Anke Nissen
Toxisch Planten

Vele Planten üm uns rüm köönt toxisch wirken. Se wasst in de frie Natur, se wasst aver ok in uns Goorns un Parks.
De mehrsten Nachtschattengewächse as Bispill sünd giftig.
"Giftig" bedüüdt, dat na Upnahme vun — mehrst — grote Mengen vun en Plant Störungen bi den Minschen orrer de Deerten upkamen köönt.

Ganz bestimmt is dat goot, wenn wi en beten wat weet över giftige Planten. Wi harrn as Bispill johrelang den giftigen Eisenhoot in'n Goorn. Ik heff nix wüsst vun sien Giftigkeit. Dormals weern uns Kinner noch lütt. Se spelen vun morgens bet avends in'n Goorn un vele vun ehre Frünnen un Fründinnen spelen mit.

Up de anner Siet so denk ik, gifft dat wohl keen Goorn, in den keen toxisch Planten wasst. Denn anners wörr dor keen Krokus un keen Narzisse wassen dörven, ok keen Maiglöckchen, Aronstab, Lilie, Trollbloom, Alpenveilchen, Immergröön orrer Goldregen. Wi dörven up unsen Balkon orrer de Terrass keen Planten stahn hebben as Eiben, Christrosen, Küchenschelle, Fingerhoot, Efeu, Stechapfel orrer Salomonsiegel. Allens is giftig, oft sogoor bannig giftig.

Ik heff nu mal en beten över toxisch Planten upschreven. Natürlich nich över alle, blots över de, de mi al mal begegent sünd, denn — as ik al baven seggt heff — ganz bestimmt is dat goot, wenn wi en beten wat weet över giftige Planten. De Planten stell ik hier in en lütte Reeg vör, jümmers twee opmaal.

Bittersöte Nachtschatten

Solanum dulcamara, en ole Heilplant gegen Pien, hüüt noch in de Homöopathie begäng.

• Gift: Solanin un annere Gifte

Foto Anke Nissen

De smucke Kletterplant, de in ganz Eurasien vörkümmt, is in all ehr Delen vull mit ünnerscheedlich Gifte. In Stengel, Bläder un in de schönen roden Beeren is vör allen dat Gift Solanin, an'n mehrsten dorvun in de unriepen Samen, de in de Beeren stickt. Kinner sünd jümmers in Versöken, de Beeren to probeern. 8 bet 10 Beeren köönt en Kind al orig vergiften. Spien, Buukpien, Huututslag un — bi starke Vergiftung — Verklaamen vun de Leden un Atemverklaamen sünd de Symptome. Ok för de mehrsten Deerten is de Plant giftig.

Alraune

Alraune, Mandragora officinalis, ok Atropa mandragora, Mandragora circaea

• Gift: Atropin un Hyoscyamin, Scopolamin

De Alraune-Wörtel gellt as magisch Töverwörtel in de Magie, bi't Tövern, in Märken bi't Mystische — wohrschienlich wieldat ehr Wöttel en Minschen liek sehn kann.

De Alraun is stark giftig! Drei Inhaltsstoffe vun de Alraune köönt to'n Dood führen. De Alkaloide Atropin un Hyoscyamin erreegt dat zentrale Nervensystem, se maakt munter un se senkt de Hemmschwell. De dritte Inhaltstoff is Scopolamin. Dat Wirken vun Scopolamin is veel langsamer. De Minsch kriggt dor Halluzinationen vun. Dörch Scopolamin kümmt dat to en zentrale Lähmung, de in'n "Deep-Slaap" endt. Wenn de Minsch to veel dorvun to sik nimmt, sinkt de Körpertemperatur. Dat kümmt to Verklaamen vun dat Atemsystem un de föhrt denn to 'n Dood.