Anke Nissen
Toxisch Planten


Na Folg 1, Folg 2, Folg 4, Folg 5, Folg 6, Folg 7 , Folg 8, Folg 9 , Folg 10, Folg 11, Folg 12, Folg 13, Folg 14, Folg 15


Bärenklau (Heracleum Sphondylium)


Blödendolde vun Bärenklau

Tohoop mit de Sünn kann Bärenklau Blasen up de Huut vun Minschen maken. Dat warrt phototoxische orr photoallergische un kontaktallergisch Reaktion nöömt.

De dekorative grote Riesenbärenklau — Heracleum mantegazzianum, ok Herkulesstaude nöömt — wasst wild in Parks, Gröönanlagen un Goorns. Mennigmaal wasst he as en rechte Plaag. Dorbi kann disse Plant en Gefohr för't Leven sien. De Furano-Cumarine, de in den Plantensaft binnen sünd, köönt, wenn se mit uns Huut in'n Kontakt kaamt un wenn denn de Sünn dor up schient, toxisch Reaktionen bringen, as Röten, Schwellen, Blasen. Dat kann sogoor to enen tödlich Schock kamen.

Noch mehr to disse Plant heff ik al mal hier op Plattpartu vertellt.

Witte Germer (Veratum album)

De Germer is en wenig bekannte, dull giftige Plant. Dat Gift sitt bi em in de Wöttel un in de deper sitten Plantendele.

Ik heff leest: Junge Lüüd, de nich to't Militär wullen, hebbt geern vör de Musterung Wöttelsud vun'n Witten Germer innahmen. Dat senk den Blootdruck un de Hart-Frequenz. Dat weer aver en bedrohlich Graatwannern, denn al 1 bet 2 Gramm vun de Germer-Wörtel köönt den Dood bringen. De kümmt na 3 bet 12 Stünnen, dat geiht los mit Erbreken, Dörfall, Krämp, denn kaamt Wahnvörstellungen, Krinkloopkollaps un Atemlähmung. Keen schöne Dood. Aver de bi't Militär ja ok nich.


25.4.2021


na baven