De Sünnschienkieker in'n Oornmaand präsenteert:

De Nettelkönig (Zaunkönig)
...Casanova un Mustervadder för Halvstarke


Nettelkönig oder Zaunkönig (Troglodytes troglodytes)
Familje: Singvagels

Al 'ne Wiel sitt ik op de Bank hier in'n Park un dröm vör mi hen.Muus? Du nöömst mi Muus? -- Dat's je woll en Utverschaamtheit! De Sünn schient so`n beten dörch de Bööm. Man wat ruschelt denn dor in de Bläder? Wat is denn dat? — 'ne Muus? —


Bild Robert Lorch/Wikimedia Commons

 

Nee, dat is ja en lütten, brunen Vagel, un de kotte Steert steiht hooch in de Luft! He hüppt un piept luut un lustig hen un her, findt dor un da en lütten Käver, 'ne lütt Mier oder ok 'n lütt Spinn to'n Freten.
Nu is dat kloor, dat is en Nettelkönig, de hier middenmang de Buschen un Bööm rümkruupt.
Un wat he luut schreet: König bün ik! König bün ik!
Dor mutt ik Se doch 'n beten vun den brunen Hüpper vertellen. De Vagels sünd ja nich all egaal, nee. Dat gifft so'ne un so'ne, ok bi de Vagels. Also denn man los!
Un de Nettelkönig is wat apartig.

9,5 cm lütt, mit Steert
Gewicht: 9 Gramm
2 x in't Johr 5 — 8 rootpunkte Eier
Bruut: 14 — 16 Daag
Flügge: woll na 18 Daag
Mann un Fru sehn egaal ut.

Den Steert dregen he un se meist stief in de Hööchte.

De Nettelkönig is 'n groten Bumeister. He kann goor nich noog kriegen von't Nestbuun.

Ünner dichte Doornbuschen un Stegen, in Ellernstumpen un siede Twiegen buut de Keerl sien för em alleen veel to grootes Kugelnest. Aver nich een, nee: glieks 'ne ganze Masse dorvon buut he in sien Königriek, dat meist nich grötter is as twee Schrebergoorns. He schreet un stried't aver üm sein Riek wahrraftig as 'n König. He bruukt jümmer veel Natt un Modder, Buschen un Bläder to'n Leven. Sünst find't he woll nich noog to'n Freten.

Wenn in't Fröjohr de Vagelwiewer in sien Reveer rümflegen, wiest he jem de scheunen Nesten un se kieken sik mit grote Ogen de ganze Herrlichkeit an, picken hier un räsoneern dor, smieten woll ok maal'n seuten Blick to den düchtigen Keerl hen; un een, de den Oolen woll ok lieden mag, täuvt, bit he ehr endlich dat beste Nest wiest. Denn sluppt se achter den Oolen rin un makt dor maal Proovsitten. Wenn ehr dat an'n Enn gefallt, sünd de beiden verspraken.
Hm. Is dat nu dat ultimative Nest? Dat vun den vörvörigen Macker weer villicht doch...?

Jo, so licht geiht dat. Nu warrt dat Nest inricht't mit Feddern, Moos un lütt Wotteln un so'n Tüügs.

Wenn de lütt Fru denn so richtig in Leev de Flünken hangen lett un em so nüdelig ankiekt, denn is dat so wiet, denn is Hochtiet.

Se leggt denn bald 4 -8 rootpunkte Eier, op de se 14 - 16 Daag bröödt. Na 15 - 18 Daag sünd de Lütten flügge un Mudder fangt bald wedder an to bröden.
Wenn Mudder graad bi'n Bröden is, fangt Vadder oftins al wedder 'n nieges Techtelmechtel an. He föhrt de Ollsch stolt sien Nesten vör un — schwupp is sien Hart wedder in'ne Büx, un he hett noch'ne Fru! Mann, is he stolt! Wat hett he doch för'n Slag bi de Wiewer!
De arme Mudder mutt nu alleen kloorkamen mit de Göörn, bit de flegen köönt.

lütt Nettelprinzessin orr -prinz -- hett noch gor keen Steert to'n Na-baben-Hollen!soooo lütt!

 

 

 

 

 

 


Muddern alleen mit de Görenbande.! Bild Sonja Kübelbeck/Wikimedia Commons

Aver Mudder söökt sik denn meist ok'n niegen Mann. Villicht is de beter. Is he aver nich! Wat schall een dor maken? — Nix!

püh! Ungetrü Lumpenkierl!

 

 

 

 

 

 

 

 


Sooo veel Hunger...! Bild Sonja Kübelbeck/Wikimedia Commons

Aver nu sünd de Göörn ja groot. De köönt flegen! — —

Wat is denn nu? Wat makt de ool Vadder nu wedder hier? Op eenmaal is he wedder to Stell.
Siene Göörn! Siene leven Göörn! He mutt se doch schütten! De oole Kloogschieter!
Nu kummst an! Lang noog heff ik op di täuvt!
Nu is he 'n ganzen Dag bi de Lütten un bald kümmt ok noch de neegste Bruut dorto, villicht sogoor de von de anner Fru ok? Dat is ja 'n ganzen Kinnergoorn! Makt nix, Vadder hett'n groot Hart un veele Hüüs. Jeedeen Nacht bringt he sien Kinner in sien Kugelnesten as in Hotel ünner. Dor is dat warm un seker. Un he passt bannig op. Wenn een kümmt, denn makt he Larm, richtig Larm!

Wüllt ji waaaat???!!!

So behööt he de Lütten, un dat is so sien Levensglück. He freit sik as dull, wenn dat recht veel Kinner sünd. Un se blieven geern bi em bi.
Doch dat is noch nich noog. In'n Winter markt een eerst, to wat so'n groot Nest goot is. Denn krupen de Nettelkönigen altohoop dor in ünner. Dor kuscheln se een bi'nannern. So'n lütt Leven kann licht verfreren. Denn de lütt Vagels blieven dat ganze Johr bi uns un se singen ok dat ganze Johr, ok de Fruenslüüt.

Wenn Se maal in Snee 'n lütt Muus lopen sehn, denn kieken Se nau hen, villicht is dat ja en Nettelkönig.
Veel von de lütt Vagels verfreren aver doch, wenn de Frost scharp is.
So warm kann keeneen Nest ween, de Frost geiht denn doch dörch un dörch.

To'n Glück gifft dat noog Nettelkönigen, aver wi wüllt oppassen, dat se in uns Goorn ok dichte Buschen, Bläder un Ünnerholt finnen. Denn blieven se bi uns un dat is doch scheun, nich?

Höörn Se em? König bün ik! König bün ik!

 


Bild Robert Lorch/Wikimedia Commons

Tschüß seggt Se
Ehr Sünnschienkieker.

(P.S. Un laat Se den Steert nich hangen!
Nich vergeten!)


Gesang vun'n Nettelkönig:
home.pfaffenhofen.de/lbv/zaun.mp3
   


na baven