So weer dat Wedder in Märzmoond

Dat Wedderdaagbook vun Uwe Mohr.
All Biller: Uwe Mohr

Ohle Nomen för'n März sünd Lenzing un Lenzmoond. "März" kümmt over ok von römischen Kriegsgott Mars. Un sünst dat Märzwedder? Hoch un Deep föhrt Karussel. Dat hebbt wi an Drütten markt: bit ovends Regenwetter, denn hett Fru Holle noch düchtig de Feddern schüddelt.

Dauweder tövert Iestappen — schöön, aver koolt. Brrrr!

Keen goode Utsichten: "Is Kunigunde regenschwoor, blivt mehrstendeels de Schüün ok leer." Nu ward over to'n Wuchenend anners! Dat hebbt wi Hoch "Karin" to verdanken. Mit düchtig Warms ünner de Bluus bringt se uns Fröhjohrswedder mit Sünnenschien, blauen Heven un 7 - 10°. Passend to'n 8. an Weltfruunsdag!

Nee, nich bloots de Fruuns sünd kregel, wenn dat Wedder stimmt: "Schient an Cyprian de Sünn recht hell, denn danzen Immen un Imker üm't Immenhuus ganz schnell."

Hoselkellings mit Blööt

Nu hebbt wi al de 2. Dekode bi'n Wickel! De fangt an mit Fröhjohrswedder von feinsten. Tied, dat de "Leddern Jungs" (dat sünd Dicke Bohnen!) in de Eer koomt, denn hebbt se keen Lüüs bi de Oorn. Wi to Anfang von de Dekode blifft dat Wedder erst mol. Bloots Pusterich hett sik en annner Richtung söcht. Ieskoolt kümmt he ut NO un schüfft düstere Wolken vör sik her. Dorto -2,6°C an Morgen. Mol sehn, wat noch kümmt! Stormdeep "Dennis" will Hoch "Karin" de Tour vermasseln un uns mit Schietwedder de Sünndag vermiesen. Doch: "En gröne März bringt nich ümmer wat Goodes."

Mit wesselhaften Heven, mol Wolken , denn Sünnenschien, over mit Fröhjohrstemperaturen geiht dat in de ni'e Wuch. +13°C, dor fangt de Müggen an to danzen, de Immen summt in de Wicheln, Poggen wandern, üm in en Tümpel to krupen, de to Vermehrung passlich is. "En hööglich März, dat freut de Buern von Harten."

So bunt is dat Fröhjohr — dat freut nich bloots de Buern!

An 20. hebbt wi vun Klock 10:30 hento Klock 10:45 Sünnenfinsternis. Af halvig teihn löppt de Verdunkelung. Dat nächste Hevenspektokel is an 10. Juni 2021. — Mannomann, heff ik doch bi de Sünn glatt dat Fröhjohr vergeten. Hüüt is Fröhlingsanfang! De Lenz is dor.

Sofi in'n Dunst över Holstein — an'n Anfang, ...

... bi gröttere ...

... un bi meist de gröttste Bedeckung. Fotos Sofi: ML

Hoch "Maria" sorgt för goodes Weder. "Sofi" hebbt wi achter uns, un en wesselhaftes Wuchenend steiht uns bevör. Von allens wat: Nödigen Regen, nachts Frost, kohlen NO-Wind. De ganze Dag Sünnenschien hett liekers keen Warms bröcht. Over keen Sorg: "Dat mutt doch Fröhling warn". — Will over noch nich recht. Hoch "Natascha" hett Pusterich no N-W dreiht! Veele Wolken un Regenschuer schüfft se vör sick her. "To Anfang odder to Enn, de März sin Gift deit senn."

Hüüt is Palmensünndag. Dor harrn wi fröher Konfermandschon. Ik müss, trotz Protest, mit swatten Antog un grönen Hoot to Kark! — Unverännert dat Wedder. Smuddelregen, Schuer un Landregen sünd fullen. "Wenn dat nich op Palmsünndag regent, gifft dat Regen op de Ostereier."

Oosterhasen bi de Arbeit: Eierversteke för Oostern utkundschaften! Man de Koh kriggt allens mit!

Nu mookt allerdings Deep "Lucien" un "Mike" dat Wedder — Stormdeep "Niclas" kümmt noch mit förchterlichen Storm to Hölp. Bi Snee, Sneeregen un Hogel goot in de letzten Märzdoog de Frühjohrsgedanken fleuten. "Niclas" pust dat Wedder röver von März in April, — de, wi ümmer, noch nich weet, wat he will.

Söte, knuddelige Oosterküken — de will ok de April!

Wedderdoten letzte Moond (in Klammern de Doten vun'n Vörmoond):

• Dörchsnittstemperatur in 2 m Höchte +5,14°C (Vörmoond +1,7°), dat sünd 0,94°C över't Middel.
• De höchste Temperatur mit +16,4C (15°) harrn wi an 8. De deepste mit -3,6°C (-7,3°) weer ok an 8.
• In'n Dörchsnitt harrn wi 20 cm in de Eer +6°C (3,2°) un 5 cm över de Eer de deepste Temperatur mit -4,4°C (-8,3°).
• De Sünn weer 145 Stünn (58) to sehn ...
• ... un de Solorstrohlung keem op 211 W/m² (106). Se weer an hööchsten mit 891 W/m² (608) an 28.
• An 12 Doog (17) hebbt wi 62 l/m² (13) Nedderslag kregen.
• Dörch Evapotranspiration sünd 36 l/m² (11,5) wedder aftrocken.
• De Wind hett an düllsten mit 78 (53) km/h (9 Bft) ut W pustet un keem mit 19,5% ut W-SW.
• De Moond harr keen Iesdoog mehr (T_max < 0°C), aver noch 9 Frostdoog (T_min < 0°C) un 20 Kole Doog (T_max < 10°C).

Oostern in Navers Goorn

Mehr Wedder ünner hartenholmer-wetter.de.