To Maiennacht de Hexenfloog
drifft mennigeen's Reflexen hooch:
Mit Angstlust op ehr Spoor to hören,
en Kribbeln in de Hoor to spören...
Dor witscht se weg, hooch böver Tannen!
-- Un noch deit uns ehr Töver bannen.

Moinmoin, leve plattdüütsche Maten un Frünnen!

Sünd Se all wedder "rekristalliseert" na de Maifiern? ("Rekristalliseern" hebbt mien Chemiker-Frünnen dat nöömt, wenn se sik in Alkohol oplööst harrn un langsam wedder in'n fasten Tostand trüchkehren dään.) Bi den Hexenriemel baven müss dat eentlich "över Dannen" heten, avers denn schüddelriemelt dat nich mehr, also bitte!

Nu avers to unsen korten Trüchblick. Wat för en Oostermaand! Wat för en gnadenlos strahlen Weder! Wat för Narichten ut de Welt! Un natüürlich Oostern: as Teelpunkt vun de Wannerung, op de uns Gertrud Everding in ehr Passioonsreeg düt Johr mitnahmen hett -- de Wannerung, de deep dal föhrt dör de Schadden vun'n Dood hen na dat strahlen Oosterfest -- dat sülvst miteens merrn in de Gewalt vun de Welt in Sri Lanka steiht. Minner grulich: Ok de Oosterhosen mööt nu an glöven. In't Natuur-Notizbook beedt Modder Söög ehr Lütten as Ersatz an.

Man ok anner Aktualitäten hett de Maand uns schickt: Cord Denker maakt en Leed för de brennen Kathedraal vun Paris, Ludgerd Lüske verklaart uns dat eerste Bild vun't Swatte Lock, un de kosmoloogschen Erkenntnissen ut uns Tied verwannelt sik in Bildpoesie. -- Dat ok Klaus Groth en runnen Bortsdag harr, hett uns Gelegenheit geven, mal in uns Schatzkist to griepen. Sowat maakt wi driest. Mutt ja nich allens nieg ween, wat good is!

Ok blangen de Aktualitäten gifft't veel Schönes: Thomas Seemann un sien Maten stellt uns nich bloots as Luftakrobatin vun'n Maand de smucke Veerflecklibell vör, sünnern ok den Goorn, 'neem de mehrsten Fotos vun uns Kalenner-Reeg tostann kamen sünd: Ernst Pagels un sien Levenswark för Planten un Minschen. In de Radioandachten-Reeg leest wi opstunns Andachten vun'n Johrsanfang, dat passt ok to'n Lent. Wieder trüch kiekt Günter Sohnemann, de vertellt, wat passeert, wenn du op See verkehrt fodert warrst, un Wolfhard Sauerbrey, de uns verkloort, woso Besapene "Hoorbüdels" heet. Un ok sünst noch düt un dat.

Dat wi in en Tied vun Ümbröök leevt, föhlt wi all. In uns Natuur-Notizbook un ok in mien Notizbook un överall is dat to föhlen. Minschen mööt wat verännern, Entscheiden drepen; besünners wi Minschen in de rieken Länner. Wenn wi düssen Sommer keen so'n Wöösten-Sommer kriegt as verleden Johr, köönt wi düt Geföhl noch beten opschuven. Wohr blifft dat liekers, un de Tied haalt uns in. So wünsch ik uns un uns Natuur düt Johr en orrig verregenten Maimaand! Dorför heff ik jüst dat Regendrüppen-Märken vun Sophie Reinheimer frieschalt. En Kinnermärken harrn wi in'n Oostermaand ja nich. Much düt en godes Omen ween!


Nu de Linklist. Op de enkelten Links mööt Se bloots klicken, dat Se henkaamt. Wenn Se den Rundbreef över Plattnet as PDF kriegt, funscheneert de Links avers nich mehr!

Plattdüütsch Künst:

Universum — wat wi market un wat nich. Kosmisch Bild-Gedicht vun Ludgerd Lüske un Marlou Lessing    (26.4.)
Hölten Danz. Bild-Gedicht vun Ludgerd Lüske    (11.4.)
Notizen ut'n Harvstmaand. Fotos un Verse vun Marlou Lessing    (5.4.)


De Welt un Gott:

Dat kannst mi glöven: Van't Glück. Vun Heinrich Siefer, mit Spraakopnahm    (28.4.)
Haarbüdel. Vun Wolfhard Sauerbrey    (26.4.)
Dat kannst mi glöven: Hogen Besöök -- de Sternsingers. Vun Heinrich Siefer, mit Spraakopnahm    (21.4.)
Passion: Oostersünndag. Vun Gertrud Everding    (21.4.)
Karsünnavend. Nadenkerie vun Marlou Lessing    (20.4.)
Stieg daal. To Karfriedag vun Rudi Witzke    (19.4.)
Passion: Karfreedag. Vun Gertrud Everding    (19.4.)
Oosterhosen. Vun Silke Frakstein    (16.4.)
Dat kannst mi glöven: In'n Häven kann hei wedder lopen. Vun Hubert Looschen, mit Spraakopnahm    (14.4.)
Passion: Palmsünndag. Vun Gertrud Everding    (14.4.)
Seemannsgarn: Labskaus op Bananen. Vun Günter Sohnemann    (12.4.)
Dat kannst mi glöven: Gägen angaohn. Vun Hubert Looschen, mit Spraakopnahm    (7.4.)
Passion: Sünndag Judika. Vun Gertrud Everding    (7.4.)

In't Lütte Gebeedbauk:

        Trööster vun de Untrööstlichen — En Beden för Sri Lankas Christen    (22.4.)


Natuur un Wetenschap:

Ernst Pagels un de Pagels-Goorns. Vun Thomas Seemann, Stefan Siegmund-Schultze un Marlou Lessing    (16.4.)
Dat eierste Bild van ein Schwartet Lock. Vun Ludgerd Lüske    (12.4.)
Luftakrobaten 2019: Veerflecklibell op Binsensneed. Vun Thomas Seemann un Marlou Lessing    (5.4.)

In't aktuelle Natuurnotizbook:

        Güüst un Wadernoot. Vun Rudi Witzke    (25.4.)
        Schöönheit in de Stadt. Vun Marlou Lessing    (14.4.)
        Dolle Dohle. Vun Ewald Eden    (12.4.)
        Marienkäver-Hochtiedstied!
Vun Thomas Seemann un Marlou Lessing    (7.4.)
       
Modder Söög snackt. Vun Thomas Seemann    (5.4.)
       
Tallen -- keen Aprilscherz! Vun Marlou Lessing    (1.4.)


Wat in de Welt vörgeiht:

De Ünnerscheed. Vun Heinz Tiekötter    (26.4.)
Notre-Dame. Leed vun Cord Denker    (18.4.)

...un veer niege Indrääg in Marlous plattdüütsch Notizbook.


Niege Spraakopnahmen:

Van't Glück. Vun Heinrich Siefer    (28.4.)
Hogen Besöök -- de Sternsingers. Vun Heinrich Siefer    (21.4.)
In'n Häven kann hei wedder lopen. Vun Hubert Looschen    (14.4.)
Gägen angaohn. Vun Hubert Looschen    (7.4.)



Hartlich grööt

Marlou Lessing un dat lütt Plattpartu-Team