Wulken bekieken

vun Wolfhard Sauerbrey



Foto: Antje Heßler

Dat is so'n fienen Nahmdag worrn!
Ik sitt op mienen Stohl in'n Goorn,
heff twaars wat to beschicken, man
nu kiek ik mi den Heven an.
Mitünner kann ik't blenkern sehn —
dat mag een Segelfleger ween,
de mit de Thermik opwarts weiht
un as so'n Hawk sien Runnen dreiht.
Ik sehg verenkelt lütte Swulken;
un denn — de wunnerboren Wulken!


Foto: Katja Renfert

De wölbt sik up, weiht uteneen,
mal is de Sünn an'n Rand to sehn,
mal warvelt se, wenn't plötzlich weiht,
un deelt sik, wenn de Wind sik dreiht,
un jümmers ännert sik dat Bild,
mal kiekt se streng, denn wedder mild.

Da kickt mien Naversch övern Tuun.
"Na", seggt se, "heute nichts zu tun?
Kein Unkrautziehen? Rasenmähen?
Da gibt's doch dies und das zu sehen!"
Ik segg to ehr: "Hüüt bün ik fuul!"
un denk in'n Stillen: "Hool dat Muul!"
Se aver, opdreiht — mannomann! —
fangt nu so'n Wulken-Vördrag an.
"In England gibt es einen Kreis —
was als Gebildeter man weiß —
die haben 'nen Verein gegründet,
bei dem sich in der Satzung findet,
wonach ein Mitglied sich verpflichtet,
dass möglichst täglich es berichtet,
was wolkenmäßig so passiert,
und dass man's brav fotografiert.

Als "Cloud appreciation" wird
im Internet es angeführt;
als Member der Society
zahlt man 10 Pfund als "sign up fee",
und danach 17.50 jährlich.
Wär das für Sie nicht unentbehrlich?"

Ik segg to ehr: "Mien leve Frünn'n,
so'n Schietkraam kriegt Se in de Künn?
To'n Fuulsien bruuk ik nix as mi,
dor bruuk ik keen Community!
Un: för dat Fuulsien noch betahlen?
Doar köönt se sik een annern halen!"

Se markt: mit mi kümmt se nich wiet!
Ik dreih mi op de anner Siet,
kiek wieder gratis in mien' Heven —
un drusel weg: Mann, wat för'n Leven!



23.7.2017


na baven