So weer dat Wedder in Aprilmoond

Dat Wedderdaagbook vun Uwe Mohr

April, April, de weet nich, wat he will. Bald lacht de Heven klor un rein, bald kiekt de Wolken düster. Bald Regen, bald Sünnenschien! — Wat sünd mi dat för Soken. Oh ha, oh ha, nu kümmt he noch mit Snee! Ganz grulich is dat, man glövt dat kum, hüüt Frost, gestern Hitten, hüüt Riep un morgen Blitze, dat sünd so siene Witze. Un drift de ruche Wintersmann ok sienen Fründ, de Noordoostwind, an, un wehrt he sik so good he kann, dat sall em doch nich glücken; denn all' Knospen springt un de Vogels singt. Hurra, hurra, de Fröhling is doch dor!

Na Heinrich Seidel, Plattdüütsch: Uwe Mohr

Nich direkt en Wedderphänomen, avers höört doch to de Johrstied: Oosterküken. Foto Uwe Mohr

Nu löst Hoch "Linus" Hoch "Kai" af, de uns over ok mit Sünnenschien verwöhnt. He mookt op Fröhling mit Warms. Dat gifft al Sommerdoog, over ok Doog mit Winterwedder, Snee un Hogelschuer. Gau sünd de Fröhlingsgeföhle wedder verswunnen.

Ohle Nomen för April sünd: Oostermoond, Knospen-, Grasmoond un Launing. Nich to vergeten dat In-den-April-Schicken, wohl dorüm, wiel he so luunsch is. "Kiek mool, Hannes, dor flüch en Storch mit hölten Been!" Gern worn ok de Lütten no'n Höker schickt, üm een Tüüt mit "Hau mi blau" to köpen.

Buschwindröschen. Foto Uwe Mohr

An föfften un sössten keem endlich dat Woter von boven, op dat wi al so bannig luert hebbt. He hett ok de piesackende Oostwind de Pust afdrückt. Nu geiht dat wedder von kohle 5-7°C no boven. Mit Regentrude in Slepp geiht dat to'n Enn von de eerste Dekode mit knapp Sünnenschien, düster un Regenschuer wieder. Dat freut de Planten, Buern, uns all. "De April tellt 30 Doog. Regent dat an 31 Doog, wöör't ok nich schoden."

Oosterklocken. Foto Uwe Mohr

An 13. is Stormdeep "Olivia" över't Land trocken. Mit Stormböen ut W-NW speelt se sik op un wiest uns driest ehr kohle Schuller. Keen Wunner, bloots good 9°C in Dörchsnitt, dorto swatte Wolken, de Fru Klara utspart. Worüm "Klara"? Heet so veel as: Lüchtend, hell un schöön. Wokeen dormit meent is, is uns all klaar: uns leve Sünn.

Mit Regenschuer, Hogel un kohlen Pusterich mookt dat Wedder wieder. "Geihst du in April bi Sünnenschien rut, loot nich de Regenschirm to Huus!" Brrrrr, wat is dat? -1,7°C Luftfrost un 5 cm över de Eer -2,8°C! Liekers, an Dag weer de 16. recht bruukbor.

Saisonale Hoosenköttel. Foto Uwe Mohr

Oostern liggt nu achter uns. Bi veel Sünnenschien un bit to 19°C an 1. Oosterdag harr de Oosterhoos düchtig Lust to'n Eierversteken un de Kinner veel Spooß bi't Söken. An 22. ovends hett Thor sien Oostertour mookt. Hier is he over sachten mit sien Wogen övern Heven rumpelt, ok Blitze hett he bloots wenig smeten. Üm so mehr hett sik Regentrude mit düchtig Gewidderschuern anstrengt.

Kiwittsblomen in de Wisch. Foto Uwe Mohr

De Rapsfeller lüchten, un de Obstbööm blöht. Masse Arbeit för de Immen! Dank Hoch "Quinlan" hebbt wi sünniges Fröhlingswedder. Bloots de kohle Wind ut Oost mookt so'n beten Speelverdarber.

För uns schöön, för de Immen veel Arbeit: Rapsdracht. Foto Uwe Mohr

Den Aprilmoond hebbt wi achter uns. In de Walpurgisnacht susen de Hexen wedder op ehr Bessen no'n Brocken hoch un droopt dor Beelzebub. Weet de Düvel, wat dor besnackt ward! Ännern künnt se de Tied ok nich; morgen geiht dat los mit Wonnemonat Mai!

Wedderdoten letzte Moond (in Klammern de Doten vun'n Vörmoond):

• De Dörchsnittstemperatur harr in 2 m Höchte 9,9°C (6,6), dat sünd 2,3°C övert Middel.
• De Höchsttemperatur mit 21°C (18) harrn wi an 30. un de deepste mit -1,7°C (-3,7) an 16.
• In'n Dörsnitt harrn wi 20 cm in de Eer 10,2 °C (6,6) un 5 cm över de Eer de deepste Temperatur mit -2,8°C (-5) an 16.
• De Sünn hett 184 Stünn (180) an Heven stohn.
• Solorstrohlung keem op 275 W/m² (228) un weer an hööchsten mit 983 W/m² (788) an 30.
• Regen an 15 Doog (12) hett 59 l/m² (29,4) bröcht. Aftrocken dörch Evapotranspiration sünd 46 l/m² (29).
• De Pusterich hett an meisten mit 22,4% ut O-SO weiht un an düllsten mit 58 km/h (7 Beaufort) ut W-NW an 14.
• De Moond harr 1 Frostdoog (T_min < 0°C), 3 kohle Doog (T_max < 10°C) un negen warme Doog (T_max > 18°C).

Mehr Wedder gifft dat hier: hartenholmer-wetter.de.