So weer dat Wedder in Novembermoond

Dat Wedderdaagbook vun Uwe Mohr.
All Biller: Uwe Mohr


Von güllen Oktober geiht dat nu wieder mit güllen November. Mehr künnt wi von Petrus nich verlangen! 19° Warms, wenig Wind — un veer Stünn Sünnenschien. Nix to marken von Wind- un letzten Harvstmoond. Egentlich hebbt wi to düsse Tied bloots söben bit acht Grood.


Güllen Novembermorgen

Liekers, Bööm un Strüker smiet bunte Bläder af, de uns noch poor Wuchen Arbeit bringt. Von Rosen un Gornland mütt se dool. Bloots an de Kannten blievt se för Igel, Vogels un allerlei anner Getier liggen. Kannst meist seggen, de letzte Moond vör'n Winter is een Ooltwieverharvst. Homo sapiens hett dat hinkregen — de Klimawandel lött gröten, un en Winter is noch nich in Sicht.


Harvstwoold

Dorför hebbt wi an 5. merrn in de Wuch vele Wulken an Heven, keen Sünn, ünner 10° un Regen. "November natt bringt jeedeen wat." An 9. den Dag, de de Weltgeschichte verännert hett, full vör fiefuntwintig Johr de Muer. Ut twee is wedder een Düütschland woorn. Loot uns dankbor sien, dat modige Fruuns un Männer düssen bewegenden Opstand mookt hebbt! — Ok de Vogelwelt hett bi den Afbo holpen: "Muerspechte" hebbt Stück för Stück rutpickert.


Snatern hin, snatern her — de Pann röppt! Hier is warm, koomt gau her!

Mit Fröhjohrswuchenend geiht dat nu in de tweete Dekode. De 10. en richtigen Novemberdach. Grau in grau, mit man bloots 5° un natt, fangt de Wuch an. Ok de Bläder wüllt noch nich recht von de Eken fallen. "Wenn Loof nich vör Martini fallt, kümmt een Winterküll, dat man so knallt." Dichte Nevel an Martini. Bi kohle Bries ut O-SO un bloots dörchsnittlich 6°, geiht dat hüüt de Göös an de Feddern. Dor hölpt keen Nevel un keen snattern — se landen in de Pann. Helau un Alaaf.


Volkstruurdag — elk Naam weer en Leven

Passend för hüüt: An Volkstruerdag gedenkt wi bi Nevel un Smuddelwedder de Opfer ut de Nazitied un de Doden ut beide Weltkriege. Leider gifft dat over Menschen op uns Eer, de lever mit Kriegsgschirr ballern un hasserfüllt Morde begoht.


Buß- un Beeddag: Uns Emmaus-Kark laadt in to Besinn na Gott

Ok to Anfang von de drütte Dekode ruhiges Novemberwetter mit Nevel, Opheiterungen un Frost. Minus 0,6° in 5 cm över de Eer. De stillen Doog liegt achter uns, un wi freut uns op en schöne, kommodige Adventstied mit Familie un Frünn.

Schient, ok de Temperatur stell sik op Advent in. To'n Enn von Moond liegt se, bi luusigen Pusterich ut Oosten, twüschen -2,1° un 3°. Dorto an Ovendheven strohlende Steern: "Lüchten in November Steern an Heven, ward uns oosige Küll verdreten."

En graue November geiht över in den eersten Wintermoond. He weer recht dröög, mit wenig Sünn; trotzdem to warm, un harr meist bloots Wind ut Oosten.


Zierappels bringt Farv in den Nevelmoond

Wedderdoten letzte Moond (in Klammern de Doten vun'n Vörmoond):

  • De Dörchsnittstemperatur harr in 2 m Höchte 6,5 °C (Vörmoond 12,4°), dat sünd 1,5°C över't Middel.
  • De höchste Temperatur mit 19°C (21°) harrn wi an 1., de deepste mit -2,1°C (-0,2°) an 30.
  • In'n Dörchsnitt harrn wi 20 cm in de Eer 9°C (13,4°) un 5 cm över de Eer de deepste Temperatur mit -1,7°C (0,0°).
  • De Sünn hett mehr in't Wolkenbett legen as schient. Bloots 35 Stünn (106) weer se to sehn. Dat sünd 69% von't Soll.
  • De Solorstrohlung keem op 73 W/m² (151). Se weer an hööchsten mit 408 W/m² (754) an drütten.
  • Dröög weer de Moond. An 17 (24) Doog sünd nur 26,4 l/m² (51) fullen. Dat sünd bloots 36% von't Middel.
  • Dörch Evapotranspiration sünd 8,12 l/m² (24) wedder afhaut.
  • De Wind hett an düllsten mit 43 km/h (6 Bft) ut O-SO pustet un keem ok mit 36% ut O-SO.
  • De Novembermoond harr een Iesdag (Tmax < 0°C), fief Frostdoog (Tmin < 0°C), 19 Kole Doog (Tmax < 10°C) un 1 warmen Dag (Tmax > 18°C).

Mehr Wedder ünner hartenholmer-wetter.de.


Fotos: Uwe Mohr
3.12.2014


na baven