier dorför. Mi in mien Notizbook fallt dat Eernstblieven meist swoor. Wolfhard Sauerbrey dorgegen gifft ganz praktische Tipps. Un J.P. "Jay Pi" Bey kiekt sik de binnenpolitische Psychologie dorbi an. Al de Kinner föhrt allens Möögliche op Corona trüch. Ludgerd Lüske avers kiekt mit den ESA-Sünnenkieker mal ganz locker in de Korona vun de Sünn, de ut dat Millioonen Grad hitte Plasma besteiht un vun vigeliensche Reedschapen utmeten warrt. -- De Natuur helpt uns nu besünners, se is de grote Skala, an de wi uns "erden" un uns Probleme wedder op dat richtige Format daalhalen köönt. So is ok op uns Natuur-Flack dat Leven in en Vagelhuus orr de Pagels-Plant för düssen Maand, de Rhododendron, to finnen -- un en kregel leviges Natuur-Notizbook. Vun't Leven mit de Natuur op en lütte Buurstee vertellt ok Karl Farr, bi Günther Sohnemann brickt glieks de Dschungel an Bord ut mit Krokodile, Bananenboren un wildwokern Grööntüüch, un Heinz Tiekötter erinnert an dat, wat in düsse Daag noch wichtig is: 75 Johr Freden in Europa.

Ik much geern all de velen Maten danken, de uns jümmers wedder wat schicken doot, un ok de, de bloots an'n Rand mitdoot, Biller bistüert orr en Maat Verlööv geevt, ehr Texten to översetten. So köönt wi elk Maand en bunten, aktuellen, schönen un relevanten Mengels tosamendragen. Plattpartu is meddewiel in sien 19. Johr! Much dat noch lang so wiedergahn. Bit to'n 20. Bortsdag vun Plattpartu op jeden Fall! All sünd -- as jümmers -- hartlich inlaadt, ok wat bitostüern. 

Nu segg ik Adjüß bet neegsten Maand. 'keen weet, wat denn allens wedder anners is? Ik höp, wi leest uns sund wedder!


Nu de Linklist. Op de Links bruukt Se bloots klicken, dat Se henkaamt.

Plattdüütsch Künst:

Oosterspazeergang. Översetten na Goethe vun Friedrich Hans Schaefer     (19.4.)
Notizen ut'n Harvstmaand. Fotos un Verse vun Marlou Lessing    (11.4.)


De Welt un Gott:

Dat Stee van mien Grootollen. Vun Karl Farr    (25.4.)
De privote Flohmarkt. Vun Heinz Tiekötter    (25.4.)
Seemannsgarn: Dschungel an Bord. Vun Günther Sohnemann    (25.4.)
Lüttke Müse häbbt uck Ohrn. Vun Josef Moorbrink un Hildegard Tölke    (17.4.)
Tosamen op den langen Padd. Leder to Oostern vun Cord Denker    (12.4.)
Oostern -- dankt den Herrn! Psalm 118, överdragen vun Adeline Decker    (12.4.)
Karfriedag -- Jesus hangt an't Krüüz. Andacht vun Pastorin Christiane Stahlmann    (10.4.)
Karfreedag -- Behöödt in Gott sien Hannen. Psalm 31, överdragen vun Adeline Decker    (10.4.)
Gesund blieven! Vun Silke Frakstein    (8.4.)
Passion: Sünndag Palmarum — Lieden un Wunnertiet von de Gerechten. Psalm 22, överdragen vun Adeline Decker    (5.4.)

In't Erinnern-Notizbook:

    Drei Daoge vör Ostern. Vun Hildegard Tölke    (7.4.)

In't lütte Gebeedbauk:

    Jona -- Corona. Vun Cord Denker    (23.4.)


Natuur un Wetenschap:

In uns Vogelhuus. Vun Heinz Tiekötter    (25.4.)
Planten in Pagels' Goorn: Rhododendren. Vun Thomas Seemann un Marlou Lessing    (20.4.)
Dei ESA-Sünnenkieker: Mäten in't Plasma. Vun Ludgerd Lüske    (17.4.)

In't aktuelle Natuurnotizbook:

    Dohlenschönheit. Vun Ewald Eden    (30.4.)
    Wat hett Kalli? Vun Herbert Timm    (21.4.)
    April, April. Vun Addi Kahl    (10.4.)
    Nu doch Aprilfleder. Vun Thomas Seemann    (7.4.)


Wat in de Welt vörgeiht:

Dat Polit-Karussell. Vun Jens-Peter Bey    (28.4.)
75 Johr Kriegsenn: Truerspeel. Vun Heinz Tiekötter    (25.4.)
Wat doon bi Coroon'? Vun Wolfhard Sauerbrey    (8.4.)
Dormit sünd wi in Düwels Käöken kaomen! Vun Hilfegard Tölke    (5.4.)

Ewald Edens Blog Eden meent:

    Moachpien van Corona    (5.4.)

In Marlou Lessings plattdüütsch Notizbook:

    Veer Lehren ut Corona    (20.4.)
    Karkenchristen un Omadrückers    (13.4.)
    All hangt an een Tau    (8.4.)
    Social Distancing: Afstandholler    (5.4.)


För Kinner:

Oosterhaas Zuckersnuut. Vun Hannelore Hinz    (13.4.)
In mien Goorn. Vun Herbert Timm    (11.4.)
Wennehr is Oostern? Vun Marlou Lessing    (5.4.)


Hartlich grööt

Marlou Lessing un dat lütte Plattpartu-Team